Primé carta para ca Corintios

7 Yanna maʼ chiguicabeʼ ni gunabadiidxatu naa lu carta ni bicaatu que, jma galán guni hombre cadi cana’* gunaa. 2 Peru cumu nabé runi cometer binni pecadu sexual la?* jma galán gapa cada hombre xheelaʼ, ne zaqueca gapa cada gunaa xheelaʼ. 3 Naquiiñeʼ gudii hombre ni caquiiñeʼ* xheelaʼ, ne zaqueca naquiiñeʼ guni gunaa né xheelaʼ. 4 Ti gunaa ni maʼ bichaganáʼ la? maʼ cadi laa diʼ runi mandar cuerpu stiʼ, sínuque xheelaʼ. Zaqueca ti hombre ni maʼ bichaganáʼ, maʼ cadi laa diʼ runi mandar cuerpu stiʼ, sínuque maʼ xheelaʼ. 5 Cadi guiniʼtu qué zápatu relación sexual né xheelatu, peru pa maʼ guyuutu de acuerdu qué zúnitu ni ti tiempu para guni orartu la? zaa laguni ni, peru despué lachuu juntu sti biaje. Ti cadi guni tentar Binidxabaʼ laatu, purtiʼ nagana gucueezatu laatu. 6 Cayabeʼ laatu zanda gúnitu zacá, peru cadi cayuneʼ mandar laatu gúnitu ni. 7 Ñuuladxeʼ ñaca guiráʼ hombre casi naa. Peru nannaʼ gadxé gadxé gracia rudii Dios cada tobi: caadxi de ti modo ne xcaadxi de sti modo.

8 Yanna, ndiʼ nga cayabeʼ ca ni caʼruʼ guichaganáʼ ne ca viuda: jma galán zaa nuucaʼ casi nuaaʼ. 9 Peru pa qué ganda gucueezacabe laacabe la? jma galán guichaganácabe pa qué ganda gucueezacabe ca deseu stícabe.

10 Yanna, ndiʼ nga ni cayuneʼ mandar ca ni maʼ bichaganáʼ —cadi naa, sínuque Señor—, cadi gusaana gunaa xheelaʼ. 11 Peru pa gusaana ti gunaa xheelaʼ la? naquiiñeʼ guiaana sin guichaganáʼ, o pa coʼ la? guibiguetané xheelaʼ. Ne hombre ni maʼ bichaganáʼ la? cadi gusaana xheelaʼ.

12 Yanna chitidxeʼ ndiʼ restu —naa, cadi Señor diʼ—, pa qué runi cré xheelaʼ ti hermanu Señor la?* cadi gusaana xheelaʼ pa naʼ xheelaʼ cuezané laa. 13 Ne pa qué runi cré xheelaʼ ti hermana Señor la? cadi gusaana xheelaʼ pa naʼ xheelaʼ cuezané laa. 14 Purtiʼ pa qué runi cré ti hombre, peru xheelaʼ runi cré la? ziuu ndaayaʼ* pur xheelaʼ. Zaqueca gunaa ni qué runi cré, laaca ziuu ndaayaʼ* pur xheelaʼ. Pa qué ñaca ni zacá la? qué ñuu ca xiiñicabe ndaayaʼ,* peru yanna maʼ ziuucaʼ ndaayaʼ.* 15 Peru pa ná ni qué runi cré ca cheʼ la?* zaa cheʼ. Pa gaca ni zacá la? qué gapa diʼ hermanu o hermana ca obligación guiaanané xheelaʼ ni qué runi cré, purtiʼ maʼ guniʼné Dios laatu para gatadxí ladxidoʼto.* 16 Lii gunaa, ¿ximodo nánnaluʼ pa zulaluʼ o pa qué zulaluʼ xheelaluʼ yaʼ? Ne lii hombre, ¿ximodo nánnaluʼ pa zulaluʼ o pa qué zulaluʼ xheelaluʼ yaʼ?

17 Modo nuutu dxi guniʼné Dios laatu, zacá nga naquiiñeʼ guiaanatu. Purtiʼ nga nga ni bidii Jehová* cada tobi de laatu. Ne ngaca nga ni rabeʼ guiráʼ ca xpinni Cristu.* 18 Pa maʼ guca circuncidar* ti hombre dxi guniʼné Dios laa la? guiaana zacá. Ne pa caʼruʼ gaca circuncidar ti hombre dxi guniʼné Dios laa la? cadi gaca circuncidar. 19 Gastiʼ naca pa guca circuncidar tuuxa o pa coʼ. Ni jma risaca nga gúnibe ni ná ca mandamientu stiʼ Dios. 20 Cada tobi guiaana modo nuu dxi guniʼné Dios laa. 21 ¿Ñee nácaluʼ esclavu dxi guniʼné Dios lii la? Cadi chuʼluʼ xizaa. Peru pa ganda guidxélaluʼ modo gácaluʼ libre la? biʼniʼ ni. 22 Purtiʼ tutiica ni naca esclavu stiʼ Señor dxi guniʼné Dios laa la? maʼ libre laa ne maʼ stiʼ Señor laa. Ne ni naca libre dxi guniʼné Dios laa la? maʼ naca esclavu stiʼ Cristu. 23 Purtiʼ gudíxecabe ti preciu pur laatu; lagusaana de gácatu esclavu stiʼ binni. 24 Hermanu caʼ, modo nuutu dxi guniʼné Dios laatu la? zacá laguiaana nezalube.

25 Qué ñabi diʼ Señor naa xi gabeʼ ca ni caʼruʼ guichaganáʼ,* peru chiguinieeʼ xi riníʼ iqueʼ purtiʼ biá Señor naa,* ne zanda guni cretu ni chiguinieeʼ riʼ. 26 Naa rabeʼ jma galán guiaana hombre modo nuu, purtiʼ nagana modo nabani binni yanna. 27 Pa nácaluʼ ti hombre ni napa xheelaʼ la? cadi guyúbiluʼ modo guixéleluʼ de laa. Peru pa nácaluʼ ti hombre ni caʼruʼ gapa xheelaʼ la? cadi guyúbiluʼ xheelaluʼ. 28 Peru pa guichaganaluʼ, cadi cayuni pecarluʼ. Ne binni ni caʼruʼ guichaganáʼ* cadi cayuni pecar pa guichaganáʼ. Peru ca ni guichaganáʼ zápacaʼ problema lu xquendanabánicaʼ.* Ne nuaaʼ gulaʼyaʼ laatu de guiráʼ nga.

29 Yanna, hermanu caʼ, cayabeʼ laatu maʼ huaxiéʼ tiempu riaana. Nga runi, ca hombre ni napa xheelaʼ la? gúnicaʼ casi ora qué gápacaʼ xheelacaʼ 30 ne ca ni ruunaʼ, gúnicaʼ casi ca ni qué ruunaʼ; ca ni nuu nayecheʼ, gúnicaʼ casi ca ni qué riuu nayecheʼ; ca ni rizíʼ, gúnicaʼ casi ora qué gápacaʼ ca cosa ni guziʼcaʼ, 31 ne ca ni riquiiñeʼ ni nuu lu guidxilayú, gúnicaʼ casi ora qué riquiiñecaʼ ni nuu luni. Purtiʼ maʼ cuchaa guiráʼ cosa ni cayaca lu guidxilayú. 32 Ñuuladxeʼ nibánitu sin ñuutu xizaa. Hombre ni qué gapa xheelaʼ, riuu xizaa pur ca cosa stiʼ Señor purtiʼ racalaʼdxiʼ gusiecheʼ Señor. 33 Peru hombre ni maʼ bichaganáʼ, riuu xizaa pur ca cosa ni nuu lu guidxilayú purtiʼ racalaʼdxiʼ gusiecheʼ xheelaʼ, 34 ne ricá ique stale cosa. Zaqueca gunaa ni qué gapa xheelaʼ ne ca binnidxaapaʼ, riuucaʼ xizaa pur ca cosa stiʼ Señor ti gaca espíritu ne cuerpu sticaʼ nayá.* Peru ti gunaa ni maʼ bichaganáʼ, riuu xizaa pur ca cosa ni nuu lu guidxilayú purtiʼ racalaʼdxiʼ gusiecheʼ xheelaʼ. 35 Peru cayabeʼ ndiʼ laatu pur bien stitu. Cadi para gucueezaʼ laatu,* sínuque para gacaniaʼ laatu gúnitu ni jneza ne cadi gusaanatu de gúnitu xhiiñaʼ Señor sin guchiiñaʼ gastiʼ laatu.

36 Peru pa caníʼ ique tuuxa cadi jneza conducta stiʼ purtiʼ solteru laa ne maʼ cadi tan nahuiiniʼ la? ndiʼ nga ni naquiiñeʼ guni: guni ni racalaʼdxiʼ; cadi cuchee. Mejor guichaganáʼ. 37 Peru pa de ndaaniʼ ladxidóʼ tuuxa maʼ biʼniʼ decidir cadi guichaganáʼ, ne nanna zanda guni cumplir decisión stiʼ, purtiʼ para laa cadi caquiiñeʼ guichaganáʼ ne zanda gucueeza ca deseu stiʼ la? biaʼsi nga ni cá ique guni. 38 Nga runi jneza cayuni ni guichaganáʼ, peru ni qué guichaganáʼ la? jmaruʼ si jneza cayuni.

39 Ora maʼ bichaganáʼ ti gunaa la? qué zanda gapa sti hombre biaʼ dxi nabani xheelaʼ. Peru pa gatiʼ xheelabe la?* maʼ libre laabe para guichaganabe tu gápabe gana, peru gaca ni ti xpinni Señor. 40 Peru naa rabeʼ jma nayecheʼ ziuube pa guiaanabe stúbibe. Ne laaca nuaaʼ seguru napaʼ espíritu stiʼ Dios.