Hebreos

11 Fe nga chuʼnu seguru zaca cumplir ni cabézanu gaca, ne laani nga ti prueba ni rusihuinni* dxandíʼ ni runi crenu neca qué ridúʼyanu ni. 2 Pur laani nga gucuaa ca hombre ni bibani dxiqué testimonio.*

3 Pur fe randa ridúʼyanu gudixhe chaahuiʼ Dios guiráʼ xixé ni nuu guibáʼ* casi peʼ modo guníʼ gaca ni, ne biquiiñeʼ ca cosa ni qué randa ridúʼyanu para guni ca cosa ni zanda guidúʼyanu.

4 Pur fe nga bidii Abel ti sacrificiu Dios, tobi ni jma risaca que ni bidii Caín. Ne pur fe ca gucuaabe testimonio nácabe ti binni nachaʼhuiʼ,* purtiʼ guyuulaʼdxiʼ* Dios ca ofrenda stibe. Neca maʼ gútibe, dede yanna caniʼbe purtiʼ gúpabe fe.

5 Pur fe nga gucuaa Dios* Enoc para cadi guni sufrir ora gatiʼ, ne guirutiʼ qué nidxela laabe purtiʼ gucuaa Dios laabe. Purtiʼ ante guicaa Dios laabe la? gucuaabe testimonio riuulaʼdxiʼ Dios guiráʼ ni rúnibe. 6 Peru pa qué gápanu fe qué ziuulaʼdxiʼ Dios ni rúninu, purtiʼ binni guidxiña laabe naquiiñeʼ guni cré dxandíʼ nuube ne rudiibe premiu ca ni ruyubi laabe sin guiree gana.

7 Pur fe nga bisihuinni Noé ridxibi Dios ora gúdxibe laa xi chigaca neca guirutiʼ caʼruʼ guʼyaʼ ni ne bizáʼ ti arca para guilané familia stiʼ. Pur fe stibe biʼniʼ condenarbe guidxilayú, ne biiyaʼ Dios laabe casi ti binni nachaʼhuiʼ* pur fe stibe.

8 Pur fe nga bizuubaʼ Abrahán diidxaʼ dxi guniʼné Dios laa, biree de xquidxi ne zeʼ ti lugar ni chiguicaa casi herencia, neca qué ganna paraa zeʼ. 9 Pur fe nga guleza Abrahán casi extranjeru ndaaniʼ guidxi ra guníʼ Dios chigudii laa. Ne ndaaniʼ carpa* si nga gulézabe raqué ne zaqueca guleza Isaac ne Jacob, purtiʼ laaca guníʼ Dios zacaacabe guidxi que. 10 Purtiʼ cabézabe guicaabe guidxi ni napa base naguidxi, ti guidxi ni biʼniʼ diseñar ne ni bicuí Dios.

11 Pur fe nga bidii Dios poder Sara para ganda gacaxiiñiʼ neca maʼ huaniisi, purtiʼ nanna zanda guni cumplir Dios promesa ni biʼniné laa. 12 Nga runi, hombre ni ruluíʼ maʼ qué zanda gapa xiiñiʼ que la?* gupa stale xiiñiʼ cásica stale beleguí* ni nuu guibáʼ, ne guirutiʼ zanda ugabaʼ laacaʼ cásica qué zanda ugábacabe yuxi ríʼ guriá nisadóʼ.

13 Naguidxi guca fe stiʼ guirácabe dede dxi gúticabe, neca qué ñuuyacabe ñaca cumplir ca promesa ni biʼniné Dios laacabe. Peru casi ñaca biiyacabe ni de zitu ne biechenécabe ni, ne guníʼcabe cadi xquídxicabe ngue guidxi ra nabézacabe que, sínuque ti tiempu si ngue nabézacabe ndaaniʼ ni. 14 Purtiʼ ca ni guiníʼ zacá la? rusihuínnicaʼ cabézacaʼ chuʼcaʼ ti lugar ra gaca lídxipecaʼ. 15 Pa ñaca qué nusaana de niníʼ íquecabe lugar ra bireecabe la? nidxélacabe modo nibiguétacabe. 16 Peru gucuá íquecabe ugaandacabe ti lugar jma galán, ti lugar ni raca pertenecer guibáʼ. Nga runi qué rituí diʼ lú Dios pur laacabe nin ora guiníʼcabe laa nga Dios stícabe, purtiʼ maʼ biʼniʼ preparar ti guidxi para laacabe.

17 Pur fe nga gucalaʼdxiʼ Abrahán nudii Isaac casi ti ofrenda dxi bitiidiʼ Dios laa ti prueba —laabe nga hombre ni gucuaa ca promesa que de guidubi ladxidóʼ ne gucaláʼdxibe nudiibe tobi lucha xiiñibe casi ti ofrenda—, 18 neca gudxi Dios laabe: «De Isaac nga gueeda ca ni dxandíʼ xiiñiluʼ».* 19 Peru bíʼnibe zaqué purtiʼ biʼniʼ crebe zanda gusibani Dios xiiñibe,* ne zanda guininu casi ñaca guti xiiñibe ne bibani sti biaje para gucuaabe laa.*

20 Pur fe nga guluu Isaac ndaayaʼ Jacob ne Esaú, ne gudxi Isaac laacaʼ xi guiráʼ chigaca.

21 Pur fe nga guluu Jacob ndaayaʼ cada tobi de ca xiiñiʼ José ante gatiʼ, ne biʼniʼ adorar Jacob Dios laga naaze punta bastón stiʼ.

22 Pur fe nga guníʼ José dxi mayaca gatiʼ zaree ca xiiñiʼ Israel de Egipto ne bisiene xi guninécabe ca dxita ladi.

23 Pur fe nga bicaachiʼ bixhoze ne jñaa Moisés laa chonna beeu dxi gule, purtiʼ biiyacaʼ pabiáʼ galán laabe, ne qué nidxíbicaʼ orden bidii rey que. 24 Pur fe nga qué niná Moisés ñábicabe laa xiiñiʼ xiiñidxaapaʼ Faraón dxi maʼ huaniisi. 25 Gulibe gacanabe né ca xpinni Dios lugar de ñechenebe guiráʼ ni nucaa pecadu laabe ñúnibe, neca ti tiempu si,* 26 purtiʼ para laabe jma risaca gusituícabe lube casi Cristu que guicaabe guiráʼ xixé tesoro ni nuu Egipto, purtiʼ bicaa íquebe guicaabe premiu ni nuu para laabe. 27 Pur fe bireebe de Egipto sin nidxíbibe rey que neca cadxiichiné laabe, ne biʼniʼ huantarbe ca guendanagana gudíʼdibe sin nireebe gana, purtiʼ casi ñaca cayuuyabe Dios neca qué rihuinni. 28 Pur fe biʼniʼ celebrarbe Pascua* ne guxúbibe rini ra puertaʼ yoo que* para cadi guuti ángel stiʼ Dios ca baʼduʼ primé* stícabe.

29 Pur fe nga gudiʼdiʼ guidxi que ndaaniʼ nisadóʼ Xiñáʼ* casi ñaca nidíʼdicaʼ ra nabidxi. Peru ora gucalaʼdxiʼ ca egipciu que nidíʼdicaʼ la? gubi nisadóʼ que laacaʼ.

30 Pur fe nga bidii guidxi que vuelta muru stiʼ Jericó gadxe gubidxa ne biaba ni. 31 Pur fe nga qué ñati Rahab xa prostituta que ra gutiʼ ca ni qué niná nuzuubaʼ diidxaʼ, purtiʼ galán modo bidxaagalube ca hombre ni yeguuya modo nuu guidxi que.*

32 ¿Xiruʼ ndiʼ zanda gabeʼ laatu ya? Qué zudii tiempu naa para güeniaʼ laatu* de Gedeón, de Barac, de Sansón, de Jefté ne de David, de Samuel ne de xcaadxi profeta. 33 Pur fe nga biʼniʼ ganárcabe ca rey, bíʼnicabe ni jneza,* binadiágacabe de ca promesa ni biʼniʼ Dios, biseegucabe ruaa lión, 34 bisuíʼcabe guí naroʼbaʼ, bilácabe de ra ñáticabe né espada, ne ca ni nuu débil gúcacaʼ nadipaʼ, ne ora bedandá tiempu tíndecabe la? qué nidxíbicabe ne bicaalúcabe, ne guládxicabe ca ejércitu ni bicaalú xquídxicabe. 35 Biasa familia stiʼ caadxi gunaa de lade gueʼtuʼ, ne laaca guyuu caadxi hombre ni nabé naná modo guca castigarcaʼ peru qué ninacaʼ ñuu tu ñuni rescatar laacaʼ para ñácacaʼ libre, ne bíʼnicaʼ zacá ti ganda guiásacaʼ de lade gueʼtuʼ ne guibánicaʼ ti modo jma galán. 36 Ne guyuu xcaadxi biʼniʼ búrlacabe laacaʼ ne gudíñecabe né chicote, ne cadi ngasi, dede bindiibicabe laacaʼ né cadena ne biseguyoocabe laacaʼ. 37 Nuu tu bichácabe guié laa, nuu tu gudiʼdiʼ lu prueba, nuu tu bíʼnicabe laa chupa galaa né sierra, ne nuu tu biiticabe laa né espada, nuu tu guzá cheríʼ chericaʼ nacu guidiladi dendxuʼ ne guidiladi chiva, ne nuu tu gudiʼdiʼ lu guendapobre, ne nuu tu gudiʼdiʼ lu guendanagana ne bininácabe laacaʼ, 38 ne qué ñuni merecer binni guidxilayú ñuucabe ládecaʼ. Guzácabe lu desiertu ne lu ca dani, ne guyuucabe ndaaniʼ cueva ne ndaaniʼ túnel.*

39 Neca gucuaacabe ti testimonio galán pur fe stícabe, qué ñuuyacabe ra guca cumplir ca promesa stiʼ Dios, 40 purtiʼ gudixhe ique Dios gudii laanu xiixa jma galán, nga runi zanda gácacabe perfectu pur laanu.