Cadi gusaana de gaca xhamíguluʼ Jehová

1, 2. ¿Paraa zanda guidxélanu ti lugar ra guilanu tiempu riʼ?

BIXUIʼLÚ zizaluʼ lu calle ne málasi bicahui guibáʼ. Bizulú caree xpiaaniʼ rayu, reciu caxidxi ca ni ne bizulú cayaba dxacha nisaguié. Ngue runi, nagueendaca biyúbiluʼ paraa zanda guilaluʼ. ¡Nanna pabiáʼ biécheluʼ ora bidxélaluʼ ti lugar ra zanda guilaluʼ yaʼ!

² Zacagá nabáninu ca dxi riʼ. Zeʼ dxi jma feu modo nabani binni. Zándaca guinabadiidxaluʼ: «¿Paraa guidxelaʼ ti lugar ra zanda guilaʼyaʼ?». Sicaríʼ guníʼ ti hombre bicaa Biblia: «Naa zabeʼ Jehová: “Lii nga ti lugar ra zanda guilaʼyaʼ, ti lugar nadipaʼ para naa, Dios stinneʼ ni runeʼ cré de guidubi ladxiduáʼ”» (Salmo 91:2). Zanda gacané Jehová laanu né ca guendanagana ni nápanu ne guizáʼ sicarú esperanza ni cudiibe laanu lu futuro.

 3. ¿Xi caquiiñeʼ gúninu para gacané Jehová laanu?

³ ¿Ximodo rapa Jehová laanu? Zanda gacanebe laanu gudxíʼlunu intiica guendanagana guidxaagalunu. Ne laaca jma nadípabe que tutiica binni ni gacalaʼdxiʼ guniná laanu. Ne pa guizaacanu xiixa cosa malu yanna la? ganna dxíchinu zuni chaahuiʼ Jehová ni despué. Biblia cayabi laanu cadi naquiiñeʼ guixélenu de Dios ni nadxii laanu (Judas 21). Caquiiñeʼ gaca xhamígunu Jehová para ganda gacanebe laanu gudxíʼlunu ca guendanagana ni nápanu. Peru ¿ximodo zanda gaca xhamígunu laabe yaʼ?

4, 5. ¿Ximodo maʼ bisihuinni Jehová nadxii laanu?

⁴ Para cadi gusaana de gaca xhamígunu Dios, caquiiñeʼ gánnanu pabiáʼ nadxiibe laanu. Guníʼ ique guiráʼ cosa ni maʼ biʼniʼ Jehová pur laanu. Maʼ bidiibe laanu Guidxilayú riʼ, ti lugar sicarú ra nuu stale yagahuiiniʼ ne stale maniʼ guizáʼ galán. Laaca bidiibe laanu stale guendaró nanixe ne nisa para iquiiñenu. Ne lu Biblia maʼ bisiidiʼ Jehová laanu tu láʼ ne ximodo laa. Peru ra jma bisihuinni Dios nadxii laanu nga ra biseendaʼ Xiiñiʼ, Jesús, para gudii xpida pur laanu (Juan 3:16). Ra bidii Dios Xiiñiʼ, nápanu ti esperanza guizáʼ sicarú lu futuro.

⁵ Maʼ guluu Jehová ti Reinu mesiánicu guibáʼ. Maʼ cadi candaa, zabee reinu riʼ yuubaʼ ni runiná laanu ne zúnini Guidxilayú riʼ ti paraísu, ra zabáninu para siempre, zabáninu nayecheʼ ne maʼ qué ziuu guendaridinde (Salmo 37:29). Laaca maʼ bisihuinni Jehová nadxii laanu purtiʼ rusiidiʼ laanu ximodo guibáninu jma jneza. Ne laaca cayábibe laanu guni orarnu laabe ne siempre nuube listu para gucaadiágabe laanu. Casi maʼ bidúʼyanu, dxandíʼ peʼ nga nadxii Jehová de guiranu.

 6. Ra gánnaluʼ pabiáʼ nadxii Jehová lii ¿xi naquiiñeʼ gúniluʼ?

⁶ ¿Ximodo runi sentirluʼ ra gánnaluʼ guiráʼ cosa ni maʼ biʼniʼ Jehová pur lii ne pabiáʼ nadxiibe lii yaʼ? ¿Cadi dxandíʼ rucaani lii gudiiluʼ xquixe peʼ laabe la? Dxandíʼ pue. Triste guininu ni, tiempu riʼ nuu stale binni qué rudii xquixe peʼ Dios. Zacaca guca ni ca dxi bibani Jesús lu Guidxilayú. Ti biaje, bisiándabe chii hombre napa lepra, peru tobi si bidii xquixe peʼ laabe (Lucas 17:12-17). Racaláʼdxinu gácanu casi hombre riʼ ne siempre gusihuínninu rudiʼnu xquixe peʼ Jehová pur guiráʼ ni huayuni pur laanu.

 7. ¿Ximodo naquiiñeʼ gannaxhiinu Jehová?

⁷ Laaca naquiiñeʼ gannaxhiinu Jehová. Gudxi Jesús ca discípulo stiʼ naquiiñeʼ gannaxhiicaʼ Jehová de guidubi ladxidoʼcaʼ, xhiálmacaʼ ne guidubi xquendabiaanicaʼ (biindaʼ Mateo 22:37). ¿Xi riníʼ nga yaʼ?

8, 9. ¿Ximodo rusihuínninu nadxiinu Jehová?

⁸ Cadi naquiiñeʼ si guininu nadxiinu Jehová. Pa dxandíʼ nadxiinu Jehová de guidubi ladxidoʼno, xhiálmanu ne xquendabiaaninu la? zusihuínninu ni lú ca ni gúninu (Mateo 7:16-20). Guizáʼ nayaʼniʼ modo rusiidiʼ Biblia laanu, pa nadxiinu Dios zúninu ni ná ca mandamientu stiʼ. ¿Ñee nagana ni la? Coʼ, purtiʼ cadi nagana chinándanu ca mandamientu stiʼ Jehová (biindaʼ 1 Juan 5:3).

⁹ Ora ruzúʼbanu stiidxaʼ Jehová, ribáninu nayecheʼ ne ránnanu xi pur nabáninu (Isaías 48:17, 18). Peru ¿xi zanda gacané laanu cadi gusaana de gaca xhamígunu Dios yaʼ? Guidúʼyanu.

10. ¿Xiñee cadi naquiiñeʼ gusaana de guiziidiluʼ de Jehová?

¹⁰ ¿Ximodo beeda gaca xhamíguluʼ Jehová? Cadi dxandíʼ ra bizulú biʼniʼ estudiarluʼ Biblia binibiáʼ chaahuiluʼ Jehová ne guca xhamíguluʼ laabe la? Zeeda gaca amistad ca casi bele. Para cadi guizuíʼ bele ca la? caquiiñeʼ cuʼluʼ jma yaga luni. Laanu laaca caquiiñeʼ guizíʼdirunu de Jehová para cadi gusaana de gaca xhamígunu laa (Proverbios 2:1-5).

11. ¿Xi zabeenduluʼ ra jma guiziidiluʼ de lu Biblia?

¹¹ Ra jma ziyuni estudiarluʼ Biblia, zaziidiluʼ stale cosa ni zindá ndaaniʼ ladxidoʼloʼ. Biiyaʼ ximodo biʼniʼ sentir chupa discípulo stiʼ Jesús ora bisiénebe laacaʼ xi raca significar caadxi profecía. Laacaʼ guniʼcaʼ: «¿Ñee cadi dxandíʼ yendá ca stiidxabe ndaaniʼ ladxidoʼno ora zedaníʼnebe laanu neza, ne ora bisiene chaahuibe laanu Stiidxaʼ Dios la?» (Lucas 24:32).

12, 13. a) ¿Xi zanda guizaaca guendarannaxhii ni nápanu Dios? b) ¿Xi zanda gúninu para cadi guirá guendarannaxhii ni nápanu Jehová?

¹² Ni bisiidiʼ Jesús guiropaʼ discípulo que yendani ndaaniʼ ladxidoʼcaʼ. Zándaca laaca guizáʼ biécheluʼ ora bizulú biziidiluʼ de lu Biblia. Pur nga, gunda binibiaʼluʼ Jehová ne bizulú gunnaxhiiluʼ laa. Dxandíʼ peʼ qué zudiiluʼ lugar guirá guendarannaxhii nápaluʼ Jehová (Mateo 24:12).

¹³ Yanna ra maʼ nácaluʼ xhamigu Dios, caquiiñeʼ gúniluʼ stale stipa para cadi guixéleluʼ de laabe. Para nga la? cadi gusaana de guiziidiluʼ de Jehová ne de Jesús. Ne caquiiñeʼ guiníʼ íqueluʼ ni caziidiluʼ ne ximodo gúniluʼ ni lu xquendanabániluʼ (Juan 17:3). Ora maʼ cayuundaluʼ Biblia, guníʼ ique: «¿Xi cusiidiʼ ni naa de Jehová? ¿Xi razón napaʼ para gannaxhieeʼ laabe de guidubi ladxiduáʼ ne xhialmaʼ yaʼ?» (1 Timoteo 4:15).

14. ¿Ximodo racané oración ca laanu para jma gannaxhiinu Jehová?

¹⁴ Pa nápaluʼ ti xhamíguluʼ, cadi dxandíʼ rúniluʼ stipa pur guiníʼneluʼ laabe gatigá la? zacá jma zaca xhamígutu. Zacaca nga rizaaca né Jehová ora runi orarnu laabe gatigá, rannaxhiinu laabe jma (biindaʼ 1 Tesalonicenses 5:17). Ti regalu guizáʼ naroʼbaʼ nga guinínenu Bixhózenu ni nuu guibáʼ. Siempre gábinu laabe ni nuu ndaaniʼ ladxidoʼno (Salmo 62:8). Cadi guni orarnu de memoria ngueca ca ngueca, sínuque guininu ni dxandíʼ cayuni sentirnu. Pa cadi gusaana de guni estudiarnu Biblia ne guni orarnu de guidubi ladxidoʼno la? jma zannaxhiinu Jehová.

15, 16. ¿Xi riníʼ íqueluʼ de predicación?

¹⁵ Laaca caquiiñeʼ guinínenu binni de ni runi crenu para gácarunu xhamigu Jehová. Ti privilegiu guizáʼ naroʼbaʼ nga guinínenu binni de Jehová (Lucas 1:74). Naca ni ti dxiiñaʼ nabé risaca ni bidii Jesús guiráʼ ca ni dxandíʼ xpinni. Nga runi, guiranu naquiiñeʼ guni predicarnu ca noticia galán de Reinu stiʼ Dios. ¿Maʼ cayúniluʼ ni la? (Mateo 24:14; 28:19, 20).

¹⁶ Nabé bisisaca Pablo dxiiñaʼ de guni predicar, dede guníʼ naca ni ti «tesoro» (2 Corintios 4:7). Ni jma guisaca para lii nga guiníʼneluʼ xcaadxi binni de Jehová ne de ni naguixhe ique guni. Laani nga ti modo runi adorarnu Dios ne nabé rusisácabe stipa ni rúninu pur gúninu ni nabe (Hebreos 6:10). Ora runi predicarluʼ, racaneluʼ xcaadxi gaca xhamígucaʼ Dios ne laaca raca xhamíguluʼ laabe jma. Pa cadi gusaana de guni predicarluʼ, zanda guicaaluʼ guendanabani ni qué zaluxe ne zaqueca ca ni gucaadiaga lii (biindaʼ 1 Timoteo 4:16). ¿Ñee rábiluʼ nuu sti dxiiñaʼ ni jma zusiecheʼ lii la?

17. ¿Xiñee caquiiñeʼ guni predicarnu nagueendaca?

¹⁷ Naquiiñeʼ guni predicarnu né stale gana o nagueenda. Biblia ná: «Biʼniʼ predicar stiidxaʼ Dios, biʼniʼ ni nagueendaca» (2 Timoteo 4:2, nota). Caquiiñeʼ gucaadiaga binni ca noticia galán de Reinu stiʼ Dios. Ne Biblia cayabi laanu: «¡Maʼ gaxha nuu dxi roʼ stiʼ Jehová! ¡Maʼ gaxha nuuni ne nagueenda zeeda guidxíñani!». «¡Qué zandaa ni!» (Sofonías 1:14; Habacuc 2:3). Maʼ cadi candaa, zunitilú Jehová guidxilayú malu stiʼ Binidxabaʼ. Peru ante gaca nga la? caquiiñeʼ chitídxinu ni binni ne zacá quixhe íquecaʼ guni servircaʼ Jehová.

18. ¿Xiñee caquiiñeʼ gaca reunírnenu ca ni dxandíʼ xpinni Cristu para guni adorarnu Jehová?

¹⁸ Racalaʼdxiʼ Jehová gaca reunir ca ni dxandíʼ xpinni para guni adorarcaʼ laabe. Biblia ná: «Ne naquiiñeʼ gucáʼ íquenu gacanésaanu ti guiale de ndaaniʼ ladxidoʼno gannaxhiisaanu ne gúninu cosa galán, ne cadi gusaana de chuunu ca reunión stinu, casi runi ca ni maʼ biaa cadi cheʼ. Ni gúninu nga cúʼsaanu gana laanu, ne jmaruʼ si yanna ra cadúʼyanu jma maʼ gaxha nuu dxi stiʼ Dios» (Hebreos 10:24, 25). Caquiiñeʼ gúninu stale stipa para chuunu reunión. Racá, zanda cúʼsaanu gana laanu ne iguidxi fe stinu.

19. ¿Xi zacané laanu para gannaxhiinu ca hermanu ne ca hermana?

¹⁹ Lu ca reunión ca, zadxélaluʼ xhamíguluʼ. Ne zacanécabe lii gúniluʼ ni ná Jehová. Zunibiaʼluʼ stale clase hermanu ne hermana ni laaca cayuni stipa pur guni adorar Jehová. Peru naquiiñeʼ gannuʼ, laaca binni imperfectu laacabe ne ziuu biaje zucheecabe. Ora guizaaca nga, guyuu dispuestu guni perdonarluʼ laacabe (biindaʼ Colosenses 3:13). Siempre biiyaʼ ca cualidad galán napa ca hermanu ne ca hermana. Nga zacané lii para gannaxhiiluʼ laacabe ne jma gaca xhamíguluʼ Jehová.

20, 21. ¿Xii nga «guendanabani, ni dxandíʼ guendanabani»?

²⁰ Racalaʼdxiʼ Jehová guibani ca xhamigu galán. Biblia rusiidiʼ maʼ gadxé modo zabáninu despué.

²¹ Maʼ qué zabáninu 70 ne 80 iza si, sínuque zabáninu para siempre. Zápanu «guendanabani ni qué zaluxe» ndaaniʼ ti paraísu sicarú, ra maʼ qué zaca huaranu, ziuu paz ne zabáninu nayecheʼ. Nga nga ni ribee lá Biblia «guendanabani, ni dxandíʼ guendanabani». Maʼ biʼniʼ prometer Jehová zudii laanu guendanabani ca, peru caquiiñeʼ gúninu stale stipa para ugaandanu ni (1 Timoteo 6:12, 19).

22. a) ¿Ximodo zanda guicaanu «guendanabani, ni dxandíʼ guendanabani»? b) ¿Xiñee qué zanda guni ganarnu guendanabani ni qué zaluxe ca né stipa si stinu?

²² ¿Ximodo zanda guicaanu «guendanabani, ni dxandíʼ guendanabani» ca yaʼ? Caquiiñeʼ gúninu ni jneza ne gúninu stale cosa galán para binni (1 Timoteo 6:18). Nga riníʼ, caquiiñeʼ gúninu guiráʼ ni cazíʼdinu lu Biblia. Peru né stipa si stinu qué zanda ugaandanu guendanabani ni qué zaluxe ca. Pur nachaʼhuiʼ Jehová nga cudii regalu riʼ ca xpinni (Romanos 5:15). De guidubi ladxidóʼ Bixhózenu ni nuu guibáʼ racalaʼdxiʼ gudii ca xpinni regalu sicarú riʼ.

23. ¿Xiñee dede ca yanna naquiiñeʼ quixhe íqueluʼ gúniluʼ ni jneza?

²³ Guníʼ ique: «¿Ñee cayuneʼ adorar Dios modo riuulaʼdxiʼ la?». Pa gudiiluʼ cuenta caquiiñeʼ guchaaluʼ modo lii la? biʼniʼ ni nagueenda. Ora nápanu confianza Jehová ne rúninu stipa pur guzúʼbanu stiidxabe, reeda gácabe ti lugar ra zanda guilanu. Zapa Jehová ca xpinni ni qué rusaana laa lu ca últimu dxi stiʼ guidxilayú malu riʼ. Ne despué zudiibe laanu ti paraísu ra zabáninu para siempre, casi maʼ biʼniʼ prometerbe. Pa dede ca yanna quixhe íqueluʼ gúniluʼ ni jneza la? zanda guicaaluʼ guendanabani ni qué zaluxe.