Ñee nahuiinirúcabe para chuʼnísacabe la?

SICARÍʼ guníʼ Carlos,a de Filipinas: «Nabé nayecheʼ nuaaʼ yanna purtiʼ maʼ xpinni Jiobá xiiñedxaapaʼ, ne laaca nannaʼ nuube nayecheʼ». Sti hombre de Grecia bicaa ca diidxaʼ riʼ: «Naa ne xheelaʼ nabé nayecheʼ nuudu purtiʼ guyuunisa guionnaʼ xiiñidu dxi nahuiinirucaʼ. Yanna ziniisicabe ndaaniʼ xquidxi Dios ne nabé nayecheʼ nuucabe cayuni adorárcabe Jiobá».

Ca xpinni Cristu ni napa xiiñiʼ nápacaʼ razón para guiéchecaʼ ora chúʼnisa xiiñicaʼ. Peru nuu biaje neca riuucabe nayecheʼ, laaca riuucabe xizaa. Sicaríʼ guníʼ ti gunaa xpinni Cristu: «Guyuaaʼ nayecheʼ ne laaca guyuaaʼ xizaa, purtiʼ nannaʼ maʼ naquiiñeʼ guni xiiñeʼ ni canabaʼ Jiobá laa ne zabídxibe cuenta laa pur cani guni».

Ni naquiiñeʼ quixhe ique ti hombrehuiiniʼ ne ti dxaapahuiiniʼ nga chuʼnísacaʼ. Peru zándaca nuu xpinni Cristu guiníʼ: «Nannaʼ maʼ caniisi hombrehuiiniʼ stinneʼ lu stiidxaʼ Dios, peru ñee zanda guzuhuaabe dxiichiʼ ora chuʼ tu uquiinde laabe gatanebe tuuxa ante guichaganabe ne zacá chuʼbe nayá nezalú Jiobá la?». Xcaadxi zándaca guinabadiidxacaʼ: «Ñee qué zusaana xiiñeʼ de guni ni na Dios né stale gana la? o jma zacá íquebe gápabe bidxichi». Para cani riníʼ ique zacá, xi conseju zeeda lu Biblia zacané laacabe para gúʼyacabe pa maʼ nuu xiiñicabe listu para chúʼnisa yaʼ.

Naquiiñeʼ gácacabe discípulo stiʼ Cristu

Lugar de quixhe Stiidxaʼ Dios panda iza nga naquiiñeʼ gapa tuuxa para chúʼnisa la? laani ruzeeteni xi naquiiñeʼ guni cani racalaʼdxiʼ chúʼnisa. Jesús biʼniʼ mandar ca discípulo stiʼ: «Lachiusiidi irá xixé binni sa nanda naa, ne lacuu nisa laaca» (Mat. 28:19). Nga runi, cani zanda si chúʼnisa nga cani maʼ naca discípulo stiʼ Cristu.

Tuu nga ti discípulo yaʼ. «Qué riníʼ si diidxaʼ ca de tuuxa ni runi cré, sínuque caniʼni de tuuxa ni maʼ zinanda guiráʼ cani bisiidiʼ Cristu.» (Perspicacia para comprender las Escrituras.) Ñee dxandíʼ nga zanda gaca tuuxa discípulo stiʼ Cristu neca nahuiiniruʼ la? Ti gunaa xpinni Cristu ni maʼ ziné cuarenta iza de naca misionera Latinoamérica guníʼ sicaríʼ: «[Naa ne guiropaʼ bendaʼ] neca nahuiinirudu maʼ bidiʼdu cuenta dxandíʼ racaláʼdxidu gúnidu ni na Jiobá ne rápadu gana guibánidu ndaaniʼ ti paraísu. Cumu bidiʼdu laadu Jiobá la? gucaneni laadu chuʼdu naguidxi ora guyuu ni biquiinde laadu dxi jma maʼ ziniisidu. Qué raca arrepentirdu de guyuunísadu ne bidiʼdu laadu Dios dxi nahuiinidu».

Laatu cani napa xiiñiʼ, ximodo zanda gánnatu pa maʼ dxandíʼ naca xiiñitu ti discípulo stiʼ Cristu ya. Pur modo nabánicabe. Nga runi na Biblia sicaríʼ: «Pur cani runi ti hombrehuiiniʼ rusihuinni pa nayá ne pa runi ni jneza» (Pro. 20:11). Nga runi, naquiiñeʼ gúʼyatu pa maʼ cayuni xiiñitu ca cosa ni rusihuinni dxandíʼ rápacabe gana gácacabe ti discípulo stiʼ Cristu (1 Tim. 4:15).

Cani rusihuinni dxandíʼ maʼ nácabe ti discípulo

Ñee ruzuubaʼ xiiñiluʼ diidxaʼ la? (Col. 3:20.) Ñee rúnibe guiráʼ ni raʼbuʼ laabe gúnibe ndaaniʼ lídxiluʼ la? Biblia na maʼ ruzuubaʼ Jesús stiidxaʼ bixhoze ne jñaa dxi napa 12 iza (Luc. 2:51). Dxandíʼ, cadi guiráʼ diʼ xiiñiʼ binni runi guiráʼ ni guni mandar bixhoze ne jñaa laa. Peru naquiiñeʼ chinanda guiráʼ xpinni Cristu ejemplu stiʼ Jesús ne gúnicaʼ «casi biʼni Cristu». Nga runi, ti hombrehuiiniʼ ni chichuunisa naquiiñeʼ gunibiáʼcabe laa lade ca binni ridagulisaa casi tuuxa ni ruzuubaʼ diidxaʼ (1 Ped. 2:21).

Laaca naquiiñeʼ guinabadiidxaluʼ: Ñee qué rusaana xiiñiluʼ de guyubi «primeru reinu stiʼ Dios» ora rucheeche diidxaʼ né stale gana la? (Mat. 6:33, NM.) O naquiiñepeʼ gabi binni laabe napa xidé chigucheechebe diidxaʼ ne guiníʼnebe binni de yoo pur yoo. Ñee rúnibe guiráʼ ni naquiiñeʼ guni tuuxa ni maʼ rucheeche diidxaʼ la? Ñee rizaaláʼdxibe guibiguétabe para chigánnabe ca binni ni rusihuinni riuulaʼdxiʼ guiziidiʼ de Dios la? Ñee rábibe cani rinebe scuela ne ca maestru stibe testigu stiʼ Jiobá laabe la?

Ñee ruuyaʼ xiiñiluʼ naquiiñeʼ cheʼ ca guendaridagulisaa la? (Sal. 122:1.) Ñee riuuláʼdxibe guicábibe lu guendaridagulisaa ra riuundaʼ revista Torre stiʼ ni rapa, lu Guendaridagulisaa ra Riuundaʼ Biblia ne lu Scuela stiʼ cani Rucheeche Diidxaʼ la? (Heb. 10:24, 25.)

Ñee rúnibe stipa pur chuʼbe nayá nezalú Dios ora qué ridxaagabe ca binni ni zándaca guxheleʼ laabe de Dios ora maʼ nuube ra scuela ne xcaadxi lugar la? (Pro. 13:20.) Xi clase saa, película, programa ni ridiʼdiʼ lu televisión, videojuego ne yaza stiʼ Internet riuulaʼdxiʼ xiiñiluʼ guʼyaʼ. Ñee rusihuinni guiráʼ ni riniʼbe ne ni rúnibe racaláʼdxibe chinándabe ca conseju ni zeeda lu Biblia la?

Ñee runibiáʼ chaahuibe Stiidxaʼ Dios la? Ñee randa rusiénebe xiixa ni biziidibe gueelaʼ runi adorartu Dios né binnilídxitu la? Ñee zanda gusiénebe ca cosa ni riziidiʼ binni primé de lu Biblia la? (Pro. 2:6-9.) Ñee riuuláʼdxibe gúʼndabe Stiidxaʼ Dios ne ca libru ne revista ribee mozo ni nuu xpiaaniʼ ne ni runi ni jneza la? (Mat. 24:45.) Ñee rinábabe tuuxa gusiene laabe xiixa versículo o xiixa ni cadi cayénebe lu Biblia la?

Ca guendarinabadiidxaʼ ni maʼ bizéʼtenu riʼ zacanécani lii gúʼyaluʼ pa maʼ ziniisi xiiñiluʼ lu stiidxaʼ Dios. Ora maʼ biiyaluʼ cani maʼ bizéʼtenu ca, zándaca gudiiluʼ cuenta cayaadxaruʼ para chúʼnisa xiiñiluʼ, purtiʼ caquiiñeruʼ gúnibe tobi de ca cosa ni maʼ bizéʼtenu ca. O zándaca gudiiluʼ cuenta maʼ nuu xiiñiluʼ listu para chúʼnisa, purtiʼ maʼ bidiibe laabe Jiobá ne rusihuínnibe pur modo nabánibe maʼ nácabe ti discípulo stiʼ Cristu.

Zanda gusisaca cani nahuiiniʼ Jiobá

Stale binni qué huasaana de guni ni na Jiobá dede dxi maʼ ziniisi o dede dxi jma nahuiiniʼ. Guiníʼ íquenu de ejemplu stiʼ José, Samuel, Josías ne Jesús (Gén. 37:2; 39:1-3; 1 Sam. 1:24-28; 2:18-20; 2 Cró. 34:1-3; Luc. 2:42-49). O laaca zanda guiníʼ íquenu de guidapaʼ xiiñidxaapaʼ Felipe, cani guca ni riguixhená ne nánnanu bisiidiʼ bixhózecabe laacabe de Dios dede dxi nahuiinicabe (Hech. 21:8, 9).

Ti xpinni Cristu de Grecia bisiene: «Guyuaanisaʼ dxi napaʼ 12 iza, ne qué raca arrepentir pur bineʼ ni. Maʼ ziniáʼ veinticuatro iza de guyuaanisaʼ ne maʼ ziniáʼ veintitres iza de nacaʼ precursor. Cumu nadxieeʼ Jiobá la? gucané nga naa para bidxieeluáʼ ca guendanagana gupa dxi jma maʼ ziniiseʼ. Dxandíʼ, jma maʼ nannaʼ de lu Biblia yanna que biaʼ gunnaʼ dxi napaʼ 12 iza, peru dede dxiqué maʼ nadxieeʼ Jiobá ne rapaʼ gana guneʼ ni nabe biaʼ dxi guibaneʼ. Rudieeʼ xquíxepeʼ laabe purtiʼ racanebe naa guneʼ ni nabe».

Biaʼ tiica iza napa tuuxa, pa rusihuínnibe lu xquendanabánibe maʼ nácabe ti xpinni Cristu la? maʼ zanda chuʼnísabe. Sicaríʼ bicaa Pablu: «Purti ndaani ladxidóʼ cabe runi cre cabe para ixá stonda cabe, ne ra iníʼ cabe ni nezalú binni la? zalá cabe» (Rom. 10:10). Ora chúʼnisa xiiñitu la? guidubi familia stitu zugaanda ti cosa nabé risaca. Nga runi, ¡cadi gudiitu lugar chuʼ xiixa gucueeza laatu ne gucueeza xiiñitu de guni sentir nayecheʼ ora chúʼnisa!

[Ni cá ñee yaza]

[Cuadru ni zeeda lu yaza 5]

Modo naquiiñeʼ gúʼyatu guendariuunisa

Nuu xpinni Cristu runi crecaʼ ora chúʼnisa xiiñicaʼ nabé zacaneni laacaʼ, peru laaca zanda guizaacacaʼ xiixa, cásica raca binni ora cuee licencia stiʼ para gusá carru. Peru, ñee dxandíʼ nga zanda guizaaca tuuxa xiixa desgracia ora chúʼnisa ne ora guni ni na Dios la? Biblia na coʼ. Proverbios 10:22 na: «Ndaayaʼ stiʼ Jiobá... nga nga ni runi binni ricu, ne qué rudiidibe yuubaʼ ne laani». Ne Pablu bicaa ca diidxaʼ riʼ ra nuu hombrehuiiniʼ ni láʼ Timoteu: «Dxandí ricu ca xpinni Cristu, pa guieche né ca biaʼ napa si caʼ» (1 Tim. 6:6).

Peru qué riníʼ diʼ nga qué iganna nga gúninu ni na Jiobá. Guiníʼ íquenu de Jeremías ni riguixhená. Laabe bidxaagalube stale guendanagana dxi bíʼnibe xhiiñaʼ Dios, peru ximodo biʼniʼ sentirbe yaʼ. Nabé biéchebe ora biʼniʼ adorarbe Dios, sicaríʼ guniʼbe: «Bisiecheʼ stiidxaluʼ naa ne bisiécheni ladxiduáʼ; purtiʼ ziniáʼ laluʼ, Jiobá, Dios stiʼ stale binni nanda guiibaʼ» (Jer. 15:16). Casi bizeeteʼ Jeremías, ora guni binni ni na Dios riuu nayecheʼ. Peru guidxilayú stiʼ Binidxabaʼ riʼ puru guendananá rudiini binni. Laatu, cani napa xiiñiʼ, dxiiñaʼ stitu nga gusiiditu laacabe gúʼyacabe gadxé ni ribeendú binni ora guni ni na Jiobá (Jer. 1:19).

[Cuadro ne dibuju/foto ni zeeda lu yaza 6]

Ñee naquiiñeʼ cueza xiiñeʼ xcaadxi para chúʼnisa la?

Nuu xpinni Cristu riníʼ qué zanda diʼ chúʼnisa xiiñiʼ neca maʼ zanda gúnini. Xi razón nápacabe para guiníʼcabe zacá yaʼ.

«Nabé ridxibeʼ chúʼnisa xiiñeʼ, purtiʼ pa gúnibe ti cosa malu zándaca cueecabe laabe de ndaaniʼ xquidxi Dios.» Peru, ñee jneza nga guiníʼ íquenu qué zabidxi Dios cuenta laabe purtiʼ si cabézabe xcaadxi para chúʼnisabe la? Salomón bicaa ca diidxaʼ riʼ para guiráʼ hombrehuiiniʼ ne dxaapahuiiniʼ: «Gunna pur guiráʼ ca [cosa ni gúniluʼ] zabidxi Dios ni dxandíʼ cuenta lii» (Ecl. 11:9). Pablu qué nuzeeteʼ diʼ de iza ora guníʼ ca diidxaʼ riʼ: «Cada tobi nu zabidxi Dios cuenta laanu» (Rom. 14:12).

Guiráʼ ca xpinni Jiobá, pa maʼ guyuunísacaʼ o pa caʼruʼ la? zabidxi Dios cuenta laacaʼ pur ni gúnicaʼ. Cadi guiaandaʼ laanu laabe zápabe laanu ne «qué zudii[be] lugar gueeda xiixa luguiá [nu] ni qué zanda gua [nu]» (1 Cor. 10:13). Pa uguʼnu xpiaaninu ne gucáʼnanu ni uquiinde laanu gúninu ni cadi jneza la? zacanebe laanu (1 Ped. 5:6-9). Ti gunaa xpinni Cristu guníʼ sicaríʼ: «Ca hombrehuiiniʼ ne ca dxaapahuiiniʼ ni maʼ guyuunisa jma nápacaʼ razón para guixélecaʼ de cosa malu. Hombrehuiiniʼ stinneʼ guyuunisa dxi napa 15 iza ne nabé gúpani laabe. Laabe gúdxibe naa sicaríʼ: “Nin qué liica ridiʼdiʼ ndaaniʼ iqueʼ gucheeniáʼ Jiobá”. Ora maʼ guyuunisa tuuxa nabé racaneni laa para guibani jneza».

Ñee bidiiluʼ ti ejemplu galán xiiñiluʼ ne maʼ bisiidiluʼ laabe guzuubabe stiidxaʼ Jiobá la? Pa zacá ni la? qué zucheenebe Dios ora maʼ guyuunísabe. Zacá ruzeeteʼ Proverbios 20:7 ni: «Ni runi ni jneza qué rucheené Dios. Nayecheʼ zaca ca xiiñibe ni gale despué».

«Ñuuladxeʼ niguixhe ique xiiñeʼ ñuni xcaadxi cosa lu xquendanabani.» Zándaca guiníʼ ique bixhózebe gúʼndabe ra scuela roʼ. Nécapeʼ jneza nga guʼndaʼ ca hombrehuiiniʼ ne ca dxaapahuiiniʼ ca ti ganda guidxélacaʼ xiixa dxiiñaʼ para gápacaʼ ni guibaninecaʼ la? cadi jneza diʼ gucaʼnu laacabe gúʼndacabe ndaaniʼ ca scuela roʼ ca para si guicá íquecabe gápacabe bidxichi lugar de niguʼnu gana laacabe gúnicabe ni na Dios. Cadi guiaandaʼ laanu ni guníʼ Jesús que, nuu stale cosa ni zanda guchiiñaʼ laacabe para cadi guiniisi stiidxaʼ Reinu ndaaniʼ ladxidóʼcabe: «Ne ni biaba lade guichi que la? ngue zeeda gaca casi tobi ni guna diaga stiidxa Dios peru jma cá ique ximodo ibani ndaani guidxilayú riʼ, ne rudii lugar quite bidxichi ique, ne irá nga ruuti stiidxa Dios ni nuu ndaani ladxidóʼ be que» (Mat. 13:22). Rihuinni dxíchica ora primeru quixhe ique binni gapa bidxichi la? zanda gucueeza ni laa de guni ni na Dios.

Pa bixhoze o jñaa binni gucueeza laa de chúʼnisa, neca gastiʼ razón ni risaca para gucueezacaʼ laabe de gúnibe ni la? zanda guninani xiiñicabe. Ti xpinni Cristu ni maʼ xadxí de naca binnigola guníʼ sicaríʼ: «Ora gucueeza tuuxa xiiñiʼ de chúʼnisa la? cucueezabe laa de guiniisi ndaaniʼ xquidxi Dios ne zabeebe gana laa». Ne ti binnigola ni riganna ca binni ridagulisaa guníʼ sicaríʼ: «Pa gucueeza tuuxa xiiñiʼ zanda gucaani laabe guníʼ íquebe qué risácabe o qué zanda ugaandabe cani naguixhe íquebe. Zándaca chebe lu guidxilayú riʼ para ugaandabe cani quixhe íquebe».

[Dibuju/foto]

Nuu tu rusihuinni maʼ discípulo laa dede nahuiiniʼ

[Dibuju/foto ni zeeda lu yaza 3]

Ruundacabe para ca guendaridagulisaa ne ricábicabe

[Dibuju/foto ni zeeda lu yaza 4]

Ruzuubacabe stiidxaʼ bixhózecabe ne jñaacabe

[Dibuju/foto ni zeeda lu yaza 4]

Rucheechecabe diidxaʼ

[Dibuju/foto ni zeeda lu yaza 4]

Runi orárcabe Jiobá

[Dibuju/foto ni zeeda lu yaza 6]

Ñee naquiiñepeʼ cheʼ xiiñitu scuela roʼ primeru la?