Cadi gusaana de gannaxhiinu Jehová ne ca hermanu stinu

 1. ¿Xi guiráʼ biziidiluʼ dxi bidiicabe estudiu lii?

¿ÑEE rietenaláʼdxiluʼ dxi bizulú biʼniʼ estudiarluʼ Biblia la? Zándaca nabé bidxagayaaluʼ ora gúnnaluʼ napa Dios lá. Ne zándaca guizáʼ gutadxí ladxidoʼloʼ ora gúnnaluʼ gastiʼ ti lugar ra cayaʼquiʼ ne ra cayacaná binni. Ne laaca guizáʼ biécheluʼ ora biziidiluʼ zuuyaluʼ sti biaje ca binni ni nadxiiluʼ ni maʼ guti ne zabánitu ndaaniʼ ti paraísu.

 2. Despué de maʼ biziidiluʼ caadxi cosa ni rusiidiʼ Biblia, ¿ximodo rusihuínniluʼ caniisiluʼ ndaaniʼ xquidxi Dios? (Efesios 5:1, 2).

² Ra jma maʼ ziziidiluʼ ni ná Stiidxaʼ Dios jma maʼ ziyannaxhiiluʼ Jehová. Ne bicaa guendarannaxhii ca lii gúniluʼ stipa gúniluʼ ni caziidiluʼ. Ne ra yenándaluʼ ca principiu ni zeeda lu Stiidxabe, jma galán ca decisión gucuaaluʼ. Bizulú bichaaluʼ modo riníʼ íqueluʼ ne bíʼniluʼ stipa gúniluʼ ca cosa ni rinabaʼ Dios lii para gusiécheluʼ laa. Cásica ti xcuidi rinanda ni runi bixhoze, lii laaca bizulú yenándaluʼ ejemplu stiʼ Bixhózeluʼ ni nuu guibáʼ (biindaʼ Efesios 5:1, 2).

 3. ¿Xi zándaca guiníʼ íquenu?

³ Zanda guiníʼ íquenu: «¿Ñee jma nadxieeʼ Jehová yanna qué dxi guyuaanisaʼ la? Pur modo riníʼ iqueʼ ne pur ni runeʼ, ¿ñee rusihuinneʼ zinandaʼ ejemplu stiʼ Jehová ra gannaxhieeʼ ca hermanu la?». Pa maʼ bizulú bianda guendarannaxhii stiluʼ, cadi guireeluʼ gana. Purtiʼ nga nga ni bizaaca ca xpinni Cristu de primé siglu. Ne Jesús qué nucaanáʼ laacabe ne laaca qué zucaanáʼ laanu (Apoc. 2:4, 7). Nánnabe zanda guibiguetaʼ gannaxhiinu Dios casi dxi bizulú gunnaxhiinu laa.

 4. ¿Xi zadúʼyanu lu artículo riʼ?

⁴ Lu artículo riʼ, zadúʼyanu ximodo zanda guiroobaʼ guendarannaxhii ni nápanu Jehová ne prójimo stinu. Ne laaca zadúʼyanu xi ndaayaʼ ricaanu ne ni ricaa xcaadxi ora rusiróʼbanu guendarannaxhii stinu.

5, 6. a) ¿Xi guendanagana bidxagalú Pablo ora biʼniʼ predicar? b) ¿Xi bicaa laabe cadi gusaana de gúnibe ni ná Jehová?

⁵ Guizáʼ biecheʼ apóstol Pablo ora biʼniʼ predicar, peru laaca guyuu biaje gúcani nagana para laabe. Casi ora guni viajarbe zitu, purtiʼ tiempu que nagana para guni viajar tuuxa. Ne ora biʼniʼ viajarbe guyuu xquendanabánibe lu peligru ra gudíʼdibe guiiguʼ ne ra biree gubaanaʼ lube, ne laaca bininá ca xhenemígube laabe (2 Cor. 11:23-27). Ne guyuu hermanu qué nusisaca stipa bíʼnibe para gacanebe laacaʼ (2 Cor. 10:10; Filip. 4:15).

⁶ ¿Xi bicaa Pablo cadi gusaana de guni ni ná Dios yaʼ? Biziidiʼ Pablo ximodo naca Jehová ora bíʼndabe Stiidxaʼ. Ne pur guiráʼ ni bidxaagalube gucané ni laabe gánnabe dxandíʼ nadxii Dios laabe (Rom. 8:38, 39; Efes. 2:4, 5). Bisihuinni Pablo guizáʼ nadxii Jehová, ra bíʼnibe stale cosa «pur ca hermanu» (Heb. 6:10).

 7. ¿Xi zacané laanu guiroobaʼ guendarannaxhii ni nápanu Jehová?

⁷ Para guiroobaʼ guendarannaxhii ni nápanu Dios, caquiiñeʼ guni estudiar chaahuinu Stiidxabe. Ora guidúʼndanu Biblia, guidúʼyanu xi rusiidiʼ ca relatu ca laanu de Jehová. Ne galán guiníʼ íquenu: «¿Ximodo rusihuinni relatu riʼ nadxii Jehová naa? Ne, ¿xi razón rudii ni naa para gannaxhieeʼ Jehová yaʼ?».

 8. ¿Ximodo racané oración laanu guiroobaʼ guendarannaxhii ni nápanu Jehová?

⁸ Sti cosa ni zacané laanu guiroobaʼ guendarannaxhii ni nápanu Jehová nga guni orarnu laabe guiráʼ dxi, guxhélenu ladxidoʼno nezalube (Sal. 25:4, 5). Ne Jehová zacabi ca oración ca (1 Juan 3:21, 22). Ti hermana láʼ Khanh,b ni nabeza ndaaniʼ guidxi Asia guníʼ: «Primeru ga que, gunnaxhieeʼ Jehová pur ca cosa si ni nannaʼ de laabe. Peru ora biiyaʼ ximodo bicábibe ca oración stinneʼ, biroobaʼ guendarannaxhii ni napaʼ laabe, ne ngue bicaa naa guneʼ stipa guneʼ ca cosa ni riuuláʼdxibe».

 9. ¿Xi rizíʼdinu de Timoteo ra gunnaxhii ca hermanu?

⁹ Chupa chonna iza de guca Pablo xpinni Cristu, binibiaʼbe ti joven nachaʼhuiʼ láʼ Timoteo. Nabé nadxii Timoteo Jehová ne nadxii binni. Pablo bizeeteʼ de laabe nezalú ca hermanu de Filipos, guniʼbe: «Qué gapaʼ stobi casi Timoteo, tobi ni dxandíʼ zazaalaʼdxiʼ laatu de guidubi ladxidóʼ» (Filip. 2:20). Qué nuzeeteʼ Pablo naca Timoteo tuuxa ni nabé nanna quixhe chaahuiʼ modo gaca xiixa o ni nabé nanna gudii discursu, ni jma bisisaca Pablo de laabe nga pabiáʼ nadxiibe ca hermanu. Rihuinni dxiichicaʼ riuulaʼdxiʼ ca congregación que cheʼ Timoteo chiganna laacaʼ (1 Cor. 4:17).

10. ¿Xi biʼniʼ Anna ne xheelaʼ para bisihuínnicaʼ nadxiicaʼ ca hermanu?

¹⁰ Laanu laaca ruyúbinu modo gacanenu ca hermanu (Heb. 13:16). Guidúʼyanu ni bizaaca Anna, hermana ni bizéʼtenu lu artículo ni gudiʼdiʼ que. Gudiʼdiʼ si ti tormenta nadipaʼ, laabe ne xheelabe, yegánnacabe ti familia de Testigu. Ne biiyacabe biaba ique lídxicaʼ, ngue runi qué gapa familia que lari nayá para gácucaʼ. Anna guníʼ: «Bitópadu xhábacabe, gudíʼbidu, biʼniʼ plánchadu ne bidxiguétadu ni laacabe maʼ nexheʼ chaahuiʼ. Cadi nagana ni bínidu riʼ, peru pur laani dede yanna guizáʼ xhamígudu». Cumu nadxii Anna ne xheelaʼ ca hermanu riʼ, nga bicaa laacabe gacanécabe laacaʼ (1 Juan 3:17, 18).

11. a) ¿Xi runi sentir ca hermanu stinu ora gúninu stipa gacanenu laacaʼ? b) Casi ná Proverbios 19:17, ¿xi runi Jehová ora rusihuínninu nadxiinu xcaadxi?

¹¹ Rinándanu ejemplu stiʼ Jehová ora rusihuínninu nadxiinu ca hermanu stinu ne rácanu nachaʼhuiʼ né laacaʼ. Ne qué rusiaandaʼ xcaadxi ni rúninu pur laacaʼ. Neca qué gánnanu pabiáʼ gucanenu laacabe. Khanh, hermana ni bizéʼtenu lu párrafo 8 que, rietenaláʼdxibe guiráʼ ca binni ni gucaʼ nachaʼhuiʼ né laabe. Sicaríʼ guniʼbe: «Rudieeʼ xquixe peʼ guiráʼ ca hermana ni yené naa serviciu. Bisihuínnicabe nadxiicabe naa, ricaacabe naa, runi invitárcabe naa gahuaʼ xiixa guiluxe si guni predicardu, de raqué risaanacabe naa ra yoo. Guizáʼ stale ni biʼniʼ ca hermana riʼ pur naa, peru bíʼnicabe ni né stale cariñu». Laaca naquiiñeʼ gánnanu cadi guiráʼ binni zudii xquixe peʼ pur ni gúninu pur laacaʼ. Guidúʼyanu xiruʼ bizeeteʼ Khanh de ca hermana ni gucané laa. Laabe guniʼbe: «Ñuuladxeʼ ñuneʼ xiixa pur guiráʼ ca ni gucané naa, peru nuu de laacabe qué gannaʼ paraa nabézacabe, nga runi rinabaʼ Jehová cuʼ ndaayaʼ laacabe purtiʼ laa nanna paraa nuucabe». Dxandíʼ ni ná Khanh, ruuyaʼ Jehová ora gácanu nachaʼhuiʼ né xcaadxi, ruuyabe ni casi ti sacrificiu risaca, ne zeeda gácani casi ora nutíʼñenu laabe xiixa ne laabe racaláʼdxibe quíxebe ni laanu (biindaʼ Proverbios 19:17).

12. ¿Ximodo zanda gusihuinni ca hombre ni maʼ guyuunisa nadxiicaʼ congregación? (Biiyaʼ ca imagen ca).

¹² Pa ti hermanu lii, ¿ximodo zanda gusihuínniluʼ nadxiiluʼ congregación? Zanda gúniluʼ ni ra gacaneluʼ. Gunabadiidxaʼ ti joven láʼ Jordan ti ancianu xi zanda guni para jma gacané ca hermanu. Biʼniʼ felicitar ancianu que laabe pur guiráʼ ni maʼ bíʼnibe ne gudxi laabe caadxi cosa ni zanda gúnibe. Chupa chonna de laacani nga chindabe tempranu ra Yoo stiʼ Reinu, ugapadiúxibe ca hermanu, gudiibe comentariu lu ca reunión ca, gatigá guni predicarnebe grupu stibe ne guyúbibe modo gacanebe xcaadxi. Ra yenanda Jordan ca conseju riʼ, gucané ni laa chuʼ listu para guicaa jma responsabilidad ne cadi ngasi, sínuque bicaa ni laabe gannaxhiibe jma ca hermanu. Ne laaca biziidibe ora gaca nombrar ti hermanu siervu ministerial la? cadi racá diʼ nga ruzulú racané xcaadxi, sínuque runi seguir runi xiixa ni maca cayuni (1 Tim. 3:8-10, 13).

13. ¿Xi gucané Christian guibiguetaʼ gaca ancianu?

¹³ Pa gúcaluʼ ancianu o siervu ministerial dxiqué, qué rusiaandaʼ Jehová ni bíʼniluʼ dxiqué né guendarannaxhii (1 Cor. 15:58). Ne laaca ruuyabe stipa ni rúniluʼ ra cadi cusaanaluʼ de gusihuínniluʼ guendarannaxhii. Guizáʼ triste guyuu ti hermanu láʼ Christian dxi bisaana de gacaʼ ancianu. Neca zacá, qué nireebe gana, laabe guniʼbe: «Gudixhe iqueʼ guneʼ guiráʼ ni nuu lu nayaʼ para guneʼ ni ná Jehová, purtiʼ nadxieeʼ laabe ne cadi pur xiixa privilegiu». Ra gudiʼdiʼ tiempu bibiguetaʼ gúcabe ancianu. Ne Christian guníʼ: «Primeru ga que rabeʼ qué zacaaʼ privilegiu que, peru guníʼ iqueʼ pa cusihuinni Jehová riá naa ne nabe gacaʼ ancianu sti biaje la? zacaaʼ ni, purtiʼ nadxieeʼ laabe ne nadxieeʼ ca hermanu».

14. ¿Xi rizíʼdinu de ni bizaaca ti hermana de guidxi Georgia?

¹⁴ Laanu ca xpinni Jehová, laaca rusihuínninu nadxiinu ca binni ni cadi Testigu (Mat. 22:37-39). Guzéʼtenu ni bizaaca ti hermana láʼ Elena de guidxi Georgia, laabe guniʼbe: «Dxi bizuluáʼ bineʼ predicar, bineʼ ni purtiʼ nadxieeʼ Jehová. Peru ra ziroobaʼ guendarannaxhii ni napaʼ Bixhozeʼ ni nuu guibáʼ, laaca biroobaʼ guendarannaxhii ni napaʼ binni. Nga runi riníʼ iqueʼ xi guendanagana cadíʼdicabe ne xi tema ñuuláʼdxicabe nucaadiágacabe. Ra bineʼ ni, jma biale de naa gacaniáʼ laacabe» (Rom. 10:13-15).

15, 16. Casi rihuinni lu ca imagen ca, ¿xi ndaayaʼ ricaanu ora rusihuínninu nadxiinu ca hermanu?

¹⁵ Ora rusihuínninu nadxiinu ca hermanu, laaca racané ni xcaadxi binni. Lu pandemia stiʼ COVID-19, Paolo ne xheelaʼ gucanecaʼ stale hermana ni maʼ huaniisi ganda iquiiñecaʼ ca dispositivu electrónicu sticaʼ para ganda guni predicarcaʼ. Tobi de ca hermana riʼ, primeru ga que guca nagana para laabe iquiiñebe dispositivu stibe, peru gunda biziidibe ne biʼniʼ invitarbe ca familia stibe Conmemoración. Biaʼsi 60 de ca familia stibe guca conectarcaʼ pur videollamada. Hermana riʼ ne familia stiʼ, gucuaacaʼ ndaayaʼ pur stipa ni biʼniʼ Paolo ne xheelaʼ. Ndiʼ nga ni bicaa hermana riʼ ra nuu Paolo: «Xquixe peʼ laatu pur bisiiditu ca ni huaniisi, qué ziaandaʼ naa pabiáʼ nadxii Jehová laadu ne stipa ni bíʼnitu ne paciencia gúpatu laadu».

¹⁶ Pur ca ni bizaaca riʼ biziidiʼ Paolo ti cosa risaca. Gunda biiyabe jma risaca gannaxhiibe binni que gánnabe stale cosa o gápabe xiixa gracia. Laabe rietenaláʼdxibe: «Dxi gucaʼ superintendente de circuito, zándaca qué rietenalaʼdxiʼ ca hermanu ca discursu ni bidieeʼ, peru rietenaláʼdxicabe xi bineʼ para gacaniáʼ laacabe».

17. Ora rusihuínninu guendarannaxhii, ¿ximodo racané ni laanu?

¹⁷ Ora rusihuínninu guendarannaxhii racané ni laanu modo cadi caníʼ íquenu. Ne nga nga ni bizaaca ti hermanu láʼ Jonathan, ni nabeza ndaaniʼ guidxi Nueva Zelanda. Ti sábadu guizáʼ nandáʼ, biiyabe cayuni predicar ti precursor stubi biaʼ galaa dxi, ngue runi gudixhe íquebe chiguni predicarnebe laa guiráʼ sábadu huadxí. Óraque qué gánnabe pabiáʼ zacané ni cayúnibe que laabe. Jonathan guníʼ: «Dxiqué huaxiéʼ riuuladxeʼ guneʼ predicar, peru ora biiyaʼ pabiáʼ galán runi predicar precursor que ne pabiáʼ rucaadiaga binni laabe, bicaa ni naa chuulaʼdxeʼ guneʼ predicar. Ne laaca guizáʼ guca xhamígudu, gucanebe naa guiniiseʼ lu stiidxaʼ Dios, chuulaʼdxeʼ guneʼ predicar ne chuaaʼ jma gaxha de Jehová».

18. ¿Xi racalaʼdxiʼ Jehová gúninu?

¹⁸ Racalaʼdxiʼ Jehová gannaxhiinu laa, ne gannaxhiinu binni. Casi maʼ bidúʼyanu, para guiroobaʼ guendarannaxhii ni nápanu Jehová caquiiñeʼ guidúʼndanu Stiidxabe, guiníʼ íquenu luni ne guni orarnu laabe guiráʼ dxi. Ne para gusihuínninu nadxiinu ca hermanu, caquiiñeʼ guyúbinu modo gacanenu laacabe. Ra jma ziroobaʼ guendarannaxhii ni nápanu Jehová ne ca hermanu stinu, jma ziuʼnu gaxha de laabe ne de ca hermanu stinu. Ne qué zusaana de gaca xhamígunu Jehová ne ca hermanu stinu.