«Biasaʼ casi ti gunaa ni napa xiiñiʼ ndaaniʼ guidxi Israel»

CAYUUYADXÍ Débora ca soldadu ni nuu punta dani Tabor. De biniibi dxacha ladxidoʼbe ora bíʼyabe laacaʼ. Maʼ zedayaba biaaniʼ stiʼ dxi, caníʼ íquebe pabiáʼ nadxibalú ca hombre que ne pabiáʼ fe napa Barac, comandante stícabe. Nécapeʼ ti ejércitu nabé naroʼbaʼ de 10,000 soldadu laacabe, peru chigusihuínnicabe pabiáʼ nadxibalúcabe ne pabiáʼ fe nápacabe. Huaxiéʼ guiibaʼ nápacabe ne nabé malu enemigu ni chigucaalúcabe ne jma stálecaʼ que laacabe. Peru raríʼ nuucabe listu para gucaalúcabe, purtiʼ biiyacabe pabiáʼ nadxibalú gunaa riʼ.

Bixuiʼlú dxiʼbaʼ Débora punta dani Tabor, cayuáʼ bi xhaba, zuhuaabe cueʼ Barac ne cayuuyacabe ni cazaaca que. Dede punta dani, biaʼ 400 metru de nasoo, de raqué cayuuyacabe xi zanda gúnicabe lu pampa stiʼ Esdrelón, o Jezreel, ti valle ngola ni rugaanda ladu gueteʼ stícabe. Didi guiiguʼ Cisón lu ti valle nagáʼ ne riguiábani lu mar Grande, peru primeru ridiʼdiʼ ni gaxha de dani Carmelo. Zándaca siadóʼ que biiyabe nabidxi nuu guiiguʼ que, peru rihuinni ti biaaniʼ ra napampa que. Xi biaaniʼ que yaʼ. Zedadxiña ejércitu stiʼ Sísara. Ni cuzaaniʼ de zitu que nga 900 carru ni né ejércitu que para tinde, nápacani ti guiibaʼ naduxhuʼ punta eje stícani ne ruluíʼ qué zanda guni ganárcabe laacaʼ. ¡Cá ique Sísara gunduuxeʼ guiráʼ ca israelita que casi raanacabe guixi!

Nanna Débora cabeza Barac ne ca soldadu stiʼ gábibe laacaʼ xi gúnicaʼ o gúnibe ti seña laacaʼ. Ximodo biʼniʼ sentirbe laasibe gunaa nuu raqué ne nápabe ti dxiiñaʼ nabé naroʼbaʼ yaʼ. Ñee guníʼ íquebe xi cayúnibe raqué la? Coʼ. Purtiʼ Jiobá peʼ, Dios stibe, gudxi laabe guzulube guerra que. Ne laaca gudxi Jiobá laabe zaquiiñeʼ ti gunaa para gunduuxeʼ ni (Jueces 4:9). Lu historia riʼ zazíʼdinu de fe stiʼ Débora ne pabiáʼ nadxibalú ca soldadu que.

Primé biaje ruzeeteʼ Biblia láʼ Débora, rieeteʼ nácabe ti gunaa ni riguixhená. Nécapeʼ huaxiéʼ rieeteʼ lu Biblia de gunaa ni gudixhená, cadi Débora si biʼniʼ dxiiñaʼ riʼ.a Ne laaca biʼniʼ juzgar gunaa riʼ, biʼniʼ chaahuiʼ guendanagana gupa binni ne biquiiñeʼ Jiobá laabe ora nuu xiixa guendanagana ndaaniʼ guidxi que (Jueces 4:4, 5).

Guleza Débora lade ca dani stiʼ Efraín, ni riaana neza Betel ne Ramá. Gatigá ribibe ñee ti yaga ziña para guidxagalube binni ne gacanebe laacaʼ casi modo na Jiobá. Neca nagana dxiiñaʼ bíʼnibe peru qué nidxíbibe ñúnibe ni, ne caquiiñeʼ guidxi que gacanebe laa. Xiñee yaʼ. Lu ti canción bicaanebe Barac rieeteʼ xiñee: «Gulícabe caadxi dios cubi. Ngue runi gúpacabe guerra» (Jueces 5:8). Cumu bidxiideche ca israelita que Jiobá ne biʼniʼ adorarcaʼ xcaadxi dios la? bidiibe lugar guniná ca enemigu sticaʼ laacaʼ. Yanna nuucabe lu naʼ rey de Canaán láʼ Jabín, laa napa ti general nabé malu láʼ Sísara.

Dede racaditi ca israelita ora gunadiágacaʼ lá Sísara. Pur religión stiʼ ca binni de Canaán ne modo nabánicaʼ binibiáʼ binni laacaʼ casi binni nabé malu. Ne gupa ca binni que costumbre guuticaʼ xiiñicaʼ para dios sticaʼ ne gatanecaʼ tutiica si binni ndaaniʼ yuʼduʼ sticaʼ. Ruxuíʼluluʼ ximodo nabánicabe yanna ra cayuni mandar ti general cananeu ne ejércitu stiʼ laacabe la? Lu canción ni biʼndaʼ Débora rieeteʼ nabé bidxibi binni saʼ ndaaniʼ guidxi que ne maʼ guirutiʼ nibeza ndaaniʼ ca guidxihuiiniʼ stini (Jueces 5:6, 7). Nabé ridxibi ca binni que ne maʼ canayúbicaʼ ra gucachilucaʼ ndaaniʼ guiʼxhiʼ ne lu ca dani nuu gaxha. Qué randa rúnicaʼ dxiiñaʼ lu layú sticaʼ ne qué rinacaʼ guireecaʼ para cadi chuʼ tu guniná laacaʼ, ti cadi guni secuestrárcabe ca xiiñicaʼ o guilaxoocabe xheelacaʼ.b

Gande iza guyuu ca israelita que lu naʼ ca binni malu que, dede ora biʼyaʼ Jiobá maʼ bichaacabe modo laacabe. O casi rieeteʼ lu canción biʼndaʼ Débora ne Barac: «Dede ora naa Débora, biasaʼ, biasaʼ casi ti gunaa ni napa xiiñiʼ ndaaniʼ guidxi Israel». Bichaganáʼ Débora ti hombre láʼ Lapidot. Neca qué gánnanu pa gúpabe xiiñibe beeda gácabe «casi ti gunaa ni napa xiiñiʼ ndaaniʼ guidxi Israel» purtiʼ gulí Jiobá laabe para gápabe guidxi que casi rapa ti gunaa xiiñiʼ. Gunabaʼ Jiobá laabe guyúbibe ti hombre ruzuubaʼ diidxaʼ ne nadxibalú, juez Barac, para gudxiilú Sísara (Jueces 4:3, 6, 7; 5:7).

Biquiiñeʼ Jiobá Débora para gabi Barac gutagulisaa 10,000 hombre ni nuu lu chupa tribu stiʼ Israel lu dani Tabor. Ne gudxi Débora laabe maʼ guníʼ Dios zuni ganarbe Sísara neca napa ti ejércitu ne 900 carru de guerra. Nabé bidxagayaa Barac ora binadiaga ndiʼ purtiʼ qué gapa diʼ Israel ti ejércitu ne laaca qué gapa stale guiibaʼ para gucaalú. Neca zaqué, nuu Barac listu para tinde. Peru gunábabe chiné Débora laacabe lu dani Tabor (Jueces 4:6-8; 5:6-8).

Nuu tu na bisihuinni Barac huaxiéʼ napa fe pur ni gunabaʼ que, peru cadi dxandíʼ nga. Xiñee rininu zaca yaʼ. Purtiʼ qué ninábabe Dios nudii laabe jma guiibaʼ, sínuque gunábabe laa ti xpinni para chiné laacabe ne cuʼ gana laacabe (Hebreos 11:32, 33). Guyuulaʼdxiʼ Jiobá ni gunábabe, ngue runi bidii lugar chiné Débora laacabe. Peru gudxi Jiobá Débora guiníʼ pur ti gunaa nga chiguni ganárcabe guerra riʼ (Jueces 4:9). Maca gudixhe Jiobá ti gunaa nga chiguuti Sísara.

Ca dxi nabáninu riʼ, nisi ruquiichinácabe ca gunaa, riguíñecabe ne runinácabe laacaʼ. Huaxiéʼ si ora rusisaca binni laacabe casi racalaʼdxiʼ Dios. Para Dios biaʼca risaca hombre ne gunaa ne zanda chuuláʼdxibe ni gúnicaʼ (Romanos 2:11; Gálatas 3:28). Historia stiʼ Débora rusietenalaʼdxiʼ ni laanu laaca rusisaca Jiobá ca gunaa, purtiʼ rudiibe laacaʼ dxiiñaʼ ni nabé risaca, ne zacá rusihuínnibe nápabe confianza laacaʼ. Nga runi, qué chuʼ dxi gúninu menu ca gunaa casi runi binni yanna.

Bitagulisaa Barac 10,000 hombre nadxibalú para gucaalú ejércitu naroʼbaʼ stiʼ Sísara. Ne ora ziné Barac ca xpinni lu dani Tabor nabé gutadxí ladxidóʼ purtiʼ nanna ziné tuuxa ni uguu gana laa, Biblia na: «Gudxiʼbané Débora laabe» (Jueces 4:10). Laaca gutadxí ladxidóʼ ca soldadu que ora bíʼyacaʼ pabiáʼ nadxibalú gunaa riʼ ziguiʼbaʼ dani ne caguu xquendanabani ra naxoo purtiʼ nadxii Jiobá.

Ora gunna Sísara maʼ bitagulisaa Israel ti ejércitu para gucaalú laa nagueendaca biyubi xi guni. Chupa chonna rey stiʼ guidxi Canaán biseendacaʼ ejércitu sticaʼ para gacané ejércitu stiʼ rey Jabín, zándaca laabe nga ni jma nadipaʼ de ládecaʼ. Dede riniibi dxacha layú que ne de ricuaataʼ diágacabe pur ridxi cayaca ra zeedazá ca soldadu que ne ridxi cayuni 900 carru que. Ca cananeu que guníʼ íquecaʼ qué lica zudii ca israelita que dxiiñaʼ para guni ganárcabe laacaʼ purtiʼ para laacabe cadi nadípacaʼ (Jueces 4:12, 13; 5:19).

Xi guni Barac ne Débora yaʼ. Pa guiaanacabe cueʼ dani Tabor que la? zuni ganárcabe ca soldadu de Canaán, purtiʼ lu pampa si nga zanda iquiiñecaʼ ca carru que para tíndecaʼ. Peru Barac cabeza tinde casi modo naguixhe Jiobá gácani, ngue runi cabézabe gabi Débora laabe xi gúnibe. Yanna huaxa, bedandá hora que. Sicaríʼ gudxi Débora laabe: «Biasa, purtiʼ yannadxí maʼ bidii Jiobá Sísara lu naluʼ. Ñee cadi Jiobá nga zaniruʼ luluʼ la?». Ne ngapeʼ nga biʼniʼ Barac. Biétebe de lu dani Tabor laabe né 10,000 hombre stibe (Jueces 4:14).c

Ca soldadu stiʼ Israel biétecaʼ de lu dani que ne biyúbicaʼ ra nuu ca carru de guerra ni nabé ruchibi binni ni nuu lu pampa que. Ñee zacané Jiobá laacabe la? Ñee zazániru lúcabe casi maca guníʼ Débora que la? Qué nindaa bihuinni ni, Biblia na: «Biniibi dxacha guidxilayú, ne laaca biinaʼ guibáʼ». Qué lica nidxela ejércitu ni ruchá bi yanni stiʼ Sísara xi ñuni ora bigaacaʼ ti nisaguié naroʼbaʼ. Cumu biaba dxacha nisaguié la? nagueenda bilaahua lugar que. Qué nindaa maʼ qué ñanda niquiiñeʼ guiráʼ carru stícabe. Guʼgaʼ cani ndaaniʼ beñe ne qué nidxélacabe modo nibeecabe cani (Jueces 4:14, 15; 5:4).

Qué lica nizaalaʼdxiʼ Barac ne ca xpinni modo nuu tiempu que. Nánnacabe Jiobá ngue cusaba nisaguié que. Ngue runi, bizulú bicaalúcabe ca soldadu de Canaán. Biquiiñeʼ Dios laacabe para guuticabe guiráʼ xixé enemigu stiʼ. Bidxá guiiguʼ Cisón ne bilaahua valle stini, guiiguʼ que binduubani guiráʼ gueʼtuʼ que ne yesáʼbini laacaʼ lu mar Grande (Jueces 4:16; 5:21).

Tiempu riʼ maʼ qué ruseendaʼ Jiobá ca xpinni lu ti guerra. Peru rinábabe laacaʼ gucaalucaʼ casi ñaca ñuucaʼ lu ti guerra para cadi guirá fe sticaʼ (Mateo 26:52; 2 Corintios 10:4). Ora ruzúʼbanu stiidxaʼ Dios rusihuínninu nuunu ladu stiʼ. Naquiiñeʼ gácanu nadxibalú purtiʼ nabé malu ca enemigu stiʼ Dios. Peru caʼruʼ guchaa Jiobá modo laa, dede yanna rápabe cani napa confianza laabe cásica gupa Débora, Barac ne guiráʼ soldadu israelita ni guca nadxibalú.

Bixooñeʼ Sísara, tobi de ca enemigu ni jma malu ni bininá xquidxi Dios. Bisaana ca xpinni ndaaniʼ beñe, ne bixooñeʼ de lu naʼ ca israelita que para guyubi ra nabidxi. Bixooñebe stale kilómetru ra nuu tobi de ca binni ni nuuné laabe tobi si ti ganda guilabe. Cadxíbibe pa guidxela ca israelita laabe ngue runi guyebe ra nuu campamentu stiʼ Héber, ti quenita ni bixeleʼ de binni xquidxi ne yendeza ladu gueteʼ, purtiʼ hombre riʼ nuuné rey Jabín tobi si (Jueces 4:11, 17).

Nabé maʼ bidxaga Sísara ora yendá ra campamentu stiʼ Héber, neca qué guinni hombre riʼ peru nuu Jael, xheelaʼ, ne laa bidxagalú laabe. Guníʼ ique Sísara zuni respetar Jael ni maca guníʼ stiidxaʼ Héber ne rey Jabín. Para laabe qué zanda guni ti gunaa xiixa sin qué ganna xheelaʼ. ¡Peru qué lica ganna Sísara xi caníʼ ique Jael! Nanna gunaa riʼ nabé malu ca binni de Canaán ne pabiáʼ ruquiichinácabe binni. Xi guni Jael yaʼ. Ñee zacanebe hombre malu riʼ la? o ziuube ladu stiʼ Jiobá ne gunduuxebe enemigu ni cucaalú xquidxi. Peru ximodo zanda guutibe hombre riʼ pa nabé nadipaʼ ne nanna tinde yaʼ.

Qué nuniti Jael tiempu: bidii ra guiziilaʼdxiʼ Sísara ndaaniʼ yoo de lari stiʼ. Peru gunabaʼ Sísara laabe cadi guiniʼbe pa raqué nuu pa chuʼ tu chiyubi laa. Guʼtaʼ Sísara para guiziilaʼdxiʼ, bichenda Jael laabe ti lari. Ne ora gunábabe laa caadxi nisa guebe la? bidii laabe caadxi leche dxaa. Qué nindaa gucuá bacaandaʼ Sísara. Óraque gucuaa Jael chupa cosa ni nanna guiráʼ gunaa ni rindeza cheríʼ chericaʼ iquiiñeʼ: ti staca ne ti masu. Chaahuidugá bidxíñabe ra nuu Sísara para gúnibe xiixa ni naquiiñeʼ guni ti binni nadxibalú: gunduuxebe enemigu stiʼ Jiobá. Pa ñaca nidxibi Jael la? qué ñanda ñuni ndiʼ. Ñee bíʼnibe ni purtiʼ guníʼ íquebe maʼ raca stale iza de cayuniná hombre malu riʼ xquidxi Dios la? o bíʼnibe ni purtiʼ para laabe nabé risaca chuʼbe ladu stiʼ Jiobá. Qué rieeteʼ lu Biblia xiñee bíʼnibe ni. Ni nánnanu nga biitibe Sísara (Jueces 4:18-21; 5:24-27).

Despué yenanda Barac enemigu stiʼ. Ora biluíʼ Jael laabe cuerpu stiʼ Sísara ne biiyabe daabi ti staca cueʼ xcuaʼsaʼ la? nagueendaca bedasilú laabe ni guníʼ Débora. ¡Ti gunaa guuti Sísara! Stale binni ni maʼ biindaʼ historia riʼ qué runi crecaʼ pa dxandíʼ Jael biiti hombre riʼ. Peru para Barac ne Débora la? nabé risaca ni bíʼnibe que. Lu canción bicaacabe bizeetecabe nabé risácabe «lade ca gunaa», purtiʼ gúcabe nadxibalú (Jueces 4:22; 5:24). Qué nidxiichi Débora ora bisisácacabe Jael purtiʼ para laabe ni jma risaca nga gaca guiráʼ ni maʼ guníʼ Jiobá.

Ra gutiʼ general Sísara, biniti rey Jabín poder. ¡Yanna huaxa maʼ qué zanda guniná ca cananeu que ca israelita! Maʼ guirutiʼ nucaalú guidxi Israel cuarenta iza (Jueces 4:24; 5:31). Rihuinni dxíchica guluu Jiobá ndaayaʼ Débora, Barac ne Jael pur fe sticaʼ. Gácanu nadxibalú casi guca Débora, chuʼnu ladu stiʼ Dios ne cuʼnu gana xcaadxi guni ni. Pa gúninu zacá la? zacané Jiobá laanu guni ganarnu ne zatadxí ladxidoʼno.