Gusihuínninu dxandíʼ nadxiinu pur ni gúninu

 1. ¿Ximodo nga guendarannaxhii ni zeeda de Jiobá, ne xiñee? (Biiyaʼ ca foto ni zeeda ra ruzulú tema riʼ).

RA NUU Jiobá nga cadá guendarannaxhii (1 Juan 4:7). Clase guendarannaxhii riʼ zeedani de caadxi principiu ni jneza. Riquiiñeʼ Biblia diidxaʼ agápe ni gucuá lu diidxaʼ griegu ora maʼ caníʼ de laani. Clase guendarannaxhii riʼ cadi guni sentírsinu cariñu pur tuuxa nga laani, sínuque laaca rihuinni ni ora gacané tuuxa xcaadxi sin cueza guicaa xiixa. Ti diccionariu cusiene «zanda gánnanu xi riníʼ [diidxaʼ agápe] pur cani rucaa ni tuuxa guni». Racané ni para guibáninu nayecheʼ.

2, 3. ¿Ximodo maʼ bisihuinni Jiobá nadxii binni sin cueza guicaa xiixa pur laani?

² Dede ante guzáʼ Jiobá Adán ne Eva maca bisihuinni nadxii binni. Casi dxi bizaʼbe Guidxilayú bíʼnibe ni para cuézanu ndaaniʼ ni ne gápani guiráʼ ni iquiiñeʼ cadi para ganda si guibáninu ndaaniʼ ni, sínuque para guibáninu nayecheʼ. Ne guiráʼ cosa bíʼnibe cani galán para laanu ne cadi para laabe. Ne laaca bizaʼbe binni para ganda guibani ndaaniʼ ti paraísu sin gatiʼ.

³ Bidxiideche si Adán ne Eva Dios, bisihuinni Jiobá laa nga ni jma nadxii sin cueza guicaa xiixa pur laani. Gunna dxíchibe ziuu tu zannaxhii laabe de lade ca xiiñiʼ Adán, ngue runi bíʼnibe xiixa para gulabe laacaʼ (Gén. 3:15; 1 Juan 4:10). Dede dxi biʼniʼ prometer Jiobá ziuu tu gulá binni, para laabe casi ora mápeca guti Xiiñibe. Biaʼ tapa mil iza despué, bidii Jiobá tobi lucha Xiiñiʼ pur binni guidxilayú neca guizáʼ naroʼbaʼ yuubaʼ biʼniʼ sentir (Juan 3:16). ¡Rudiʼnu xquíxepeʼ laabe pur ni bíʼnibe riʼ!

 4. Neca nácanu binni ruchee, ¿ximodo nánnanu zanda gusihuínninu dxandíʼ nadxiinu sin cuézanu guicaanu xiixa?

⁴ Cumu bizáʼ Dios laanu casi laa la? zanda gusihuínninu dxandíʼ nadxiinu sin cuézanu guicaanu xiixa pur laani. Dxandíʼ, nuu tiru raca nagana para laanu gúninu ni, purtiʼ imperfectu laanu, peru zanda gúninu ni. Casi Abel la? bisihuinni pabiáʼ nadxii Dios ra bidii laabe sacrificiu ni jma galán napa (Gén. 4:3, 4). Bisihuinni Noé pabiáʼ nadxii binni ra biʼniʼ predicar stale iza neca qué ninacaʼ nucaadiágacaʼ laabe (2 Ped. 2:5). Ne Abrahán la? guyuu dispuestu gudii xiiñiʼ casi sacrificiu ne zaqué bisihuinni jma naroʼbaʼ guendarannaxhii ni runi sentir pur Dios que ni runi sentir pur xcaadxi (Sant. 2:21). Cásica ca hombre ni bizuubaʼ diidxaʼ riʼ, laanu laaca racaláʼdxinu gusihuínninu guendarannaxhii dede né ora gaca ni nagana para laanu.

 5. ¿Ximodo zanda gusihuínninu dxandíʼ nadxiinu?

⁵ Biblia cusiene «cadi gabi si nu nadxii nu binni sínuque ganaxhii nu laaca de idubi ladxidóʼ no ne usihuinni nu ni ra acané nu laacaʼ» zacá nga zusihuínninu dxandíʼ nadxiinu (1 Juan 3:18). Cadi caníʼ diʼ ni qué zanda gusihuínninu guendarannaxhii stinu né diidxaʼ si (1 Tes. 4:18). Ni ná ni nga cadi guiráʼ biaje caquiiñeʼ si gábinu tuuxa nadxiinu laa, ziuu ora zaquiiñeʼ gúninu xiixa para gusihuínninu dxandíʼ nadxiinu. Guzéʼtenu ti ejemplu, pa ti hermanu qué gapa ni gó o ni gacuʼ cadi caquiiñesibe caadxi diidxaʼ ni cuʼ gana laabe (Sant. 2:15, 16). Zacaca nga rizaacanu, cumu nadxiinu Dios ne binni la? qué zanábasinu Jiobá guseendaʼ tu guni dxiiñaʼ stiʼ, sínuque zuni predicarnu biaʼ gándatiʼ (Mat. 9:38).

6, 7. a) ¿Ximodo nga gannaxhiinu de guidubi ladxidoʼno? b) ¿Bizeeteʼ caadxi ejemplu de ximodo nga ora cadi dxandíʼ nadxii tuuxa?

⁶ Guníʼ apóstol Juan naquiiñeʼ gannaxhiinu binni «de idubi ladxidóʼ no ne usihuinni nu ni ra acané nu laacaʼ». Laaca zanda guiénenu ca diidxaʼ riʼ cadi naquiiñeʼ gácanu hipócrita ora guininu nadxiinu (Rom. 12:9; 2 Cor. 6:6). Ndiʼ riníʼ cadi gúnisinu casi ora dxandíʼ nadxiinu tuuxa, casi ora nicá ti máscara lunu. Pa gannaxhiinu ti luguiasi, cadi dxandíʼ nadxiinu ne qué zasaca ni.

⁷ Guidúʼyanu caadxi ejemplu de ximodo nga ora cadi dxandíʼ nadxii tuuxa. Dxi guniʼné Binidxabaʼ Eva ndaaniʼ jardín guyuu Edén, bíʼnibe casi ora dxandíʼ rizaaláʼdxibe chuʼcaʼ galán. Peru hipócrita laabe ne cuyúbibe para laasibe (Gén. 3:4, 5). Sti ejemplu nápanu nga stiʼ Ahitofel, bíʼnibe casi ora dxandíʼ xhamígube rey David peru bidxiidéchebe laa ora bíʼyabe zabeendube ni galán (2 Sam. 15:31). Tiempu riʼ, ca apóstata ne xcaadxi binni ni ruyubi guindaa congregación riquiiñecaʼ diidxaʼ «nanaxhi» ne rusisácacaʼ xcaadxi xpinni Cristu para gucaacabe laacaʼ guiníʼ íquecaʼ nadxiicabe laacaʼ. Peru ni rúnicabe riʼ rusihuinni ni ruyúbicabe puru para laasicabe (Rom. 16:17, 18).

 8. ¿Xi naquiiñeʼ guinabadiidxanu laca laanu?

⁸ Ziabanáʼ cani guiníʼ nadxii tuuxa para si quítecaʼ xcaadxi. Zanda quítenu binni, peru qué zanda quítenu Jiobá. Guníʼ Jesús ca binni ni gaca casi ca hipócrita ziabanacaʼ «biaʼ ganda tiʼ» (Mat. 24:51). Laanu ca xpinni Jiobá qué racaláʼdxinu gácanu hipócrita. Nga runi, naquiiñeʼ guinabadiidxanu: «¿Ñee dxandíʼ nadxieeʼ de guidubi ladxiduáʼ ne qué runeʼ ni purtiʼ ruyubeʼ para naa si la?». Guidúʼyanu gáʼ modo zanda gusihuínninu nadxiinu de «idubi ladxidóʼ no».

 9. ¿Xi zúninu pa dxandíʼ nadxiinu ca hermanu?

⁹ Gacanenu de guidubi ladxidoʼno neca qué guʼyaʼ xcaadxi ni. Naquiiñeʼ chuʼnu dispuestu gacanenu ca hermanu stinu «ra nagaʼchiʼ», ndiʼ riníʼ cadi ganna xcaadxi ni (biindaʼ Mateo 6:1-4). Ndiʼ nga ni qué ñuni Ananías ne Safira. Laacaʼ gucaláʼdxicaʼ ñanna guiráʼ binni bidiicaʼ ti donación. Ne cadi ngasi, laaca bisiguiicaʼ sin nituí lucaʼ ora guniʼcaʼ pabiáʼ bueltu bidiicaʼ. Ngue runi bisabanáʼ Dios laacabe purtiʼ gúcacabe hipócrita (Hech. 5:1-10). Pa dxandíʼ nadxiinu ca hermanu stinu, zacanenu laacaʼ de guidubi ladxidoʼno sin cuézanu ganna xcaadxi ni. Zanda guizíʼdinu de ejemplu stiʼ ca hermanu ni racané Grupu ni Zaniruʼ para gacaʼ preparar guendaró espiritual. Laacabe qué ruyúbicabe gusisaca binni laacabe ne qué riníʼcabe xi dxiiñaʼ rúnicabe.

10. ¿Ximodo zanda gusisácanu xcaadxi?

¹⁰ Gusisácanu xcaadxi (biindaʼ Romanos 12:10). Bisaana Jesús ti ejemplu galán dxi gudiibiʼ ñee ca apóstol (Juan 13:3-5, 12-15). Gucuaasícabe espíritu santu, oraqueruʼ nga biénecabe xiñee biʼniʼ Jesús ndiʼ (Juan 13:7). Naquiiñeʼ gúninu stale stipa pur gácanu humilde cásica guca Jesús ne gusisácanu xcaadxi. ¿Ximodo gúninu yaʼ? Ra cadi guiníʼ íquenu laanu nga jma nánnanu purtiʼ si guyuunu scuela, pur ca cosa ni nápanu o pur ca privilegiu ni bidiicabe laanu lu xhiiñaʼ Jiobá (Rom. 12:3). Ne lugar de gápanu envidia xcaadxi pur cusisácacabe laacaʼ, ziéchenu pur laacaʼ neca guiníʼ íquenu laaca naquiiñeʼ nusisácacabe laanu pur dxiiñaʼ ni guca que.

11. ¿Xiñee naquiiñeʼ guni felicitarnu xcaadxi ne gúninu ni de guidubi ladxidoʼno?

¹¹ Guni felicitarnu ca hermanu stinu de guidubi ladxidoʼno. Naquiiñeʼ chuʼnu listu para guni felicitarnu xcaadxi ora caquiiñeʼ gúninu ni, purtiʼ racané ni para «uzuhuaa chaahuiʼ» stobi (Efes. 4:29). Peru naquiiñeʼ chuʼnu seguru caree ni de ndaaniʼ ladxidoʼno ne cadi para si gudxíʼbanu tuuxa. Laaca cadi naquiiñeʼ guininu ni cadi cayuni sentirnu ne pa caquiiñeʼ gudiʼnu conseju tuuxa la? gúninu ni (Prov. 29:5). Pa gábinu tuuxa galán ni biʼniʼ ne despué guininu mal de laa nezalú xcaadxi la? maʼ cayácanu hipócrita. Guca apóstol Pablo ti ejemplu galán de ora dxandíʼ nadxii tuuxa. Ti biaje biʼniʼ felicitarbe ca xpinni Cristu de guidxi Corinto purtiʼ cayúnicaʼ ni jneza (1 Cor. 11:2). Peru laaca bidiibe conseju laacaʼ ne bisiénebe laacaʼ né diidxaʼ nadóʼ paraa cadi cayúnicaʼ ni jneza (1 Cor. 11:20-22).

12. ¿Ximodo zusihuínninu dxandíʼ nadxiinu ora gácanu hospitalariu?

¹² Guidxagalunu xcaadxi o gácanu hospitalariu. Cayuni mandar Jiobá laanu gudiʼnu de ni nápanu ca hermanu stinu (biindaʼ 1 Juan 3:17). Peru cadi gúninu ni purtiʼ si racaláʼdxinu guicaanu xiixa. Guinabadiidxanu laca laanu: «¿Ñee hospitalariu naa jmaruʼ si né cani dxandíʼ xhamiguaʼ o ca binni ni rabeʼ risaca ndaaniʼ congregación la? ¿Ñee runeʼ invitar ca binni si ni rabeʼ zúnicaʼ xiixa pur naa despué la? ¿O ruyubeʼ modo gudieeʼ de ni napaʼ ca hermanu ni huaxiéʼ runebiaʼyaʼ o cani qué zanda gúnicaʼ xiixa pur naa despué?» (Luc. 14:12-14). Guxuíʼlunu ti hermanu ni caquiiñeʼ tu gacané laa purtiʼ gucuaa decisión ni cadi jneza o tuuxa ni biʼniʼ invitarnu qué huayuu dxi gudii xquixe laanu. Pa guizaacanu ndiʼ, galán chinándanu conseju riʼ: «Lauchagalú saa sin quiche ruaa tu», o gúninu ni de guidubi ladxidoʼno (1 Ped. 4:9). Pa chinándanu ni ná principiu riʼ ziuʼnu nayecheʼ purtiʼ cadi cayúninu ni para guicaanu xiixa (Hech. 20:35).

13. a) ¿Pora nga naquiiñeʼ gusihuínninu nápanu paciencia? b) ¿Ximodo gacanenu cani cadi zuhuaa chaahuiʼ?

¹³ Gacanenu cani cadi zuhuaa chaahuiʼ o ca débil. Zusihuínninu dxandíʼ nadxiinu ora rúninu ni ná mandatu riʼ: «Lagacané [...] cani caʼru uzuhuaa chaahui, ne cadi ixhacalaʼdxi tu laacaʼ» (1 Tes. 5:14). Stale de ca hermanu ni nuu débil raca fe sticaʼ naguidxi despué. Peru nuu xcaadxi caquiiñerucaʼ gápanu paciencia laacaʼ. ¿Ximodo yaʼ? Lade ca cosa ni zanda gúninu nga iquiiñenu Biblia para uguʼnu gana laacabe, guni invitarnu laacabe chiguni predicarnécabe laanu ne cueenu tiempu para gucaʼdiáganu laacabe. Ngue runi, lugar de guidúʼyanu tu laa zuhuaa chaahuiʼ lade ca hermanu ne tu laa coʼ, guietenaláʼdxinu guiranu nápanu cualidad galán peru laaca guiranu nuu paraa naquiiñeʼ guni mejorarnu. Dede apóstol Pablo bidii cuenta nuu paraa caquiiñeʼ guchaa (2 Cor. 12:9, 10). Guiranu caquiiñenu gacané ca hermanu stinu laanu ne cuʼcaʼ gana laanu.

14. ¿Xi naquiiñeʼ chuʼnu dispuestu gúninu para chuʼnu tobi si né ca hermanu stinu?

¹⁴ Guyúbinu modo chuʼnu tobi si. Naquiiñeʼ gúninu stipa pur chuʼnu tobi si né ca hermanu stinu dede né ora ruluíʼ bíʼnicaʼ laanu xiixa ni cadi jneza o gadxé modo biénecaʼ xiixa ni bíninu o ni guninu (biindaʼ Romanos 12:17, 18). Pa guninanu tuuxa, naquiiñeʼ guinábanu perdón, peru gúninu ni de guidubi ladxidoʼno. Guzéʼtenu ti ejemplu, lugar de guininu: «Bitiidilaʼdxiʼ, qué niníʼ iqueʼ pa nidxiichiluʼ», naquiiñeʼ guni reconocernu laaca nápanu donda ne guininu: «Bitiidilaʼdxiʼ naa, maʼ bichiicheʼ lii». Guizáʼ risaca chuʼnu tobi si jmaruʼ si lu ti guendaxheelaʼ. Cadi jneza nga gusihuínnicabe nadxiicabe nezalú si binni peru ora maʼ nuucabe stúbicabe guiníʼcabe diidxaʼ ni guniná laacabe, gusaana de guiníʼcabe dede tíndecabe.

15. ¿Ximodo zusihuínninu dxandíʼ runi perdonarnu?

¹⁵ Naquiiñeʼ chuʼnu dispuestu guni perdonarnu. Pa guniná tuuxa laanu sin gudii cuenta, naquiiñeʼ guni perdonarnu ne gúninu stipa pur gusiáʼndanu ni bíʼnibe laanu. Runi ca xpinni Cristu ni ora runi «huantarsaa[caʼ] né guendarannaxhii» ne ra gúnicaʼ «stipa pur gápa[caʼ] guendariuudxi purtiʼ maʼ biʼniʼ espíritu santu laa[caʼ] tobi si» (Efes. 4:2, 3, TNM). Para gusihuínninu dxandíʼ maʼ biʼniʼ perdonarnu, naquiiñeʼ gucueezanu ni riníʼ íquenu ne qué zadaʼnu xiana (1 Cor. 13:4, 5). Pa guidaʼnu xiana, zuxheleʼ ni laanu de ca hermanu stinu ne de Jiobá (Mat. 6:14, 15). Sti modo gusihuínninu dxandíʼ runi perdonarnu nga guni orarnu pur cani guni laanu xiixa (Luc. 6:27, 28).

16. ¿Ximodo ridúʼyanu ca privilegiu ni ricaanu lu xhiiñaʼ Jiobá?

¹⁶ Gúninu sacrificiu para gacanenu xcaadxi. Pa guicaa tuuxa ti privilegiu lu xhiiñaʼ Jiobá, naquiiñeʼ guʼyaʼ ni casi ti oportunidad para gusihuinni dxandíʼ nadxii. ¿Ximodo yaʼ? Ra chinándabe ni ná conseju riʼ: «Uyubi nu acané nu stobi ne cadi uyubi nu para laasi nu» (1 Cor. 10:24). Guzéʼtenu ti ejemplu, cumu ca acomodador nga rindá primé ra local de asamblea ante chindá xcaadxi la? zándaca guquiinde laacaʼ cueecaʼ ca lugar jma galán para laacaʼ ne para familia sticaʼ. Lugar de ñúnicaʼ nga, stale de laacaʼ ruyúbicaʼ ca lugar ni huaxiéʼ galán ni nuu lu sección ni maʼ guca asignarcaʼ. Zacá rusihuínnicaʼ dxandíʼ nadxiicaʼ ne cadi cuyúbicaʼ para laasicaʼ. ¿Ñee nuu sti modo zanda chinándanu ejemplu stícabe la?

17. Pa dxandíʼ nadxii tuuxa ni maʼ biʼniʼ ti pecadu naroʼbaʼ, ¿xi zucaa ni laabe gúnibe?

¹⁷ Guininu ca pecadu ni bíninu nagaʼchiʼ ne gusaananu de gúninu cani. Nuu caadxi xpinni Cristu ni maʼ biʼniʼ xiixa pecadu naroʼbaʼ ruyúbicaʼ modo gucaachicaʼ ni para cadi guituílucaʼ ne para cadi guninacaʼ xcaadxi (Prov. 28:13). Peru ora gúnicabe zacá rusihuínnicabe cadi dxandíʼ nadxiicabe, purtiʼ cayuninácabe laca laacabe ne laaca cayuninácabe xcaadxi. Zándaca zaxeleʼ espíritu santu de laanu ne maʼ qué ziuu congregación tobi si (Efes. 4:30). Pa dxandíʼ nadxii ti xpinni Cristu ni maʼ biʼniʼ xiixa pecadu, zucaa ni laa guiniʼné ca ancianu para gacané laa (Sant. 5:14, 15).

18. ¿Pabiáʼ risaca nga gusihuínninu dxandíʼ nadxiinu?

¹⁸ Tobi de ca cualidad ni jma risaca ni naquiiñeʼ gapa ca xpinni Cristu nga guendarannaxhii (1 Cor. 13:13). Rusihuinni ni laanu nga cani dxandíʼ xpinni Jesús, ne cani rinanda ejemplu stiʼ Jiobá purtiʼ ra nuu cadá guendarannaxhii (Efes. 5:1, 2). Pablo bicaa pa qué gannaxhii qué zasaca guiráʼ ni runi (1 Cor. 13:2). Nga runi, «cadi gabi si nu nadxii nu binni sínuque gannaxhii nu laaca de idubi ladxidóʼ no ne usihuinni nu ni ra acané nu laacaʼ».