Luka
4 Manje uJesu, egcwele umoya ongcwele, wamuka eJordani, umoya wamholela ehlane+ 2 izinsuku ezingamashumi amane,+ elingwa+ uDeveli. Ngaphezu kwalokho, akadlanga lutho ngalezo zinsuku, ngakho, lapho ziphela, wazizwa elambile. 3 Khona-ke uDeveli wathi kuye: “Uma uyindodana kaNkulunkulu, tshela leli tshe ukuba libe yisinkwa.” 4 Kodwa uJesu wamphendula wathi: “Kulotshiwe ukuthi, ‘Umuntu akumelwe aphile ngesinkwa sodwa.’”+
5 Wamnyusa futhi wambonisa yonke imibuso yomhlaba owakhiweyo ngomzuzwana nje; 6 uDeveli wathi kuye: “Ngizokunika lonke leli gunya+ nenkazimulo yale mibuso, ngoba linikezwe mina, futhi ngilinika noma ubani engithanda ukumnika lona.+ 7 Ngakho-ke, uma wenza isenzo+ sokukhulekela phambi kwami, konke kuzoba okwakho.” 8 UJesu waphendula wathi kuye: “Kulotshiwe ukuthi, ‘NguJehova uNkulunkulu wakho+ okumelwe umkhulekele, futhi nguye yedwa okumelwe unikele kuye inkonzo engcwele.’”+
9 Manje wamholela eJerusalema wammisa phezu kombhoshongo+ wethempeli wathi kuye: “Uma uyindodana kaNkulunkulu, ziphonse phansi usuka lapha;+ 10 ngoba kulotshiwe ukuthi, ‘Uyoyaleza izingelosi zakhe ngawe, ukuba zikuvikele,’+ 11 nokuthi, ‘Ziyokuthwala ngezandla zazo, ukuze ungaluqhuzuli nanini unyawo lwakho etsheni.’”+ 12 UJesu waphendula wathi kuye: “Kuthiwa, ‘Ungamvivinyi uJehova uNkulunkulu wakho.’”+ 13 Ngakho uDeveli, eseqede konke ukulinga, wasuka kuye kuze kube esinye isikhathi esikahle.+
14 Manje uJesu wabuya esemandleni omoya waya eGalile.+ Izinkulumo ezinhle ngaye zasakazeka kulo lonke izwe elizungezile.+ 15 Wafundisa emasinagogeni abo, edunyiswa yibo bonke.+
16 Wafika eNazaretha,+ lapho ayekhulele khona; futhi, ngokwenqubo yakhe ngosuku lwesabatha, wangena esinagogeni,+ wasukuma ukuba afunde. 17 Wanikezwa umqulu womprofethi u-Isaya, wawuvula umqulu wathola indawo okwakulotshwe kuyo ukuthi: 18 “Umoya kaJehova+ uphezu kwami, ngoba ungigcobile ukuba ngimemezele izindaba ezinhle kwabampofu, ungithumé ukuba ngishumayele ukukhululwa ezithunjweni nokuvulwa kwamehlo ezimpumputhe, ukuba ngimukise abachotshoziweyo bekhululiwe,+ 19 ukuba ngishumayele unyaka owamukelekayo kaJehova.” + 20 Ngemva kwalokho wawugoqa umqulu, wawubuyisela esikhonzini wahlala phansi; amehlo abo bonke esinagogeni ayethe njó kuye. 21 Khona-ke wathi kubo: “Namuhla lo mbhalo enisanda kuwuzwa ugcwalisekile.”+
22 Bonke banikeza ubufakazi obuhle ngaye futhi bamangala ngamazwi amnandi+ ayephuma emlonyeni wakhe, bethi: “Lona uyindodana kaJosefa, akunjalo?”+ 23 Khona-ke wathi kubo: “Ngokungangabazeki niyosebenzisa lo mfanekiso kimi, ‘Dokotela,+ zelaphe; izinto+ esizwe ukuthi ziye zenzeka eKapernawume+ zenze nalapha endaweni yakini.’”+ 24 Kodwa wathi: “Ngiqinisile ngithi kini akekho umprofethi owamukelwayo endaweni yakubo. 25 Ngokwesibonelo, ngiqinisile ngithi kini, Kwakukhona abafelokazi abaningi kwa-Israyeli ezinsukwini zika-Eliya, lapho izulu livaleke iminyaka emithathu nezinyanga eziyisithupha, kangangokuba indlala enkulu yehlela phezu kwalo lonke izwe,+ 26 nokho, u-Eliya akathunyelwanga nakoyedwa kulabo besifazane, kodwa eZarefati+ kuphela, kumfelokazi othile ezweni laseSidoni. 27 Futhi, kwakukhona abanochoko abaningi kwa-Israyeli esikhathini sika-Elisha umprofethi, nokho akukho noyedwa kubo owahlambuluka, ngaphandle kukaNahamani umuntu waseSiriya.”+ 28 Manje bonke abezwa lezi zinto esinagogeni bathukuthela;+ 29 basukuma bamphuthumisa ngaphandle komuzi, bamyisa onqenqemeni lwentaba umuzi wakubo owawakhiwe kulo, ukuze bamphonse phansi ngekhanda.+ 30 Kodwa wadabula phakathi kwabo waqhubeka nendlela yakhe.+
31 Wehlela eKapernawume,+ umuzi waseGalile. Wabafundisa ngesabatha; 32 bakhexa ngendlela ayefundisa ngayo,+ ngoba wayekhuluma njengonegunya.+ 33 Manje esinagogeni kwakukhona umuntu owayenomoya,+ idemoni elingcolile, wamemeza ngezwi elikhulu wathi: 34 “Maye! Senzeni kuwe,+ Jesu mNazaretha?+ Ingabe uzele ukusibhubhisa? Ngazi+ kahle ukuthi ungubani, ungoNgcwele kaNkulunkulu.”+ 35 Kodwa uJesu wawukhuza, wathi: “Thula, uphume kuye.” Ngemva kokuphonsa lo muntu phansi phakathi kwabo, idemoni laphuma kuye lingamlimazanga.+ 36 Khona-ke, bonke bamangala, baqala ukuxoxa omunye nomunye, bethi: “Luhlobo luni lwenkulumo lolu, ngoba uyala omoya abangcolile ngegunya nangamandla, baphume?”+ 37 Ngakho izindaba eziphathelene naye zasakazekela yonke indawo.+
38 Esesukumile, waphuma esinagogeni wangena emzini kaSimoni. Manje umkhwekazi kaSimoni wayecindezelwe umkhuhlane onzima, ngakho bamcelela kuye.+ 39 Ngakho wamengama wawukhuza lowo mkhuhlane,+ wamyeka. Ngaso leso sikhathi wavuka waqala ukubakhonza.+
40 Kodwa lapho kushona ilanga, bonke ababenabantu abagulayo bephethwe izifo ezihlukahlukene babaletha kuye. Wabelapha ngokubeka izandla kulowo nalowo kubo.+ 41 Kwaphuma amademoni kwabaningi,+ ekhamuluka ethi: “Wena uyiNdodana+ kaNkulunkulu.” Kodwa, wawakhuza, engawavumeli ukuba akhulume,+ ngoba ayemazi+ ukuthi unguKristu.+
42 Nokho, lapho kusa, waphuma waya endaweni engenabantu.+ Kodwa izixuku zamthungatha zaze zafika lapho ayekhona, futhi zazama ukumbamba ukuba angamuki kuzo. 43 Kodwa wathi kuzo: “Nakweminye imizi kumelwe ngishumayele izindaba ezinhle zombuso kaNkulunkulu, ngoba yilokhu engathunyelwa kona.”+ 44 Ngakho waqhubeka eshumayela emasinagogeni aseJudiya.+