Isahluko Seshumi Nanye
Gcina Umkhaya Wakho Unokuthula
1. Yiziphi ezinye zezinto ezingabanga ukuhlukana emikhayeni?
BAYAJABULA labo abasemikhayeni enothando, ukuqonda, nokuthula. Sithemba ukuthi nowakho unjalo. Kuyadabukisa ukuthi imikhaya eminingi ayinjalo futhi ihlukene phakathi ngenxa yezizathu ezihlukahlukene. Yini ehlukanisa imikhaya phakathi? Kulesi sahluko sizoxoxa ngezinto ezintathu. Kweminye imikhaya, amalungu omkhaya awekho wonke enkolweni eyodwa. Kweminye, izingane zingase zibe nabazali abahlukene. Kanti kweminye, umshikashika wokuziphilisa noma isifiso sezinto ezibonakalayo ezengeziwe sibonakala sihlukanisa amalungu omkhaya. Nakuba kunjalo, izimo ezihlukanisa umkhaya othile zingase zingawuthinti omunye. Yini eyenza umehluko?
2. Abanye babhekaphi ukuze bathole isiqondiso ngokuphila komkhaya, kodwa imuphi umthombo ongcono kakhulu wesiqondiso esinjalo?
2 Esinye isici umbono wakho ngezinto. Uma uzama ngobuqotho ukuqonda umbono womunye, cishe uyobona ukuthi ungaba kanjani nomkhaya onobunye. Isici sesibili siwumthombo wakho wesiqondiso. Abantu abaningi balandela iseluleko sabantu abasebenza nabo, omakhelwane, abalobeli bamaphephandaba, noma ezinye iziqondiso ezingabantu. Nokho, abanye baye bathola lokho iZwi likaNkulunkulu elikushoyo ngesimo sabo, base bekusebenzisa abakufundile. Ukwenza lokhu kungawusiza kanjani umkhaya ukuba ube nokuthula?—2 Thimothewu 3:16, 17.
UMA UMYENI WAKHO ENOKHOLO OLUHLUKILE
3. (a) Siyini iseluleko seBhayibheli mayelana nokushada nomuntu osenkolweni ehlukile? (b) Yiziphi ezinye zezimiso eziyisisekelo ezisebenzayo uma umngane womshado oyedwa ekholwa omunye engakholwa?
3 IBhayibheli liseluleka ngokunamandla ngokungashadi nomuntu wenkolo ehlukile. (Duteronomi 7:3, 4; 1 Korinte 7:39) Nokho, kungenzeka ukuthi wafunda iqiniso leBhayibheli usushadile kodwa umyeni wakho akazange. Kuthiwani-ke? Yebo, izifungo zomshado zisasebenza. (1 Korinte 7:10) IBhayibheli ligcizelela ukuhlala njalo kwesibopho somshado futhi likhuthaza abantu abashadile ukuba baxazulule izinkinga zabo kunokuba bazibalekele. (Efesu 5:28-31; Thithu 2:4, 5) Kodwa-ke kuthiwani uma umyeni wakho ekwenqabela ngempela ukuba uqhube inkolo yeBhayibheli? Angase azame ukukuvimbela ukuba uye emihlanganweni yebandla, noma angase athi akafuni ukuba umkakhe ahambe indlu ngendlu, ekhuluma ngenkolo. Yini oyoyenza?
4. Inkosikazi ingabubonisa ngayiphi indlela ububele uma umyeni wayo engahlanganyeli ukholo lwayo?
4 Zibuze, ‘Kungani umyeni wami ezizwa ngendlela azizwa ngayo?’ (IzAga 16:20, 23) Uma engakuqondi ngempela okwenzayo, angase akhathazeke ngawe. Noma angase acindezelwe izihlobo ngoba ungasahlanganyeli emasikweni athile abalulekile kuzo. “Lapho ngingedwa endlini, ngazizwa ngilahliwe,” kusho indoda ethile. Lendoda yayinomuzwa wokuthi isilahlekelwa umkayo ngenxa yenkolo. Nokho ukuzazisa kwayivimbela ukuba ivume ukuthi inesizungu. Umyeni wakho angase adinge isiqinisekiso sokuthi uthando onalo ngoJehova alusho ukuthi usumthanda kancane manje kunangaphambili. Qikelela ukuthi uchitha isikhathi naye.
5. Yikuphi ukulinganisela okumelwe ibe nakho inkosikazi yendoda enenkolo ehlukile?
5 Nokho, kumelwe kucatshangelwe okuthile okubalu- leke ngokwengeziwe ukuze usisingathe ngokuhlakanipha isimo. IZwi likaNkulunkulu linxusa amakhosikazi: “Zithobeni kubayeni benu, njengoba kufaneleka eNkosini.” (Kolose 3:18) Ngaleyo ndlela lixwayisa ngomoya wokuzibusa. Ngaphezu kwalokho, ngokuthi “njengoba kufaneleka eNkosini,” lombhalo ubonisa ukuthi ukuthobela komuntu umyeni wakhe kufanele kuhambisane nokuthobela iNkosi. Kumelwe kube nokulinganisela.
6. Yiziphi izimiso okufanele zikhunjulwe inkosikazi engumKri- stu?
6 KumKristu, ukuba khona emihlanganweni yebandla nokufakaza kwabanye ngokholo lwakhe olusekelwe eBhayibhelini kuyizici ezibalulekile zokukhulekela kweqiniso okungafanele zishaywe indiva. (Roma 10:9, 10, 14; Heberu 10:24, 25) Yini-ke obungayenza uma umuntu ekuyala ngokuqondile ukuba ungayilaleli imfuneko ethile kaNkulunkulu? Abaphostoli bakaJesu Kristu bathi: “Kumelwe silalele uNkulunkulu njengombusi kunabantu.” (IzEnzo 5:29) Isibonelo sabo siyisandulela esisebenzayo ezimweni eziningi zokuphila. Ingabe uthando ngoJehova luyokushukumisela ukuba umnikeze ukuzinikela okumfanele? Ngesikhathi esifanayo, ingabe uthando nenhlonipho onayo ngomyeni wakho kuyokwenza ukuba uzame ukwenza lokhu ngendlela ayamukelayo?—Mathewu 4:10; 1 Johane 5:3.
7. Yikuphi ukuzimisela inkosikazi engumKristu okumelwe ibe nakho?
7 UJesu waphawula ukuthi kwakungeke kwenzeke ngaso sonke isikhathi lokhu. Waxwayisa ngokuthi ngenxa yokuphikiswa kokukhulekela kweqiniso, amalungu akholwayo eminye imikhaya ayeyozizwa ekhishwe inyumbazane, njengokungathi kungene inkemba phakathi kwawo namanye amalungu omkhaya. (Mathewu 10:34-36) Owesifazane othile eJapane wabhekana nalokhu. Kwase kuyiminyaka engu-11 ephikiswa umyeni wakhe. Wayemphatha ngendluzula futhi emkhiyela njalo ngaphandle. Kodwa wabekezela. Abangane ebandleni lobuKristu bamsiza. Wayethandaza engaphezi futhi wathola isikhuthazo esikhulu kweyoku-1 Petru 2:20. Lona wesifazane ongumKristu wayeqiniseka ukuthi uma ehlala eqinile, ngelinye ilanga umyeni wakhe wayeyohlanganyela naye ekukhonzeni uJehova. Nangempela kwaba njalo.
8, 9. Inkosikazi kufanele yenzenjani ukuze igweme ukubekela umyeni wayo izithiyo ezingadingekile?
8 Ziningi izinto ezingokoqobo ongazenza ukuze uthonye isimo sengqondo sowakwakho. Ngokwesibonelo, uma umyeni wakho ephikisana nenkolo yakho, ungamnikezi izizathu eziphathekayo zokukhononda ngezinye izinto. Gcina ikhaya lihlanzekile. Nakekela ukubukeka kwakho. Ungawagodli amazwi othando nokwazisa. Kunokuba ugxeke, sekela. Mbonise ukuthi ubheke kuye ukuba ahole. Ungaphindiseli uma unomuzwa wokuthi uye woniwa. (1 Petru 2:21, 23) Bonelela ukungapheleli kwakhe kobuntu, futhi uma kuba khona ukuphikisana, ngokuthobeka xolisa kuqala.—Efesu 4:26.
9 Ukuya kwakho emihlanganweni makungabi isizathu sokuba aphuze ukudla. Ungase ukhethe nokuhlanganyela enkonzweni yobuKristu ngezikhathi umyeni wakho angekho ngazo ekhaya. Kuwukuhlakanipha ngenkosikazi engumKristu ukugwema ukushumayeza umyeni wayo uma engathandi. Kunalokho, ilandela iseluleko somphostoli uPetru: “Nani bafazi, zithobeni kubayeni benu siqu, ukuze kuthi, uma bekhona abangalilaleli izwi, bazuzwe ngaphandle kwezwi ngokuziphatha kwabafazi babo, ngoba beye baba ofakazi bokuzibonela bokuziphatha kwenu okumsulwa kanye nenhlonipho ejulile.” (1 Petru 3:1, 2) Amakhosikazi angamaKristu asebenzela ukubonisa izithelo zomoya kaNkulunkulu ngokwengeziwe.—Galathiya 5:22, 23.
LAPHO INKOSIKAZI INGEYENA UMKRISTU
10. Indoda ekholwayo kufanele imphathe kanjani umkayo uma engowenkolo ehlukile?
10 Kuthiwani uma indoda ingumKristu inkosikazi ingeyena? IBhayibheli linikeza isiqondiso ezimweni ezinjalo. Lithi: “Uma kukhona umfowethu onomfazi ongakholwayo, kodwa nokho umfazi evuma ukuhlala naye, makangamshiyi.” (1 Korinte 7:12) Liphinde liyale amadoda: “Qhubekani nithanda omkenu.”—Kolose 3:19.
11. Indoda ingakubonisa kanjani ukuqonda futhi isebenzise ubunhloko ngokuhlakanipha kumkayo uma engeyena umKristu?
11 Uma ungumyeni wenkosikazi enenkolo ehlukile, kuqaphele ngokukhethekile ukubonisa inhlonipho ngomkakho nokucabangela imizwa yakhe. Njengomuntu omdala, ufanelwe isilinganiso esithile senkululeko yokuqhuba izinkolelo zakhe ezingokwenkolo, ngisho noma ungavumelani nazo. Lapho ukhuluma naye okokuqala ngenkolo yakho, ungalindeli ukuba alahle izinkolelo zakhe asenesikhathi eside ezikholelwa ukuze amukele ezintsha. Esikhundleni sokumbhozomela ngokuthi imikhuba yena nomkhaya wakubo abebelokhu bebambelele kuyo isikhathi eside ingamanga, zama ukubonisana naye ngemiBhalo ngesineke. Kungenzeka ukuthi uzizwa enganakiwe uma unikela isikhathi esiningi emisebenzini yebandla. Angase amelane nemizamo yakho yokukhonza uJehova, kanti umyalezo oyinhloko ungase ube ukuthi nje: “Ngidinga isikhathi sakho esengeziwe!” Bekezela. Ngokucabangela kwakho kothando, ngokuhamba kwesikhathi angase asizakale amukele ukukhulekela kweqiniso.—Kolose 3:12-14; 1 Petru 3:8, 9.
UKUQEQESHA IZINGANE
12. Nakuba indoda nenkosikazi behlukene ngezinkolo, kufanele bazisebenzise kanjani izimiso ezingokomBhalo ekuqeqesheni izingane zabo?
12 Emkhayeni ohlukene ngokukhulekela, ngezinye izikhathi kuba impikiswano ukufundiswa kwezingane ngenkolo. Izimiso ezingokomBhalo kufanele zisetshenziswe kanjani? IBhayibheli linikeza ubaba umthwalo wemfanelo oyinhloko wokufundisa izingane, kodwa umama naye unendima ebalulekile yokuyifeza. (IzAga 1:8; qhathanisa noGenesise 18:19; Duteronomi 11:18, 19.) Nakuba engabamukeli ubunhloko bukaKristu, ubaba useyinhloko yomkhaya.
13, 14. Uma indoda imnqabela umkayo ukuba aye nezingane emihlanganweni yobuKristu noma afunde nazo, yini angayenza?
13 Abanye obaba abangakholwa abaphikisi uma umama efundisa izingane izinto ezingokwenkolo. Abanye bayaphikisa. Kuthiwani uma umyeni wakho ekwenqabela ukuba uye nezingane emihlanganweni yebandla noma ekwenqabela ukuba ufunde nazo iBhayibheli ekhaya? Manje sekufanele ulinganisele ezibophweni eziningana—isibopho sakho kuJehova uNkulunkulu, ebunhlokweni bomyeni wakho, nasezinganeni zakho ezithandekayo. Ungakuvumelanisa kanjani lokhu?
14 Ngokuqinisekile uyothandaza ngalendaba. (Filipi 4:6, 7; 1 Johane 5:14) Kodwa ekugcineni, uwena okumelwe unqume ukuthi uthatha yiphi inkambo. Uma wenza ngokuhlakanipha, ukwenza kucace kumyeni wakho ukuthi awububekeli inselele ubunhloko bakhe, ukuphikisa kwakhe kungase kunciphe ekugcineni. Ngisho noma umyeni wakho ekwenqabela ukuba uye nezingane zakho emihlanganweni noma ukuba ube nesifundo esihleliwe seBhayibheli nazo, usengazifundisa. Ngengxoxo yansuku zonke nangesibonelo sakho esihle, zama ukugxilisa kuzo isilinganiso esithile sothando ngoJehova, ukholo eZwini lakhe, ukuhlonipha abazali—kuhlanganise noyise—ukukhathalela abanye abantu ngothando, nokwazisa imikhuba yokusebenza ngobuqotho. Ngokuhamba kwesikhathi, ubaba angase ayibone imiphumela emihle futhi angase ayibone inzuzo yemizamo yakho.—IzAga 23:24.
15. Uyini umthwalo wemfanelo kababa okholwayo ekufundiseni izingane?
15 Uma uyindoda ekholwayo umkakho engakholwa, khona-ke kumelwe uthwale umthwalo wemfanelo wokukhulisa izingane zakho “ngesiyalo nangokuqondisa umqondo kukaJehova.” (Efesu 6:4) Yiqiniso, ngesikhathi wenza lokho kufanele ube nomusa, nothando, futhi ube ocabangelayo lapho usebenzelana nomkakho.
UMA INKOLO YAKHO KUNGEYONA EYABAZALI BAKHO
16, 17. Yiziphi izimiso zeBhayibheli okumelwe izingane zizikhumbule uma zamukela inkolo ehlukile kweyabazali bazo?
16 Akuseyona into engavamile ngisho nangezingane ezincane ukuba zamukele imibono engokwenkolo engafani neyabazali bazo. Ingabe kunjalo ngawe? Uma kunjalo, iBhayibheli likuphathele iseluleko.
17 IZwi likaNkulunkulu lithi: “Lalelani abazali benu ebunyeni neNkosi, ngoba lokhu kulungile: ‘Dumisa uyihlo nonyoko.’” (Efesu 6:1, 2) Lokho kuhilela ukuhlonipha abazali okunempilo. Nokho, nakuba ukulalela abazali kubalulekile, akumelwe kwenziwe ngaphandle kokuqaphela uNkulunkulu weqiniso. Lapho ingane isikhule ngokwanele ukuba izenzele izinqumo, iba nesilinganiso esithe xaxá secala ngezenzo zayo. Lokhu akulona iqiniso ngomthetho wabantu kuphela kodwa kuyiqiniso ngokukhethekile mayelana nomthetho waphezulu. “Ngamunye wethu uyozilandisela kuNkulunkulu,” kusho iBhayibheli.—Roma 14:12.
18, 19. Uma izingane zisenkolweni ehlukile kweyabazali bazo, zingabasiza kanjani abazali bazo ukuba baluqonde kangcono ukholo lwazo?
18 Uma izinkolelo zakho zikwenza wenze izinguquko ezithile ekuphileni kwakho, zama ukuqonda umbono wabazali bakho. Cishe bayojabula uma, ngenxa yokufunda nokusebenzisa kwakho izimfundiso zeBhayibheli, uhlonipha ngokwengeziwe, ulalela ngokwengeziwe, ukhuthala ngokwengeziwe kulokho abathi kwenze. Nokho, uma ukholo lwakho olusha lukwenza ulahle izinkolelo namasiko abawathandayo bona, bangase babe nomuzwa wokuthi weya ifa abebefuna ukukunika lona. Bangase futhi basabele inhlalakahle yakho uma lokho okwenzayo kungathandeki emphakathini noma kukwenza ungazinaki izinto abanomuzwa wokuthi ziyokusiza uchume ngokwezinto ezibonakalayo. Ukuzazisa nakho kungaba isithiyo. Bangase babe nomuzwa wokuthi, empeleni, wena uthi wenza okufanele bona benza okungafanele.
19 Ngakho-ke, ngokushesha ngangokunokwenzeka, zama ukuhlela ukuba abazali bakho bazane nabanye babadala noma abanye oFakazi abavuthiwe ebandleni lakini. Khuthaza abazali bakho ukuba bavakashele eHholo LoMbuso ukuze bazizwele okufundwayo futhi bazibonele ngawabo ukuthi oFakazi BakaJehova bangabantu abanjani. Ngokuhamba kwesikhathi, isimo sengqondo sabazali bakho singase sithambe. Ngisho nalapho abazali bephikisa ngenkani, bonakalisa izincwadi zeBhayibheli, futhi benqabela izingane ukuba ziye emihlanganweni yobuKristu, ngokuvamile aba khona amathuba okufundela kwenye indawo, okukhuluma namaKristu ezikanye nawo, nawokufakaza nokusiza abanye ngokwethukela. Ungathandaza futhi kuJehova. Enye intsha kudingeka ilinde kuze kube yilapho isikhule ngokwanele ukuba ilishiye ikhaya ngaphambi kokuba yenze okwengeziwe. Nokho, kungakhathaliseki ukuthi siyini isimo ekhaya, ungakhohlwa ‘ukudumisa uyihlo nonyoko.’ Feza ingxenye yakho ekwenzeni kube nokuthula ekhaya. (Roma 12:17, 18) Ngaphezu kwakho konke, phishekela ukuthula noNkulunkulu.
INSELELE YOKUBA USINGAMZALI
20. Imiphi imizwa izingane ezingase zibe nayo uma uyise noma unina engusingamzali?
20 Emakhaya amaningi isimo esiyinselele kakhulu akusona esingokwenkolo kodwa esokuba usingamzali. Imikhaya eminingi namuhla yakhiwa izingane zasemshadweni wangaphambili womunye wabazali noma bobabili. Emkhayeni onjalo, izingane zingase zibe nesikhwele nentukuthelo noma mhlawumbe zingazi ukuthi zithembeke kubani. Ngenxa yalokho, zingase ziyidelele imizamo eqotho kasingamzali yokuba ubaba noma umama okahle. Yini engasiza yenze umkhaya wokutholwa uphumelele?
21. Naphezu kwezimo zabo ezingavamile, kungani osingamzali kufanele babheke ezimisweni zeBhayibheli ukuze bathole usizo?
21 Qaphela ukuthi naphezu kwezimo ezingavamile, izimiso zeBhayibheli eziletha impumelelo kweminye imikhaya ziyasebenza nalapha. Ukungazinaki lezo zimiso kungase kubonakale kuyixazulula inkinga okwesikhashana, kodwa cishe kuyoholela ebuhlungwini benhliziyo kamuva. (IHubo 127:1; IzAga 29:15) Hlakulela ukuhlakanipha nokuqonda—ukuhlakanipha kokusebenzisa izimiso zokuhlonipha uNkulunkulu ucabanga ngezinzuzo ezihlala njalo, nokuqonda kokubona ukuthi kungani amalungu omkhaya esho futhi enza izinto ezithile. Kukhona nesidingo sobubele.—IzAga 16:21; 24:3; 1 Petru 3:8.
22. Kungani izingane zingase zikuthole kunzima ukwamukela usingamzali?
22 Uma ungusingamzali, ungase ukhumbule ukuthi lapho usengumngane walomkhaya, cishe izingane zazikwamukela. Kodwa lapho uba usingamzali wazo, kungenzeka isimo sazo sengqondo sashintsha. Zikhumbula umzali wazo ozizalayo ongasahlali nazo, izingane zingase zilwe nokungazi ukuthi zithembeke kubani, mhlawumbe zinomuzwa wokuthi ufuna ukuzephuca uthando ezithanda ngalo umzali ongekho. Ngezinye izikhathi, zingase zikukhumbuze kabuhlungu ukuthi awuyena ubaba wazo noma umama wazo. Izinkulumo ezinjalo zibuhlungu. Nakuba kunjalo, “ungasheshi ukuthukuthela emoyeni wakho.” (UmShumayeli 7:9) Ukuqonda nobubele kuyadingeka ukuze ubhekane nemizwelo yezingane.
23. Ukuyala kungasingathwa kanjani emkhayeni onezingane zokutholwa?
23 Lezo zimfanelo zibalulekile lapho umuntu eyala. Isiyalo esingaguquguquki sibalulekile. (IzAga 6:20; 13:1) Futhi njengoba izingane zingafani, isiyalo singase sihluke kuye ngesimo. Abanye osingamzali bathola ukuthi kungaba ngcono, okungenani ekuqaleni, ukuba kube umzali wangempela osingatha lesi sici sokukhulisa ingane. Nokho, kubalulekile ukuba bobabili abazali bavumelane ngokuyala futhi banamathele kukho, ngamunye angathandi ingane ezalwa nguye kakhulu kunezalwa ngomunye. (IzAga 24:23) Ukulalela kubalulekile, kodwa kudingeka kubonelelwe ukungapheleli. Ungahluthuki. Yala ngothando.—Kolose 3:21.
24. Yini engasiza ekunqandeni izinkinga zokuziphatha emalungwini obulili obuhlukile emkhayeni wokutholwa?
24 Izingxoxo zomkhaya zingenza okukhulu ekuvimbeleni izinkathazo. Zingasiza umkhaya ukuba ugxile ezintweni ezibaluleke ngokwengeziwe ekuphileni. (Qhathanisa neyabaseFilipi 1:9-11.) Zingasiza ngamunye abone indlela angaba nengxenye ngayo ekufinyeleleni imigomo yomkhaya. Ngaphezu kwalokho, izingxoxo zomkhaya ezingagunci zingavimbela izinkinga zokuziphatha. Amantombazane kudingeka azi ukuthi kufanele agqoke kanjani lapho enosingayise nanoma ibaphi abafowabo bokutholwa, nabafana badinga iseluleko ngokuziphatha kahle kusinganina nakunoma ibaphi odadewabo bokutholwa.—1 Thesalonika 4:3-8.
25. Yiziphi izimfanelo ezingasiza zigcine ukuthula emkhayeni wokutholwa?
25 Ekubhekaneni nenselele ekhethekile yokuba usingamzali, bekezela. Kuthatha isikhathi ukwakha ubuhlobo obusha. Ukuzuza uthando nenhlonipho yezingane ongazizali kungaba umsebenzi omkhulu. Kodwa kungenzeka. Inhliziyo ehlakaniphile neqondayo, kanye nesifiso esijulile sokujabulisa uJehova, kuyisihluthulelo sokuthula emkhayeni wokutholwa. (IzAga 16:20) Izimfanelo ezinjalo zingakusiza ukuba ubhekane nezinye izimo.
INGABE IZINTO EZIBONAKALAYO ZIWUHLUKANISA PHAKATHI UMUZI WAKHO?
26. Izinkinga nezimo zengqondo mayelana nezinto ezibonakalayo zingawuhlukanisa ngaziphi izindlela umkhaya?
26 Izinkinga nezimo zengqondo ngezinto ezibonakalayo zingayihlukanisa ngezindlela eziningi imikhaya. Kuyadabukisa ukuthi eminye imikhaya ihlukaniswa izingxabano ezibangelwa imali nesifiso sokuceba—noma okungenani sokuceba kakhudlwana. Kungase kube khona ukuhlukana lapho bobabili abangane bomshado besebenza futhi behlakulela isimo sengqondo sokuthi “imali yami, imali yakho.” Ngisho noma izingxabano zigwenywa, uma bobabili abangane bomshado besebenza bangase bazithole benesimiso esibenza bangabi nesikhathi somunye nomunye. Ukuthambekela okwandayo emhlabeni okokuba obaba bahlale kude nemikhaya yabo isikhathi eside—izinyanga noma ngisho iminyaka—ukuze bahole imali eningi kunaleyo abebengayihola ekhaya. Lokhu kungaholela ezinkingeni ezingathi sína kakhulu.
27. Yiziphi ezinye zezimiso ezingasiza umkhaya ocindezelekile ngokwezimali?
27 Ayikho imithetho yokuxazulula lezi zimo engase ibekwe, ngoba imikhaya ehlukahlukene kudingeka ibhekane nokucindezeleka nezidingo ezihlukahlukene. Kodwa iseluleko seBhayibheli singasiza. Ngokwesibonelo, izAga 13:10 zibonisa ukuthi umshikashika ongadingekile ngezinye izikhathi ungagwenywa ‘ngokululekana.’ Lokhu akuhileli nje ukusho imibono yakho kodwa nokufuna iseluleko nokuthola ukuthi omunye umuntu uyibheka kanjani indaba. Ngaphezu kwalokho, ukwenza uhlelo lokusebenzisa imali olusebenzisekayo kungasiza ekuhlanganiseni imizamo yomkhaya. Ngezinye izikhathi kuyadingeka—mhlawumbe okwesikhashana—ukuba bobabili abangane bomshado bayosebenza ukuze banakekele izindleko ezengeziwe, ikakhulukazi lapho kunezingane noma abanye ababondlayo. Uma kunjalo, indoda ingaqinisekisa umkayo ukuthi isenaso isikhathi sakhe. Yona kanye nezingane ngothando bangasiza ngomunye umsebenzi abengawenza yedwa ngokuvamile.—Filipi 2:1-4.
28. Yiziphi izikhumbuzo okungathi uma zilalelwa zisize umkhaya usebenzele ukuba nobunye?
28 Nokho, khumbula ukuthi nakuba imali idingeka kulesi simiso sezinto, ayiyilethi injabulo. Ngokuqinisekile ayikunikezi ukuphila. (UmShumayeli 7:12) Ngempela, ukugcizelela ngokweqile izinto ezibonakalayo kungadala umonakalo ongokomoya nongokokuziphatha. (1 Thimothewu 6:9-12) Yeka ukuthi kungcono kanjani ukufuna uMbuso kaNkulunkulu kuqala nokulunga kwakhe, sinesiqiniseko sokuthi uyoyibusisa imizamo yethu yokuthola izidingo zokuphila! (Mathewu 6:25-33; Heberu 13:5) Ngokwenza izithakazelo ezingokomoya zize kuqala nangokuphishekela ukuthula noNkulunkulu kuqala, ungase uthole ukuthi nakuba umkhaya wakho mhlawumbe uhlukaniswe izimo ezithile, uyoba onobunye ngempela ngezindlela ezibaluleke kakhulu.
LEZI ZIMISO ZEBHAYIBHELI ZINGAWASIZA KANJANI . . . AMALUNGU OMKHAYA UKUBA AGCINE UKUTHULA EKHAYA?
AmaKristu ahlakulela ukuqonda.—IzAga 16:21; 24:3.
Ukubonisa kombhangqwana uthando nenhlonipho emshadweni akuxhomekile ekutheni ungowenkolo eyodwa yini.—Efesu 5:23, 25.
UmKristu akasoze aphula umthetho kaNkulunkulu ngamabomu.—IzEnzo 5:29.
AmaKristu angabenzi bokuthula.—Roma 12:18.
Ungasheshi uthukuthele.—UmShumayeli 7:9.
[Ibhokisi ekhasini 139]
IMISHADO EFANELE INIKEZA ISITHUNZI NOKUTHULA
Osukwini lwethu amadoda nabesifazane abaningi bahlala ndawonye njengendoda nenkosikazi ngaphandle kokuzibopha ngokomthetho. Umuntu osanda kukholwa kungase kudingeke abhekane nalesi simo. Kwezinye izimo ukuhlangana kungase kuvunyelwe umphakathi noma isiko lesizwe, kodwa akukho emthethweni. Nokho, indinganiso yeBhayibheli idinga ukuba umshado ubhaliswe ngendlela efanele. (Thithu 3:1; Heberu 13:4) Kubantu abasebandleni lobuKristu, iBhayibheli lithi futhi makube nendoda eyodwa nenkosikazi eyodwa efindweni lomshado. (1 Korinte 7:2; 1 Thimothewu 3:2, 12) Ukuzivumelanisa nalendinganiso kuyisinyathelo sokuqala sokuthola ukuthula emzini wakho. (IHubo 119:165) Izimfuneko zikaJehova azeqisi futhi aziwona umthwalo. Asifundisa khona kuklanyelwe ukusizuzisa.—Isaya 48:17, 18.
[Isithombe ekhasini 130]
Zama ukuqonda umbono womunye
[Isithombe ekhasini 138]
Kungakhathaliseki ukuthi ungumzali wangempela noma ungusingamzali, thembela eBhayibhelini ukuze uthole isiqondiso