’n Wyse spreuk

“Slaan jy die spotter, dan word die eenvoudige bedagsaam; maar bestraf jy die verstandige, dan sal hy kennis verkry.” Hierdie wyse stelling in Spreuke 19:25 vestig ons aandag op twee onderrig-metodes.

Voordat ’n onervare of ’n eenvoudige persoon sal leer dat hy oortreding moet vermy, sal hy dalk moet sien hoe ’n verstokte oortreder kwaai gestraf word. Hetsy daardie kragtige optrede die oortreder laat hervorm of nie, leer dit darem iets aan die eenvoudige. Dit sal waarskynlik vir hom ’n sterk afskrikmiddel wees. Die verstandige persoon het egter nie so ’n sterk waarskuwende les nodig nie. Dikwels is dit vir hom voldoende om privaat woorde van bestrawwing te hoor; hy aanvaar dadelik die raad en pas dit toe.

Talle ouers het al die waaragtigheid van hierdie woorde gesien, of hulle kan dit nog doen en daarby baat vind. Soms is streng dissipline soos ’n pak slae nodig (hetsy hy sien hoe ’n ander dit kry, of dit self kry) voordat ’n kind leer om ’n verkeerde weg te vermy. Maar in talle gevalle waar ’n kind voortdurend ferme, vormende teregwysing van sy ouers ontvang, vorder hy tot die punt waar hy uit ouerlike bestrawwing of raad kan leer. Dit op sigself sal dwarsdeur sy lewe ’n waardevolle les wees.