Valse godsdiens en oorlog

WARE aanbidders van Jehovah God strewe vrede met hulle medemens na. Dit is wat ons van hulle behoort te verwag, want vrede is ’n vrug van God se gees (Gal. 5:22). Maar in die geval van valse godsdiens is dit heeltemal ’n ander storie. Valse godsdiens het diep verwikkel geraak in die wêreld se botsinge en dit selfs aangemoedig. Godsdiensleiers het hulle volle ondersteuning en seën toegesê aan die verspilling van ander mense se bloed op die slagvelde. Dit is niks nuuts nie. Reeds in die tyd van eertydse Egipte was die heidense priesters voorstanders van oorlog.

E. A. Wallis Budge skryf oor die priesters van die valse god Amon-Ra (Amen-Ra): “Daar bestaan rede om te glo dat talle van die groot Egiptiese strooptogte in Sirië en Nubië net soseer uitgevoer is vir die doel om fondse te voorsien vir die instandhouding van die tempels, en -dienste, en priesters van Amen-Ra as wat dit gedoen is vir die eer en prestige van Egipte. Die slaafse verering van Amen-Ra deur die Totmese konings, en die Amen-heteps, en die Ramesse, en hulle kwistige gawes aan sy heiligdomme dui daarop dat dit in werklikheid sy priesters was wat die bewerkers van oorlog en vrede was.”—The Gods of the Egyptians, DI. II, bl. 12.