Jeremías
3 Pu che ramtuquei: “Quiñe huentru feipifi tañi domo ñi amutual. Feiti domo elcünueyu, fei niehui ca huentru engu. Ti hunen huentru, ¿mülei tañi huiñotual tañi domo engu?”.
Rüfcünu, com podcülei ti mapu, ¿felelai am?
“Eimi cudumuhuimi fentren huentru engün,
feula ¿mülei tami huiñotual iñche mu?” pi ta Jehová.
2 “Püraquintunge ca adquintufinge fillque huincul nienolu anümca.
¿Cheu nüntungelaimi?
Fei engün ñi duam mu anücünuuquefuimi ina rüpü mu,
quiñe che reque fill püle miyaulu huellin mapu mu.*
Tami conün pod cudumuhun ca tami huesa femün mu
amuleimi tami podümcafiel ti mapu.
3 Feimu ti fütra mahun catrütuniengei
ca mahunhuelai pehu mu.*
Pengelimi tami yehuenon, quiñe domo reque conlu pod cudumuhun mu.*
Pilaimi tami yehueleal.
4 Huelu feula llellipuen:
‘¡Chau, huechengelu iñchiu cüme hueniyehuiyu!
5 ¿Rumel illculepeafuimi mai?*
¿Mülei tami rumel huesa duamcüleal tami femngen mu?’.
Femngechi feipimi,
huelu fentecünuquelaimi tami femal huesaque dungu”.
6 Ti lonco ülmen Josías ñi antü mu, Chau Jehová feipieneu: “‘¿Pefimi ñi femün Israel trencül piuquengelu?* Pürai com fütraque huincul mu ca coni miñche com fütraque anümca mu tañi conal pod cudumuhun mu. 7 Israel femlu rume com tüfachi dungu, iñche feipimequefun ñi huiñotual iñche mu, huelu huiñolai. Ca Judá peniefui tañi lamngen manelfalngenolu. 8 Iñche pefilu tati ngünefalngenochi Israel ñi conün ñihuan dungu mu, feipifiñ ñi amutual ca elufiñ quiñe huirintucun tañi hudayafiel. Huelu tañi lamngen Judá ca manelfalngelai, fei llicalai rume. Cafei amui ca coni pod cudumuhun mu. 9 Huesa duamcülelai rume ñi conal pod cudumuhun mu. Amulei ñi podümcafiel ti mapu. Amulei ñi ñihuañpeteu reque poyefiel mu cura ca anümca. 10 Femlu rume, Israel ñi manelfalngenochi lamngen, Judá pingelu, huiñotulai iñche mu com piuque mu, re femfaluhui müten’ pi ta Jehová”.
11 Fei hula Chau Jehová feipieneu: “Tati ngünefalngenochi Israel doi pengeli tañi norngen tati manelfalngenochi Judá mu. 12 Amunge norte püle ca huldungunge tüfachi dungu:
‘Chau Jehová feipi: “Ahuem, ngünefalngenochi Israel, huiñotunge. Fei illculen adquintuulayaiñ. Iñche manelfal chengen. Rumel illculelayan” pi Chau Jehová. 13 “Caiñetufimi tami Chau Ngünechen Jehová, feimu entudungunge* tami culpan. Pu quimnoelchi che* cudumeimu miñche com fütraque anümca mu, huelu pilaimün tamün allcütual iñche tañi dungun” pi Chau Jehová’”.
14 Chau Jehová feipi: “Huiñotumün, pu yall* ngünefalngenolu. Iñche müten tamün ñidolngerpun.* Quisuque tamün huaria mu nüafiñ quiñe che ca quisuque familia mu nüafiñ epu che, fei cüpalafiñ engün Sion mu. 15 Ca eluafiñ camañfe* femquelu iñche tañi piel. Tüfa engün eluafingün quimün ca adümuhun iyael reque. 16 Feichi antü mu alün-ngerpuaimün ca fentren-ngeaimün mapu mu” pi Jehová. “Fei engün huiño feipilayaingün ‘¡Ti falin caja nielu Chau Jehová ñi eldungu!’. Raquiduamhuelayaingün ti falin caja mu, acordahuelayaingün, hueñancütuhuelayaingün ca huiño deumangehuelayai cangelu falin caja. 17 Feichi antü mu feipiaingün Jerusalén fei ta Chau Jehová ñi ülmen huancu. Com troquiñche trahulngeai Jerusalén mu tañi püramyeafiel Chau Jehová ñi üi. Inahuelayaingün chem ñi ayüqueel tañi huesa piuque”.
18 “Feichi antü mu pu Judá che ca pu Israel che quiñehun amuleaingün, trür miyahuaingün, quiñentrür tripatuaingün norte mülechi mapu, fei cüpayaingün ti mapu mu ñi elufiel tamün cuifiqueche ñi ngen-ngeal. 19 Iñche raquiduamün: ‘¡Fente tañi ayühun elcünueyu rangi tañi pu fotüm mu! ¡Elueyu ti ayüfalchi mapu, ti afmatufalchi mapu ñi ayüquefel caque troquiñche!’.* Cafei raquiduamün tamün feipimuafiel ‘¡Iñche tañi Chau!’, ca tamün rumel inaniemuafiel. 20 ‘Ahuem, pu Israel che, chumngechi quiñe domo ñihuañpefi tañi füta* ca elcünufi, ca femngechi eimün ñihuañpemun’ feipi Jehová”.
21 Fillque huincul nienolu anümca allcüngequei ñi huaqueñcülen che.
Pu Israel che ngümaquei ca llellipuquei.
Huesa rüpü inaingün.
Ngoimanentufingün* tañi Chau Ngünechen Jehová.
22 “Huiñotumün, pu yall ngünefalngenolu.
Iñche tremoltuhuaiñ* tamün yafü piuque”.
“Ahuem, Jehová, taiñ Chau Ngünechen ngeimi,
feimu ¡fau mülepaiñ! Eimi mu cüpaiñ.
23 Rüfcünu, chem ñi allcüngequen huincul ca fütraque huincul mu rüfngelai.
Rüfcünu, taiñ Chau Ngünechen Jehová montulafi ta Israel.
24 Taiñ pu cuifiqueche nehuentu cüdahuingün, huelu petu huechengelu iñchiñ ta fantepu mu ti falinochi dios* müntuñmafi* com tañi nierpuel engün,
tañi pu quechan culliñ, tañi pu huaca,
tañi pu fotüm ca tañi pu ñahue.
25 Cuduaiñ taiñ yehuen mu
ca taiñ huesaque dungu tacuaiñmu.
Petu huechengelu iñchiñ ta fantepu mu,
iñchiñ ca taiñ pu chau culpaiñ* taiñ Chau Ngünechen Jehová mu.
Allcütuquelafiyiñ taiñ Chau Ngünechen Jehová ñi dungun”.