Jeremías
21 Jeremías llohui Chau Jehová ñi dungun. Feichi mu ti lonco ülmen Sedequías huercüfi ta Pasjur ca ti sacerdote Sofonías ñi pemeafiel ta Jeremías. Pasjur fei ta Malkías ñi fotüm. Sofonías fei ta Maaseya ñi fotüm. Sedequías feipifalfi Jeremías tüfachi dungu: 2 “Nabucodonosor,* Babilonia ñi lonco ülmen, lefcontueiñmu. Feimu, füreneen, ramtuafimi ta Chau Jehová chem taiñ rupayal. Chau Jehová femafui chi quiñe afmatun dungu taiñ quelluaeteu ca dicümtucuafui* tañi amutual”.
3 Jeremías feipieyu engu: “Feipiafimu ta Sedequías tüfachi dungu: 4 ‘Tüfa ñi feipin Jehová, Israel ñi Chau Ngünechen: “Babilonia ñi lonco ülmen lefcontueimünmu ca pu Caldea che hualloñmaeimünmu* huecun püle ti fütra cura malal.* Cafei eimün nüniefimün fillque hueichahue* tamün incañpehual. Huelu iñche tañi pin mu tamün hueichahue huesalcayaimünmu ca trahulafiñ* rangi tüfachi huaria mu. 5 Iñche mai, tañi cuhu ca tañi nehuen mu quehuatuhuaiñ. Lladcün ca rume fütra illcun mu quehuatuhuaiñ. 6 Hulelcayafiñ pu che mülelu tüfachi huaria mu, pu huentru ca pu culliñ. Quiñe huesa cutran langümayu”’.
7 ‘Chau Jehová ca feipi: “Ti huesa cutran mu, fütra cuchillo ca ngüñün mu mongetripayai che. Tüfa ta Sedequías, feita Judá ñi lonco ülmen, quiñeque tañi pu cüdaufe ca quiñeque che mülelu tüfachi huaria mu. Huelu iñche tañi pin mu huehuayu engün Nabucodonosor,* tüfa Babilonia ñi lonco ülmen, quiñentrür tañi pu caiñe ca tati pu che ayülu ñi langümaeteu. Fei langümafi fütra cuchillo mu. Cafei cutranpiuqueyelayafi ca huesa duamcülelayai rume”’.
8 Feipiafimi tüfachi pu che: ‘Tüfa ñi feipin Chau Jehová: “Tamün adquiñ mu elcünun ti rüpü yenielu ñi mongeleal ca ti rüpü yenielu tañi layal. 9 Pu che mülehuelu tüfachi huaria mu layaingün fütra cuchillo, ngüñün cam huesa cutran mu. Huelu inei rume tripale huaria mu ca eluule tañi huehuaeteu pu Caldea che huall püle mülelu, mongetripayai, fei montuai tañi mongen hueichan mu”’.
10 ‘Chau Jehová feipi: “Eluhun tañi huercüafiel fillque cutrancahun tüfachi huaria mu, huercülayan cümeque dungu. Hultucungeai Babilonia ñi lonco ülmen tañi cuhu mu, fei lüpümafi cütral mu”.
11 Pu che mülelu Judá ñi lonco ülmen tañi ruca mu: allcütumün Chau Jehová ñi dungun. 12 Ahuem, David ñi pu che, tüfa ñi feipin Chau Jehová:
“Fill pulihuen incayafimün ti nor dungu.
Pu ngünencachequelu ñi cuhu mu lifrenentuafimün pu hueñeñmangelu.
Femngechi tañi fütra illcun* üilayai* quiñe cütral reque.
Fei üile, inei no rume chongümlayafui
tamün huesa femün ñi duam mu”’.
13 ‘Ahuem, che mülelu laf mapu mu,* fau chaftupaeyu.
Ahuem, cura mülelu laf mapu mu’ feipi ta Jehová.
‘Eimün, pu feipiquelu “¿Inei nagai taiñ caiñetuaeteu?
¿Inei malocontuaiñmu taiñ ruca?”,
14 tamün femün mu
castigahuaiñ’ pi Chau Jehová.
‘Cütraltuafiñ tami mahuida,
ca com tañi hualloñmanieteu üiconai’”.