Jeremías
4 Chau Jehová feipi: “Ahuem, Israel, huiñofulmi,
huiñofulmi iñche mu
ca entufulmi tami ünufal adentun* iñche tañi adquiñ mu,
fentecünuai tami lefmauquiyahun.
2 Cafei rüf dungu ca nor dungu mu feipicünulmi:*
‘¡Taiñ mongelechi Chau Jehová ñi üi mu!’,
pu troquiñche cümelcangeai fei tañi duam mu,
ca ayühunquechi dungucheaingün tañi ineingen”.
3 Chau Jehová feipifi pu Judá ca Jerusalén huentru tüfachi dungu:
“Quetrayaimün tamün cüme mapu
ca nganhuelayaimün rangi troltro meu.
4 Pu Judá huentru ca pu Jerusalén che,
liftuhuaimün* Chau Jehová ñi adquiñ mu
ca liftuaimün tamün piuque,
femngechi tañi illcun* cütral reque üilayai*
tamün huesa femün mu.
Ca üile, inei no rume pepi chongümlayafi”.
5 Huldunguaimün Judá ca Jerusalén mu.
Huiraraimün ca dungulafimün ti cullcull com troquiñ mapu mu.
Nehuen mu feipiaimün: “Trahuluumün,
amuaiñ ti huaria nielu fütra cura malal.*
6 Huitrañpüramaimün quiñe orcon* amulelu* Sion püle.
Quintuaimün cheu tamün ellcahual* ca huitracünuulayaimün”,
norte püle cüpalan cutrancahun, quiñe fütra apümcahun.
7 Quisu peufaluhui quiñe trapial reque tripalu mahuida mu,
tripai tati apümcaquefilu pu troquiñche.
Cheu tañi mülen tripai tañi llicafalngetual tami mapu.
Tami pu huaria teifücalehueai, ngehuelayai che tiye mu.
8 Feimu tucuaimün sacu tacun,*
hueñancüleaimün* ca tamün cutrancahun mu huiraraimün,
Chau Jehová ñi fütra illcun püntütripalai* iñchiñ mu.
9 Chau Jehová feipi: “Feichi antü ti lonco ülmen
ca pu principe ñi piuque nehuen-ngehuelayai.
Cafei pu sacerdote pellquelehueai* ca pu huerquen afmatulehueai”.
10 Fei feipin: “¡Ahuem, Doi Fütra Ñidol Jehová! Eimi feipimi ‘Cüme feleaimün’, huelu epe langümngeiñ fütra cuchillo mu, femngechi rüf ngünencafimi com tüfachi troquiñche ca pu Jerusalén che”.
11 Feichi antü mu tüfachi troquiñche ca pu Jerusalén che feipingeai:
“Fillque huincul nienolu anümca huellin mapu mu* cüpayai quiñe are cürüf,
fei pimuafi reque iñche tañi ñahue, tañi troquiñche,
huelu ütrüfpüramlayafi ca liftulayafi ti quetran.
12 Iñche tañi pin mu, ti cürüf nehuentu cüpai feichi lof mu.
Feula iñche juzgayafiñ engün.
13 ¡Ngüneduamaimün! Quisu cüpayai quiñe tromü mahun reque,
ca tañi pu carretela* quiñe cürüftucu mahun reque cüpayai.
Tañi pu cahuellu doi matu lefquei pu ñamcu mu.
¡Aungeiñ iñchiñ, pepi chumlaiñ rume!
14 Ahuem, Jerusalén, tami montual, liftunge tami huesa femün ñi mülen tami piuque mu.
¿Tuntepuai* tami huesa raquiduamcülen?
15 Dan püle tripai quiñe dungun quimeltuchequelu
ca Efraín ñi huincul püle feipi ñi müleal cutrancahun.
16 Feipiafimün pu troquiñche,
huldungulelafimün ta Jerusalén”.
17 Fei caiñetueneu, feimu huall püle hualloñmangeai* tañi pu huaria
chumngechi hualloñmangequei lelfün mu pu cüdaufe” pi ta Chau Jehová.
18 “Chem tami femün contupayaimu.
¡Rume huesa duamün-ngei tami cutrancahun,
rüfcünu puhui tami piuque mu!”.
19 ¡Ay fotrü, huesa duamcülen! ¡Huesa duamcülen!
Rume cutrantupiuquelen.
Nehuentu trefcüi tañi piuque.
20 Com ti troquiñ mapu apümcangei,
feimu quimelngei ñi rupan fillque cutrancahun.
Feica müten apümcangei iñche tañi tolto ruca,*
matu apümcangei tañi pañu tolto ruca.
21 ¿Tunteñma peniean ti orcon amulelu* Sion püle?
¿Tunteñma allcütuniean ti cullcull ñi dungun?
22 Chau Dios feipi: “Tañi troquiñche huedhued chengei,
allcütulaeneu tañi feipin.
Trüri engün ta fotüm nienolu quimün ca adümuhun.
Rume münaleingün* tañi huesa femal,
huelu quimlaingün tañi cüme femal”.
23 Adquintufiñ ti mapu ca ngüneduamün ñi huellilen.
Püraquintun ti huenu, fei ngehuequelafui tañi pelon.
24 Adquintufiñ fütraque huincul ca pefiñ ñi nüyülen*
ca ñi mütroulen fillque huincul.
25 Adquintufiñ, fei quiñe che no rume pelafiñ,
ca com pu üñüm* cañpüle amutui.
26 Adquintufiñ ca pefiñ ti tucucahue huellin mapu reque feletui,
ca teifücangei com tañi huaria.
Chau Jehová femi tüfa,
fütra illculelu cai.
27 Tüfa ñi feipin Chau Jehová: “Com tüfachi mapu huellilehuetuai,
huelu com apümcalayafiñ.
28 Feimu ti mapu rume hueñancüleai
ca dumiñnagai ti huenu.
Iñche ta feipicünun, dullin tañi chumal,
caletulayan tañi feipin ca huitrautulayan rume.
29 Com pu huaria che lefmahui,
allcülu ñi huirarün pu püracahuellulelu ca pu adümquelu arco.
Mahuida püle ellcahui pu che
ca püraingün cura mu.
Com huaria huelliletui
ca mülehuelai che tiye mu”.
30 Feula apümcangeimi, fei ¿chem chumaimi?
Cuifi tucutuuquefuimi quelü tacun,
tucuquefuimi oro llancatu
Huelu famentueimu* pu huentru ayülu tami cudumaeteu,
feimu ngünam adngequefuimi.
Feula ayünieingün tami langümaeteu.
31 Allcün ñi huirarün che. Trüri quiñe domo reque cutrancülelu,
cutrancaumequei quiñe domo reque choyüfilu ñi hunen püñeñ.
Sion tañi püñeñ huirari, ngellu neyüquei.
Petu fampuhul-lu tañi cuhu, feipi:
“¡Aungen mai ta iñche! ¡Ngañhuadcülen* pu langümchefe ñi duam mu!”.