Jeremías

34 Jeremías llohui Chau Jehová ñi dungun. Feichi mu Nabucodonosor,* tüfa Babilonia ñi lonco ülmen, com tañi pu hueichafe,* com gobierno mapu mu tañi ngüneniefiel ca com pu troquiñche hueichamequefi ta Jerusalén ca com tañi fillque huaria. Tüfachi dungu feipingei ta Jeremías:

2 “Tüfa ñi feipin Jehová, Israel ñi Chau Ngünechen: ‘Amunge ca dungufinge Sedequías, Judá ñi lonco ülmen. Feipifinge: “Tüfa ñi feipin Jehová: ‘Iñche tañi pin mu Babilonia ñi lonco ülmen huehuafi tüfachi huaria ca lüpümafi cütral mu. 3 Rüfcünu presungeaimi ca hultucungeaimi ti lonco ülmen ñi cuhu mu. Eimi montulayaimi. Adquintuafimi tañi nge Babilonia tañi lonco ülmen, tüfa dunguaimu fei tami leliniefiel. Amuaimi Babilonia mu’. 4 Huelu allcütunge Chau Jehová ñi dungun, ahuem, Sedequías, Judá ñi lonco ülmen: ‘Tüfa ñi feipin Jehová eimi mu: “Fütra cuchillo mu lalayaimi. 5 Tüngcülen* layaimi, ca tami eluhun mu quiñe fütra cütral deumalelngeaimi chumngechi femngei tami pu chau, pu lonco ülmen mülelu petu tami mülenon ta eimi. Pu che hueñancüaingün ca feipiaingün ‘¡Aungeiñ, taiñ ñidol!’. Tüfa rupayai ‘Iñche feipilu cai tüfachi dungu’ pi Chau Jehová”’”’”.

6 Jerusalén mu, Jeremías, Chau Ngünechen ñi huerquen, feipifi com tüfachi dungu ta Sedequías, Judá ñi lonco ülmen. 7 Feichi mu Babilonia ñi lonco ülmen tañi pu hueichafe quehuaquefingün ta Jerusalén, com Judá ñi fillque huaria mülehuelu, Lakís ca Azecá. Judá mu feichi huaria müten nierquefui fütra cura malal.*

8 Jeremías llohui Chau Jehová ñi dungun. Feichi mu ti lonco ülmen Sedequías eldungucünufi com pu Jerusalén che, feipicünui tañi lifrecünuafiel pu esclavo, 9 femngechi caque quiñeque che lifrecünuafui tañi pu hebreo esclavo, pu huentru ca pu domo, femngechi quiñe che no rume esclavocünulayafui cangelu judio. 10 Fei com pu principe ca com pu che inafingün tüfachi huercün dungu. Feipicünuingün ñi huechurpual ti eldungu, fei ñi lifrecünuafiel pu esclavo ca pu esclava, femngechi esclavongehuelayai engün. Inaingün ti huercün dungu ca lifrecünufingün. 11 Huelu rupachi antü mu huiño cüpaltufingün pu esclavo ca pu esclava ñi lifrecünufiel. Fei obligafingün ñi huiño esclavongetual. 12 Feimu Jeremías llohui Chau Jehová ñi dungun. Jehová feipieyu:

13 “Tüfa ñi feipin Jehová, Israel ñi Chau Ngünechen: ‘Egipto mapu mu entufiñ tamün pu cuifiqueche, cheu esclavongefuingün. Feichi antü eldungucünufiñ engün ca feipifiñ: 14 “Ti 7 tripantu mu, com eimün mülei tamün lifrecünuafiel quisuque tamün hebreo peñi tamün ngillafiel. Rupale hula 6 tripantu tamün cüdahueleteu, mülei tamün lifrecünuafiel”. Huelu tamün pu cuifiqueche allcütulaingün ca inalaingün tañi feipin. 15 Huelu nehue chumül müten* eimün norümtuimün tamün raquiduam. Cüme femimün iñche tañi adquiñ mu, fei lifrecünufimün tamün chafche.* Iñche tañi adquiñ mu femimün quiñe eldungu, ti ruca mu yenielu tañi üi. 16 Huelu fei hula huiño huitrautuimün,* fei yamhuelafimün* tañi üi. Lifrecünufuimün pu esclavo ca pu esclava chumngechi tañi ayünieel engün, huelu obligafimün tañi huiño esclavongetual’.

17 Feimu tüfa ñi feipin Chau Jehová: ‘Eimün allcütumulan, lifrecünulafimün tamün pu peñi ca tamün chafche’. Chau Jehová feipi: ‘Feula lifrecünuhuaiñ ta eimün, lifrecünuhuaiñ tamün layal fütra cuchillo mu, cutran ca ngüñün mu. Com gobierno mapu mu llicayaingün tamün femngen mu. 18 Feipicünuhuaiñ chem ñi rupayal tüfachi pu huentru huechurpunolu tañi eldungu. Feichi eldungucünulu engün, 2 troquiñ mu catrüingün ti pichi culliñ* ca rangiñ mu rupaingün, huelu fei engün inalaingün chem ñi eldungucünuel iñche tañi adquiñ mu. 19 Tüfa ta com pu che rupalu rangiñ ti pichi culliñ mu: Judá ñi pu principe, Jerusalén ñi pu principe, pu cüdauquelu ülmen ruca mu, pu sacerdote ca com pu che mülelu troquiñ mapu mu. 20 Hultucuafiñ engün tañi pu caiñe ñi cuhu mu ca tañi pu cüpa langümeteu. Pu üñüm* ca pu culliñ iyafi tañi lachi cuerpo. 21 Iñche tañi pin mu, hueungeai ta Sedequías, tüfa Judá ñi lonco ülmen, ca tañi pu principe. Femngechi femayu tañi pu caiñe, tañi pu cüpa langümeteu ca pu hueichafe amuletulu ca serfiquefilu Babilonia ñi lonco ülmen’.

22 Chau Jehová feipi: ‘Iñche tañi pin mu huiño cüpaltuafiñ engün tüfachi huaria mu. Tüfa engün lefcontuafi ti huaria, nüafi ca lüpümafi cütral mu. Iñche tañi pin mu Judá ñi fillque huaria huelliletuai, ngehuelayai che’”.