Jeremías

35 Jehoiaquim ñi antü mu, tüfa Josías ñi fotüm, Judá ñi lonco ülmen, Jeremías llohui Chau Jehová ñi dungun. Feipingei: 2 “Amunge, pemeafimi pu Recab che ñi familia, dunguafimi ca yeafimi engün Chau Jehová ñi ruca mu, quiñe pieza mu cheu ñi iquen che, fei eluafimi pulcu”.

3 Feimu yefiñ ta Jaazanías, tüfa Jeremías ñi fotüm, Habazinías tañi lacu,* tañi pu peñi, com tañi pu fotüm ca com pu Recab che ñi familia. Com engün yefiñ 4 Chau Jehová ñi ruca mu. Yefiñ cheu ñi iquen Hanán ñi pu fotüm, tüfa Igdalías ñi fotüm, Chau Ngünechen ñi huerquen. Yefiñ engün inafül cheu ñi iquen pu principe mülelu huente cheu ñi iquen Maaseya, Salum ñi fotüm, ti cuidaquelu puerta. 5 Tucun fasu ca copa apolelu pulcu mu adquiñ püle pu Recab huentru, ca feipifiñ engün: “Putuaimün* pulcu”.

6 Huelu tüfa engün feipingün: “Putulayaiñ pulcu. Jehonadab,* Recab ñi fotüm, taiñ cuifiqueche, feipieiñmu tüfachi huercün dungu: ‘Eimün ca tamün pu fotüm turpu putulayaimün pulcu. 7 Cafei deumalayaimün ruca, nganlayaimün, anümlayaimün ca nielayaimün anümca ofad. Doi mai rumel müleaimün tolto ruca mu,* femngechi alüñmayaimün ti mapu mu, cheu tamün mülen ca cüpanche reque’. 8 Feimu iñchiñ inaniefiyiñ ñi feipin Jehonadab, tüfa taiñ cuifiqueche Recab ñi fotüm. Inaniequefiyiñ com taiñ huercüeteu. Iñchiñ, taiñ pu domo, taiñ pu fotüm ca taiñ pu ñahue turpu putuquelaiñ pulcu. 9 Cafei deumalaiñ ruca taiñ müleal fei mu, nielaiñ anümca ofad, lelfün ca fün. 10 Petu müleiñ tolto ruca mu. Inaniequeiñ com taiñ feipieteu Jehonadab,* taiñ cuifiqueche. 11 Huelu Nabucodonosor,* Babilonia ñi lonco ülmen, hueichamefilu* ti troquiñ mapu, feipiyiñ: ‘Amuaiñ. Conpuaiñ Jerusalén mu taiñ montual pu Caldea ca pu Siria hueichafe mu’. Feula müleiñ Jerusalén mu”.

12 Ca Jeremías llohui Chau Jehová ñi dungun. Feipingei: 13 “Tüfa ñi feipin Jehová, Ñidolcülelu pu hueichafe mu, Israel ñi Chau Ngünechen: ‘Amunge ca feipiafimi pu Judá huentru ca pu Jerusalén che: “Fentren rupa feipingeimün tamün inanieafiel iñche tañi feipin, ¿felei no am?” pi Chau Jehová. 14 “Jehonadab, Recab ñi fotüm, huercüfi tañi pu cüpanche ñi putunoal pulcu. Fei engün inaniequefingün tañi feipin, feimu putulaingün pulcu ta fantepu mu. Femngechi huechurpuingün chem tañi feipieteu tañi cuifiqueche. Huelu iñche fentren rupa dunguhuiyiñ, huelu eimün inalaimün iñche tañi feipin. 15 Fentren rupa huercüleluhuiyiñ com tañi pu huerquen tamün feipiafiel: ‘¡Fürenemuchi! ¡Quisuque eimün elcünumün tamün huesa rüpü ca cümeque dungu femaimün! Poyelayafimün caquelu dios ca serfilayafimün, femngechi amuleaimün tamün müleal tüfachi mapu mu, feiti mapu tañi elufiel ta eimün ca tamün cuifiqueche’. Huelu eimün inalaimün ca allcütulaimün tañi feipin. 16 Pu che tuhun-ngelu Jehonadab mu, tüfa Recab ñi fotüm, huechurpuingün chem tañi feipieteu tañi cuifiqueche. Huelu tüfachi pu che allcütulaeneu iñche”’”.

17 “Feimu tüfa ñi feipin Jehová, Ñidolcülelu pu hueichafe mu, Israel ñi Chau Ngünechen: ‘Huercülelafiñ pu Judá che ca com pu Jerusalén che ti huesa dungu tañi feipicünufiel. Iñche dungulelfiñ, huelu allcütulaeneu engün. Mütrümfiñ,* huelu huiñoldungulaeneu engün’”.*

18 Fei Jeremías feipifi pu Recab che: “Tüfa ñi feipin Jehová, Ñidolcülelu pu hueichafe mu, Israel ñi Chau Ngünechen: ‘Eimün inaniefimün chem tamün huercüeteu Jehonadab, tamün cuifiqueche. Inaniequefimün com tamün feipieteu. Cüme huechurpuimün com tamün huercüeteu. 19 Feimu, tüfa ñi feipin Jehová, Ñidolcülelu pu hueichafe mu, Israel ñi Chau Ngünechen: “Rumel müleai che tuhun-ngelu Jehonadab mu,* tüfa Recab ñi fotüm. Fei serfiai iñche tañi adquiñ mu”’”.