Jeremías

36 Jehoiaquim, Josías ñi fotüm, Judá ñi lonco ülmen, yeniefui 4 tripantu tañi ngünenieel, feichi mu Jeremías llohui Chau Jehová ñi dungun. Feipingei: 2 “Nüfinge quiñe chumpol lifru* ca huirintucunge com tañi feipiel iñche tañi chaftuafiel ta Israel, Judá ca com ti troquiñche. Huirintucunge chem feipieyu feichi hunen antü petu ngünenielu Josías ta fantepu meu. 3 Fei pu Judá che allcütule com tati huesa dungu tañi cüpa huercüfiel, elcünuafuingün chi tañi huesa rüpü. Femngechi femle engün, rulpacünuafiñ tañi huelulcan ca tañi culpan”.*

4 Fei Jeremías mütrümfi* ta Baruc, Nerías ñi fotüm, ca feipifi ñi huirintucual com ñi feipieteu Chau Jehová. Fei Baruc huirintucufi quiñe chumpol lifru mu. 5 Fei Jeremías feipifi ta Baruc: “Iñche elungelan* ñi conpual Chau Jehová ñi ruca mu. 6 Feimu eimi mülei tami conpual ca nehuentu dungun mu papeltuaimi Chau Jehová ñi dungu mülelu ti chumpol lifru mu. Iñche feipieyu tami huirintucual feichi dungu. Papeltuaimi tañi allcütual pu che mülelu Chau Jehová ñi ruca mu, feichi antü ngüñüluule engün. Femngechi papeltulelafimi com pu Judá che cüpalu tañi fillque huaria mu. 7 Chau Jehová rume illcutuniefi* tüfachi pu che, huelu tañi llellipun engün puhuafui chi Chau Jehová mu ca quisuque engün elcünuafui tañi huesa rüpü”.

8 Fei Baruc, Nerías ñi fotüm, femi com ñi huercüeteu Jeremías, Chau Ngünechen ñi huerquen. Chau Jehová ñi ruca mu, nehuentu dungun mu papeltui Chau Jehová ñi feipin mülelu ti chumpol lifru mu.

9 Jehoiaquim, Josías tañi fotüm, Judá ñi lonco ülmen, yeniefui 5 tripantu ca 9 cüyen tañi ngünenieel. Feichi mu com pu Jerusalén che ca com pu che mülelu Judá ñi fillque huaria mu acuingün Jerusalén mu. Tüfa engün huercüngei ñi ngüñüluhual Chau Jehová ñi adquiñ mu. 10 Chau Jehová ñi ruca mu, Baruc nehuentu dungun mu papeltui Jeremías ñi feipin mülelu ti chumpol lifru mu. Fei papeltui ñi allcütual com pu che. Femi tüfa Guemarías ñi pieza mu,* tüfa Safán ñi fotüm, tati huirintucuquelu Chau Ngünechen ñi huirintucun. Tiye mu ca mülefui ti doicülechi lepün* mülelu conhue püle ti hue puerta Chau Jehová ñi ruca mu.

11 Micaya, Guemarías ñi fotüm, Safán ñi lacu,* allcüi com ñi feipin Jehová ti chumpol lifru mu. Feica müten 12 amui ti lonco ülmen ñi ruca mu, ti secretario ñi pieza mu. Tiye mu anülerquei com pu principe:* ti secretario Elisamá, Delayá, tüfa Semaya ñi fotüm, Elnatán, tüfa Acbor ñi fotüm, Guemarías, tüfa Safán ñi fotüm, Sedequías, tüfa Hananías ñi fotüm ca com pu caquelu principe. 13 Micaya feipifi pu principe com ñi feipin Baruc papeltulelfilu pu che ti chumpol lifru.

14 Fei hula com pu principe dungufi ta Jehudí, tüfa Netanías ñi fotüm, Selemías ñi fotüm, Cusí ñi fotüm. Pu principe huercüfingün ta Jehudí ñi feipiafiel ta Baruc: “Cüpange ca cüpalaimi ti chumpol lifru tami papeltulelfiel pu che”. Fei Baruc, Nerías tañi fotüm, nüfi ti chumpol lifru ca amui cheu tañi mülen engün. 15 Pu principe feipieyu: “Füreneen, anünagnge. Papeltulelmuaiñ”. Fei Baruc papeltulelfi engün.

16 Allcütulu müten com ñi feipin, llicaingün, peniehuingün ca feipifingün ta Baruc: “Mülei taiñ feipiafiel ti lonco ülmen com tüfachi dungu”. 17 Ramtufingün ta Baruc: “¿Jeremías feipieimu tami huirintucual com tüfachi dungu? Fürenemuaiñ, feipimuaiñ”. 18 Baruc huiñoldungui:* “Mai, fei feipieneu com tüfachi dungu ca iñche tinta mu huirintucufiñ tañi feipin tüfachi chumpol lifru mu”. 19 Pu principe feipifingün ta Baruc: “Eimi ca Jeremías amuaimu ca ellcahuaimu.* Inei no rume quimlayai cheu tamu mülen”.

20 Fei hula pemefingün ti lonco ülmen lepün püle. Guardacünufingün ti chumpol lifru ti secretario Elisamá ñi pieza mu ca feipifingün ti lonco ülmen com tañi allcütuel.

21 Ti lonco ülmen cüpalelen ti chumpol lifru pifi ta Jehudí. Fei Jehudí entufi ti chumpol lifru ti secretario Elisamá ñi pieza mu ca cüpalfi, fei hula papeltulelfi ti lonco ülmen ca com pu principe huitralelu inafül ti lonco ülmen. 22 Tüfa rupai 9 cüyen mu,* ti lonco ülmen mülefui tañi puquem ruca mu ca inafül brasero anülerquei. 23 Jehudí fentecünulu ñi papeltual 3 cam 4 troquiñ ti chumpol lifru, ti lonco ülmen catrücaquefui feichi troquiñ quiñe cuchillo mu pünequelu ti secretario. Fei cütraltuquefui brasero mu, femngechi cütraltungei brasero mu com ti chumpol lifru. 24 Ti lonco ülmen ca pu cüdaufe allcütulu com ñi feipin ti chumpol lifru llicalaingün ca huichafcalaingün* tañi tacun. 25 Elnatán, Delayá ca Guemarías llellipufingün ti lonco ülmen ñi cütraltunoal ti chumpol lifru, huelu allcütulaeyu engün. 26 Doi mai ti lonco ülmen dungufi ta Jerahmeel, tüfa ti lonco ülmen tañi fotüm, Seraya, tüfa Azriel tañi fotüm, ca Selemías, tüfa Abdeel tañi fotüm. Ti lonco ülmen huercüfi engün ñi nüafiel ti secretario Baruc ca Jeremías, Chau Ngünechen ñi huerquen, huelu Chau Jehová ellcaniefi engu.

27 Ti lonco ülmen cütraltufilu ti chumpol lifru nielu chem tañi feipifiel Jeremías ta Baruc, fei hula Jeremías ca huiño llohui Chau Jehová tañi dungun. Feipingei: 28 “Quintunge cangelu chumpol lifru ca huirintucunge chem ñi feipin ti hunen chumpol lifru, feichi chumpol lifru ñi cütraltuel Jehoiaquim, Judá ñi lonco ülmen. 29 Ca feipiaimi tüfachi dungu tami chaftuafiel ta Jehoiaquim, Judá ñi lonco ülmen: ‘Tüfa ñi feipin Chau Jehová: “Eimi cütraltufimi tüfachi chumpol lifru ca feipimi: ‘Huirintucuimi ñi cüpayal Babilonia ñi lonco ülmen, ñi apümcayafiel tüfachi mapu, fei ñi ngehuenoal huentru ca culliñ, ¿chumngelu* femngechi huirintucuimi?’. 30 Feimu tüfa ñi feipin Chau Jehová ñi chaftuafiel ta Jehoiaquim, Judá ñi lonco ülmen: ‘Ngelayai inei no rume anüalu David ñi ülmen huancu mu. Tañi lachi cuerpo tranaleai are antü mu ca trangliñ pun meu. 31 Castigayafiñ ta Jehoiaquim tañi culpan mu, cafei tañi pu cüpanche ca tañi pu cüdaufe. Huercüafiñ engün, pu Jerusalén che ca pu Judá huentru com tati huesaque dungu tañi feipicünufiel, huelu allcütulaingün’”’”.

32 Feimu Jeremías nierpui cangelu chumpol lifru ca elufi ti secretario Baruc, tüfa Nerías tañi fotüm. Fei Baruc huirintucui fei mu chem tañi feipieteu Jeremías: com ñi feipin ti chumpol lifru ñi cütraltuel Jehoiaquim, Judá ñi lonco ülmen. Ca huirintucungei fentren caquelu femngechi dungu.