Jeremías

37 Ngüneniehuenolu Jehoiaquim ñi fotüm, Conías pingelu,* eluhui ñi ngünenieal ti lonco ülmen Sedequías, tüfa Josías ñi fotüm. Fei Nabucodonosor,* Babilonia ñi lonco ülmen, lonco ülmencünueyu Judá mapu mu. 2 Huelu Sedequías, tañi pu cüdaufe ca tati pu che allcütulaingün chem tañi feipieteu Chau Jehová ti huerquen Jeremías mu.

3 Ti lonco ülmen Sedequías dungufi ta Jehucal, tüfa Selemías ñi fotüm, ca Sofonías, tüfa Maaseya ñi fotüm, ti sacerdote. Sedequías huercüfi engu ñi feipiafiel ti huerquen Jeremías: “Fürenemuaiñ, llellipuafimi taiñ Chau Ngünechen Jehová iñchiñ taiñ duam mu”. 4 Fei Jeremías lifreyauquefui rangi pu che meu. Petu presuntucungelafui. 5 Feichi mu faraon ñi pu hueichafe* tripaingün Egipto mu. Fei pu Caldea che hualloñmafilu* Jerusalén quimingün tüfa, feimu amutuingün Jerusalén mu. 6 Fei hula Jeremías, Chau Ngünechen ñi huerquen, llohui Chau Jehová ñi dungun. Feipingei: 7 “Tüfa ñi feipin Jehová, Israel ñi Chau Ngünechen: ‘Judá ñi lonco ülmen huercüeimünmu tamün ramtupayafiel. Fei feipiafimün tüfa: “Faraón ñi pu hueichafe cüpalei tamün quellupayaeteu, huelu mülei tañi huiñotual Egipto mu, tañi mapu meu. 8 Pu Caldea che huiñotuaingün, hueichayafi tüfachi huaria, nürpuafingün ca lüpümafingün”. 9 Tüfa ñi feipin Chau Jehová: “Quisu ngünencaulayaimün ca feipiulayaimün: ‘Rüfcünu, pu Caldea che amutuaingün, fei lefcontuhuelayaiñmu’. Huelu amutulayaingün. 10 Eimün apümcafilmün rume com pu Caldea hueichafe tamün lefcontueteu ca re mülefule Caldea huentru allfülelu, tüfa engün tripayafui tañi tolto ruca mu,* fei lüpümafingün tüfachi huaria”’”.

11 Pu Caldea hueichafe amutulu Jerusalén mu Faraón ñi pu hueichafe tañi duam mu, 12 fei Jeremías tripai Jerusalén mu ca amui Benjamín mapu mu. Ayüfui tañi llohual chem tañi elungeafel rangi tañi pu che mu. 13 Huelu puulu Benjamín ñi Puerta püle, mülefui ti loncolechi soltau Iriya pingelu, feita Selemías ñi fotüm, Hananías ñi fotüm. Fei nüfi ti huerquen Jeremías ca feipifi: “¡Eimi quelluntucuquefimi pu Caldea che!”. 14 “¡Femlai, rüfngelai! Quelluntucuquelan pu Caldea che” pieyu Jeremías. Huelu Iriya allcütulaeyu. Nüfi ta Jeremías ca yefi cheu ñi mülen pu principe. 15 Pu principe rume illcutufi* ta Jeremías, hulelcafingün, fei presuntucufingün. Yefingün ti secretario Jehonatán ñi ruca mu, tüfa quiñe carcelngetui. 16 Lolo mu elcünufingün ta Jeremías, cheu ñi mülen celda miñche mapu mu. Tiye mu mülenagi fentren antü.

17 Fei hula ti lonco ülmen Sedequías huercüi ñi cüpalngeal Jeremías ca ellcanquechi* ramtucafi tañi ruca mu.* Ramtufi: “Chau Jehová, ¿feipieimu quiñeque dungu?”. Jeremías huiñoldungui:* “¡Mai!”. Ca feipi: “¡Hultucungeaimi Babilonia ñi lonco ülmen tañi cuhu mu!”.

18 Jeremías ca feipifi ti lonco ülmen Sedequías: “¿Chem dungu mu culpan* eimi mu, tami pu cüdaufe ca tüfachi pu che mu, fei tañi presuntucungeal? 19 Tamün pu huerquen feipicünueimünmu: ‘Babilonia ñi lonco ülmen lefcontulayaimünmu ca lefcontulayafi tüfachi mapu’, huelu feula ¿cheu mülei tamün pu huerquen? 20 Ahuem, tañi ñidol, lonco ülmen, feula füreneen, allcütuen. Eluen chem tañi pediel, llellipueyu. Huiño huercülayaen ti secretario Jehonatán ñi ruca mu. Tiye mu layan”. 21 Feimu ti lonco ülmen Sedequías huercüi ñi presungeal pu Soltau ñi Lepün mu.* Fill antü elungequefui quiñe cofque deumalu ti rüpü mu cheu ñi mülen pu deumaquelu cofque, aflu hula ti cofque huaria mu. Fei Jeremías mülenagi pu Soltau ñi Lepün püle.