Jeremías

38 Sefatías fei ta Matán ñi fotüm. Guedalías fei ta Pasjur ñi fotüm. Jucal fei ta Selemías ñi fotüm. Pasjur fei ta Malkiya ñi fotüm. Tüfa engün allcüingün Jeremías ñi dungun, chem tañi feipifiel com pu che: 2 “Tüfa ñi feipin Chau Jehová: ‘Ti che mülenagle tüfachi huaria mu, layai fütra cuchillo mu, ngüñün ca cutran mu. Huelu ti che eluule ñi huehuaeteu pu Caldea che, amuleai ñi mongelen. Montuai ñi mongen ca mongeleai’. 3 Tüfa ñi feipin Chau Jehová: ‘Pu hueichafe* cüdahuelfilu Babilonia ñi lonco ülmen rüf huehuafingün tüfachi huaria, fei nürpuafi’”.

4 Pu principe feipifingün ti lonco ülmen: “Fürenemuiñ, langümfalfinge feichi huentru. Tañi feipin mu afelmequefi pu hueichafe mülehuelu tüfachi huaria ca com pu che. Tüfachi huentru ayülai ñi cüme feleal tüfachi pu che, ayüquei ñi huesalcangeal engün”. 5 Ti lonco ülmen Sedequías feipi: “Tüfa tañi mülen, eimün tamün cuhu mu. Ti lonco ülmen chem no rume femlayafui tamün catrütuaeteu”.

6 Feimu nüfingün ta Jeremías ca ütrüftucufingün Malkiya ñi rünganco,* tüfa ti lonco ülmen ñi fotüm. Ti rünganco mülefui pu Soltau ñi Lepün püle,* fei llasu mu nacümfingün.* Ti rünganco nielafui co, re fotra müten,* feimu Jeremías ñamconmequefui fotra mu.

7 Mülerquefui quiñe Etiopía huentru, Ébed-Mélec pingelu, fei cüdauquefui ti lonco ülmen ñi ruca mu.* Tüfachi huentru quimi ñi tucungeel Jeremías rünganco mu. Feichi mu ti lonco ülmen anülerquei Benjamín ñi Puerta püle. 8 Fei Ébed-Mélec tripai ti lonco ülmen ñi ruca mu ca feipieyu: 9 “¡Ahuem, tañi ñidol, lonco ülmen! ¡Feichi pu huentru rume huesalcafingün ta Jeremías, Chau Ngünechen ñi huerquen! Ütrüftucungei rünganco mu, ca üyeu entrin mu layai. Deu ngehuelai cofque huaria mu”.

10 Fei hula ti lonco ülmen huercüfi ta Ébed-Mélec, ti Etiopía huentru: “Feipifinge 30 huentru tami compañaeteu, ca entumefinge rünganco mu ta Jeremías, Chau Ngünechen ñi huerquen, petu tañi lanon”. 11 Feimu Ébed-Mélec yefi pu huentru ca amui ti lonco ülmen ñi ruca mu, quiñe pieza mu miñche cheu ñi ngülümngequen falinque fillem. Tiye mu entuingün huesaquelu ca catrücalechi pañu, fei llasu mu nacümelfingün Jeremías rünganco mu. 12 Feimu Ébed-Mélec, ti Etiopía huentru, feipifi ta Jeremías: “Füreneen, tucunge ti huesaquelu ca ti catrücalechi pañu tami punpuya* ca ti llasu mu”. Jeremías femi. 13 Fei hula pu huentru püramfingün Jeremías llasu mu ca entufingün ti rünganco. Fei Jeremías mülenagi pu Soltau ñi Lepün püle.

14 Ti lonco ülmen Sedequías cüpange ti cülangechi conhue feipifalfi ta Jeremías, Chau Ngünechen ñi huerquen. Feichi conhue mülerquefui Chau Jehová ñi ruca mu. Ti lonco ülmen feipifi ta Jeremías: “Ramtuayu quiñe dungu. Chem no rume ellcalayaen”.* 15 Jeremías feipifi ta Sedequías: “Feipieliyu, rüfcünu langümaen. Ngülamtueliyu, allcütulayaen”. 16 Fei Sedequías ellcanquechi feipicünufi* ta Jeremías: “Chau Dios elueiñmu ta mongen,* feimu taiñ mongelechi Chau Jehová ñi üi mu feipicünueyu, iñche langümlayayu ca hultuculayayu feitachi pu huentru ayülu tami langümaeteu”.

17 Fei hula Jeremías feipifi ta Sedequías: “Tüfa ñi feipin Jehová, Ñidolcülelu pu hueichafe mu, Israel ñi Chau Ngünechen: ‘Eluhulmi tami huehuaeteu pu principe cüdahuelfilu Babilonia ñi lonco ülmen, mongetripayaimi. Tüfachi huaria lüpümngelayai, cafei eimi ca tami pu che lalayaimün. 18 Huelu eluunolmi tami huehuaeteu pu principe cüdahuelfilu Babilonia ñi lonco ülmen, pu Caldea che huehuafi tüfachi huaria ca lüpümafingün. Eimi montulayaimi fei engün ñi cuhu mu’”.

19 Fei hula ti lonco ülmen Sedequías feipifi ta Jeremías: “Llicaquefiñ pu judio che quelluntucuquefilu pu Caldea che. Hultucungeli tañi cuhu mu, fei engün rume huesalcayafeneu chi”. 20 Huelu Jeremías feipi: “Hultucungelayaimi fei engün tañi cuhu mu. Füreneen, inafinge Chau Jehová ñi dungu ca femnge chem tami feipieteu. Femngechi cüme amuleaimi ca mongeleaimi. 21 Huelu eluunolmi tami hueungeal, Chau Jehová pengeleleneu tami rupayal tüfachi dungu: 22 entungeai com pu domo mülehuelu Judá ñi lonco ülmen tañi ruca mu, fei yelelngeai pu principe cüdahuelfilu Babilonia ñi lonco ülmen. Pu domo feipimequeaingün:

‘Tami pu manelfal huentru ngünencaeimu ca huehueimu.

Fei engün ñi femün mu ñamconi tami namun fotra meu.

Feula huiñotuingün tañi amutual’.

23 Com tami pu domo ca tami pu fotüm hultucungeai pu Caldea che mu. Eimi montulayaimi tañi cuhu mu, doi mai Babilonia ñi lonco ülmen nüaimu, ca eimi tami duam mu lüpümngeai tüfachi huaria”.

24 Fei hula Sedequías feipifi ta Jeremías: “Inei no rume feipilayafimi tüfachi dungu, fei tami langümngenoal. 25 Cafei pu principe quimle tayu nütramcahun ca feipielmu: ‘Füreneen, feipimuaiñ chem tami feipifiel ti lonco ülmen. Chem no rume ellcalayaimi, fei langümuulayaiñ. ¿Chem pieimu ti lonco ülmen?’ feipingelmi, 26 huiñoldungulelafimi engün:* ‘Llellipufiñ ti lonco ülmen ñi huiño huercünoaeteu Jehonatán tañi ruca mu, fei ñi lanoal tiye mu’”.

27 Rupachi antü, com pu principe pepafingün Jeremías ca ramtucafingün. Fei Jeremías feipieyu com tañi feipieteu ti lonco ülmen. Feimu pu principe ramtuhuelafingün. Quiñe no rume allcüquelafui ñi nütramcahun engu. 28 Jeremías mülenagi pu Soltau ñi Lepün mu, hueungelu hula Jerusalén huaria. Nüngelu tüfachi huaria, Jeremías petu mülefui tiye mu.