Jeremías

39 Sedequías, Judá ñi lonco ülmen, yeniefui 9 tripantu ca 10 cüyen tañi ngünenieel. Feichi mu Jerusalén mu cüpai Nabucodonosor,* tüfa Babilonia ñi lonco ülmen, ca com tañi pu hueichafe,* fei hualloñmafingün* ti huaria.

2 Sedequías yenielu 11 tripantu tañi ngünenieel, feichi 9 antü conchi 4 cüyen mu, conpuingün ti huaria ñi fütra cura malal mu.* 3 Fei com pu principe cüdahuelfilu Babilonia ñi lonco ülmen conpuingün ca anüpuingün Rangi mülechi Conhue. Mülefui ti samgar Nergal-Sarézer, ti rabsaris Nebo-Sarsekim, ti rabmag* Nergal-Sarézer ca com pu caquelu principe cüdahuelfilu Babilonia ñi lonco ülmen.

4 Sedequías, Judá ñi lonco ülmen, ca com pu soltau pefi engün, feica müten leftripaingün huaria mu. Pun meu tripaingün ti lonco ülmen ñi ayüfalchi lof mu, puerta püle mülelu rangi ti 2 fütra cura malal, fei amuingün ti rüpü püle puulu Arabá mapu mu. 5 Huelu pu Caldea hueichafe inantucueyu engün ca dintucufingün Sedequías Jericó ñi laf mapu püle* huellin mapu mu.* Nüfingün ca yefingün Riblá mu, Hamat mapu meu, cheu ñi mülen Nabucodonosor,* Babilonia ñi lonco ülmen. Tiye mu condenangei. 6 Riblá mu, Babilonia ñi lonco ülmen langümfalfi Sedequías ñi pu fotüm, quisu tañi adquiñ mu. Cafei langümfalfi com Judá ñi pu yamfal huentru.* 7 Fei hula traumalfi ta Sedequías ca traricünufi cobre cadena mu tañi yetuafiel Babilonia mu.

8 Fei pu Caldea che lüpümfingün ti lonco ülmen ñi ruca ca tati pu che ñi ruca. Cafei teifücafingün Jerusalén ñi fütra cura malal. 9 Nebuzaradán, ti loncolechi soltau, Babilonia mu yetufi pu che mülehuelu huaria mu, pu quelluntucufilu ta Babilonia ca com pu caquelu che.

10 Huelu Nebuzaradán, ti loncolechi soltau, elcünufi Judá mapu mu quiñeque che doi pofrelelu, pu che chem no rume nienolu. Feichi antü ca elufi engün anümca ofad ca mapu tañi cüdahual.*

11 Huelu Nabucodonosor, Babilonia ñi lonco ülmen, dungufi ta Nebuzaradán, ti loncolechi soltau. Huercüfi chem tañi femngeal Jeremías. Feipifi: 12 “Yemeafimi ca cuidayafimi. Huesalcalayafimi. Eluafimi com tañi pediel”.

13 Feimu Nebuzaradán, tüfa ti loncolechi soltau, ti rabsaris* Nebusazbán, ti rabmag* Nergal-Sarézer ca com pu falin huentru cüdahuelfilu Babilonia ñi lonco ülmen, huercüingün 14 ñi entungeal Jeremías pu Soltau ñi Lepün püle.* Fei hula feipifingün ta Guedalías ñi yeafiel tañi ruca mu ta Jeremías. Guedalías fei ta Ahicam ñi fotüm, Safán ñi fotüm. Feimu Jeremías mülerquefui rangi pu che meu.

15 Presuntuculelu Jeremías pu Soltau ñi Lepün püle, llohui Chau Jehová ñi dungun. Feipingei: 16 “Amunge ca feipiafimi ta Ébed-Mélec, ti Etiopía huentru: ‘Tüfa ñi feipin Jehová, Ñidolcülelu pu hueichafe mu, Israel ñi Chau Ngünechen: “Huechunenturpuan chem tañi feipicünufiel tüfachi huaria, feman huesaque dungu, cümeque dungu no. Feichi antü peaimi ñi huechunenturpun”’.

17 ‘Huelu feichi antü montulayu ca hultucungelayaimi tañi cuhu mu pu huentru tami llicalcaeteu’ pi Chau Jehová.

18 ‘Iñche rüf lifrenentuayu ca langümngelayaimi fütra cuchillo mu. Eimi maneluhuimi iñche mu, feimu montuai tami mongen’ pi Chau Jehová”.