Jeremías
5 Huall püle amumün Jerusalén ñi rüpü mu.
Huall püle adquintumün ca ngüneduamaimün.
Plaza püle quintumün,
fei ¿peafuimün mai quiñe che nor dungu femquelu
ca püntütripaquenolu* Chau Dios mu?
Pefilmün, iñche perdonayafiñ pu huaria che.
2 Feipile rume engün: “¡Taiñ mongelechi Chau Jehová ñi üi mu!”,
coila feipicünuaingün* tañi chumal.
3 Ahuem, Chau Jehová, eimi quintuquefimi ñi manelfalngeal che.
Feimu hulelcafimi, huelu duamcülelaingün rume.*
Apümcafimi, huelu pilaingün tañi norümngeal.
Doi yafü piuquengeingün* fütra cura mu,
fei pilaingün tañi huiñotual.
4 Huelu feipihun: “Feiti pu che quimeltungelaingün.
Quimlaingün Chau Jehová ñi rüpü ca tañi Chau Ngünechen ñi juician dungu,
feimu huedhued reque femqueingün.
5 Dungumeafiñ pu falinque huentru.
Fei engün mülefui ñi ngüneduamal Chau Jehová ñi rüpü,
tañi Chau Ngünechen ñi juician dungu.
Huelu com trafocaingün ti yucu,
fei catrüingün tañi coyunda”.
6 Feimu quiñe trapial mülelu mahuida mu lefcontueyu engün.
Laf mapu püle* huellin mapu mu* quiñe auca trehua* huirüfcamequeyu engün.*
Quiñe fütra auca ñarqui üngümnieyu* inafül tañi fillque huaria engün.
Com pu che tripalu huaria mu huirüfcangei,
fentrelelu tañi culpan.*
Fentren rupa püntütripaingün* Chau Dios mu.
7 ¿Chumngechi perdonayafeyu tüfachi dungu mu?
Tami pu fotüm elcünueneu
ca feipicünuingün tañi chumal coila dios ñi duam mu.
Iñche elufiñ com tañi duamnieel,
huelu fentecünulaingün ñi conal ñihuan dungu mu,
fei quiñentrür amuingün quiñe domo pod mongen yenielu,* quisu tañi ruca mu.
8 Potro reque duamtulu ñi yegua,
ca femngechi rume ayüñmafingün ñi cudumafiel tañi carucatu ñi domo.
9 “¿Juiciantucunoafulu iñche tañi femün mu engün?” pi ta Jehová.
“¿Huiñoleltunoafulu iñche chem tañi femün tüfachi troquiñche?”.
10 “Amumün cheu ñi mülen anümca ofad Jerusalén mu tamün apümcayafiel,
huelu com apümcalayafimün.
Entuafimün ti choyün* tripalelu,
ngen-ngenolu cai ta Chau Jehová.
11 Com pu Israel che ca com pu Judá che
ngünencaeneu” pi Chau Jehová.
12 “Quiñepülecünufingün ta Jehová ca feipiyauqueingün:
‘Fei chumlayai rume.*
Contulayaiñmu chem huesa dungu no rume.
Pelayaiñ hueichan* ca filla no rume’.
13 Chau Ngünechen ñi pu huerquen fill huesa pimequei,
nielaingün Chau Ngünechen ñi dungu.
Ngehuelayai engün chumngechi ngehuelai tañi feipin”.
14 Feimu Jehová, Ñidolcülelu pu hueichafe mu, feipi:
“Tañi feipin mu tüfachi pu huentru,
feula iñche tañi pin mu cütral reque feleai tañi dungun eimi tami hun mu,
cafei tüfachi pu che mamüll reque feleai,
fei cütral mu lüpümngeaingün”.
15 “Ahuem, pu Israel che, camapu mu cüpalan quiñe troquiñche tamün caiñetuaeteu” pi Chau Jehová.
“Feichi troquiñche fütra cuifi ñi mülen.
Quiñe cuifi troquiñche tati,
nieingün quiñe quehun dungu tami quimnofiel.
Dungule tüfachi troquiñche, eimi adümquelafimi.
16 Cheu ñi yeniequen tañi flecha engün nülalechi rüngan reque felei.
Com engün hueichafengei.
17 Lümüaingün tamün cosecha ca tamün cofque.
Lümüaingün tamün fotüm ca tamün ñahue.
Lümüaingün tamün quechan culliñ ca tamün huaca.
Lümüaingün tamün anümca ofad ca tamün higuera.
Fütra cuchillo mu apümcayafingün tamün fillque huaria nielu fütra cura malal,* feichi huaria tamün maneluuquen”.
18 “Huelu acule rume feichi antü, com apümcaulayaiñ” pi Jehová. 19 “Ramtule engün ‘Taiñ Chau Ngünechen Jehová, ¿chemu femeiñmu com tüfachi dungu?’, eimi feipiafimi engün ‘Eimün quisu tamün mapu mu elcünumun tamün poyeafiel cangelu dios, ca femngechi quiñe mapu tamün ngen-ngenoel, eimün serfiafimün pu ca cüpanche’”.
20 Tüfachi dungu huldunguafimün Jacob ñi pu cüpanche
ca huldungulelafimün pu Judá che. Feipiaimün:
21 “Pu huedhued che quimchengenolu, allcütumün tüfa,
nieimün nge, huelu pepi pelolaimün,
nieimün pilun, huelu pepi allcütuquelaimün.
22 ‘¿Yamniemulan cai?’* pi Chau Jehová.
‘¿Llicalenoafulu eimün iñche tañi adquiñ mu?
Iñche elcünun ti cuyüm cheu ñi fentepual ti lafquen.
Tüfa quiñe huercün dungu reque felei rumel mülequelu, fei ñi tripanoal ti lafquen.
23 Huelu tüfachi pu che trencül piuquengei* ca ngünefalngelai,*
elcünuingün iñche tañi rüpü ca inaingün quisu tañi rüpü.
24 Feipiquelaingün tañi piuque mu:
“Feula yamafiyiñ taiñ Chau Ngünechen Jehová,
fei hulquei ta mahun puuchi antü,
hulquei mahun rimu ca pehu meu.*
Fei feipicünui ñi müleal semana taiñ cosechayal”.
25 Tamün huelulcan mu cüpahuelai tüfachi dungu.
Tamün culpan mu* nielaimün cümeque dungu.
26 Rangi tañi troquiñche mu mülei huesaque huentru.
Lloftulei engün,* chumngechi pochongnagquei* pu nüquefilu üñüm.*
Tucuqueingün quiñe huachi ñi langümal.
Nüqueingün pu che.
27 Tañi ruca apolei reque ngünencan dungu mu,
chumngechi apolei quiñe jaula üñüm mu.
Feimu ricungetuingün ca nehuen-ngetuingün.
28 Motringetuingün ca pañushngetui tañi trahua.
Re huesaque dungu femquei.
Ñi cüme amuleal tañi mongen engün,
incaquelafingün pu cuñifall
ca juzgaquelafingün pu pofre nor dungu mu’”.
29 “¿Juiciantucunoafulu iñche tañi femün mu engün?” pi ta Jehová.
“¿Huiñoleltunoafulu iñche chem tañi femün tüfachi troquiñche?
30 Troquiñ mapu mu rupai quiñe rume huesa dungu yehuefalngelu:
31 pu huerquen huldunguingün coilaque dungu
ca pu sacerdote allmalltui tañi cüdau mu ñi ngünenieafiel pu che.
Iñche tañi pu che rume ayüniefi tüfachi dungu.
Huelu, ¿chem chumaimün afle tüfachi dungu?”.