Jeremías
46 Jeremías, tüfa Chau Ngünechen ñi huerquen, llohui Chau Jehová ñi dungun. Feipingei chem ñi rupayal pu troquiñche. 2 Tüfa tañi feipingeel Egipto, ti faraon Nekó ñi pu hueichafe,* Egipto ñi lonco ülmen. Fei mülefui inaltu Éufrates leufü mu ca Nabucodonosor,* tüfa Babilonia ñi lonco ülmen, huehueyu Carquemis huaria mu. Tüfa rupai Jehoiaquim yenielu 4 tripantu tañi ngünenieel. Jehoiaquim fei ta Josías ñi fotüm, Judá ñi lonco ülmen. Feipingei:
3 “Pepicayaimün tamün fütraque escudo ca tamün pichique escudo,*
fei tripamün tamün hueichayal.
4 Pu püracahuellulelu, pepicayaimün tamün cahuellu, fei pürayaimün.
Pepicaucülemün ca tucuaimün tamün casco.
Liftuafimün tamün huaiqui* ca tucuaimün ti tacun tamün hueichayal.
5 ‘¿Chumngelu* rume llicalequei engün?
Petu amutuingün, hueungei tañi pu hueichafe.
Fente tañi llican engün, lefmahuingün, tañi pu hueichafe huiñoquintulaingün rume.
Huall püle llicalei pu che’ pi Chau Jehová.
6 ‘Pu matu lefquelu pepi lefmaulaingün ca pu hueichafe pepi montulaingün.
Norte püle, inaltu Éufrates leufü mu,
mutrurtucuhuingün, fei traningün’.
7 ¿Inei am ta tüfa püralepalu Nilo leufü reque,
illculechi* leufü reque?
8 Pu Egipto che püralei Nilo leufü reque,
illculechi leufü reque,
ca feipi: ‘Pürayan ca tacuan reque ta mapu.
Apümcayafiñ ti huaria ca tañi pu che’.
9 ¡Pu cahuellu, amumün!
¡Pu carretela,* matu amulemün!
Amumün pu hueichafe,
cafei pu Cus huentru ca Put huentru, pu adümquefilu escudo,
ca pu Lud hueichafe, tüfa pu adümquefilu ca pepicaquefilu ti arco.
10 Doi Fütra Ñidol Jehová, Ñidolcülelu pu hueichafe mu, ngen-ngeai feichi antü. Feichi antü castigayafi tañi pu caiñe. Ti fütra cuchillo lümüafi pu che, tuduamai ca pütocoai reque tañi mollfüñ engün, fei huihuhuelayai. Ti Doi Fütra Ñidol Jehová, Ñidolcülelu pu hueichafe mu, pepicai quiñe chalintucun* norte mapu püle, inaltu Éufrates leufü mu.
Ngünam quintuimi fentren lahuen,
eimi tremotulayaimi.*
12 Pu troquiñche allcüingün tami yehuelcangen,
ca tami huirarün com huall mapu mu puhui.
Quiñe hueichafe mutrurtucuhui cangelu hueichafe engu,
fei trür traningu”.
13 Chau Jehová dungufi tañi huerquen Jeremías. Feipifi ñi cüpayal Nabucodonosor,* Babilonia ñi lonco ülmen, tañi lefcontuafiel Egipto mapu. Feipingei ta Jeremías:
14 “Huldungumün Egipto ca Migdol mapu mu.
Huldungumün Nof ca Tahpanhés huaria mu.
Feipiaimün: ‘Pepicaucülemün tamün hueichayal, pepicaucülemün.
Huall püle quiñe fütra cuchillo com lümüafi.
15 ¿Chumngelu apümcangei tami nehuen-ngechi huentru?
Chau Jehová apümcaeyu,
feimu huitralehuelaingün.
16 Fentren che mutrurtucuuquei ca tranmequei.
Hueluquentu feipihuingün:
“¡Amutuaiñ! Huiñotuaiñ taiñ troquiñche mu ca taiñ mapu,
lefmahuaiñ ti fütra cuchillo ñi duam mu”’.
17 Tiye mu huldungungei:
‘Ti faraon, Egipto ñi lonco ülmen, re hun müten niei, huelu chumlai rume.
Fei felelu tañi chumal, chumlai rume’.*
18 Ti Lonco Ülmen, Jehová pingelu, Ñidolcülelu pu hueichafe mu feipi: ‘Iñche tañi mongen mu feipicünun:
fei cüpayai* rangi huincul mu Tabor reque
ca Carmelo reque ina lafquen püle.
19 Pepicange tami fillem tami cañpüle yengeal,
ahuem, Egipto ñi ñahue.
Pu che llicayai tañi femngen ta Nof,
cütraltungeai,* fei ngehuelayai che tiye mu.
20 Egipto quiñe cüme pichi huaca reque felei.
Huelu norte mapu püle cüpalei pülü tañi pitrongcayaeteu.
21 Cafei pu soltau cullingelu ca mülelu tiye mu motrinque pichi culliñ reque* feleingün,
huelu fei engün ca huiñotuingün, fei quiñentrür lefmahuingün.
Contueyu engün ti antü tañi huesalcangeal,
ti antü tañi castigangeal,
feimu pepi nehuen-ngehuelaingün’.
22 ‘Feiti ñahue allcün-ngei quiñe huinolquiyauchi* filu reque,
tañi pu caiñe com nehuen mu inantucuayu, nünieai tañi toqui engün.
Trüraingün huentru reque catrücaquelu anümca.*
23 Contufalngenolu troquingequefui tañi mahuida, huelu com catrüngeai’ pi Chau Jehová.
‘Doi fentren-ngeingün tañi pu caiñe saltamonte reque,* pepi raquifalngelai.
24 Egipto ñi ñahue illamcangeai.
Norte mülechi troquiñche huehuayu’.
25 Jehová, Ñidolcülelu pu hueichafe mu, Israel ñi Chau Ngünechen, feipi: ‘Feula castigayafiñ ta Amón mülelu No pingechi huaria,* ti faraon, pu Egipto che, tañi pu dios ca tañi pu lonco ülmen. Felei, castigayafiñ ta faraon ca com tañi pu manelnieteu’.
26 ‘Hultucuafiñ engün ti pu ayülu tañi langümaeteu, feita Nabucodonosor,* Babilonia ñi lonco ülmen, ca tañi pu cüdaufe. Huelu fei hula huiño mületuai che tiye mu chumngechi ñi felefel cuifi’ pi Chau Jehová.
27 ‘Huelu eimi, iñche tañi cüdaufe Jacob, llicalayaimi.
Ahuem, Israel, rume llicalayaimi.
Camapu, cheu tami mülen, iñche montulayu,
ca ti mapu mu cheu tami yengen, montulafiñ tami cüpanche.
Jacob huiñotuai, cüme duamcületuai ca cüme feletuai,
inei no rume llicalcalayayu.
28 Feimu llicalayaimi, iñche tañi cüdaufe Jacob. Iñche afcadinieyu’ pi Chau Jehová.
‘Apümcayafiñ com pu troquiñche, cheu tami yefiel,
huelu apümcalayayu ta eimi.
Norümtuayu tunte* tami duamnieel,
huelu ca castigayayu’”.