Jeremías
47 Faraon, petu ñi lefcontunofiel ta Gaza, ti huerquen Jeremías llohui Chau Jehová ñi dungun. Feipingei chem ñi rupayal pu Filistea che. 2 Tüfa ñi feipin Jehová:
“¡Ngüneduamnge! Norte mapu püle cüpalei co.
Mangiñmalechi leufü reque feleai.
Mangiñmayafi ti troquiñ mapu ca com ñi mülen fei mu,
ti huaria ca tañi pu che.
Pu huentru huiraraingün,
ca com pu che mülelu ti troquiñ mapu mu ngümayaingün.
3 Allcün-ngeai pu cahuellu ñi huili tañi cupafmequen ti mapu,
ñi trefcü amulen pu hueichan* carretela*
ca ñi trününcülen tañi rueda.
Tüfa rupale, pu chau nehuen-ngehuelayai tañi cuhu,
feimu huiñoquintulayai rume tañi quintual ñi pu yall.*
4 Feichi antü epe püllelepalu apümcayafi com pu Filistea che
ca com mülehuechi che tañi quelluntucueteu mülelu Tiro ca Sidón mu.
Jehová apümcayafi pu Filistea che,
tüfa tati pu mülehuechi che Caftor huapi meu tuulu.*
5 Gaza fente tañi cutrancaucülen niehuelayai cal lonco.*
Asquelón ñücüfcünungei.*
6 ¡Ay fotrü! ¡Chau Jehová ñi fütra cuchillo!
¿Chumül nengümuuhuelayaimi?
Huiñotunge cheu tami yengequen.
Ürcütunge ca ñücüfcülenge.
7 Chau Jehová huercüeyu,
¿chumngelu cai* nengümuuhuelayai?
Huercüngei ñi caiñetuafiel Asquelón
ca ti mapu ina lafquen mülelu”.