Jeremías
6 Ahuem, Benjamín ñi pu fotüm, camapu Jerusalén mu ellcahuaimün.*
Tecoa mu dungulaimün ti cullcull.
¡Bet-Hakerem mu cütraltuaimün tamün pengelal chem tañi rupayal!
Norte püle püllelepai cutrancahun, quiñe rume huesa dungu.
2 Sion ñi püñeñ trüri quiñe saquin domo cüme adngelu.*
3 Cüpayai pu camañfe* ca tañi quechan ufisa.
Anümai tañi tolto ruca* huall püle Jerusalén mu.
Quisuque engün camañafi ca cuidayafi tañi quechan ufisa.
4 “¡Pepicahuaimün tamün hueichameafiel* ta Jerusalén!
¡Amuaiñ! ¡Rangiantü lefcontuafiyiñ!”.
“¡Aungeiñ iñchiñ! ¡Epe coni ta antü!
¡Epe puni tati!”.
5 “¡Amuaiñ! Pun meu lefcontuafiyiñ
ca apümcayafiyiñ tañi nehuen-ngechi adquintuhue”.
6 Tüfa tañi feipin Jehová, Ñidolcülelu pu hueichafe mu:
“Catrümün mamüll ca deumayaimün quiñe nehuen-ngechi cura malal,
fei lefcontuafimün Jerusalén.
Tüfachi huaria mülei tañi castigangeal.
Re huesalcangequei pu che fei mu.
7 Quiñe rünganco reque* hulquelu füshcü co,
tüfachi huaria re hulquei huesaque dungu.
Tüfachi huaria mu allcüngequei ñi mülen quehuan ca apümcan dungu.
Iñche tañi adquiñ mu rumel mülequei fillque cutran ca huesaque dungu.
8 Jerusalén, allcütunge tañi norüm dungu. Femnolmi, püntütripayan* eimi mu, ünufal troquiayu.
Iñche tañi pin mu huelliletuaimi, ngehuelayai che tami mapu mu”.
9 Tüfa tañi feipin Jehová, Ñidolcülelu pu hueichafe mu:
“Chumngechi ñimitungequei* mülehuechi ofad tañi anümca mu, ca femngechi com trapümngeai pu mülehuechi Israel che.
Huiño rulpange tami cuhu anümca ofad mu, chumngechi femquei quiñe che ñimituquelu ofad”.
10 “¿Inei cai dunguafiñ? ¿Inei feipicünuafiñ?
¿Inei allcütuai?
Taculei tañi pilun engün, pepi allcütuquelaingün.
Fei illamcaquefingün ca ayüquelafingün
Chau Jehová ñi dungun.
“Illcutuafimi ti pichi huentru rüpü mu.
Illcutuafimi pu huechequeche trahulelu.
Com nüngeai, ti huentru ca tañi domo engu,
pu fücha ca pu doi füchalelu.
12 Fampuhulelafiñ tañi cuhu ñi castigayafiel tati pu che,
feimu tañi ruca, tañi mapu ca tañi pu domo engün
elungeai caquelu pu che” pi Jehová.
13 “Tati illamcangelu ca tati doi falin che, com ngünencaqueingün tañi cümelcaleal.
Pu huerquen ca pu sacerdote com ngünencaqueingün.
14 Huenche tremoltufingün* tañi pu che ñi allfen feipilen mu
‘¡Cüme felen mülei! ¡Cüme felen mülei!’,
huelu ngelai cüme felen.
15 ¿Yehuequeingün mai tañi ünufalchi dungu tañi femquen?
¡Yehuequelaingün rume!
¡Quim yehuequelaingün rume!
Feimu layaingün rangi pu la meu.
Iñche castigafili, tranaconaingün” pi Jehová.
16 Tüfa ñi feipin Chau Jehová:
“Huitracünuhuaimün hudatripachi rüpü mu* ca ngüneduamaimün.
Ramtuaimün tati cuifique rüpü mu,
¿chuchi am ti cüme rüpü? ramtuaimün, ca miyahuaimün fei mu,
fei peaimün cheu tamün ürcütual”.
Huelu tüfa engün feipingün: “Miyaulayaiñ fei mu”.
17 “Ca üitufiñ soltau cuidaquelu, fei feipingün:
‘¡Cüme allcütumün ti cullcull!’”.
Huelu tüfa engün feipingün: “Allcütulayaiñ tati”.
18 “Feimu, ¡allcütumün, ahuem, pu troquiñche!
Ahuem, fütra trahunche,
quimürpunge chem ñi rupayal engün.
19 ¡Ahuem, mapu, allcütunge!
Huercülelafiñ tüfachi troquiñche cutrancahun
tañi huesa femün mu engün.
Inalaingün tañi feipin.
Quiñepülecünufingün tañi ley”.*
20 “Cüpalfulmi rume olibano* Saba mapu mu*
ca alü camapu meu cüpalfulmi cüme nümün-ngechi rüme,* iñche duamcülelan rume.
Tamün lüpümngeelchi chalintucun* lloungequelai.
Tamün chalintucun ayühuelquelaeneu”.
21 Feimu Chau Jehová feipi:
“Feula tuculelafiñ tüfachi pu che chem tañi catrütuaeteu,
fei mutrurtucuhuai engün.
22 Tüfa tañi feipin Chau Jehová:
“¡Ngüneduamnge! Cüpalei quiñe troquiñche norte mapu püle,
quiñe fütra troquiñche huitrapürayai doi camapu mülechi mapu püle.
23 Nüaingün ti arco ca ti pichi huaiqui.*
Huesa chengeingün ca cutranpiuqueyechelayai.
Lafquen reque raracüai tañi dungun,
ca püracahuellcüleingün.
Pepicahuingün ñi quehuayal quiñe hueichafe reque, fei lefcontuaimu, ahuem, Sion ñi püñeñ”.
24 Allcüiñ tüfachi dungu,
ca nehuen-ngehuelai taiñ cuhu.
Rumeñma cutrantupiuqueleiñ
chumngechi cutrantupiuquelei quiñe domo choyüalu tañi püñeñ.
25 Lelfün mu tripalayaimi
ca miyaulayaimi rüpü mu.
Ti caiñe nüniei quiñe fütra cuchillo.
Fill püle llicalei pu che.
26 Ahuem, tañi troquiñche ñi püñeñ,
tucutuhuaimi sacu tacun* ca ümülcahuaimi trufquen mu.
Acurumeai iñchiñ mu ti apümcaquelu,
feimu rume hueñancülenge ca ngümacahuaimi,
chumngechi ngümaquei quiñe domo lan mu tañi quiñen püñeñ.
27 “Rangi tañi pu che mu femcünueyu* quiñe che reque ngüneduamquelu fillque pañillhue,*
quiñe che reque com ngüneduamquelu.
Ngüneduamafimi tañi chumquen engün ca cüme inaduamafimi.
28 Com tüfachi huentru trencül piuquengeingün*
ca coila dalluntucuyahuingün.
Cobre ca pañillhue reque feleingün,
com ngünencachequeingün.
29 Quiñe che nehuentu cüdauquei ñi liftuafiel engün,
huelu lüftripai tañi herramienta.
Re ngünam liftucünuquefi engün, com huesa chengeingün.
Re plomo tripaquei cütral mu.
30 Chau Jehová famentueyu engün,*
feimu ti pu che huesa plata piayu”.