Jeremías

7 Jeremías llohui Chau Jehová ñi dungun. Feipingei: 2 “Puerta püle Chau Jehová ñi ruca mu huitracünuunge ca huldungunge tüfachi dungu: ‘Com eimün, pu Judá che, pu conquelu puerta püle tamün pochongnagal* Chau Jehová ñi adquiñ mu, allcütumün Chau Jehová ñi dungun. 3 Tüfa tañi feipin Jehová, Ñidolcülelu pu hueichafe mu,* Israel ñi Chau Ngünechen: “Norümtumün chumngechi tamün miyahun ca tamün femquen, fei eluhuaiñ* tamün mülenagal tüfachi mülehue mu. 4 Maneluulayaimün ngünencan dungu mu ca feipilayaimün: ‘¡Tüfa ta Chau Jehová ñi ruca,* Chau Jehová ñi ruca, Chau Jehová ñi ruca!’. 5 Huelu norümtuaimün chumngechi tamün miyahun ca tamün femquen, nor dungu mu juzgayafimün quiñe huentru tañi chafche engu,* 6 cutrancalayafimün pu ca cüpanche, pu cuñifall ca pu lantu domo, langümlayafimün culpanochi che tüfachi mülehue mu ca tamün huesa tripanoal inalayafimün caquelu dios. 7 Femngechi femülmün, iñche eluhuaiñ tamün müleal tüfachi mülehue mu, tüfachi mapu tañi elufiel tamün cuifiqueche ñi rumel müleal”’”.

8 “Huelu eimün maneluuqueimün ngünencan dungu mu... tüfa quellulayaimünmeu. 9 Eimün hueñequeimün, langümchequeimün, ñihuañpequeimün, feipicünuqueimün* coilaque dungu, chalintuculelquefimün* ta Baal ca inaquefimün quimngenochi dios, 10 fei, ¿cümelu troquifimün tamün cüpayal iñche tañi adquiñ tüfachi ruca yenielu tañi üi? ¿Cümelu troquifimün feipial ‘Montulngeaiñ’ femlu rume eimün ünufalchi dungu? 11 ¿Pu hueñefe ñi rucacünufimün tüfachi ruca yenielu tañi üi? Iñche pefiñ ta tüfa” pi Jehová.

12 “‘Feula amumün tañi yamfal mülehue* Siló huaria mu, ellaca mu elcünun tañi üi tiye mu. Amulmün, ngüneduamaimün chem tañi femfiel tañi yamfal mülehue fente tañi huesa femün tañi pu che Israel. 13 Huelu eimün fentecünulaimün tamün femal huesaque dungu’ pi ta Jehová. ‘Iñche fentren rupa nütramcahuiyiñ, huelu allcütumulan. Iñche mütrümuhuiyiñ,* huelu huiñoldungulaimün.* 14 Chumngechi femfiñ ta Siló, ca femngechi femafiñ ti ruca yenielu tañi üi, feiti ruca tamün maneluuquen ca tañi elufiel ta eimün ca tamün cuifiqueche. 15 Com famentuhuaiñ* tañi adquiñ mu, chumngechi famentufiñ com tamün pu peñi, com Efraín ñi pu cüpanche’.

16 Ca eimi, llellipulayaimi tüfachi troquiñche ñi duam mu. Ngillatulayaen ca llellipulayaen fei engün ñi duam mu, iñche allcütulayayu. 17 ¿Pelafimi chem tañi femmequen engün Judá ñi fillque huaria ca Jerusalén ñi rüpü mu? 18 Pu fotüm ñimituqueingün* mamüll, pu chau cütraltuingün ca pu domo masaingün ñi deumayal cofque tañi chalintuculelafiel tati diosa Huenu ñi Ülmen Domo* pingelu. Cafei elufingün hutrulngeelchi* chalintucun* caquelu dios tañi illculcayaeteu.* 19 ‘Huelu, ¿iñche mai huesa femngequen?’* pi Jehová. ‘¿Cam quisu huesalcahuingün, fei tañi yehuelcangeal?’. 20 Feimu Doi Fütra Ñidol Jehová feipi: ‘Pengelan tañi fütra illcun tüfachi mülehue mu, tati pu che, pu culliñ, lelfün mülechi anümca ca chem ñi hulquen ta mapu. Tañi fütra illcun üyai* cütral reque, fei chongümngelayai’.

21 Tüfa tañi feipin Jehová, Ñidolcülelu pu hueichafe mu, Israel ñi Chau Ngünechen: ‘Amulemün, trapümaimün tamün lüpümngeelchi chalintucun ca tamün caquelu chalintucun, ca quisuque eimün iñmuaimün ti ilo. 22 Iñche entufiñ tamün cuifiqueche Egipto mapu mu, huelu feichi antü iñche feipilafiñ ca huercülafiñ engün chem no rume tati lüpümngeelchi chalintucun ca tati chalintucun meu no rume. 23 Huelu huercüfiñ engün tüfachi dungu: “Allcütumün tañi dungun, ca iñche tamün Chau Ngünechen ngean, ca eimün iñche tañi pu chengerpuaimün. Rumel miyahuaimün ti rüpü tamün huercüfiel, femngechi cüme amuleaimün”’. 24 Huelu fei engün inalaingün tañi feipin ca allcütulaingün rume. Inaingün quisu tañi ayüel müten,* trencül piuquengetuingün,* fei inafingün tañi huesa piuque. Furintucueneu engün ca huiñotulaingün iñche mu. 25 Femngechi femingün feichi antü tripalu tamün cuifiqueche Egipto mapu mu ta fantepu mu. Feimu fentecünulan tamün huercülelfiel com tañi pu cüdaufe, tañi pu huerquen. Fill antü, fentren rupa huercüleluhuiyiñ. 26 Huelu pilaingün tañi allcütuaeteu, inalaingün tañi feipin, trencül piuquengeingün. ¡Doi huesa femingün tañi pu cuifiqueche mu!

27 Eimi com tüfachi dungu feipiafimi engün, huelu allcütungelayaimi. Eimi mütrümafimi engün, huelu huiñoldungungelayaimi. 28 Ca feipiafimi engün: ‘Tüfachi troquiñche inalai tañi Chau Ngünechen Jehová ñi dungun, pilaingün tañi norümngeal. Ngelai quiñe manelfal che no rume, ca nütramcaquelaingün rume tañi manelfal chengeal’.

29 Cupilaimi tami tünai lonco ca ütrüfentufinge, ca huente huincul nienolu anümca ülcantunge quiñe hueñancün ülcantun. Chau Jehová famentufi tüfachi pu che tañi illculcaeteu, fei quisucünuafi engün. 30 Chau Jehová feipi: ‘Pu Judá che huesa femingün iñche tañi adquiñ mu. Ti ruca yenielu tañi üi tucuingün tañi ünufal adentun* tañi podümafiel. 31 Cafei Hinón laf mapu* Tófet mu deumaingün ngillatuhue* tañi lüpümafiel tañi pu fotüm ca pu ñahue cütral mu. Huelu iñche huercülafun tüfachi dungu, raquiduamquelafun rume’.

32 ‘Feimu, ngüneduamnge, pichilehuei ta antü, fei Tófet cam Hinón laf mapu* pingehuelayai, doi mai Cheu ñi Langümngequen pingetuai ti laf mapu’ pi Chau Jehová. ‘Tófet mu rüngaltucungeai pu la, feihuelayai caquelu la ñi rüngaltucungeal. 33 Cafei pu üñüm* ca pu culliñ iyafi tüfachi troquiñche ñi lachi cuerpo, inei no rume quechanentulayayu engün. 34 Iñche tañi pin mu, Judá ñi fillque huaria mu ca Jerusalén ñi rüpü püle, allcüngehuelayai ñi rumeñma ayüucülequen pu che ca tañi dunguquen ti novio ca ti novia. Ti mapu apümcangeai tati’”.