Jeremías
8 Chau Jehová feipi: “Feichi antü mu, rüngan mu entungeai Judá ñi pu lonco ülmen tañi foro, pu principe ñi foro, pu sacerdote ñi foro, pu huerquen ñi foro ca pu Jerusalén che ñi foro. 2 Tañi foro engün ütrüfentungeai adquiñ püle ti antü, cüyen ca com huenu mülechi huangülen.* Feichi pu che poyefingün com tüfachi dungu, cafei serfifingün, inafingün, quintufingün ca pochongnagingün* tañi adquiñ mu. Trapümngelayai ca rüngaltucungelayai rume. Funa reque feletuai mapu mu”.
3 “Iñche fill püle mapu mu huercüfiñ tüfachi huesa familia ñi pu che, ca pu mongetripalu dulliaingün tañi layal, dullilayaingün tañi mongeleal” feipi ta Jehová, Ñidolcülelu pu hueichafe mu.*
4 “Cafei feipiafimi engün: ‘Tüfa tañi feipin Chau Jehová:
“Tranle pu che, ¿ca huiño huitratulayafui?
Quiñe che huitrautule, ¿cangelu ca huiño huitrautulayafui?
5 ¿Chumngelu* tüfachi pu Jerusalén che maneluuquei coilaque dungu mu?
Maneluuqueingün ngünencan dungu mu.
Pilaingün tañi huiñotual.
6 Ngüneduamniefun ca allcütuniefun, huelu cümelai chumngechi tañi dungun engün.
Inei no rume nor raquiduamtulai tañi huesa femün mu ca ramtulaingün rume ‘¿Chem femün iñche?’.
Quisuque engün re ayünieingün ñi huiño inayafiel cheu ñi amun epe com che, trüri engün cahuellu reque conlu hueichan mu.
7 Ti cigüeña cüme quimniei chem antü tañi müpüal cañpüle.
Ti maicoño, ti pichi üñüm* vencejo pingelu ca ti tordo* cüme quimniei chem antü tañi huiñotual.
Huelu iñche tañi pu che quimtuculai Chau Jehová tañi juzgayaeteu”’.*
8 ‘Pu huirintucuquelu Chau Ngünechen ñi huirintucun* pünequei tañi lapiz* ñi huirintucual re coilaque dungu.
Feimu, ¿chumngechi feipiafuimün “Quimchengeiñ ca inaqueiñ Chau Jehová ñi ley”?*
9 Pu quimche yehuelcangeingün.
Rume llicaingün ca nüngeaingün.
Tüfa engün famentufingün* Chau Jehová ñi dungun,
fei ¿niepeingün mai ta quimün?
10 Tati illamcangelu ca tati doi falin che, com ngünencaqueingün tañi cümelcaleal,
pu huerquen ca pu sacerdote com ngünencaqueingün.
Feimu tañi pu domo engün eluafiñ ta caquelu huentru,
ca tañi lelfün engün eluafiñ caquelu che tañi ngen-ngeal.
11 Huenche tremoltufingün* tañi allfen tañi troquiñche tañi püñeñ, feipilen mu
“¡Cüme felen mülei! ¡Cüme felen mülei!”,
huelu ngelai cüme felen.
12 ¿Yehuequeingün mai tañi ünufalchi dungu tañi femün?
¡Yehuequelaingün rume!
¡Quim yehuequelaingün rume!
Feimu layaingün rangi pu la meu.
Iñche castigafili, tranaconaingün’ pi Jehová.
13 ‘Trapümfili engün, fei apümcayafiñ’ feipi ta Jehová.
‘Anümca ofad mu ngehuelayai fün ca higuera mu ngehuelayai higo. Cafei ti tapül tonfünagai.*
Ñamümaingün chem tañi elufiel’”.
14 “¿Chemu anüleiñ fau?
Taiñ Chau Ngünechen Jehová apümcayaiñmu,
fei eluqueiñmu taiñ pütocoal co nielu veneno,
culpalu cai iñchiñ* Chau Jehová mu.
Feimu trahuluhuaiñ ca conpuaiñ fillque huaria nielu fütra cura malal* taiñ layal tiye mu.
15 Maneluuquefuiñ taiñ cüme feleal, huelu chem cüme dungu no rume cüpalai.
Üngümquefuiñ* taiñ quellungeal, huelu rume llicalequeiñ.
16 Dan püle allcüngequei ñi pafülmequen pu cahuellu.
Pu caiñe conpuingün, fei apümcafingün ti mapu ca com ñi mülen fei mu,
ti huaria ca tañi pu che”.
17 “Ngüneduamaimün, huercüleluhuiyiñ filu,
venenongechi filu pepi ngünefalngenolu,
rüfcünu ünatuaimünmu” pi Jehová.
18 Afquelai tañi hueñancün,
cutrancülei tañi piuque.
19 Alü camapu meu allcüngei ñi huirarün tañi quellungeal
tañi troquiñche ñi püñeñ:
“¿Mülelai Chau Jehová Sion mu?
¿Tañi lonco ülmen mülelai fei mu?”.
20 “Deu rupai ti cosecha, afi ti hualüng,
¡huelu iñchiñ montulngelaiñ!”.
21 Rumeñma cutrancaucülen allfülcangelu tañi troquiñche ñi püñeñ,
rume hueñancülequen.
Rumeñma llicalequen.
22 ¿Ngelai balsamo* Galaad mu?
Tiye mu, ¿mülelai lahuentuchefe?
¿Chemu tremotulai tañi troquiñche ñi püñeñ?