¿Kunjam jakasiñassa Diosajj muni?

 1. ¿Diosajj jaqenakan kunjam jakasiñapsa muni?

JAQENAKAJJ sum jakasipjjaspa ukwa Diosajj muni. Nayrïr chacha warmir lurasajja, Diosajj mä suma jardinaruw uchäna. Jupanakajj wawanakanïpjjaspa, aka oraqsa mä suma paraisor tukuyapjjaspa, animalanakarus sum uñjapjjaspa ukwa Diosajj munäna (Génesis 1:28; 2:8, 9, 15; 6 qhanañchäwi uñjjattʼäta).

 2. 1) ¿Kunatsa Diosajj amtap phoqapuniniwa sissna? 2) ¿Kamsis Bibliajj wiñay jakasiñ toqetjja?

² ¿Mä suma paraison jakassnati? Jehová Diosajj siwa: “Arstwa, ukham lurarakëjja; amtastwa, uka amtatanakajjsti phoqharakïwa” sasa (Isaías 46:9-11; 55:11). Diosajj kuntï amtki uk phoqapuniniwa, janiw khitis jarkʼkaspati. Jupajj mä amtampiw aka oraq luri, janiw ina “chʼusäñapataki” lurkiti (Isaías 45:18). Jaqenakajj oraqpachan jakasipjjaspa ukwa Diosajj muni. Paraíso oraqen ¿kunjam chuymani jaqenakan jakasipjjañapsa Diosajj muni? ¿Qhawqha tiempo jakapjjañapsa muni? Bibliajj siwa: “Aski [jan ukajj istʼasiri] jaqenakajj oraq katoqapjjani, wiñayatakiw ukan jakapjjarakini” sasa (Salmo 37:29; Apocalipsis 21:3, 4).

 3. ¿Kunsa usuntañanaka jiwañanaka utjipan jisktʼastanjja?

³ Jichhürunakanjja taqeniw usunttansa, jiwtansa. Nuwasiñanakasa, maynit maynikam jiwayasiñanakasa walja cheqanwa utjaraki. Diosajj janiw ukham jakasiñas munkänti. Ukhamajj ¿kunatsa jan walinakajj utji? Bibliakiw uka toqet sum qhanañchistaspa.

4, 5. 1) ¿Khitis mä asiru taypejj Edén jardinan Evar parljjayäna? 2) ¿Kunjamatsa mä honrado jaqejj lunthatar tukuspa?

⁴ Diosan mä enemigopaw utji sasaw Bibliajj qhanañchi, jupajj ‘Diablo Supaya’ satawa. Edén jardinanjja Supayajj mä asiru taypiw Evar parläna (Apocalipsis 12:9; Génesis 3:1). Asirus parlkaspa ukhamwa Supayajj Evar engañjäna (7 qhanañchäwi uñjjattʼäta).

⁵ ¿Diosat Supayar lurpachäna? Janiwa. Diosajj aka oraqe lurkäna ukhajja, walja angelanakaw alajjpachankasipkäna. Uka angelanakat mayniw chuymapamp apayasisajj mayjtʼäna, qhepatsti Diabloruw tukjjarakïna (Job 38:4, 7). ¿Kunjamatsa ukajj pasäna? Uk sum amuytʼañatakejja, kunjamsa mä honrado jaqejj lunthatar tukuspa uka toqet parltʼañäni. Uka jaqejj janiw lunthata naskiti, jan ukasti kunatï jan jupankki ukanakwa muni. Uka toqet wal lupʼisajj jukʼampiw munjjaraki. Qhepatsti lunthatasiñjamäki ukhajja lunthatasiñaruw purjje, ukhamatwa mä lunthatar tukjje (Santiago 1:13-15 liytʼañataki; 8 qhanañchäwi uñjjattʼäta).

 6. ¿Kunjamatsa mä angelajj Diosan enemigopar tuküna?

⁶ Dios contra saytʼkäna uka angelampejj ukaw pasäna. Diosajj Adanampir Evampir lurkäna ukhajja, jupanakar sänwa: “Wali mirantapjjam, aka oraqerusti phoqhantapjjarakim” sasa (Génesis 1:27, 28). Uk istʼasajj inas uka angelajj akham amuychïna: “Jehová Diosar adorañat jan ukajj yupaychañat sipansa uka jaqenakajj nayaruw adorapjjetaspa” sasa. Uka toqet wal lupʼisajja, jukʼampiw kunatï Jehová Diosankki uk munjjäna. Uka angelajj jaqenakampiw adorayasiñ munjjäna, ukatwa kʼarinak parlasajj Evar engañjäna (Génesis 3:1-5 liytʼañataki). Ukhamatwa uka angelajj Supayar tukjjäna, Diosan enemigopäjjarakïna.

 7. 1) ¿Kunatsa Adanampi Evampejj jiwapjjäna? 2) ¿Kunatsa chuymankipstasin jiwtanjja?

⁷ Adanampi Evampejj janiw Diosar istʼapkänti, kawkïr achtï jan manqʼapjjañapäkäna ukwa manqʼantapjjäna (Génesis 2:17; 3:6). Ukham lurasaw Dios contra juchachasipjjäna, tiempompejja kunjamtï Jehová Diosajj siskäna ukhamapuniw jiwjjapjjäna (Génesis 3:17-19). Adanampin Evampin wawanakapajja, jupanakjam juchanïpjjatap laykojj ukhamarakiw jiwapjjäna (Romanos 5:12 liytʼañataki). ¿Kunatsa Adanampi Evampin wawanakapajj juchararäpjje? Uk amuytʼañatakejj adoberampi lurat adobenakat parltʼañäni. Adoberatï wejjrjatäspa ukhajja, adobenakajj wejjrukamakiw mistuspa. Adanajja, Diosar jan istʼasajj jucharar jaqëjjänwa, wejjrjat adoberäkaspas ukhamäjjänwa, ukatwa wawanakapjamajj taqeni juchanïtanjja, juchanïtas laykurakiw chuymankipstasin jiwtanjja (Romanos 3:23; 9 qhanañchäwi uñjjattʼäta).

8, 9. 1) ¿Adanampin Evampin kun amuyapjjañapsa Supayajj munäna? 2) ¿Kunatsa Jehová Diosajj jupa contra saytʼasirinakar jan jiwaraykäna?

⁸ Supayajj Adanampi Evampiruw juchar puriyäna, ukhamatwa kimspachanejj Jehová Dios contra saytʼapjjäna. Diosajj kʼarïkaspasa, janis suma apnaqerïkaspa, janis jaqenakan sum jakasipjjañap munkaspa ukhama Adanampi Evampejj amuyapjjaspa ukwa Supayajj munäna. Kunsa lurapjjañapa uk janis Diosajj jaqenakar sañapäkaspa, kunatï walïki jan walïkaraki uk jupanakakis amtapjjañapäkaspa ukham amuyapjjañapwa munarakïna. Jehová Diosajj jupa contra saytʼirinakarojj ¿kunsa luraspäna? Jiwarayaspänwa, ukhamatwa jupa contra saytʼirinakajj jan utj-jjaspänti. Diosatï jupanakar jiwarayaspäna ukhajja, ¿Supayan kʼarïtapajj yatisispänti? Janiwa.

⁹ Jehová Diosajj janiw jupa contra saytʼasirinakar jiwaraykänti. Antisas jaqenakan mä qhawqha tiempo apnaqasipjjañapatakiw jaytäna. Ukhamatwa Supayan kʼarïtapajj yatisispäna, ukhamatarakwa Jehová Diosajj jaqenakan sum jakasiñ munatapajj yatisispäna. Uka toqetjja 11 yatichäwinwa jukʼamp yatjjataskañäni. Adanampina Evampin Supayar istʼasina Dios contra saytʼasipjjatapajj ¿walikïskänti? ¿Jumajj kamsasmasa? Diosajj taqe kunwa jupanakar churäna: suma jakaña, mä suma paraison jakasiña, mä suma trabajo. Ukampis Supayajj janiw jupanakar kuns churkänti. Jumatï ukankasmäna ukhajja, ¿khitirus istʼasamäna?

10. ¿Kunsa sapa maynejj ajlliñasa?

¹⁰ Jichhürunakanjja niya ukhamanwa uñjasiraktanjja. Sapa mayniw Jehová Diosaruti, jan ukajj Supayarucha istʼañäni uk ajlliñasa. Jiwasatï Jehová Diosar apnaqerisarjam istʼañäni ukhajja, Supayan kʼarïtapwa uñachtʼayañäni. Supayarutï apnaqerisarjam istʼañäni ukhajj jiwañaruw purtʼasiñäni (Salmo 73:28; Proverbios 27:11 liytʼañataki). Akapachanjja jukʼanikiw Diosarojj apnaqeriparjam istʼapjje. Cheqas Diosajj janiw akapach apnaqkiti, ukhamajj ¿khitis apnaqpacha?

11, 12. 1) Supayajj Jesusar markanak churañ munkäna ukatjja, ¿kunsa amuysna? 2) Supayan akapach apnaqerïtapjja, ¿kawkïr textonakas qhanañchi?

¹¹ Khitis akapach apnaqe ukjja Jesusajj sum yatïna. Mä kutejja Supayajj “akapachankir taqe markanaka, ukhamaraki kunja qamirïpkitejj taqe ukanakwa” Jesusar uñachtʼayäna, akham sasa: “Jumatï killptʼasisin mä kutik adoritäta ukhajja, taqe akanakwa churäma” sasa (Mateo 4:8, 9; Lucas 4:5, 6). Akapachankir taqe markanakatï jan Supayankkaspäna ukhajja, ¿Jesusar uka markanak churañ munaspänti? Janiwa. Ukhamajj taqe akapachankir gobiernonakajj Supayankiwa.

¹² Inas akham sischisma: “¿Kunjamarak Supayajj akapach apnaqaspasti? ¿Janiti taqe kunas Taqe Chʼamani Jehová Diosan luratäki?” sasa (Apocalipsis 4:11). Taqe kunas Diosan luratawa. Ukampis Supayaw “akapachan apnaqeripajj” sasaw Jesusajj säna (Juan 12:31; 14:30; 16:11). Apóstol Pablojja, “akapachan diosapajj” Supayawa sasaw sarakïna (2 Corintios 4:3, 4). Apóstol Juanajj akham sarakïnwa: “Akapachajj Supayan amparapankiwa” sasa (1 Juan 5:19).

13. ¿Kunatsa akapachan tukusiñapajj wakisi?

¹³ Akapachajj jukʼamp jan waliruw saraski. Guerranakasa, lunthatasiñanakasa, kʼarisiñanakasa, nuwasiñanakasa taqe cheqanwa utji. Jaqenakajj ukanak chhaqtayañ walsa munapkchejja, chʼamachasitanakapajj inamayakiwa. Ukampis Diosajj niyaw akapachjja Armagedón guerran chhaqtayjjani, uka lantejj mä machaq oraqe uttʼayjjani, ukansti taqe kunas cheqapäniwa (Apocalipsis 16:14-16; 10 qhanañchäwi uñjjattʼäta).

14. 1) ¿Khitirus Diosajj gobiernopan Reyïñapatak uttʼayi? 2) ¿Bibliajj Jesusat kamsänsa?

¹⁴ Jehová Diosajj Jesucristoruw alajjpachankir gobiernopan Reyïñapataki uttʼayi. Walja maranak nayrajja, ‘Sumankañan Jilïripjamajj’ Jesusaw apnaqani, jupan gobiernopasti janipuniw tukuskaniti sasaw Bibliajj säna (Isaías 9:6, 7). Diosar uka gobierno mayipjjañapatakiw Jesusajj discipulonakapar yatichäna, akham sasa: “Reinomajj jutpan. Munañamajj luratäpan, kunjamatï alajjpachan luraski ukhamarak aka oraqens luraspan” sasa (Mateo 6:10). Diosan Reinopajj kunjamsa akapacha gobiernonak lantejj uttʼayasini uka toqetjja, 8 yatichäwinwa yatjjatañäni (Daniel 2:44 liytʼañataki). Diosan Reinopajj aka oraqjja paraisoruw tukuyjjani (11 qhanañchäwi uñjjattʼäta).

15. ‘Machaq oraqe’ sasinjja, ¿Bibliajj khitinakatsa parlaski?

¹⁵ Bibliajj siwa: “Machaq alajjpachanakampi machaq oraqempi suyasktanjja, ukanjja cheqapar sarnaqañaw utjani” sasa (2 Pedro 3:13; Isaías 65:17). “Oraqe” sasajja, aka oraqen jakiri jaqenakatwa awisajj Biblian parli (Deuteronomio 32:1). Ukhamajj ‘machaq oraqe’ sasinjja, Diosar istʼiri taqe jaqenakatwa parlaski, jupanakaw Diosat walja bendicionanak katoqapjjani.

16. Machaq oraqen jakirinakajja, ¿kunsa Diosat katoqapjjani, uk katoqañatakejj kunsa lurañasa?

¹⁶ Machaq oraqen jakirinakajja, ‘wiñay jakañ katoqapjjani’ sasaw Jesusajj säna (Marcos 10:30). Wiñay jakañ katoqañatakejj ¿kunsa lurañasa? Uk yatiñatakejj Juan 3:16; 17:3 qellqatanak liytʼañäni. Paraíso oraqen jakasiñajj kunjamäniw sis Bibliajj uka toqet jichhajj yatjjatañäni.

17, 18. Paraison sumankañaw utjani, janiw ajjsarañajj utj-jjaniti sasin ¿kunatsa sistanjja?

¹⁷ Uñisisiñanakasa, guerranakasa, jan walinak lurir jaqenakasa, nuwasiñanakas janiw utj-jjaniti. Jan wali lurir jaqenakajj aka oraqet chhaqtayatäpjjaniwa (Salmo 37:10, 11). Diosajj ‘aka oraq tukuykamaw nuwasiñanak’ chhaqtayani (Salmo 46:9; Isaías 2:4). Diosar munasiri, jupar istʼiri jaqenakakiw aka oraqen jakjjapjjani. Sumankañajj wiñayatakïniwa (Salmo 72:7).

¹⁸ Jehová Diosan servirinakapajj jan ajjsarasaw jakasjjapjjani. Nayra tiemponjja, israelitanakajj Diosar istʼapkäna ukhajja, jan ajjsarasaw kʼuchiki jakasipjjäna, Diosaw jupanakarojj jan walinakat jarkʼaqäna (Levítico 25:18, 19). Paraisonjja, janiw kunarusa ni khitirus ajjsarjjañäniti. ¡Janiw kuna jan walis utj-jjaniti! (Isaías 32:18; Miqueas 4:4 liytʼañataki).

19. ¿Kunatsa manqʼajj jutïrin waljaw utjani sistanjja?

¹⁹ Manqʼajj waljaw utjani. ‘Trigojj yapunakan jilarkiriw utjani, qollu patanakansti jilantarakiniwa’ (Salmo 72:16). Jehová Diosasti bendisistaniwa, ‘oraqesti achunakwa churarakini’ (Salmo 67:6).

20. ¿Kunatsa aka oraqejj mä suma paraisoruw tukuyatäni sissna?

²⁰ Oraqpachaw mä suma paraisor tukuyatäni. Jaqenakajj suma utanakani, jardinanakani ukhamäpjjaniwa (Isaías 65:21-24; Apocalipsis 11:18 liytʼañataki). Aka oraqejja, Edén jardinajj kunja sumäkäntejj ukham sumarakïniwa. Jehová Diosajj taqe kunwa churistani. Bibliajj Diosat akham siwa: “Jumaw amparam loqatattajja, taqe jakirinakarusti askinak jilarkir churtajja” sasa (Salmo 145:16).

21. ¿Kunatsa jaqenakampi animalanakampejj sumankapjjaniwa sissna?

²¹ Jaqenakampi animalanakampejj sumankapjjaniwa. Animalanakajj janiw jaqenakar kamachjjanisa. Wali ajjsarat animalanakarus janiw wawanakajj ajjsarjjapjjaniti (Isaías 11:6-9; 65:25 liytʼañataki).

22. ¿Kunjamsa Jesusajj usutanakar yanaptʼani?

²² Janiw khitis usuntjjaniti. Jesusajj aka oraqenkkäna ukhajja, walja jaqenakaruw qolläna (Mateo 9:35; Marcos 1:40-42; Juan 5:5-9). Diosan Reinopan Reyipjamajja, Jesusajj taqeniruw qollani. Janiw khitis “usutätwa” sisjjaniti (Isaías 33:24; 35:5, 6).

23. ¿Kunsa Diosajj jiwatanakampejj lurani?

²³ Jiwatanakajj jaktanipjjaniwa. Walja jaqenakaruw jaktayäjja sasaw Diosajj säna. “Cheqapar sarnaqer jaqenakasa jan cheqapar sarnaqer jaqenakas jaktanipjjaniwa” (Juan 5:28, 29 liytʼañataki; Hechos 24:15).

24. ¿Paraison jakasiñat jumajj kamsasmasa?

²⁴ Sapa mayniw kunsa lurañäni uk amtañasa. Jehová Diosar jukʼamp uñtʼasin juparut serviñäni, jan ukajj munañasarjamakich sarnaqañäni ukjja sapa mayniw amtjjañasa. Jiwasatï Diosar serviñ ajlliñäni ukhajja, jutïrin wali sumaw jakasiñäni. Mä kutejja, “Reinomar mantjjäta ukhajj nayat amttʼasitätawa” sasaw mä chachajj Jesusar säna. Jesusasti jupar sarakïnwa: “Nayamp chikaw jumajj Paraisonkäta” sasa (Lucas 23:43). Ukhamajj Jesucristot jukʼampi yatjjatapjjañäni, kunjamsa jupajj Diosan arsutanakap phoqayani uksa yatjjatarakiñäni.