Filipos

1 Hali ki Pablo asin Timoteo, na mga uripon ni Cristo Jesus, para sa gabos na mga banal na kasaro ni Cristo Jesus na yaon sa Filipos, pati na sa mga paraataman asin mga ministeryal na lingkod:*

2 Mapasaindo an daing kapantay na kabuutan asin katuninungan na hali sa Diyos na satuyang Ama asin sa Kagurangnan na Jesu-Cristo.

3 Pirmi akong nagpapasalamat sa Diyos pag nagigirumduman ko kamo 4 sa kada beses na pagngayo-ngayo* ko. May kaugmahan kong ginigibo ini para sa saindo, 5 huli sa naitabang nindo alang-alang sa* maugmang bareta puon kan inot na aldaw na inako nindo iyan asin sagkod sa oras na ini. 6 Huli ta nasisiyerto ko an mismong bagay na ini, na an marahay na gibong pinunan nin Diyos diyan sa saindo ipagpapadagos niya sagkod na makumpleto iyan sa aldaw ni Cristo Jesus. 7 Tama sanang ini an isipon ko mapadapit sa saindo, huling yaon kamo sa puso ko, kamo na kairiba kong nakinabang sa daing kapantay na kabuutan nin Diyos. Mala ta sinuportaran nindo ako mantang nakapreso ako saka sinuportaran man nindo ako sa pagdepensa kan maugmang bareta asin sa paghihinguwang makua an legal na deretso para ihulit iyan.

8 Diyos an sakuyang saksi kun gurano an pagkapungaw ko sa saindo gabos asin kun gurano kararom kan pagkamuot ko sa saindo na siring kan pagkamuot ni Cristo Jesus. 9 Asin ini an padagos kong ipinapamibi, na lugod an saindong pagkamuot lalo pang mag-urog nin mag-urog kasabay nin tamang kaaraman asin lubos na pakamansay; 10 na lugod masiyerto nindo kun ano an mas importanteng mga bagay, tanganing mayo nin makuang depekto sa saindo asin dai nindo maulang an pagtubod kan iba* sagkod sa aldaw ni Cristo; 11 asin na lugod mapano kamo nin mga bungang matanos sa tabang ni Jesu-Cristo, para sa kamurawayan asin kaumawan nin Diyos.

12 Ngunyan mga tugang, gusto kong maaraman nindo na an sitwasyon ko nagin sarong oportunidad lugod para maglakop an maugmang bareta, 13 mala ta an pagkapreso ko nin dahil ki Cristo nagin hayag sa gabos na kabilang sa Guwardiya kan Emperador* asin sa gabos na iba pa. 14 An kadaklan kan mga tugang sa Kagurangnan napakusog dahil sa nagin sitwasyon ko bilang preso, asin lalo pa sindang nagpapahiling nin kusog nin buot sa pagpahayag kan tataramon nin Diyos na daing takot.

15 Totoo, an nagkapira ihinuhulit an Cristo dahil sa pagkauri asin pakikipagkumpetensiya, alagad an iba naghuhulit na may marahay na motibo. 16 An huring nasambit ibinabalangibog an Cristo dahil sa pagkamuot, huli ta aram ninda na ninombrahan ako tanganing idepensa an maugmang bareta; 17 alagad an inot na nasambit ginigibo iyan dahil sa sobrang ambisyon, asin bako dahil sa malinig na motibo, huli ta an intensiyon ninda tawan ako nin problema miyentras na nasa presuhan ako. 18 Pero anong kinaluwasan? Iyo ini, na sa lambang paagi, sa pagsagin-sagin man o sa katotoohan, naibabalangibog an Cristo, asin ipinag-uugma ko ini. Sa katunayan, padagos pa akong mag-uugma, 19 huli ta aram kong an magigin resulta para sa sako iyo an kaligtasan dahil sa saindong pagngayo-ngayo asin sa tabang kan espiritu ni Jesu-Cristo. 20 Kauyon ini kan sakuyang inaantisipar asin linalauman, na dai ako mapapasupog sa ano man na paagi. Imbes, dahil sa pagtaram ko na dai nanggad nin pag-alangan, mapapamuraway ngunyan si Cristo, kun paanong dati na siyang pirming napapamuraway. Paagi kan sakuyang hawak,* papamurawayon ko siya sa buhay man o sa kagadanan.

21 Huli ta kun manungod sa sako, nabubuhay ako para ki Cristo, asin kun magadan ako, para iyan sa kapakinabangan ko. 22 Buweno, kun padagos man akong mabuhay sa hawak na ini, dakul pa akong mahahaman; alagad ta kun arin man diyan an pipilion ko, dai ko sasabihon. 23 Nasasakitan akong magdesisyon kun arin sa duwang ini an pipilion ko, huling mawot ko talaga na makatalingkas asin na makaibanan si Cristo, na siyempre, iyo nanggad an mas marahay. 24 Minsan siring, mas hinahagad kan sitwasyon na magdanay akong buhay sa hawak na ini alang-alang sa saindo. 25 Kaya, huling sigurado ako kaini, aram kong magdadanay akong buhay asin padagos na makakaibanan nindo gabos para sa saindong pag-uswag asin kaugmahan na gikan sa pagtubod, 26 na sa siring pag kaibanan na giraray nindo ako, mapano kamo nin kagaya-gayahan bilang mga parasunod ni Cristo Jesus.

27 An hagad ko lang, gumawi kamo sa paaging kauyon kan maugmang bareta manungod sa Cristo, tanganing kun magdiyan ako saka mahiling ko kamo o kun mayo man ako diyan, mabaretaan ko an manungod sa saindo asin maaraman na marigon kamong nakatindog na may sarong espiritu asin sarong kalag,* na iribang nagmamaigot tanganing mapagdanay an pagtubod sa maugmang bareta, 28 asin na dai nanggad kamo kayang takuton kan saindong mga kaiwal. An mismong bagay na ini sarong malinaw na patunay hali sa Diyos na sinda lalaglagon alagad ta kamo ililigtas. 29 Huli ta tinawan kamo kan pribilehiyo, asin iyan bako sanang an magtubod ki Cristo, kundi an magsakit man alang-alang sa saiya. 30 Asin may inaatubang kamong pagbalo na kapareho kan nahiling nindong inatubang ko, na nabaretaan nindo ngunyan na inaatubang ko pa man giraray.