Nagpapasalamat sa Sarong Makosog na Kristianong Mana

ISINAYSAY NI GWEN GOOCH

Sa eskuelahan inaawit ko an sarong himno na may mga tataramon na, ‘si Jehovang Dakula nakatukaw sa trono sa saiyang kamurawayan.’ Parate kong iniisip-isip, ‘Siisay man an Jehovang ini?’

AN SAKONG mga apoon matatakton sa Dios. Sa pagpopoon kan siglong ini, nakiasosyar sinda sa Mga Estudyante sa Biblia, na apod kaidto sa Mga Saksi ni Jehova. An ama ko nag-asenso sa negosyo alagad kan primero dai nia ipinamana sa saiyang tolong aki an Kristianong mana na itinao sa saiya.

Kaidto sanang itao ni Tatay sa sakong tugang na lalaki, si Douglas, sa sakong tugang na babae, si Anne, asin sa sako an mga pulyeto na may titulong His Works asin Who Is God? na nanodan ko na Jehova an ngaran kan tunay na Dios. (Salmo 83:18) Naogma ako! Alagad ano an nakapukaw liwat sa interes ni Tatay?

Kan 1938, kan maheling nia na nag-aandam an mga nasyon para sa guerra, narealisar ni Tatay na labi pa sa mga paghihingoa nin tawo an kaipuhan tangani na maresolberan an mga problema sa kinaban. Itinao sa saiya ni lola an librong Enemies, na ipinublikar kan Mga Saksi ni Jehova. Sa pagbasa kaiyan, nanodan nia na an tunay na kaiwal nin katawohan iyo si Satanas na Diablo asin na solamente an Kahadean nin Dios an makatatao nin katoninongan sa kinaban.a​—Daniel 2:​44; 2 Corinto 4:4.

Mantang nagdadangadang an guerra, pinonan kan samong pamilya na umatender sa mga pagtiripon sa Kingdom Hall kan Mga Saksi ni Jehova sa Wood Green, Londres del Norte. Kan Hunyo 1939 nagduman kami sa karaning Alexandra Palace tangani na magdangog kan pampublikong pahayag na, “Government and Peace” (sa Bicol, “Gobyerno Asin Katoninongan”), na itinao ni Joseph F. Rutherford, an presidente kaidto kan Watch Tower Society. An pahayag ni Rutherford sa Madison Square Garden sa Siudad nin Nueva York ipinaabot sa Londres asin sa iba pang mayor na mga siudad paagi sa radyo. Nadadangog niamo nin malinaw na marhay an pahayag kaya kan mandisturbo an sarong maribok na sururog sa Nueva York, nangalagkalag ako sa palibot tanganing helingon kun iyan nangyayari sa samong auditoryum!

An Kaigotan ni Tatay Para sa Katotoohan sa Biblia

Iininsister ni Tatay na kada Sabadong banggi an bilog niamong pamilya iribang mag-adal sa Biblia. An samong pag-adal nakasentro sa tema sa Biblia na nasa An Torrengbantayan na nakaiskedyul na pag-olayan sa masunod na aldaw. Sa pag-ilustrar sa nagin epekto kan mga pag-adal na ini, sagkod sa aldaw na ini malinaw pa sa sakong isip an pagkasaysay manongod ki Josue asin an pagsalikop sa siudad nin Hai na ipinaliwanag sa The Watchtower na Mayo 1, 1939. Napukaw na marhay an sakong interes sa pagkasaysay na iyan kaya hineling ko an gabos na pagkasambit dian sa sakong sadiring Biblia. Nanompongan ko na interesanteng gayo an pagsiyasat na iyan​—asin iyo pa sagkod ngonyan.

An paghiras sa iba kan samong nanonodan itinadom sa sakong puso an mga katokdoan sa Biblia. Sarong aldaw tinawan ako ni Tatay nin sarong ponograpo na may nakarekord na sermon sa Biblia, sarong pulyeto na ginagamit mi sa pag-adal sa Biblia, asin adres nin sarong may edad nang babae. Dangan kinaolay nia akong songkoon ini.

“Ano po an sasabihon ko, asin ano po an gigibohon ko?” an hapot ko.

“Yaon na dian gabos,” an simbag ni Tatay. “Patanogon mo sana an plaka, basahon mo an mga hapot, ipabasa mo sa kagharong an mga simbag, dangan basahon mo an mga teksto.”

Ginibo ko an siring sa sinabi nia, asin sa paaging ini nanodan kong magkondukta nin pag-adal sa Biblia. Sa siring paagi sa paggamit kan Kasuratan sa sakong ministeryo, nanodan ko iyan nin orog pa.

Angat kan mga Taon nin Guerra

Puminutok an Guerra Mundial II kan 1939, asin kan suminunod na taon nabautismohan ako bilang simbolo kan sakong pagdusay tangani na maglingkod ki Jehova. Ako 13 anyos pa sana. Nagdesisyon ako kan panahon na idto na magin sarong payunir, na apod sa bilog na panahon na mga ministro. Nagpondo ako sa pag-eskuela kan 1941 asin sa kombension sa Leicester uminiba ako ki Douglas sa bilog na panahon na paghuhulit.

Kan suminunod na taon, nabilanggo si Tatay huli sa saiyang sono sa konsensiang pagsayuma na makiguerra. Kaming mga aki nag-arabot tangani na tabangan an samong ina, na tinatabangan siang asikasohon an samong harong durante kan masakit na panahon na idto nin guerra. Dangan, dai nahaloy pakapaluwas ki Tatay sa bilanggoan inapod si Douglas sa serbisyo militar. An bareta sa sarong lokal na diaryo nagsasabi, “Kun Taano ta Pinili nin Aking Lalaki Siring sa Ama an Bilanggoan.” Marahay na patotoo an nagin resulta, mantang itinao an oportunidad na ipaliwanag kun taano an tunay na mga Kristiano ta dai nakikikabtang sa paggadan sa saindang kapwa.​—Juan 13:​35; 1 Juan 3:​10-​12.

Durante kan mga taon na idto nin guerra, dakol na Saksing nasa bilog na panahon na ministeryo an regular na nagbibisita sa samong harong, asin an saindang nakaparirigon na mga pakikipag-olay na basado sa Biblia nagwalat nin nagdadanay na epekto. Kabilang sa fiel na Kristianong mga tugang na ini sinda John Barr asin Albert Schroeder, na ngonyan mga miembro na kan Namamahalang Grupo kan Mga Saksi ni Jehova. An mga magurang ko tunay na mapag-istimar, asin tinokdoan ninda kami na magin siring man kaiyan.​—Hebreo 13:2.

Andam na Magtao nin Simbag

Dai nahaloy pakapoon ko sa pagpapayunir, nanompongan ko si Hilda sa ministeryo sa mga pinto. Sia anggot na nagsabi: “An agom ko nakikipaglaban para sa mga kapareho nindo! Taano ta dai kamong ginigibo para sa kapakanan kan guerra?”

“Gurano an aram nindo dapit sa sakong ginigibo?” an hapot ko. “Aram daw nindo kun taano ta nagdigdi ako sa saindo?”

“Bueno,” an simbag nia, “mas marahay pang dumagos ka asin sabihon mo sa sako.”

Ikinapaliwanag ko na kami nagtatao nin tunay na paglaom sa mga tawong nagdudusa huli sa makatatakot na mga ginigibo​—na sa parate sa ngaran nin Dios. Naghinanyog si Hilda na may pag-apresyar, asin sia an nagin kaenot-enote kong regular na estudyante sa Biblia. Sia sarong aktibong Saksi sa laog nin labing 55 taon na ngonyan.

Sa katapusan kan guerra, nakaresibi ako nin bagong asignasyon sa pagpapayunir sa Dorchester, sarong banwaan sa timog-solnopan na Inglaterra. Ini an kaenot-enote kong pamumuhay na harayo sa harong. An samong sadit na kongregasyon nagtitiripon sa sarong restawran, sarong edipisyo na kaidto pang ika-16 na siglo na inapod na “The Old Tea House” (sa Bicol, “An Daan na Kapihan”). Kaipuhan ming areglaron liwat an mga lamesa asin tukawan para sa kada pagtiripon niamo. Idto laen na gayo sa Kingdom Hall na pinagkatodan ko. Minsan siring, yaon an iyo man sanang espirituwal na kakanon asin mamomoton na kasararoan nin Kristianong mga tugang na lalaki asin babae.

Mientras tanto nagbalyo an sakong mga magurang sa Tunbridge Wells, timog kan Londres. Puminuli ako tangani na si Tatay, Anne, asin ako iribang makapagpayunir. Dai nahaloy duminakula an samong kongregasyon poon sa 12 sagkod sa 70 Saksi, kaya hinagad sa samong pamilya na bumalyo sa Brighton sa timog na baybayon, kun saen mas dakula an pangangaipo para sa mga parabalangibog kan Kahadean. Dakol an maigot na uminiba sa paghuhulit kaiba kan samong pamilya na mga payunir, asin naheling mi na mayaman na binebendisyonan ni Jehova an samong gibohon. Dai nahaloy nagin tolo an sasarong kongregasyon!

Imbitasyon na Dai Linalaoman

Kan tig-init nin 1950, kabilang an samong pamilya sa 850 delegado hale sa Britania na nag-atender sa Pag-oswag sa Teokrasya na Internasyonal na Asamblea sa Yankee Stadium sa Siudad nin Nueva York. Dakol na payunir na maatender sa kombension na idto hale sa ibang mga nasyon an pinadarahan nin aplikasyon na umatender sa Paadalan sa Biblia kan Watchtower sa Gilead, na harani sa South Lansing, Nueva York. Si Douglas, Anne, asin ako kabilang sa sainda! Nagigirumdoman ko an pinag-iisip ko kan iholog ko sa buson an sakong aplikasyon na nallenaran na, ‘Ngonyan talagang nagibo ko na iyan! Ano daw an magigin direksion kan sakong buhay?’ Pero an sakong determinasyon iyo na: “Uya ako! Sugoa ako.” (Isaias 6:8) Naogma ako kan maresibi ko an imbitasyon na magdanay pakatapos kan kombension tangani na umatender sa ika-16 na klase nin Gilead, kaiba ninda Douglas asin Anne. Kami gabos nakaaaram na marhay na puede kaming sugoon bilang mga misyonero sa arin man na parte kan kinaban.

Pakatapos na magkairibanan sa kombension bilang sarong pamilya, nag-abot an panahon na mabuelta na an samong mga magurang sa Inglaterra​—na sinda sana. Kaming tolong aki nagbabay mantang sinda naglalayag papuli sakay sa Mauritania. Kanigoan kaemosyonal na pagsuruhayan idto!

Mga Asignasyon sa Pagmimisyonero

An ika-16 na klase nin Gilead kompuesto nin 120 estudyante hale sa gabos na parte kan kinaban, kabale an nagkapira na nagdusa sa mga kampo de konsentrasyon nin Nazi. Mantang an samong klase tinokdoan nin Kastila, naglalaom kaming idestino sa sarong nasyon sa Amerika del Sur na nagtataram nin Kastila. Imahinara an samong pagkasorpresa kan aldaw nin gradwasyon na maaraman na si Douglas idinestino sa Hapon asin kami ni Anne sa Siria. Kaya kaming mga babae kaipuhan na mag-adal nin Arabiko, asin ini nagdanay na totoo maski kan ibalyo naman kami nin destino sa Lebanon. Mientras na hinahalat an samong bisa, nag-ako kami nin mga leksion sa Arabiko nin duwang beses sa kada semana ki George Shakashiri, typesetter kan Watch Tower Society para sa Torrengbantayan na Arabiko.

Kanigoan kaogmang dumuman sa sarong nasyon sa Biblia na pinag-adalan niamo sa klase! Inibanan kami duman ninda Keith asin Joyce Chew, Edna Stackhouse, Olive Turner, Doreen Warburton, patin Doris Wood. Kami nagin nanggad sarong maogmang pamilya nin mga misyonero! An sarong lokal na Saksi nagdalaw sa samong erokan nin mga misyonero tangani na orog pa kaming tabangan sa lenguahe. Durante kan aroaldaw na peryodo nin pagtotokdo sa samo, ineensayo mi an sarong halipot na pag-atubang, na pakatapos kaiyan minaluwas kami asin ginagamit iyan sa samong paghuhulit.

Ginamit mi an samong enot na duwang taon sa Tripoli, kun saen may naestablisar nang kongregasyon. Si Joyce, Edna, Olive, Doreen, Doris, Anne, asin ako nagtabang sa mga agom na babae asin mga aking babae kan lokal na mga Saksi na makikabtang sa mga pagtiripon saka sa ministeryo sa publiko. Sagkod kan panahon na idto, huli sa pagsunod sa lokal na kaugalean, an samong Kristianong mga tugang na lalaki asin babae dai nagtataraed sa mga pagtiripon, asin bihirang makikabtang sa ministeryo sa harong-harong an Kristianang mga tugang na ini. Kaipuhan niamo an tabang ninda sa lenguahe sa samong paghuhulit sa publiko, asin inenkaminar niamo sinda na makikabtang sa gibohon na ini.

Sunod iinasignar kami ni Anne na tabangan an sadit na grupo nin mga Saksi sa suanoy na siudad nin Sidon. Dai nahaloy pakalihis kaiyan, pinabuelta kami sa kabisera, sa Beirut. Ikinatanom na an mga banhi kan katotoohan sa Biblia sa tahaw kan komunidad duman na nagtataram nin Armeniano, kaya pinag-adalan niamo an lenguaheng iyan tangani na matabangan sinda.

Mga Pagliliwat nin Asignasyon

Nakamidbid ko si Wilfred Gooch bago maghale sa Inglaterra. Sia sarong maigot, madinamayon na tugang na naglingkod sa Bethel sa Londres. Si Wilf miembro kan ika-15 klase nin Gilead, na naggradwar durante kan kombension sa Yankee Stadium kan 1950. An saiyang asignasyon bilang misyonero iyo an sangang opisina kan Watch Tower Society sa Nigeria, asin haloy-haloy kaming nagsuratan. Kan 1955 pareho kaming nag-atender sa “Mapangganang Kahadean” na kombension sa Londres, asin dai nahaloy pakalihis kaiyan kami nagkatratong pakasal. Kan suminunod na taon, ikinasal kami sa Ghana, asin uminiba ako ki Wilf sa saiyang asignasyon nin pagmimisyonero sa Lagos, Nigeria.

Pakatapos kong bayaan sa Lebanon si Anne, pinakasalan nia an sarong marahay na Kristianong tugang na nakanood kan katotoohan sa Biblia sa Jerusalem. Dai nakaatender an sakong mga magurang sa samong mga kasal, huling si Douglas, Anne, asin ako ikinasal sa laen-laen na parte kan kinaban. Sa ibong kaiyan, kontento sindang maaraman na kami gabos maogmang naglilingkod sa satong Dios, si Jehova.

Gibohon sa Nigeria

Sa sangang opisina sa Lagos, iinasignar akong maglinig sa mga kuarto kan walong miembro nin samong pamilya sa sangang opisina saka magluto patin maglaba para sa sainda. Garo baga para sa sako ako nagkaigwa bako sana nin agom kundi man nin pamilya ora mismo!

Kami ni Wilf nakanood nin haralipot na pag-atubang sa Biblia sa lenguaheng Yoruba, asin binalosan kami sa samong mga paghihingoa. An sarong hoben na estudyante na nakaolay niamo ngonyan may saro nang aking lalaki asin sarong aking babae na naglilingkod sa dakulang pamilya kan Bethel sa Nigeria na may mga 400 na miembro.

Kan 1963, nakaresibi si Wilf nin imbitasyon na umatender sa sampulong bulan na kurso nin espesyal na pagtotokdo sa Brooklyn, Nueva York. Pakatapos kaiyan, sia dai linalaoman na idinestino pabalik sa Inglaterra. Nawalat ako sa Nigeria asin tinawan sana nin 14 aldaw na abiso na tagboon si Wilf sa Londres. Naghale ako na nagkakatumang an nasa boot, huling nagin maogmahon na asignasyon an Nigeria. Pakatapos na maglingkod nin 14 taon sa ibang nasyon, nagkaipo nin panahon na makibagay giraray sa buhay sa Inglaterra. Minsan siring, nagpapasalamat kami na magin harani giraray sa samong nagkakaedad nang mga magurang asin makatabang sa pag-ataman sa sainda.

Nasususteniran kan Samong Paglaom

Poon 1980, nagkapribilehio akong ibanan si Wilf mantang sia nagbibiahe sa dakol na nasyon bilang paraataman sa sona. Nangorognang naghidaw ako sa samong mga pagdalaw liwat sa Nigeria. Sa huri nagduman man kami sa Scandinavia, sa Solnopan na Indies, asin sa Tahaw na Sirangan​—kabale an Lebanon. Espesyal na kaogmahan na maeksperyensiahan liwat an maogmang mga memorya asin maheling an mga kamidbid ko kaidto na hoben na mga tin-edyer na naglilingkod bilang Kristianong kamagurangan.

Makamomondo nanggad, nagadan an sakong namomotan na agom kan tigsoli nin 1992. Sia 69 anyos pa sana. Idto nangorognang masakiton huli ta idto biglaan na gayong nangyari. Pakaagi nin 35 taon nin pag-agoman, nagkaipo nin panahon sa pagliliwat. Alagad nag-ako ako nin dakol na tabang asin pagkamoot gikan sa sakong Kristianong pamilya sa bilog na kinaban. Nagkaigwa ako nin kadakol na maogmang eksperyensia na mahohorophorop.

Pareho nagtao an sakong mga magurang nin marahayon na halimbawa nin Kristianong integridad. Nagadan si Nanay kan 1981 asin si Tatay kan 1986. Sinda Douglas asin Anne padagos na fiel na naglilingkod ki Jehova. Si Douglas asin an saiyang agom, si Kam, nagbuelta sa Londres, kun saen sinda nagdanay pakatapos na atamanon si Tatay. Si Anne asin an saiyang pamilya nasa Estados Unidos. Kami gabos dakula an pag-apresyar sa itinao sa samo nin Dios na paglaom asin mana. Padagos kaming ‘nagpapaheling nin mapaghalat na kaisipan,’ na naglalaom sa panahon na an mga buhay, kaiba kan saindang binuhay liwat na mga namomotan, iribang maglilingkod sagkod lamang bilang mga miembro kan daganon na pamilya ni Jehova.​—Lamentacion 3:24.

[Nota sa ibaba]

[Mga retrato sa pahina 23]

Paitok patoo poon sa itaas na wala:

Si Gwen sa edad na 13 anyos na idinedemonstrar an sarong pag-adal sa Kingdom Hall sa Enfield

Pamilya nin mga misyonero sa Tripoli, Lebanon, 1951

Si Gwen kaiba an saiyang gadan nang agom, si Wilf