Pagdanayon na Makusog an Saimong Paglaom Bilang Kristiyano

 1. Anong paglaom an itinao sa sato ni Jehova?

ITINAO sa sato ni Jehova an marahayon na paglaom na buhay na daing katapusan. May mga naglalaom na mabuhay nin daing sagkod sa langit bilang imortal na espiritung mga linalang. (1 Cor. 15:50, 53) Pero an kadaklan naglalaom na mabuhay nin daing sagkod digdi sa daga na may perpektong salud saka kaugmahan. (Kap. 21:3, 4) Mahalagang marhay sa sato an satong paglaom, paglaom man iyan na buhay na daing katapusan sa langit o digdi sa daga.

 2. Sa ano nakabasar an satong paglaom, asin taano ta nasabi ta iyan?

² An tataramon na “paglaom,” pag ginagamit sa Bibliya, puwedeng mangahulugan na “an pag-antisipar sa marahay na mga bagay na mangyayari.” An satong paglaom sa maabot na panahon sigurado huling hali iyan ki Jehova. (Roma 15:13) Aram ta kun ano an ipinanuga niya, asin aram ta na pirmi niyang inuutob an saiyang mga panuga. (Bil. 23:19) Kumbinsido kita na igwa si Jehova kan pagmawot asin kan kapangyarihan na isagibo an ano man na sinabi niyang gigibuhon niya. Sa dahilan na iyan, an satong paglaom bakong imahinasyon sana; nakabasar iyan sa ebidensiya asin katotoohan.

 3. Ano an pag-uulayan ta sa artikulong ini? (Salmo 27:14)

³ Namumutan kita kan satong Ama sa langit, asin gusto niya na magtiwala kita sa saiya. (Basahon an Salmo 27:14.) Pag an satong paglaom ki Jehova makusog, matatagalan ta an mga pagbalo asin maaatubang ta nin may kusog nin buot asin kaugmahan an maabot na panahon. Pag-ulayan ta kun paano kita pinoprotektaran kan satong paglaom. Pero tukaron ta nguna kun paano an paglaom siring sa angkla asin sa helmet. Dangan pag-uulayan ta kun paano ta mapapakusog an satong paglaom.

 4. Paano an paglaom siring sa angkla? (Hebreo 6:19)

⁴ Sa surat ni apostol Pablo sa mga Hebreo, iinagid niya an satong paglaom sa angkla. (Basahon an Hebreo 6:19.) Parati siyang nagbibiyahe sa dagat, kaya aram niyang ginagamit an mga angkla para dai maanod an barko. Sa sarong pagkakataon, saro siya sa mga pasahero nin barko kan magkaigwa nin makusugon na bagyo. Mantang nagbabagyo, nahiling niya an mga tripulante na naghulog sa tubig nin mga angkla para malikayan na maanod an barko sa peligrosong kagagapuan. (Gibo 27:29, 39-41) Kun paanong an angkla pinapagdanay an barko sa kinamumugtakan kaiyan, nakakatabang man an satong paglaom na magdanay kitang marigon tanganing dai kita maanod parayo ki Jehova pag napapaatubang sa arog-bagyong mga problema. Tinatabangan kita kan satong makusog na paglaom na makayanan an arog-bagyong mga pagbalo huling kumbinsido kita na magigin marahay man an mga bagay-bagay. Girumduma na nagpatanid si Jesus na pepersegiron kita. (Juan 15:20) Kaya an paghurop-hurop sa ipinanugang magigin balos sa sato nakakatabang na magdanay kita sa satong pamumuhay bilang Kristiyano.

 5. Paano nakatabang ki Jesus an paglaom kan siya mapaatubang sa kagadanan?

⁵ Pag-isipan kun paano an paglaom nakatabang ki Jesus na magdanay na maimbod dawa ngani aram niya na maagi siya nin makulugon na kagadanan. Kan aldaw nin Pentecostes 33 C.E., kinotar ni apostol Pedro an propesiya sa libro nin Salmo na diyan magayunon na ilinadawan an pagigin kalmado ni Jesus asin an saiyang kumpiyansa: “Mabubuhay ako na may paglaom; huli ta dai mo ako papabayaan na nasa Lubungan, asin dai mo tutugutan na mag-agi nin kalapaan an saro na maimbod sa saimo. . . . Tatawan mo ako nin dakulang kagaya-gayahan sa saimong presensiya.” (Gibo 2:25-28; Sal. 16:8-11) Maski ngani aram ni Jesus na magagadan siya, igwa siya nin makusog na paglaom na bubuhayon siya liwat nin Diyos asin na maugma niyang makakaibanan giraray an saiyang Ama sa langit.—Heb. 12:2, 3.

 6. Ano an sinabi kan sarong brother manungod sa paglaom?

⁶ An satong paglaom bilang Kristiyano nakatabang sa dakul na tugang ta na makatagal. Pag-isipan an halimbawa ni Leonard Chinn, sarong maimbod na brother na nakaistar sa England. Durante kan Giyera Mundiyal Uno, iprineso siya huli sa pagsayuma niya na magserbisyo sa militar. Sa laog nin duwang bulan, ibinartolina siya. Pagkatapos kaiyan, puwersahan siyang pinagtrabaho nin magagabat. “An sakong eksperyensiya,” an isinurat niya kan huri, “nakatabang na marhay sako na marealisar kun gurano kahalaga an paglaom para makatagal kita. Igwa kita kan halimbawa ni Jesus, kan mga apostol, asin kan mga propeta, saka igwa kita kan mahalagang marhay na mga panuga na nasa Bibliya. Gabos iyan nagtatao sato nin dakulang paglaom para sa maabot na panahon asin nagpapakusog sato para makatagal.” Para ki Leonard an paglaom sarong angkla, asin puwedeng iyo man sa sato.

 7. Paano an mga pagbalo nakakapakusog kan satong paglaom? (Roma 5:3-5; Santiago 1:12)

⁷ Nagigin mas makusog an satong paglaom pagkatapos na matagalan ta an mga pagbalo asin mamatian an tabang saka pag-uyon ni Jehova. (Basahon an Roma 5:3-5; Santiago 1:12.) Kaya ngunyan, an satong paglaom mas makusog na kisa kan inot na akuon ta an maugmang bareta. Gusto ni Satanas na madaog kita kan mga pagbalo sa sato, pero si Jehova tinatabangan kita na mapangganang matagalan an kada saro kaiyan.

 8. Paano an paglaom siring sa helmet? (1 Tesalonica 5:8)

⁸ An satong paglaom ikinumparar man kan Bibliya sa helmet. (Basahon an 1 Tesalonica 5:8.) Isinusulot nin sarong suldados an helmet para protektaran an saiyang payo sa mga pagsalakay kan saiyang mga kalaban. Sa satong espirituwal na pakikilaban, kaipuhan tang protektaran an satong pag-iisip sa mga pag-atake ni Satanas. Pinapauranan niya kita nin mga sugot asin mga ideya na dinisenyo para rauton an satong kaisipan. Kun paanong pinoprotektaran kan helmet an payo kan suldados, pinoprotektaran man kan satong paglaom an satong kaisipan tanganing magdanay kitang maimbod ki Jehova.

 9. Ano an nagigin resulta pag an mga tawo mayo nin paglaom?

⁹ An satong paglaom na buhay na daing katapusan matabang sato na humiro nin may kadunungan asin pakamansay. Sa kabaliktaran, kun magluya an satong paglaom asin tugutan ta an satong makalaman na kaisipan na kontrulon an satong pag-iisip, puwede tang maiwara an satong pokus sa pasuhan na kamtan an buhay na daing katapusan. Pag-isipan an nangyari sa nagkapirang Kristiyano na nakaistar kaidto sa Corinto. Naiwara ninda an pagtubod sa mahalagang panuga nin Diyos—an paglaom na pagkabuhay liwat. (1 Cor. 15:12) Sinabi ni Pablo na an mga tawo na dai nagtutubod sa pagkabuhay liwat, nabubuhay sana para sa presente. (1 Cor. 15:32) Sa ngunyan, dakul na dai nagtutubod sa mga panuga nin Diyos an nabubuhay sana para sa presente, na ginigibo an ano man na makakapaugma sa sainda. Pero kita, nagtitiwala kita sa puturo na ipinanuga nin Diyos. An satong paglaom nagseserbing piguratibong helmet na nagpoprotektar kan satong kaisipan asin nakakatabang sa sato na dai mag-isip nin para sa sadiri ta sana, na puwedeng makaraot kan satong relasyon ki Jehova.—1 Cor. 15:33, 34.

10. Paano an paglaom makakaprotektar sa sato sa salang pangangatanusan?

¹⁰ An satong helmet na paglaom puwede man na makaprotektar sa sato para dai ta isipon na nungka tang mapapaugma si Jehova. Halimbawa, puwedeng ipangatanusan nin nagkapira: ‘Dai lamang ako makakabilang sa mga mabubuhay nin daing sagkod. Dai ko kayang magin arog ninda. Dai ko magigibo na mamuhay nin uyon sa mga pamantayan nin Diyos.’ Girumdumon na an siring na pangangatanusan an ginamit ki Job kan bakong tunay na pararanga niya na si Elifaz. Sinabi ni Elifaz: “Paano magigin dalisay an sarong tawong mortal?” Sinabi niya pa manungod sa Diyos: “Uya! Dai siyang tiwala sa saiyang mga banal, asin maski an kalangitan bakong malinig sa saiyang paghiling.” (Job 15:14, 15) Grabeng kaputikan nanggad! Girumdumon na an nasa likod kan siring na kaisipan iyo si Satanas. Aram niya na kun pagpaparaisipon mo an siring na mga kaisipan, luway-luway na mawawara an saimong paglaom. Kaya isikwal an siring na mga kaputikan asin magpokus sa mga panuga ni Jehova. Nungka mong pagdudahan na gusto niya na mabuhay ka nin daing sagkod asin na tatabangan ka niya na maabot an pasuhan na iyan.—1 Tim. 2:3, 4.

11. Taano ta dapat kitang magin mapasensiya mantang hinahalat an kautuban kan satong linalauman?

¹¹ Bako pirming madali na pagdanayon na makusog an satong paglaom. Puwede kitang mawaran nin pasensiya mantang hinahalat ta an Diyos na utubon an saiyang mga panuga. Minsan siring, si Jehova daing sagkod, asin an saiyang pagmansay sa panahon bakong arog kan satong pagmansay. (2 Ped. 3:8, 9) Uutubon niya kun ano an ipinanuga niya sa pinakamarahay na paaging posible, pero puwedeng dai siya humiro sa panahon na inaasahan ta. Ano an makakatabang sa sato para mapagdanay na makusog an satong paglaom mantang mapasensiya kitang naghahalat na utubon nin Diyos an saiyang mga panuga?—Sant. 5:7, 8.

12. Sigun sa Hebreo 11:1, 6, paano an paglaom konektado sa pagtubod?

¹² Mapapagdanay tang makusog an satong paglaom kun magdadanay kitang harani ki Jehova, an saro na naggagarantiya kan satong paglaom. Sa katunayan, sa Bibliya an paglaom konektadong marhay sa pagtubod na si Jehova nag-eeksister asin na siya an “paratao nin balos sa mga udok na naghahanap sa saiya.” (Basahon an Hebreo 11:1, 6.) Kun talagang totoo sa sato si Jehova, magigin mas makusog an kumpiyansa ta na uutubon niya an gabos na saiyang ipinanuga. Konsideraron niyato an praktikal na mga paagi para mapararom an satong relasyon ki Jehova asin sa siring mapagdanay tang makusog an satong paglaom.

13. Paano kita magigin harani sa Diyos?

¹³ Mamibi ki Jehova, asin basahon an saiyang Tataramon. Dawa ngani dai ta nahihiling si Jehova, puwede kitang magin harani sa saiya. Puwede ta siyang kaulayon paagi sa pamibi, na nagtitiwala na dadangugon niya kita. (Jer. 29:11, 12) Puwede kitang magdangog sa Diyos paagi sa pagbasa kan saiyang Tataramon asin paghurop-hurop kaiyan. Mantang binabasa niyato kun paano inataman ni Jehova an mga maimbod sa saiya kan nakalihis na panahon, padagos na magkukusog an satong paglaom. An gabos na nasa Tataramon nin Diyos “isinurat para sa pagtukdo sa sato, tanganing paagi sa satuyang pakatagal asin paagi sa karangahan hali sa Kasuratan magkaigwa kita nin paglaom.”—Roma 15:4.

14. Taano ta marahay na hurop-hurupon an manungod sa mga ginibo ni Jehova para sa iba?

¹⁴ Hurop-hurupon kun paano inutob ni Jehova an saiyang mga panuga. Pag-isipan an ginibo nin Diyos para ki Abraham asin Sara. Gurangon na sinda para magkaaki. Pero, ipinanuga sa sainda nin Diyos na magkakaaki sinda. (Gen. 18:10) Ano an nagin reaksiyon ni Abraham? Sinasabi kan Bibliya: “Nagtubod siya na siya an magigin ama nin dakul na nasyon.” (Roma 4:18) Dawa ngani para sa tawo mayo na nin paglaom an sitwasyon ninda, may tiwala si Abraham na uutubon ni Jehova an Saiyang panuga. Dai nasudya an pagtitiwala kan maimbod na lalaking iyan. (Roma 4:19-21) An arog kaiyan na mga pagkasaysay nagtutukdo sa sato na pirmi kitang makakapagtiwala na uutubon ni Jehova an saiyang mga panuga, gurano man tibaad kaimposible para sa sato an sitwasyon.

15. Taano ta dapat tang hurop-hurupon an mga ginibo nin Diyos para sa sato?

¹⁵ Pag-isipan an ginibo ni Jehova para sa saimo. Pag-isipan kun paano ka nakinabang na mismo sa nautob na mga panuga na yaon sa Tataramon nin Diyos. Halimbawa, nanuga si Jesus na itatao kan saiyang Ama an panginot na mga pangangaipo mo sa buhay. (Mat. 6:32, 33) Inasigurar man saimo ni Jesus na tatawan ka ni Jehova nin banal na espiritu pag hinagad mo iyan. (Luc. 11:13) Inutob ni Jehova an mga panugang iyan. Posibleng marhay na makakaisip ka nin iba pang mga panuga na inutob ni Jehova para sa saimo. Halimbawa, nanunuga siya na papatawadon ka niya, rarangahon ka niya, asin papakakanon ka niya sa espirituwal. (Mat. 6:14; 24:45; 2 Cor. 1:3) Pag hinuhurop-hurop mo an mga ginibo na nin Diyos para sa saimo, mapapakusog mo an saimong paglaom sa mga gigibuhon niya para sa saimo sa maabot na panahon.

16. Taano ta an paglaom sarong mahalagang marhay na regalo?

¹⁶ An satong paglaom na buhay na daing katapusan sarong mahalagang marhay na regalo hali ki Jehova. Inaantisipar niyato an sarong magayunon na puturo, asin makakasigurado kita na mangyayari iyan. Nagseserbi iyan na angkla niyato, na nakakaparigon sa sato para makayanan an mga pagbalo, matagalan an persekusyon, asin maatubang pa ngani an kagadanan. Nagseserbi iyan na helmet niyato, na nagpoprotektar sa satong kaisipan tanganing maisikwal ta an sala asin magibo an tama. An satong paglaom na basado sa Bibliya lalong nakakaparani sa sato sa Diyos, asin ihinahayag kaiyan an rarom kan saiyang pagkamuot sa sato. Nakikinabang nanggad kita mantang pinapagdanay tang malinaw asin makusog an satong paglaom.

17. Taano ta an satong paglaom minaresulta sa kaugmahan?

¹⁷ Sa surat ni apostol Pablo sa mga taga Roma, dinagka niya kita: “Mag-ugma huli sa saindong paglaom.” (Roma 12:12) Makakapag-ugma si Pablo dahil sigurado siya na kun magdadanay siyang maimbod, magkakamit siya nin buhay na daing katapusan sa langit. Makakapag-ugma man kita sa satong paglaom dahil sigurado kita na uutubon ni Jehova an saiyang mga panuga. Arog kan isinurat kan salmista na, “maugma an saro . . . na an paglaom yaon ki Jehova na saiyang Diyos, . . . an Saro na pirming nagdadanay na maimbod.”—Sal. 146:5, 6.