Nehemia

5 Tapi kalak Jahudi ras diberu kalak e mengeluh kerna senina-seninana kalak Jahudi.+ 2 Piga-piga ngataken, “Enterem anak-anak kami dilaki ras diberu. Perlu kami pangan gelah banci kami man janah tetap nggeluh.” 3 Si deban ngataken, “Enggo bere kami juma kami, kebun anggur kami, ras rumah kami jadi jaminen guna ndatken pangan sanga lit kekurangen pangan.” 4 Si debanna ka ngataken, “Enggo pinjam kami sen, janah juma kami ras kebun anggur kami ban kami jadi jaminenna guna nggalari upeti* man raja.+ 5 Amin pe kami sada dareh ras sada daging ras senina-senina kami, janah anak-anak kami bali bagi anak-anak kalak e, tapi anak-anak kami enggo bereken kami jadi budak. Piga-piga anak kami si diberu enggo jadi budak.+ Tapi lanai lit si banci lakoken kami, sebap juma ras kebun anggur kami enggo jadi jang kalak.”

6 Merawa kel aku sanga kubegi kalak e mengeluh. 7 Emaka kuukuri kerna si e bas pusuhku. La aku setuju nandangi bangsawan-bangsawan ras pejabat-pejabat janah ningku man kalak e, “Uga maka galang kel ban kena bungana man senina-senina kena?”+

Selain si e, kuaturken ka gelah jelma si enterem pulung guna ncakapken kerna si e. 8 Ningku man kalak e, “Asa ngasup kami, tukur kami mulihi senina-seninata kalak Jahudi si mbarenda enggo idayaken ku bangsa-bangsa. Gundari, dayaken kena ka nge senina-senina kena+ mulihi janah arus tukur kami?” Megi si e sip kalak e, janah lanai terjawap kalak e. 9 Kenca si e ningku, “Labo mehuli si lakoken kena e. La kin arusna mbiar kena man Dibata+ i bas kerina si lakoken kena,* alu bage kita la ihina bangsa-bangsa ras musuh-musuhta? 10 Aku, senina-seninaku, ras anak buahku enggo minjamken sen ras pangan man kalak e. Emaka mindo kel aku, ula nai min ban kena bungana adi pinjamken kena sen kena.+ 11 Ulihken kena min bas wari enda man kalak e juma,+ kebun anggur, kebun saitun, rumah, bage pe seperseratus* arah sen, pangan, anggur mbaru, ras minak si enggo pindo kena jadi bungana.”

12 Megi si e, nina kalak e, “Uga nindu bage kari ban kami. Pasti ulihken kami kerina man kalak e janah labo pindo kami kai pe.” Emaka kulebuh imam-imam janah kusuruh kalak e ndai ersumpah guna nepati janji e. 13 Kukisamken ka lipaten bajuku janah ningku, “Mbera-mbera ise pe si la nepati janjina, kisamken Dibata si benar ia arah rumahna bage pe arah ertana alu cara si bagenda, seh ngasa lanai lit kai pe si tading.” Megi si e kerina kalak si pulung ngataken, “Amin!”* Jenari puji kalak e Jahwe janah tepati kalak e janji e.

14 Selain si e, aku ras senina-seninaku la pernah man pangan si jadi hak gubernur,+ mulai aku itugasken jadi gubernur+ kalak e i Juda, eme mulai tahun si pe-20-ken+ seh asa tahun si pe-32-ken+ pemerentahen Raja Artasasta,+ si dekahna enggo 12 tahun. 15 Tapi gubernur-gubernur si sebelumna, ibebanina rakyat janah tiap wari tetapkenna 456 gram* pirak guna roti ras anggur. Anak buah kalak e pe kejam man rakyat. Tapi aku la bage,+ perban mbiar aku man Dibata.+

16 Ikut aku nampati guna mpekena tembok e janah anak buahku pe pulung i je guna erdahin. Tapi sada lambar juma pe la pindo kami.+ 17 Selain si e, lit 150 kalak Jahudi ras pejabat-pejabat si man i mejaku, lenga termasuk kalak arah bangsa si deban si reh ndahi kami. 18 Tiap wari isikapken man bangku* sada lembu jantan, enem biri-biri si mejilena, ras perik-perik. Sekali bas sepuluh wari isikapken ka kerina jenis anggur janah mbue kel si isikapken. Amin gia bage la kupindo pangan si jadi hak gubernur, sebap tugas si ibereken man rakyat pe enggo mberat. 19 Emaka ertoto aku, “O Dibataku, inget min aku janah pasu-pasu min aku perban kerina si enggo kulakoken guna bangsa enda.”+