January

Eú me lein ekkewe fansoun mi kon apwapwa ngeni rúúemén pwúpwúlú, ina atun a uputiw emén néúr. Iwe nge, inaamwo iká ra tongei néúr na upwufé mi aúchea, nge saminne repwe mochen an epwe chék mémménúkol. Ren enletin, repwe fókkun lólilen iká néúr na ese mámmááritá. Pwal ina ussun ren Jiowa, a pwapwa atun sia poputá le káé ussun i, nge ese mochen ach sipwe chék mémménúkol lón pekin ngún. (1 Kor. 3:1) Nge a erenikich ach sipwe emén Chón Kraist mi “ásimaw.” Lón ewe Paipel, ewe kapasen Krik mi wewe ngeni ásimaw a pwal tongeni wewe ngeni “emén mi mwukóló.” (1 Kor. 2:6) Emén ménúkol a kan mámmááritá tori an wiliiti emén mi mwukóló. Ina ussun ren kich, sia pwal mámmááritá lón ach riri ngeni Jiowa. Me ikena ie, sia wiliiti emén Chón Kraist mi ásimaw. Ewer, inaamwo iká sia fen ásimaw, nge sipwe chék sópweeló le feffeitá lón pekin ngún.—1 Tim. 4:15. w24.04 2 ¶1, 3

Iká emén a eisinuk, ‘Ié Jiowa me reom?’ Eli kopwe apasa, ‘Jiowa i Semei, ái Kot, me Chiechiei.’ Eli ka pwal ekieki ekkóch itelap are kapas ka tongeni áweweei ussun Jiowa. Iwe nge, ka fen pwal ekieki pwe i ewe a wisen awasélaéchuk? King Tafit a aléllééi án Jiowa chiechi ngeni néún kewe aramas mi túppwél ngeni ewe riri lefilen emén mi wisen awasélai aramas me néún kewe waséla. Tafit a eisini: “Jiowa, ié epwe tongeni waséla lón imwom imw mangaku? Ié epwe tongeni nónnóm wóón chukum mi pin?” (Kölf. 15:​1, NW) Seni ena wokisin, sia silei pwe sia tongeni néún Jiowa waséla, weween sia tongeni wiliiti chiechian. Me mwen án Jiowa féraatá mettóch meinisin, i a chék áláemén. Nge mwirin, a féraatá Néún we mwánichi. Jiowa a ussun emén mi wisen awasélaéchú aramas, i a etiwa néún we áeménún waséla ngeni imwan imw mangaku, me i a fókkun pwapwa le féri ena. Ewe Paipel a apasa pwe Jiowa a fókkun “pwapwa” ren Néún na. Iwe, néún na waséla a “meseik me fän mesan fansoun meinisin.”—SalF. 8:30. w24.06 2 ¶1-3

Anchangei eú mwichemmóngun aramas ina epwe lap seni 340,000 soufiu ra kochufengen pwe repwe seikaatá Tafit an epwe kingen unusen Israel. Ren úkúúkún úlúngát rán, ekkena soufiu ra nóm lón eú leeni mi panapanetá me kitiféúféú únúkkún Hepron. Ra akkaasoos me eáni kélún mwareiti Jiowa. (1 Kron. 12:39) A wor emén alúwél itan Satok a nóm lein ena mwichemmóngun aramas. Eli chómmóng aramas resap tepereni pwe a nóm ikena. Iwe nge, Jiowa a kúna pwe a nóm ikena, iwe a mochen ach sipwe pwal silei ena. (1 Kron. 12:​22, 26-28) Satok, i emén souasor me ra angangfengen me ewe Souasor mi Lap itan Apiatar. Kot a pwal fang ngeni Satok watteen tipáchem me an tufichin weweiti letipan. (2 Sam. 15:27) Satok i emén mi fókkun pwora. Atun ekkeei ránin lesópwólóón, a lallapoló án Setan sótun atai ach lúkúlúk wóón Jiowa. (1 Pit. 5:8) A lamot ach sipwe pwora atun sia witiwiti án Jiowa epwe asopwaló án Setan ei ótót mi ngaw. (Kölf. 31:24) Iká sia féri ena, sia tongeni áppirú án Satok pwora. w24.07 2 ¶1-3

Lupwen Jiowa a féri ewe áeménún mwán me ewe áeménún fefin, a mochen ar repwe pwapwa. A eleenier lón eú leeni mi lingéch, ngeniir ewe liffang pwúpwúlú, me ewisa ngeniir eú angang mi múrinné. Iir repwe ouraló fénúfan ren mwirimwiriir kewe me achéúaaló ewe paratis wóón unusen fénúfan pwe epwe ussun ewe tánipiin Ichen. A ngeniir eú chék allúk mi mecheres. A pwal ereniir pwe iká ra pwúkún filaatá le álleasolapa ena allúk, ar tipis epwe emmweniir ngeni máló. Sia silei met a fis mwirin. Emén chónláng mi ngaw ese tongei Kot are aramas a etipetipa Atam me If ar repwe álleasolapa Kot. Atam me If ra tipetipeló ren ena chónláng mi ngaw. Rese lúkú Semer we mi tong, iwe ra tipis. Minne Jiowa a apasa, a pwénútá. Pokiten án Atam me If álleasolap, ra riáfféú lón ánein manawer. Ra chinnapeló, me ló, ló, ló, ra máló.—Ken. 1:​28, 29; 2:​8, 9, 16-18; 3:​1-6, 17-19, 24. w24.08 3 ¶3

Jiowa me Néún we mi áchengicheng ra mochen ach sipwe pwapwa. Kölfel 119:​2, TF, a apasa: “Mi feioch [“pwapwa,” NW] ir mi alleasochisi an kewe afalafal, ir mi kukutta i seni lon unusen letiper.” Iei met Jises a pwal anúkúnúkú ngenikich: “Chókkewe mi rongorong ewe kapasen Kot me akkamwéchú, iir ra pwapwa!” (Luk 11:28) Kich néún Jiowa aramas, kich aramas mi pwapwa atun sia kan ákkálleani án Kot we Kapas me achocho le apwénúetá met sia káé. (Jem. 1:​22-25) Ina eú alen ach sipwe apwapwaai Jiowa. (SalAf. 12:13) Pwal och, atun sia álleasochisi ekkewe kapasen fén lón án Kot we Kapas, sia émúrinnéló ach riri ngeni chón ach famili me chón ach mwichefel. Pwal och, sia ttiisenikich chómmóng osukosuk mi tori ekkewe rese álleasochisi án Jiowa kewe allúk. Sia tipeeú ngeni met King Tafit a apasa lón an we kél. Mwirin an kapas ussun ekkewe allúk me án Jiowa kapwúng, iei met a erá: “Eman mi apwönüetä epwe angei liwinin mi lapalap.”—Kölf. 19:​7-11. w24.09 2 ¶1-3

Jiowa a kúna meinisin met a fiffis ngeni néún kewe chón angang. A kúna atun sia pwapwa me atun sia letipechou. (Kölf. 37:18) Atun a kúna pwe sia achocho úkúúkún ach tufich le angang ngeni inaamwo iká sia nóm fán weires, a fókkun pwapwa rech! Nge lap seni ena, a fókkun mochen álisikich me oururukich. Kölfel 147:​3, a apasa pwe Jiowa a ‘filiti kinasen’ ekkewe mi tatakkis leluker. Ena wokisin a áweweei ifa ussun Jiowa a angepwetete le túmúnúéchú chókkewe mi kinás letiper. Met a lamot sipwe féri iká sia mochen unusen kúna án Jiowa túmún? Ekieki ei kapas áwewe. Emén tokter mi lipwákéch a tongeni álisi emén mi feiengaw an epwe chikar. Nge ren án ena mi feiengaw epwe chikar, a lamot epwe unusen álleasochisi met ewe tokter a ereni an epwe féri. Lón ewe Paipel, Jiowa a fós ngeni chókkewe mi riáfféú letiper, me a awora kapasen emmwen mi fiti tong. w24.10 6 ¶1-2

Me lóóm, sia fen káé seni néúch kewe puk met a fis ngeni chókkewe Jiowa a fen apwúngaló pwe iir aramas rese pwúng. Sia fen erá pwe chókkewe Jiowa a fen nireló, ese chúen wor ar ápilúkúlúkún manawsefál. A wor fitu pwóróus lón Paipel mi áweweei án Jiowa apwúngú chókkewe rese pwúng. Áwewe chék, a nieló meinisin atun ewe Noter, chilóón chék Noa me an we famili. Pwal och, Jiowa a néúnéú ekkewe chón Israel le nieló ekkewe fisu mwúún aramas mi nóm lón ewe Fénúen Pwon. Me a pwal néúnéú emén chónláng le nieló 185,000 soufiun Asiria lón chék eú pwiin. (Tut. 7:​2, 3; Ais. 37:​36, 37) Itá ewe Paipel a fókkun erá pwe Jiowa esap amanawasefáli meinisin chókkana, nge repwe chék máffócholó? Aapw, esap ina. Sise silei ifa ussun Jiowa a apwúngú emén me emén ekkena aramas, me sise pwal silei iká a suuk ngeniir alen ar repwe káé ussun i, me áier. w24.05 3 ¶5-7

Jises a eáni eú kapas áwewe ussun emén fefin mi má seni pwúlúwan mi soun ló tingorei emén soukapwúng an epwe eáni an apwúng fán pwúng. Néún Jises kewe chón káé ra tongeni weweiti meefien ena fefin lón ena pwóróus pokiten chómmóng aramas lón ena fansoun ra kúna féfférún pwúngúngaw. (Luk 18:​1-5) Kich sia pwal tongeni weweiti meefien ena fefin pokiten kich meinisin sia pwal kúkkúna féfférún pwúngúngaw. Chómmóng aramas lón ei ótót, ra aapaap, kirikiringaw, me tipemmóng, ina popun sisap máirú atun aramas repwe eáni féffér ese pwúng ngenikich. (SalAf. 5:8) Nge neman sipwe kon lichippúng iká emén chienach Chón Kraist epwe ina ussun ngenikich. Esap turun tipen chienach kewe ar repwe eáni féfférún pwúngúngaw ngenikich, nge pokiten rese unuséch iwe a tongeni fis ena. Sia tongeni káé chómmóng mettóch seni met Jises a féri atun a kúna pwúngúngaw seni ekkewe aramasangaw. Iká sia tongeni mosonottam ngeni féfférún ekkewe aramasangaw, epwele fen ifa me ach mosonottam ngeni chienach kewe lón mwichefel! w24.11 2 ¶1-2

Pilawa, ina eú me lein ekkewe mwéngé mi aúchea ngeni aramas lón fansoun lóóm. (Ken. 14:18; Luk 4:4) Ren enletin, lape ngeni aramas ra kan mwémmwéngé pilawa, ina popun fán ekkóch Paipel a néúnéú pilawa le áwewe ngeni mwéngé. (Mat. 6:​11, ftn.) Jises a pwal áeá pilawa lón ruu me lein an kewe manaman mi iteféúló. (Mat. 16:​9, 10) Sia kúna eú me lein pwóróusen ekkena manaman lón Jon sópwun 6. Mwirin án néún Jises kewe aposel ra wes le afalafal, i a uweiireló wóón efóch waa ngeni ewe Setin Kalili pwe repwe asésé. (Mark 6:​7, 30-32; Luk 9:10) Ra wareiti eú leeni mi mosonoson me kinamwe lón ewe kinikin Petsaita. Nge fitengéréú aramas ra rong pwe Jises a nóm ikena, iwe, ra rangoto ren. Jises ese éménúngaw seniir. A kirekiréch le awora fansoun le asukuler ussun ewe Mwúún Kot me echikaraatá ekkewe mi semmwen. Pokiten epwele pwin, iwe ekkewe chón káé ra ekieki iká ifa ussun ekkena aramas ra tongeni kúnékún met repwe áni. Eli ekkóch me leir ra chék uwei ekis ener, nge lape ngeniir a lamot ar repwe feiló ngeni ekkewe sóópw me kamé ener.—Mat. 14:15. w24.12 2 ¶1-2

Popuch kewe Atam me If ra nóm lón eú paratis mi ling. (Ken. 1:27; 2:​7-9) A suuk ngeniir ar repwe eáni manaw mi pwapwa tori feilfeiló, nge mettóch meinisin a siwil. A péút seniir leenier we, ewe paratis me pwal ar we ápilúkúlúkún manaw tori feilfeiló. Iwe, met mwirimwiriir kewe repwe álemwiri seniir? Ewe Paipel a erá: “Ren emén aramas [Atam], tipis a tolong lón fénúfan, me máló a tolong ren ena tipis, iei ussun máló a tori aramas meinisin pokiten iir meinisin ra tipis.” (Rom 5:12) Iwe, álemwiriach me ren Atam, ina tipis, mi atoto máló. Álemwiriach na tipis, a ussun eú liwinimmang mi fókkun watte ese wor emén leich a tongeni omusa. (Kölf. 49:8) Jises a aléllééi tipis ngeni “liwinimmang.” (Mat. 6:12; Luk 11:4) Atun sia tipis, ussun itá a wor ach liwinimmang ngeni Jiowa. A lamot ach sipwe omusatiw ena liwinimmangen tipis. Iká ese mus ena liwinimmang, iwe epwe chék mus iká sia máló.—Rom 6:7. w25.02 2-3 ¶2-3

Ach afalafala ngeni aramas ewe enlet ussun ewe Mwúún Kot, ina eú watteen feiéch ngenikich! Ena feiéch ese suuk ngeni ese lifilifil ié. Áwewe chék, atun Jises a nóm fénúfan, ese mut ngeni ekkewe ngún mi ngaw ar repwe afalafala ussun i. (Luk 4:41) Lón ei fansoun, me mwen án emén epwe tongeni fiti néún Jiowa kewe aramas le afalafal, a lamot epwe fich ngeni ena wis. Sia pwáári úkúúkún ach aúcheani wisach le afalafal ren ach afalafal ese lifilifil ia sia nóm ie, me ese lifilifil ineet a suuk ngenikich. Sia áppirú Jises le achocho ngeni le fótukaalong me étútúúi pwikilin ewe enlet lón letipen aramas. (Mat. 13:​3, 23; 1 Kor. 3:6) Ussun chék met Jises a féri, án Jiowa we mwicheich a pwal féri meinisin met epwe atufichi án aramas repwe silei iten Kot we. Eú alen án ewe mwicheich féri ena, ina ren kaworen ewe New World Translation of the Holy Scriptures. Ena Paipel a eliwinalóng iten Kot we lón úrúrún leenian lón ewe Paipel. Iei a chiyakú unusen are kinikinin ena Paipel lón lap seni 270 fósun fénúfan. w24.04 9 ¶8-9

Ekkóch Chón Kraist mwán mi pwapwa lón ar pwúpwúlú, ra kan féri och mettóch iteiten rán mi pwáári ngeni pwúlúwer úkúúkún ar tongei. (1 Jon 3:18) Eli emén mwán a tongeni pwáári an tong ngeni pwúlúwan we lón ekkóch mettóch mi chék kisikis, áwewe chék ren an kémwéch péún are foropachei. A pwal tongeni text ngeni me ereni, “Úa pwosiituk” are “Ifa ussum ikenái?” Eli fán ekkóch kopwe pwáári óm tongei pwúlúwom we ren óm mak ngeni taropwe me ereni úkúúkún óm tongei. Iká emén mwán a féri ekkena mettóch, a ésúúfélú pwúlúwan we me apéchékkúla ar ririin pwúpwúlú. Emén mwán mi súféliti pwúlúwan, a kan aúfichietá me apéchékkúla. Eú alen an féri ena, ina an chemeni an epwe pwáári an aúcheani are kilisou ren meinisin met a féri pwe epwe álisi. (Kol. 3:15) Atun emén mwán a mwareiti pwúlúwan we seni letipan, a apwapwaai letipen neminna me epwe meefi núkúnúkéch, meefi tongan, me meefi ésúfélún. w25.01 11 ¶15; 13 ¶16

Kölfel 15 a muchúló ren ei pwon: “Ätewe mi föri ekei mettoch epwe nomopos won chukum mi pin.” Ewe soumakken kélfel a affata ewe popun pwata Jiowa a mochen ach sipwe féri meinisin ekkena mettóch mi mak lón ena puken Kölfel 15. I a mochen ach sipwe pwapwa. Lupwen sia féri met a apasa ach sipwe féri, manawach epwe múrinné me i epwe túmúnúkich. Néún Jiowa kewe waséla ra tongeni mwétéresiiti ar we ápilúkúlúk mi amwarar fán iten mwachkkan. Ekkewe mi kepit, repwe nóm lón láng ikewe Jises a ammólnatá eú leeni fán iter. (Jon 14:2) Nge ekkewe mi eáni ápilúkúlúkún manaw wóón fénúfan, ra ésúkúsúkú pwénútáán ewe pwon lón Pwáraatá 21:3. Ewer, kich meinisin sia fókkun feiéch pwe Jiowa a etiwakich ach sipwe chiechian, sipwe néún waséla lón imwan imw mangaku tori feilfeiló.—Kölf. 15:​1-5. w24.06 13 ¶19-20

Ewe Paipel a áiti ngenikich pwe Jiowa i emén Kot mi fókkun lapalap. Ekiseló chék mwirin an angasaaló ewe mwúún Israel seni ar slave lón Isip, a pwáár ngeniir ifa úkúúkún amwararan. Anchangei ei: Fite million chón Israel ra kochufengen arap ngeni ewe Chuuk Sinai pwe repwe aúseling ngeni Kot. Eú kuchuchol a pwélúoló ena chuuk. Mwirin, a fis eú watteen chchech fengen me chopulap me inefi me a pwal ttik och akúrang mi ussun ttikin rappwa mi léúwommóng. (Eks. 19:​16-18; 24:17; Kölf. 68:8) Atun Jiowa a féri ekkena mettóch, eli ra fókkun mwaar ren úkúúkún amwararan. Lón ei fansoun, sia ellingaaló Jiowa ren ach ereni aramas ussun ekkewe mettóch mi amwarar a féri, me napanapan kewe mi echipwér me atun sia ereni ekkewe ekkóch pwe sia tufichin féri ekkewe mettóch pokiten i a álisikich.—Ais. 26:12. w25.01 2 ¶2-3

Atun ekkewe chón Israel ra sái ngeni ewe Fénúen Pwon, ekkewe mwán mi wor maner ra sótuni Moses me wisan we Jiowa a fen ewisa ngeni. Ra erá: “Unusen ei mwichen aramas [esap chék Moses] a pin, nge ewe Samol mi Lapalap a nom lefiler.” (Num. 16:​1-3) Inaamwo iká a pwúng pwe “unusen ei mwichen aramas” ra pin mwen mesen Jiowa, nge I a fen filaatá Moses an epwe wisen emmweni Néún kewe aramas. Atun ekkena aramas ra esiita Moses, ren enletin ra esiita Jiowa. Rese nefótófót wóón met Jiowa a mochen, nge ra nefótófót wóón met ra mochen, ina ar mochen nemenem me án aramas repwe ingeitiir. Kot a nieló ekkewe chónemmwen rese álleasochis, me pwal ekkewe fitengéréú aramas mi peniir. (Num. 16:​30-35, 41, 49) Lón ei fansoun, sia tongeni lúkúlúk pwe Jiowa ese pwapwa ren chókkewe rese súféliti kókkótun an we mwicheich. w24.07 11 ¶11

Sia manaw lón ei fansoun lape ngeni aramas ra oputa, pwal mwo nge esiita, án Paipel éúréúr ussun sópwólóón ei ótót. (2 Pit. 3:​3, 4) Inaamwo iká a chúen wor chómmóng mettóch sise silei ussun, a lamot an epwe wor ach lúkú mi péchékkúl pwe Jiowa a fen filaatá ineet epwe war sópwólóón ei ótót. Me sipwe pwal lúkúlúk pwe i epwe túmúnúkich lón ena atun. A pwal lamot sipwe apéchékkúlaló ach lúkú pwe Jiowa a néúnéú “ewe chón angang mi túppwél me tipáchem” lón ei fansoun le ekkemmwenikich. (Mat. 24:45) Lupwen ewe riáfféú mi lapalap epwe poputá, neman epwe kawor ngenikich emmwen mi tichik ren ifa ussun sipwe kúna túmúnún manawach. Iei ewe fansoun mi fókkun lamot ach sipwe lúkúlúk wóón chókkewe mi emmweni án Jiowa mwicheich. Iká sise lúkúlúk wóór me álleasochisi ar emmwen lón ei fansoun, epwe weires ngenikich le álleasochisi ekkewe emmwen epwe kawor ngenikich atun ewe riáfféú mi lapalap. w24.09 11 ¶11-12

Ámi kena sam me in Chón Kraist, esap pokiten chék oua lúkú Kot, iwe néúmi kewe repwele pwal lúkú Kot. Ina popun, neman néúmi kewe repwe poputá le eisinikemi ekkeei esin kapas eis: ‘Ifa ussun úpwe silei pwe mi wor emén Kot? Úa tongeni wesewesen lúkú met Paipel a apasa?’ Ren enletin, ewe Paipel a pesei ngenikich ach sipwe áeá unusen ach tufichin ekiek me “etittinafichi mettóch meinisin.” (Rom 12:1; 1 Tes. 5:21) Iwe, ifa ussun oua tongeni álisi néúmi we le apéchékkúla an lúkú? Pesei néúmi we an epwe kútta pisekin ánnet mi pwáári pwe met ewe Paipel a apasa mi enlet. Lupwen néúmi we epwe eáni kapas eis, alamota ena fansoun le áiti ngeni ifa ussun epwe kútta pélúwer ren an áeá ekkewe minen research, áwewe chék ren ewe Watch Tower Publications Index me ewe Research Guide for Jehovah’s Witnesses. Lón ena Research Guide, fán ewe itelap “The Bible,” a tongeni kútta ei itelap “Inspired by God,” mi pwáári pwe ewe Paipel esap eú chék puk mi múrinné makkeien aramas. Nge fen ina “ewe kapasen Kot.”—1 Tes. 2:13. w24.12 14-15 ¶4-5

Ifa ussun ekkewe mwán mi ásimaw ra tongeni áppirú Jises? A lamot repwe ákkáiti ekkewe mwán, pwal mwo nge ekkewe kúkkún me sáráfé, an epwe fich ngeniir pwal ekkóch angang lón mwichefel. Ekkewe mwán mi ásimaw ra weweiti pwe eli a lamot ngeni chókkana ar repwe káé chómmóng mettóch. A lamot ar repwe ákkáiti chókkana fán tong pwe repwe tongeni káé ar repwe pwáári tipetekison, alúkúlúk, me tipemecheres le álisi ekkewe ekkóch. (1 Tim. 3:1; 1 Pit. 5:5) Jises a ewisa ngeni néún kewe chón káé ar repwe áiti ngeni aramas ewe kapas allim, me pwal áweweei ngeniir masouen án Kot Kapas. Eli ekkena chón káé ra meefi pwe rese tufichin féri ena angang. Iwe nge, Jises a fókkun lúkúlúk pwe ra tongeni féri ena angang, ina minne a ereniir: “Ussun chék ewe Sam a tiinieito, ngang úpwe pwal tiinikemiiló.”—Jon 20:21. w24.10 16 ¶15; 17 ¶17

Tafit i emén king mi túppwél ngeni Kot. I pwal emén chón kél, chón mak kúúkúún fós, emén soufiu, me emén soufós. A tori Tafit chómmóng weires. Ren fite ier, a chék nómofetál me súsúfeil seni ewe mwán mi lólówó, King Saul. Mwirin án Tafit a wiliiti king, a pwal súsúfeil pokiten án néún we Apsalom mochen wiliiti king me sótun nieló. Inaamwo iká a tori Tafit ekkena esin osukosuk, pwal mwo nge féri tipis mi chou, nge a sópweeló le angang ngeni Kot tori an a máló. Jiowa a erá pwe Tafit, i emén ‘mwán mi apwapwaai letipan.’ A ifa me múrinnéén ach sipwe aúseling ngeni án Tafit kewe kapasen éúréúr! (1 King 15:5) Áwewe chék, ekieki ussun ewe kapasen éúréúr Tafit a ngeni néún we Salomon, ewe epwe wii lón wisan we wisen king. Ena alúwél a kefil me ren Jiowa an epwe wisen sópweeló le álisaatá fel mi enlet me aúetá ewe imwenfel mi ellingaaló Kot. (1 Kron. 22:5) Epwe wor chómmóng osukosuk epwe tori Salomon atun epwe féri ena angang. Iwe, met Tafit epwele ereni? Tafit a ereni néún na pwe iká epwe álleasochisi Jiowa, iwe epwe sópwéch lón manawan.—1 King 2:​2, 3. w24.11 10 ¶9-11

A lamot ngeni emén mwán mi kirikiringaw ngeni pwúlúwan we lón kapas are féffér, an epwe féri ekkóch mettóch pwe epwe ririéchsefál ngeni pwúlúwan we me pwal ngeni Jiowa. Áeúin, epwe mirititi pwe a chou an we osukosuk. Ese wor met mi opoló seni Jiowa. (Kölf. 44:21; SalAf. 12:14; Ipru 4:13) Oruuan, epwe úkútiw le eriáfféwú pwúlúwan we me siwili napanapan. (SalF. 28:13) Aúlúngátin, epwe omusomus ngeni pwúlúwan we me ngeni Jiowa. (Féf. 3:19) A lamot an epwe pwal tingorei Jiowa an epwe fang ngeni ewe mochen le féri siwil me álisi le nemeni an ekiek, kapas, me féffér. (Kölf. 51:​10-12; 2 Kor. 10:5; Fil. 2:13) Arúáánúún, epwe etipeeú féfférún ngeni met a eáni iótek ren an káé le oput meinisin sókkun féfférún akkachofesá me kapas mi ámmetek. (Kölf. 97:10) Enimuan, epwe mwittir kútta álillis seni ekkewe mwán mi ásimaw lón ewe mwichefel. (Jem. 5:​14-16) Awonuan, epwe féri eú kókkót mi tongeni álisi le túmúnú seni minne mi ngaw lón fansoun mwan. w25.01 11 ¶14

En mi tongei Jiowa Kot, ewe emén mi fang ngonuk liffang mi múrinné meinisin, pwal mwo nge manawom? Ka mochen pwáári óm tongei? Ewe mettóch mi múrinné seni meinisin kopwe féri pwe kopwe pwáári ena, ina óm fangoló manawom ngeni me papatais. Iká ka féri ena, kopwe wiliiti chón án Jiowa we famili. Iwe, Semom na pwal Chiechiom epwe emmwenuk me túmúnuk pokiten en néún. (Kölf. 73:24; Ais. 43:​1, 2) Pwal och, óm fangoló manawom me papatais epwe ngonuk ewe ápilúkúlúkún manaw esemuch. (1 Pit. 3:21) Mi wor met a eppetuk óm kopwe papatais? Iká ewer, iwe esap chék en ka meefi ena. A wor fite million aramas ra fen féri ekkesiwil lón féfférúr me napanapen ar ekiek pwe epwe fich ngeniir ar repwe papatais. Nge iei, ra angang ngeni Jiowa fán pwapwa me tinikken. w25.03 2 ¶1-2

Fán chómmóng, Paipel a aléllééi tipis ngeni och mettóch mi chou sia mwárei. King Tafit a áweweei tipisin kewe ren an erá: “Üa pwölüla fän ai kewe föför mi ngau, ra chou usun och mettoch mi kon chou ngeniei.” (Kölf. 38:4) Nge Jiowa a omusaaló tipisin chókkewe mi áier. (Kölf. 25:18; 32:5) Ewe kapasen Ipru mi áweweei ewe kapas “omusaaló tipis,” a wewe ngeni “epichaaló” are “uwealó.” Iwe atun Jiowa a omusaaló ach kewe tipis, a epichaaló are uwealó ach choun mengiringirin tipis. Ussun itá a angei senikich osach mi chou sia mwárei. Paipel a pwal néúnéú eú kapas áwewe pwe epwe pwáári úkúúkún án Jiowa atowawa senikich ach kewe tipis. Kölfel 103:​12, KG a erá: “Ussun towawen ötiw seni notou, ina chok ussun an epwe atowawano ach tipis seni kich.” Éétiw a fókkun towaw seni notou, me rese fókkun tongeni chufengen. Weween, Jiowa a fókkun atowawaaló ach kewe tipis senikich. Ena mettóch a oururukich pwe Jiowa a unusen omusakicheló! w25.02 9 ¶5-6

Mwirin án Jises liwiniti láng, ewe aposel Piter a féri eú manaman ren an echikaraatá emén mwán mi pechemá seni leuputiwan. (Féf. 1:​8, 9; 3:​2, 6-8) Eú mwichen aramas ra kúna ena manaman, iwe ra rongeeló Piter. (Féf. 3:11) Nge Piter ese mochen án aramas repwe ingeiti inaamwo iká a mááritá lón eú ééreni ikewe ekkewe aramas ra fókkun sani ar repwe iteféúló. Piter a tipetekison me ereni ekkewe aramas ar repwe mwareiti Jiowa me Jises ren an apasa: ‘Ren iten [Jises] we, me ren ám lúkú lón itan, ei mwán oua kúna me silei a péchékkúletá.’ (Féf. 3:​12-16) Sia tongeni áppirú Piter me sópweeló le ámááraatá tipetekison. Sia angang fán iten ekkewe ekkóch pokiten sia tongei Jiowa me tongei aramas, nge esap pokiten sia mochen án ekkewe ekkóch repwe ingeitikich. Sia pwáári pwe sia enletin tipetekison iká sia pwapwa le angang ngeni Jiowa me angang fán iten chienach kewe Chón Kraist inaamwo iká ekkewe ekkóch rese kúna met sia féri.—Mat. 6:​1-4. w25.03 10-11 ¶11-12

Sia tongeni alapaaló ach pwapwaiti ewe angangen afalafal iká sia nefótófót wóón ach tongei Jiowa me aramas. (Mat. 22:​37-39) Anchangei úkúúkún pwapwaan Jiowa atun a kúna ach fiti ewe angangen afalafal me pwapwaan aramas atun ra poputá le káé ewe Paipel! Pwal chemeni pwe chókkewe mi aúseling ngeni ewe pwóróus sia uwei me filaatá le angang ngeni Jiowa, ra tongeni manaw tori feilfeiló. (Jon 6:40) Ka chék nónnóm lón imw ren och popun? Iká ewer, nefótófót wóón met ka tongeni féri le pwáári óm tongei Jiowa me aramas. Atun ewe COVID-19 pandemic, Samuel me Dania ra chék nómólong lón imwer we. Lón unusen ena atun mi áweires, ra kan soun afalafal wóón phone, mak taropwe, me káé ngeni aramas wóón Zoom. Nónnómun Samuel me Dania a aúkúkú met ra tongeni féri, nge ra féri met ra tufichin féri me ra pwapwa ren ar féri ena. w24.04 18-19 ¶15-16

Pwúpwúlú esap ina lóngólóngun án emén epwe kúna pwapwa, nge chómmóng Chón Kraist lipich, ese lifilifil iká iir alúwél, fépwúl, are mi mwukóló, ra mwétéresiiti ar repwe pwúpwúlú. Ewer, me mwen kopwe kammwet ngeni emén, a lamot epwe péchékkúl óm riri ngeni Jiowa, kopwe silefichi pwisin en, me kopwe tongeni atufichi óm pwúpwúlú. (1 Kor. 7:36) Iká ka mochen pwúpwúlú, a éch kopwe silei met sókkun napanap ka mochen kúna seni emén ka mochen pwúlúweni me mwen kopwe kammwet ngeni. Iká kese, iwe ka tongeni tunaaló emén itá mi fen éch fán itom are fen kammwet ngeni emén ouse pélúwéchfengen. Pwúngún, ewe emén ka mochen kútta ámi oupwe pwúpwúlú, epwe emén Chón Kraist mi papatais. (1 Kor. 7:39) Nge saminne meinisin mi papatais repwe pélúwéch ngonuk. Ina minne, kopwe pwisin eisinuk: ‘Met úa mochen achocho ngeni? Ikkefa ekkewe napanap úa mochen emén úa ekiekin pwúlúweni epwe napanapeni? A kon tichik met úa ésúkúsúkú seni ewe emén?’ w24.05 20 ¶1; 21 ¶3

Atun ámi fansoun kammwetfengen, ifa ussun oupwe ataweei ámi kewe osukosuk me tipefesen eli epwe wor fán ekkóch? Itá a wewe ngeni pwe ouse pélúwéchfengen? Esap ina, saminne meinisin repwe kan tittipeeúfengen iteitan. Eú pwúpwúlú mi núkúchar, a wewe ngeni rúúemén mi súfélfengen me tipemecheres le féri tipen ewe emén. Iwe napanapen óm ataweei ekkewe osukosuk iei, eli epwe pwáári iká óm pwúpwúlú epwe sópwéch. Ámi me rúúemén oupwe pwisin eisinikemi ekkeei kapas eis: ‘Áúa tongeni pwóróusfengen wóón ekkewe osukosuk fán kinamwe me súfél? Áúa tipemecheres le pwáári mwáálim kewe me achocho le amúrinnékemiló? Áúa kan akkomwa mochenin ewe emén, omusaaló tipisin, me omusomusfengen?’ (Efi. 4:31) Iwe nge, iká oua kan soun tipefesen are ánini atun oua kammwetfengen, eli epwe fen lallapoló atun oua pwúpwúlú. Iká ka mirititi pwe ewe emén ese pélúwéch ngonuk, epwe fen éch ngenikemi me rúúemén ámi oupwe áwesaaló lefilemi we. w24.05 30 ¶12

Iká sia álleasochisi Jiowa lón mettóch meinisin me féri kefil mi lóngólóng wóón ewe Paipel, iwe sipwe eú leenien áppirú mi múrinné ngeni ekkewe ekkóch. Lupwen sipwe káé án Kot we Kapas me apéchékkúlaló ach lúkú Jiowa, iwe sipwe túppwél ngeni me álleasochisi an kewe allúk. Sipwe esilla ekkewe afalafal mi chofona me ekiek ese tipeeú ngeni ekiekin Jiowa, me sisap tipetipeló rer. (Efi. 4:14; Jem. 1:​6-8) Sipwe pwal tufichin álisi chókkewe mi toriir osukosuk. (1 Tes. 3:​2, 3) Ekkewe mwán mi ásimaw repwe nemeni unusen kinikinin manawer, mirit, kókkótéch, me tipepwetete. Ekkena mwán ra álisi ekkewe ekkóch ar repwe meefi kinamwe me eáni lúkú mi péchékkúl me apéchékkúla ewe mwichefel ren ar “fitipachei ewe pwóróus mi alúkúlúk.” (Tait. 1:9; 1 Tim. 3:​1-3) Án ekkena mwán mi ásimaw leenien áppirú me ar kapasen pesepes, a álisi chón mwichefel ar repwe fiffiti ekkewe mwiich iteitan, fiffiti ewe angangen afalafal, me féri ar pwisin káéén Paipel. Atun a wor án emén chón ewe mwichefel osukosuk mi efisi an epwe aúrek, ekkewe mwán mi ásimaw ra áchchema ngeni an epwe lúkúlúk wóón Jiowa me an kewe pwon. w24.06 31 ¶16-18

Lupwen Jises a nóm fénúfan, a áiti ngeni aramas pwe Seman we a tipemecheres le omusakicheló atun sia tipis. Ekieki ewe kapas áwewe ussun ewe naw mi mwálecheló. Ena alúwél a filaatá an epwe ló seni imwan we me féri ekkóch mettóch mi fókkun ngaw. Nge mwirin och fansoun, “a miritiló” me a liwiniti imwan. Met seman we a féri? Jises a erá pwe atun ewe naw “a chúen towaw, seman we a kúna i . . . me a ssá me turufaaló i me kisi i fán pwetete.” Ena naw a ekiekin tingorei seman na an epwe wiliiti emén néún chón angang. Nge ena sam a omusaaló tipisin me kér ngeni “nei” me a etiwasefáli ngeni ar we famili. Ena sam a erá: “A mwálecheló nge a pwásefál.” (Luk 15:​11-32) Lupwen Jises a manaw lón láng me mwen an feito fénúfan, a kúna án Seman we pwáári ena esin tong ngeni chómmóng aramas mi áier seni ar tipis. Ei pwóróus Jises a áiti ngenikich, a fókkun oururukich me pwáári úkúúkún watteen úméúméchún Seman we, Jiowa. w24.08 11 ¶11-12

Emén Chón Kraist mi mirit a achocho úkúúkún an tufich le féri kefil mi múrinné mi pwáári pwe a eáni ekiekin Jiowa. Ena esin aramas a silei pwe ese wor och mettóch mi aúchea epwe lap seni an riri ngeni Jiowa. A eáni ekiek mi múrinné ussun pwisin i, me a mirititi pwe a aúkúk silean. A pwal pwáári pwe a lúkúlúk wóón Kot ren an tittingorei an emmwen lón iótek. Kich sia mirititi pwe a lamot ach sipwe kútta emmwen seni Jiowa lón iótek inaamwo iká sia ekieki pwe mi mecheres ach sipwe féri ekkóch mettóch. Ina minne, atun sia féri kefil mi aúchea a fen kon lamot ach sipwe tingor án Jiowa emmwen me lúkúlúk pwe i a silei met mi múrinné ngenikich. Sia fókkun kilisou ren án Jiowa férikich lón ewe napanap sia tongeni áppirú napanapan kewe. (Ken. 1:26) Ewer, kich sise tufichin unusen áppirú Jiowa.—Ais. 55:9. w25.03 11 ¶13; 13 ¶17-18

Kosap ekieki pwe ekkewe ekkóch rese sile kilisou. Iká ekkewe ekkóch rese apasa ar kilisou ren met sia féri fán iter, sia tongeni eisini pwisinkich: ‘Iir rese wesewesen sile kilisou, are ra chék ménúkaaló le apasa?’ Eli a wor ekkóch popun pwata rese apasa are pwáári ar kilisou. Eli ekkóch, ra meefi kilisou, nge a weires ngeniir ar repwe apasawu. Eli ekkóch ra sáw le angei álillis seni ekkewe ekkóch, ákkáeúin iká me lóóm iir ra wisen awora álillis ngeni ekkewe ekkóch. Ese lifilifil ewe popun, nge ach tong ngeniir epwe álisikich ach sisap ekiekingaw ngeniir me sipwe chék sópweeló le fang fán pwapwa. (Efi. 4:2) Kopwe mosonottam. Ewe king mi tipáchem, Salomon, a fen erá: “Kopwe fangafangöch ngeni aramas, pun mürin chomong rän kopwe angei liwinin.” (SalAf. 11:1) Ekkena kapas ra áiti ngenikich pwe fán ekkóch eli aramas repwe pwáári ar kilisou “mürin chomong rän.” w24.09 30 ¶18-19

Fán ekkóch a kan esilesil lón ewe mwichefel pwe emén a kapwúng. Iká ina, iwe sia chúen tongeni sópweeló le chiechi ngeni pún a áier me lúkúsékúrú an féffér mi ngaw. A chúen chóni ewe mwichefel me a lamot ngeni kapasen apéchékkúl seni chienan kewe Chón Kraist. (Ipru 10:​24, 25) Iwe nge, a fókkun sókkóló ena seni emén mi katowu. Sia “úkútiw le chichchiechi ngeni” ena emén, me sisap pwal “mwo nge mwéngé ren ena esin aramas.” (1 Kor. 5:11) Itá a wewe ngeni pwe sise tongeni etiwa an epwe fiti mwiich are kapwong ngeni iká a fiti mwiich? Aapw. Nge sisap chiechi ngeni. Chón Kraist ra tongeni áeá miritin letiper mi káit me ren ewe Paipel le filaatá iká repwe etiwa emén mi katowu, eli aramaser are chiechier me mwen an katowu, an epwe fiti mwiich. w24.08 30 ¶13-14