Kapas Eis Seni Ekkewe Chon Allea
Ulungat me lein ekkewe puken Kapas Allim ra kapas ussun ewe ngunungunungau lupwen emon a eppiti Jises ren ewe lopwokkus mi mommong. Ita chommong ekkewe aposel ra ngunungunungau, are akkaeuin Jutas?
Sia kuna ena poraus lon ewe puken Mattu, Mark, me Jon. Ussun ita nge Jutas a akkaeuin ngunungunungau, me pwal ekkoch ekkewe aposel ra tipeeu ngeni. Minne a fis lon na fansoun a pwarata ewe popun sipwe kilisou pwe a wor ekkewe ruanu puken Kapas Allim. Makkeien emon me emon sou mak a pwung, nge ese lollo chok minne emon me emon a makkei. Ren ach sipwe alollofengenni ekkewe poraus lon ekkewe puken Kapas Allim, epwe awattei me affata ach weweiti minne a fis lon ekkena fansoun.
Ewe poraus lon Mattu 26:6-13) a aiti ngenikich ia a fis ia—lon imwen Saimon, ewe mi uri rupun pwotur, lon Petany—nge ese makkei iten ewe fefin mi niinatiu ewe lopwokkus won mokuren Jises. Mattu a makkei: “Nge lupwen ekkewe chon kaeo ra kuna, ra chok lingeringer” me ra ngunungunungau pwe ita repwe tongeni amomolo ewe lo me ngeni ekkewe chon woungau ewe moni.
A pwal kapachelong lon puken Mark ekkena poraus. Nge a pwal makkei pwe ewe fefin a amoku ewe rume. A masou ren wesewesen “lopwokkusun nard,” eni ewe sokkun mi popu seni Intia. Ussun ewe ngunungunungau, Mark a repotei pwe “ekkoch ra lingeringer,” me “ra fokkun apwungu neminewe.” (Mark 14:3-9) Iwe, ekkena ruu puk ra pwarata pwe lap seni emon aposel a ngunungunungau. Iwe nge, ifa usuun an a poputa?
Jon, emon mi pwisin kuna minne a fis, a apacha ekkoch poraus mi titchik. A makkei iten ewe fefin—Meri, fefinen Marta me Laseres. Jon a pwal awora ei poraus mi titchik, mi pacha ngeni nge ese u ngeni Mattu me Mark, a era: “A epiti pechen Jises, o a tolupwasei pechen kkewe ren meten mokuran.” Ren ach sipwe apachafengenni ekkewe poraus seni ekkewe ulungat puk, sipwe tongeni kuna pwe Meri a niinatiu ewe lo, ewe Jon a pwal apasa pwe a “wesewesen lopwokkusun nard,” won mokuren me pechen Jises. Jon a fokkun tongei Jises, iwe, a kkan song ika aramas repwe fori minne ese och ngeni. Sia alleani: “Jutas Iscariot, emon me lein noun kkewe chon kaeo, atewe mi epwe afangema i, a apasa: ‘Pwata ese amomolo ei lo pwokkus won ulupuku moni silfer o fangelo ngeni chon woungau?’”—Jon 12:2-8.
Pwungun pwe Jutas, i “emon lein noun kkewe chon kaeo,” nge kopwe tongeni meefi an Jon song Jon pwe emon mi eani ena wis tekia epwe meefata pwe epwe afangema Jises. Emon sou chiyaku itan Dr. C. Howard Matheny a makkei ei poraus ussun Jon 12:4, a era: “Ewe kapas ‘epwe’ [are, “epwele”] me ewe kapas ‘epwe afangema’ [are, “epwele afengema”], ra pwarata pwe ewe foffor a chok sopwosopw. A pwarata pwe an Jutas ekiekin afangemaen Jises ese chok fisita lon eu chok seken, nge a fen ekekkieki ussun me a rauangauei ukukun fitu ran.” Jon a pwal mirititi pwe Jutas a ngunungunungau “esap ren an tongei chon woungau, nge pokiten i emon chon sola. Nour we chotan moni a nom ren, nge a chok pwisin angei seni minne ra walong lon.”
Ina minne epwe ussun ita nge ena chon sola Jutas a poputani ewe ngunungunungau pun epwe wattelo minne epwe tongeni solani ika repwe amomolo ewe lo mi mommong me walong lon ewe chotan moni a uwei. Lupwen Jutas a poputani ewe ngunungunungau, eni pwal ekkoch ekkewe aposel ra tipeeu ngeni minne a era, ussun ita nge a pwung. Iwe nge, Jutas, ewe chon poputani ewe ngunungunungau.