Repotun Ekkewe Chon Afalafala Ewe Muu

Pwapwaan Eu Famili a luki pwal ekkoch ngeni Kot

JIOWA a efeiochu Josef ren tipatchem me mirit. (Foffor 7:10) Ina minne “Farao me noun kkewe nouwis meinisin ra tipeeu ngeni” miritin Josef.​—Keneses 41:37.

Iwe, ikenai, Jiowa a pwal ngeni noun kkewe aramas tipatchem me mirit me ren ar kakkaeo ewe Paipel. (2 Timoti 3:16, 17) Ei tipatchem me mirit a efisata uwaoch atun emon epwe apwonueta ekkewe kapasen emmwen seni Paipel. Fan chommong, ar fofforoch ‘a murinno mwen mesen aramas,’ ussun ewe poraus mi mak fan a pwarata.

• Chon orun emon fefin, ir chon Pwarata Jiowa. Inaamwo ika neminewe ese sani ekkewe chon Pwarata, nge a ingeiti ar foffor, akkaeuin ar nonnomfengen lon ar famili. A kuna pwe ewe mwan me puluan we ra fokkun ririoch me nour kkewe ra alleasochis. A akkaeuin kuna pwe ewe mwan a fokkun tongei puluan we.

Ekkoch einangen chon Afrika, ra luku pwe ika emon mwan a tongei puluan we, ewe fefin a aea och magic pwe epwe “afesira” atewe. Ina minne, ewe fefin a fos ngeni puluen ewe mwan me eis: “Kese mochen kopwe ngeniei ewe magic ka ngeni puluom we pwe puluei epwe tongeiei ussun chok puluom we a tongeiok?” Ewe chon Pwarata a polueni: “Ewer, upwe uwei ngonuk lesor, mwirin leonowas.”

Iwe, lon ewe ran mwirin, ewe sister a chuuri chon orun we fan an we “magic.” Ifa ewe? Ina ewe Paipel me pwal ewe puk Ewe Sile mi Emmwen ngeni Manau esemuch. Mwirin an kaeo ngeni lon ewe Sile puk ewe poraus “Amarata eu Famili mi Asamolu Kot,” a apasa ngeni ewe fefin: “Iei ewe ‘magic’ am me puluei am aua aea pwe aupwe ‘afesirafengennikem, iwe, ina ewe popun am aua fokkun tongfengen lefilem.” A poputa eu kaeo lon Paipel, iwe, ewe fefin a muttir feffeita me pwarata an fangelo manauan ngeni Jiowa ren an papataiselo.

• Ukukun ruu wiik, ruuemon special pioneer mi wisen alisi eu mwichefel mi kukkun mi kan ngeni ennefenin ewe nekiannin lefilen Zimbabwe me Mozambique rese feilo afalafal imw me imw. Pwata? Pokiten chommongun ekkewe aramas ra feito rer fan iten ar repwe auseling ngeni ar afalafal. Emon lein ekkewe pioneer a apasa met a fis: “Am aua sai tiu mail iteiten wiik fan iten am aupwe kaeo ngeni emon ewe Paipel. Ese mecheres ngenikem am aupwe sai ngeni ewe leeni. Am aua fetal lon pwokak me feilo le pekin lon ekkewe chanpupu ikewe ie ewe konik a kan tori chiorem. A wewe ngeni am aupwe uwei ufem kkewe me noum sus won mokurem, fetal lon ewe chanpupu, me ufoufsefal lon ewe epek.

“Chon orun ewe chon kaeo ra ingeiti am achocho. Emon leir, i emon nouwisen eu mwicheichin lamalam. A apasa ngeni noun kkewe chon appiru: ‘Ouse mochen ami achocho epwe ussun chok ekkena ruuemon aluwol Chon Pwarata Jiowa?’ Iwe, sorotan, chommong chon an we pekin lamalam ra feito lon imwem we pun ra mochen silei ewe popun am aua tinikken le afalafal. Pwal eu, ukukun ekkewe ruu wiik mwirin, ese wor pwal mwo nge fansoun am aupwe ammolnata anem mongo pokiten chommongun ekkewe aramas!”

Emon lein ekkewe aramas mi chuuri ekkewe pioneer lon imwer we lon ekkewe ruu wiik, ina ewe nouwisen lamalam. Ekieki mwo ussun ar pwapwa lupwen atewe a tipeeu ngeni an epwe kaeo ewe Paipel!