Auseling Ngeni Minne Ewe Ngun A Apasa
“Iwe, lupwen oua kul ngeni peliifich ika peliimong, selingemi repwe rongorong me lukun sokurumi, ‘Iei ewe al oupwe aleni.’”—AISEA 30:21.
1, 2. Lon uruwoon aramas, ifa ussun Jiowa a fos ngeni aramas?
EWE single-dish radio telescope mi lapalap seni meinisin won unusen fonufan a nonnom lon ewe fonu itan Puerto Rico. Ren fitu ier, ekkewe sou tipatchem ra aneanei pwe repwe angei poraus seni chon pwal eu pisekin fan lang ren ar nounou ena mwesin. Nge rese mwo angei eu poraus fan eu. Iwe nge, mei wor poraus mi ffatoch mi popu seni lukun fonufan pwe oukich meinisin sipwe tongeni angei fansoun meinisin, nge sisap nounou eu mwesin. Ra popu seni Emon mi tekia seni meinisin chon lukun ach ei fonufan aramas ra kefisita. Iwe, io na Popun ekkena poraus, me io kkewe ra angei ekkena poraus? Met ekkewe poraus ra apasa?
2 Mei wor fitu poraus lon ewe Paipel mi aiti ngenikich ussun an aramas ra rongorong poraus seni Kot. Fan ekkoch, ekkena poraus ra feito me ren ekkoch chonlang mi wisen uwei poraus seni Kot. (Keneses 22:11, 15; Sekaraia 4:4, 5; Luk 1:26-28) Fan ulungat, aramas ra rongorong pwisin leuwen Jiowa we. (Mattu 3:17; 17:5; Jon 12:28, 29) Kot a pwal kapas ren ekkewe soufos won fonufan, nge chommong leir ra makketiu minne a amwokutur ar repwe apasa. Ikenai, mei wor rech ewe Paipel, nge mi kapachelong eu rekotun chommong ekkena poraus, pwal aitien Jises me noun kewe chon kaeo. (Ipru 1:1, 2) Enlet, Jiowa a fen esilei ngeni forian kewe aramas chommong poraus.
3. Ifa ewe popun epwe wor poraus seni Kot, iwe, met epwe kutta senikich?
3 Ekkeei poraus seni Kot rese kan pwarata chommong mettoch ussun forien Kot kewe fan lang. Ra kapas ussun ekkewe mettoch mi lamot lap seni ena, ekkewe mettoch mi kku manauach iei me pwal lon mwach kkan. (Kol Fel 19:7-11; 1 Timoti 4:8) Jiowa a aea ekkewe poraus pwe epwe esilei ngenikich letipan me awora ngenikich an kewe kapasen emmwen. A ina ussun alon ewe soufos Aisea a pwonueta, a era: “Iwe, lupwen oua kul ngeni peliifich ika peliimong, selingemi repwe rongorong lukun sokurumi, ‘Iei ewe al oupwe aleni.’” (Aisea 30:21) Jiowa esap erianikich pwe sipwe auseling ngeni an “kapas.” Epwe filiach ika sipwe alleasochis ngeni me aleni an we al. Ina popun ewe Paipel a peseikich ach sipwe auseling ngeni ekkewe poraus seni Jiowa. Lon ewe puken Pwarata, a mak fan fisu ewe kapasen pesepes pwe sipwe “auseling ngeni minne ewe ngun a apasa.”—Pwarata 2:7, 11, 17, 29; 3:6, 13, 22.
4. Epwe pwung ach sipwe ekieki pwe Kot epwe pwisin fos ngenikich seni lang lon ach ei fansoun?
4 Ikenai, Jiowa ese pwisin fosetiu me lang. Pwal mwo nge lon ekkewe fansoun an a mak ewe Paipel, a chok fan akkaeu an Kot fos ngeni aramas seni lang, iwe, fan ekkoch, fitepuku ier epwe lo lefilen ekkena fansoun. Lon porausen uruwo, lap ngeni fansoun meinisin Jiowa a esilei ngeni noun kkewe aramas an kewe poraus ren pwal ekkoch lapalap. A pwal ina ussun lon ach ei fansoun. Iwe, sipwe kaeo ulungat an Kot kewe alen fos ngenikich ikenai.
“Ekkewe Puk Meinisin ra Popu seni Ngunun Kot”
5. Ifa ussun Jiowa a akkaeuin aporausakich ikenai, iwe, ifa ussun sipwe tongeni kuna feioch seni?
5 Kot a akkaeuin kapas ngeni aramas ren ewe Paipel. A popu seni ngunun Kot, iwe, masouan epwe tongeni efeiochukich. (2 Timoti 3:16) A mak lon ewe Paipel chommong porausen aramas mi anganga ar tufichin filata ika repwe auseling ngeni leuwen Kot are resap. Ekkena poraus ra achema ngenikich ussun ewe popun epwe lamot ach sipwe auseling ngeni minne ewe ngunun Kot a apasa. (1 Korint 10:11) Ewe Paipel a pwal awora tipatchem, iwe, a ngenikich kapasen emmwen fan iten ach sipwe filata met sipwe foffori. Epwe ussun ita nge Kot a nom le sokuruch, me apasa lon selingach ekkeei kapas: “Iei ewe al. Oupwe fetal won.”
6. Pwata ewe Paipel a tekia seni ekkewe ekkoch puk meinisin?
6 Ren ach sipwe rongorong minne ewe ngun a apasa me ren ekkewe pekin taropwe lon ewe Paipel, epwe lamot ach sipwe alleani iteitan. Sap minne ewe Paipel, eu chok puk mi murinno, itefoulo, me choufetal lein aramas ikenai. Ewe Paipel a popu seni ngunun Kot, iwe, a masou ren an Kot kewe ekiek. Ipru 4:12 a apasa: “Pun ewe kapasen Kot mi manau o manaman, a ken seni sokkun katilas meinisin mi ken me ruu epek, o a tu ngeni tori aimufeseni manau o ngun, o pwal ekkewe kailin chuu me masouen chuu; o a pwal tongeni apwungu ekkewe ekiek o mochenian letipach.” Atun sipwe alleani ewe Paipel, epwe kku ach kkewe ekiek me minne a amwokutukich ussun chok efoch katilas, iwe, epwe pwarata ifa ukukun manauach a kan tipeeu ngeni letipen Kot.
7. Pwata a lamot ach sipwe alleani ewe Paipel, iwe, a wor kapasen pesepes ach sipwe alleani inet?
7 “Ekkewe ekiek o mochenian letipach” repwe tongeni siwil mwirin och fansoun me pwal ren minne sipwe kuna lon manauach—mettoch mi murinno me mettoch mi weires. Ika sisap likiitu le kakkaeo ewe Kapasen Kot, ach kkewe ekiek me memeef resap chuen tipeeu ngeni ekiekin Kot. Ina minne ewe Paipel a peseikich: “Oupwe [sosopweilo le] sotuni pwisin ami, are oua nonnom lon luku. Oupwe [sosopweilo le] ekieki pwisin ami.” (2 Korint 12:5) Ika sipwe sopweilo le rongorong minne ewe ngun a apasa, epwe lamot ach sipwe apwonueta ewe kapasen fon pwe sipwe alleani an Kot we Kapas iteiten ran.—Kol Fel 1:2.
8. Ifa ussun alon ewe aposel Paul epwe alisikich ach sipwe atittina pwisin kich ussun ach alleani ewe Paipel?
8 A lamot ngeni ekkewe chon alleani Paipel ar repwe chechemeni ei mettoch: Awora nafochun fansoun fan iten om kopwe ekkekieki ussun minne ka fen alleani! Lon ach achocho le apwonueta ewe fon pwe sipwe alleani ewe Paipel iteiten ran, sise mochen muttir alleani fitu sopwun nge sise kon lien weweiti minne sia fen alleani. Inaamwo ika epwe lamot ach sipwe alleani ewe Paipel iteitan, nge sap minne sipwe chok fiti ewe schedule, nge epwe pokiten ach enletin mochen kaeo ussun Jiowa me an kkewe kokkot. Ren ena mettoch, epwe murinno ach sipwe atittina pwisin kich me ren alon ewe aposel Paul. A makkei ngeni chienan kkewe Chon Kraist: “Ua chok fotopukutiu mwen mesen Semach, pwe epwe ngenikemi . . . pwe Kraist epwe nonnom chok lon letipemi ren luku; pwe epwe fotuki ami pwal anukuchara ami lon tong, o ami oupwe tongeni eti ekkewe aramas mi fel meinisin le meefi meeta cholapan, are langattaman, are tekian, are alollolun, o oupwe pwal silei ewe tong an Kraist, ewe mi fokkun lap seni an aramas silei, pwe oupwe masou ren masouen Kot meinisin.”—Efisus 3:14, 16-19.
9. Ifa ussun sipwe tongeni amarata me awattei ach mochen kaeo ussun Jiowa?
9 Pwungun pwe ekkoch leich sise kan pwapwaesini ach akkalleani puk, nge pwal ekkoch repwe pwapwaesini. Iwe nge, ese lifilifil met meefiach, nge sipwe tongeni amarata me apochokkulata ach mochen kaeo ussun Jiowa. Ewe aposel Piter a awewei pwe mi lamot ach sipwe fokkun mochen angei sile seni Paipel, iwe, a pwal silei pwe eni epwe wewe ngeni ach sipwe amarata ena sokkun mochen. A makkei: “Ussun chok monukol mi a koran uputiu, oupwe fokkun mochen ewe chonun oup mi enlet o mi fich ngeni ngunumi, pwe oupwe mamarita ren ngeni manau.” (1 Piter 2:2) Epwe lamot ach sipwe pwisin nemenikich ika sipwe “fokkun mochen” kaeo ewe Paipel. Ussun chok ach sipwe tongeni mwoneiti och minefoon mongo mwirin ach neni fan fite, epwe pwal ina ussun ach sipwe tongeni siwili ach ekiek ussun allea me kaeo ika sipwe nemeniochu pwisin kich pwe sipwe fori ena mettoch iteitan.
“Mongo lon Fansoun mi Fich”
10. Io ekkewe chon ewe “chon angang mi tuppwol me tipatchem,” me ifa ussun Jiowa a nounour ikenai?
10 Jises a pwarata pwal eu mettoch Jiowa a aea pwe epwe fos ngenikich ikenai lon Mattu 24:45-47. Ikkewe ie a kapas ussun ewe mwichefelin Chon Kraist mi kepit—“ewe chon angang mi tuppwol o tipatchem” mi wisen awora ewe “mongo lon fansoun mi fich” lon pekin ngun. Emon me emon lein chon ena mwichefel mi kepit ren ngun mi fel, ir “chienen” Jises kkewe. Ir fengen me chon ewe “mwich mi fokkun lapalap,” ra akkangei kapasen pesepes me emmwen. (Pwarata 7:9; Jon 10:16) Chommongun mongoon ngun mi kawor lon fansoun mi fich a nonnom lon ekkewe puk, awewe chok, Ewe Leenien Mas, ewe Awake! me pwal ekkewe ekkoch puk. Pwal ekkoch mongo lon pekin luku a torikich ren ekkewe afalafal me pwom lon ekkewe mwichelap, me an ewe mwichefel kewe mwich.
11. Ifa ussun sipwe annetata ach mochen auseling ngeni minne ewe ngun a apasa me ren “ewe chon angang mi tuppwol o tipatchem”?
11 Ekkewe poraus mi kawor ren “ewe chon angang mi tuppwol o tipatchem” a for pwe epwe apochokkulata ach luku me alisikich pwe sipwe mirit. (Ipru 5:14) Ekkena kapasen fon repwe tongeni kku manauen aramas meinisin pwe emon me emon epwe tongeni pwisin apwonueta. Fan ekkoch, sipwe pwal angei ekkewe kapasen fon mi titchik mi weneiti och sokkun fofforuch. Epwe ita met ach ekiek ika sia wesewesen rongorong minne ewe ngun a apasa me ren ewe mwichen chon angang? Ewe aposel Paul a polueni: “Iwe, oupwe alleasochisi ekkewe chon emmwenikemi, o nonnom fan nemenier.” (Ipru 13:17) Enlet, ekkewe chon emmwenikich, ir meinisin rese unusoch. Iwe nge, inaamwo ika rese unusoch, nge Jiowa a pwapwaiti an nounou noun kkewe chon angang won fonufan fan iten an epwe emmwenikich lon ei fansoun sopwolon.
Emmwen Seni Miritin Letipach
12, 13. (a) Ifa pwal ekkoch minen emmwen Jiowa a ngenikich? (b) Ifa pwunuochun ewe miritin letip won pwal mwo nge aramas mi rese sileiochu an Kot we Kapas?
12 Jiowa a ngenikich pwal eu minen emmwen—miritin letipach. A forata aramas pwe epwe wor eu minen esilei ngenir minne mi pwung me minne mi mwaal. Ina eu kinikinin lapalapach. Lon noun we taropwe ngeni ekkewe chon Rom, ewe aposel Paul a awewei: “Ewe alluk ese nom ren ekkewe Jentail, nge lupwen ra pwisin fori ekkewe fofforun ewe alluk, ra alluku ngeni pwisin ir, inaamwo ika ewe alluk ese nom rer. A pwa pwe ekkewe fofforun ewe alluk a makketiu lon letiper, o meefier kkewe ra pwal pwarata, inaamwo ika ekiekin letiper rese wewefengen, nge repwe tipi ngeni pwisin ir, are poluen ngenir.”—Rom 2:14, 15.
13 Chommong mi rese silei Jiowa repwe tongeni ekis etipeeufengenni ar kkewe ekiek me foffor ren minne mi pwung me mwaal me ren Kot. Ussun ita nge ra rongorong och mongungu mi emmwenir won ewe al mi pwung. Ika mei enlet ena ren ir kkewe rese fen kaeo an Kot we Kapas, a ifa me watten emmwenien ewe mongungu ngeni ekkewe Chon Kraist mi enlet! Pwungun pwe miritin letipen emon Chon Kraist mi miritilo ren an silelo an Kot we Kapas me an kewe foffor ra pwal tipeeu ngeni an Jiowa we ngun mi fel epwe tongeni awora emmwen mi lukuchar.—Rom 9:1.
14. Ifa ussun eu miritin letip mi alongolong won Paipel epwe tongeni alisikich le apwonueta emmwenien an Jiowa we ngun?
14 Ewe sokkun miritin letip mi alongolong won an emonewe kakkaeofichi Paipel epwe tongeni achema ngenikich ussun ewe al ewe ngun a mochen ach sipwe aleni. Eni epwe wor ekkoch fansoun lupwen esap wor emmwen mi titchik lon ewe Paipel me lon ekkewe puken awewei Paipel ussun minne epwe fis lon manauach. Iwe nge, miritin letipach epwe tongeni ourourakich ussun efoch al mi tongeni efeiengauakich. Lon ekkena fansoun, ach tunalo emmwenien miritin letipach epwe tongeni wewe ngeni ach sipwe tunalo minne an Jiowa we ngun a apasa. Iwe nge, ren ach sipwe auseling ngeni miritin letipach, sipwe tongeni filiochu pwal mwo nge lupwen ese mak och emmwen mi titchik. Iwe nge, epwe lamot ach sipwe chechemeni pwe lupwen esor och alluk seni Kot, me mei mumuta emon me emon epwe pwisin filata met epwe fori, esap pwung ach sipwe apwungu chienach kewe chon Kraist me ren pwungupwungun pwisin miritin letipach.—Rom 14:1-4; Kalesia 6:5.
15, 16. Met epwe tongeni aingaua angangen miritin letipach, iwe, ifa ussun sipwe tongeni pinei pwe esap fis?
15 Eu miritin letip mi limelimoch me alongolong won Paipel, ina eu liffang mi murinno seni Kot. (Jemes 1:17) Nge epwe lamot ach sipwe tumunu ei liffang seni etipetipaen ekkewe minen efeiengau ika epwe eu minen emmwen mi murinno ngenikich. Ekiekin aramas, eoreni, me minne aramas ra kkan foffori mi u ngeni ekiekin Kot repwe tongeni aingaua anngangen miritin letipach pwe esap chuen amwokutukich won ewe alen pwung. Eni sisap chuen tongeni apwunguochu poraus, iwe, sipwe pwal tongeni otupu pwisin kich pwe och fofforingau mi murinno.—Alollo ngeni Jon 16:2.
16 Ika sipwe kkan tunalo ekkewe kapasen ourour seni miritin letipach, mongungun epwe apwangapwangelo tori ach sisap chuen meefi och. Ewe sou mak kol fel a kapas ussun ena sokkun aramas lupwen a apasa: “Leluker esap wor memmef lon.” (Kol Fel 119:70) Ekkoch mi tunalo miritin letiper rese chuen tongeni ekiekoch. Resap chuen nom fan emmwenien an Kot kkewe alluk, iwe, resap chuen tongeni filioch. Ren ach sipwe tumunukich seni ena sokkun lapalap, sipwe afanni emmwenien miritin letipach pwal mwo nge lupwen sia ekieki pwe mi chok lamot kisikis minne sipwe filata.—Luk 16:10.
Repwe Pwapwa Ekkewe mi Auseling me Alleasochis
17. Atun sipwe auseling ngeni ‘ewe kapas lesokuruch’ me alleasochisi miritin letipach mi alongolong won Paipel, epwe met feiochuch?
17 Lupwen sipwe kkan eoreni ach akkauseling ngeni ‘ewe kapas lesokuruch’—mi kawor ren ewe Paipel me pwal ewe chon angang mi tuppwol me tipatchem—me lupwen sipwe pwal apwonueta ekkewe minen achechem seni miritin letipach mi alongolong won ewe Paipel, Jiowa epwe efeiochukich ren an we ngun. Iwe, ewe ngun mi fel epwe pwal awattei ach tufichin angei me weweiti minne Jiowa epwe erenikich.
18, 19. Ifa ussun an Jiowa we emmwen epwe tongeni efeiochukich lon ach angangen afalafal me pwal pwisin manauach?
18 An Jiowa we ngun epwe pwal atufichikich pwe sipwe pworacho ngeni ekkewe fansoun weires ren tipatchem me pwora. Ussun chok ren ekkewe aposel, an Kot we ngun epwe tongeni emmweni ach ekiek me alisikich pwe ach foffor me fos epwe tipeeu ngeni ewe Paipel. (Mattu 10:18-20; Jon 14:26; Foffor 4:5-8, 13, 31; 15:28) An Jiowa we ngun fengen me pwisin ach kkewe foffor epwe wato ngenikich sopwoch atun sipwe filioch lon manauach, iwe, epwe awora ngenikich pwora pwe sipwe likiitu won ewe al sia fen filata. Awewe chok, eni en mi ekiekin siwili alen manauom pwe kopwe alapalo om achocho fan iten ekkewe mettochun ngun. Are, eni epwe toruk och kefil mi epwe siwili manauom, awewe chok, ren io kopwe pulueni, ika kopwe angang fan iten eu business, are kopwe moni eu imw. Sisap chok apilukuluku pwisin ach kewe memeef nge sipwe auseling ngeni minne an Kot we ngun a apasa me atipeeufengenni ach kkewe foffor ngeni.
19 Sia enletin kilisou ren ekkewe kapasen achechem mi kirikiroch seni chienach kkewe Chon Kraist, pachelong ekkewe elter. Iwe nge, sisap ekieki witiwiti ekkewe ekkoch ar repwe fos ngenikich ussun eu mettoch. Ika sia silei ewe alen tipatchem me ekkewe sokkun siwil lon ekiekich me fofforuch epwe lamot ach sipwe fori pwe sipwe apwapwai Kot, sipwe mochen mwokutukut. Jises a apasa: “Are oua silei ekkeei mettoch, oupwe feioch ika oupwe fori.”—Jon 13:17.
20. Ifa ewe feioch epwe tori ir kkewe mi auseling ngeni ‘ewe kapas lesokurur’?
20 A ffat pwe esor lamoten ekkewe Chon Kraist repwe wesewesen rongorong och mongungu seni lang, iwe, esap pwal lamot emon chonlang epwe feitiu chuurir ika repwe silei ifa ussun repwe apwapwai Kot. Ra feioch pun a nonnom rer an Kot we Kapas me ewe emmwen mi tong me ren ewe mwichen aramas mi kepit won fonufan. Ika repwe tumunuochu ar auseling ngeni ei ‘kapas lesokurur’ me apwonueta emmwenien miritin letiper mi alongolong won Paipel, repwe sopwoch lon ar foffori letipen Kot. Iwe, repwe wesewesen kuna pwonuetaan an ewe aposel Jon we pwon, a era: “I mi fori letipen Kot epwe nonnom feilfeilo chok.”—1 Jon 2:17.
Eu Enniwili mi Mochomoch
• Pwata Jiowa a fos ngeni aramas?
• Ifa ussun sipwe kuna feioch seni ach sipwe alleani ewe Paipel iteitan?
• Ifa ussun sipwe etiwa ewe emmwen seni ewe chon angang?
• Pwata sisap tunalo ewe emmwen seni eu miritin letip mi sukul ren ewe Paipel?
[Sasing lon pekin taropwe 25]
Esor lamoten aramas repwe aea ekkewe mwesin pwe repwe angei poraus seni Kot
[Credit Line]
Courtesy Arecibo Observatory/David Parker/Science Photo Library
[Sasing lon pekin taropwe 27]
Jiowa a fos ngenikich ren ewe Paipel me pwal “ewe chon angang mi tuppwol o tipatchem”