Mukanda wa A-Kolosu
3 Kashika, nyi hananuhindwisa hamwe ni Kristu, nungenu ni kufupa yuma ya mwilu, kuze Kristu anatwama ku chindume cha Zambi. 2 Hulikilenu manyonga jenu ha yuma ya mwilu, hi ha yuma ya hano hashi ko. 3 Mumu yenu hinunafu, ni mwono wenu uli wakusweka hamwe ni Kristu, mukulinunga ni Zambi. 4 Muze Kristu, mwono wetu, makamusolola, ni yenu nawa makanusolola hamwe nenyi mu uhenya.
5 Kashika, shihenu yihanda ya mujimba* wenu hakutwala ku utanji,* luchisa, usolo upi wa kulisumbakenya, manyonga api, ni kuzo, yize yinalumbunuka kukombelela mahamba. 6 Utenu wa Zambi wakwiza mumu lia yuma yino. 7 Yitanga yenu neyo che yapwile* ku mwono* wenu wa kunyima. 8 Alioze, haliapwila nwatamba kumbila yuma yino yeswe: Utenu, ufwatulo, yuma yeswe yipi, ni matuka. Chikwo nawa, mu kanwa lienu kumwatambile kutuhuka maliji waze kalitele. 9 Kanda nuhanjika mahuza kuli umwe ni mukwo. Zulenu utu ukulu* ni yitanga yawo, 10 ni kuzala utu waha, uze kupalikila mu chinyingi chamwenemwene, anaupwisa waha kulita ni chifwa cha Yoze wautangile. 11 Ha chikuma chino, kukushi Ka-Ngresia chipwe Ka-Yunda, chipwe ngalami hanji chilima, chipwe chilambala hanji Ka-Seteya,* chipwe ndungo hanji mutu yoze uli ni utuswilo. Mumu Kristu iye yuma yeswe, muli eswe.
12 Kashika, ngwe atu akusakula kuli Zambi, asandu ni waze azanga, zalenu keke, utu, kulikehesa,* umbovu ni uhomboloji. 13 Nungenu ni kulihumikiza umwe ni mukwo, ni kulikonekena umwe ni mukwo ni mbunge yeswe, chipwe ngwe umwe kali ni chitela kuli mukwo. Chizechene ngwe Yehova* hananukonekena, ni yenu nawa nwatamba kulinga chocho. 14 Alioze, helu lia yuma yino yeswe, zalenu zango, mumu zango lili muya ungunu uze wakununga atu.
15 Chikwo nawa, sambukila ya Kristu yikayule mbunge* jenu, mumu yenu hananusanyika ku sambukila yacho nukapwe mujimba umuwika. Kashika, sakwililenu mashimbu eswe. 16 Liji lia Kristu likatwame muli yenu ni kulumbama ni mana eswe. Nungenu ni kulilongesa ni kulitakamisa* umwe ni mukwo ni masamu, ni kuhalisa Zambi, ni kwimba miaso ya uwayilo yize akwimba ni usakwililo. Nungenu ni kwimbila Yehova* mu mambunge jenu. 17 Yuma yeswe yize munulinga, mu maliji hanji mu yitanga, yilingenu mu jina lia Mwene Yesu, ni kusakwilila Zambi, mwe Tata, kupalikila muli iye.
18 Mapwo, zeyelenu kuli malunga jenu, ngwe chize chinalite muli Mwene. 19 Malunga, nungenu ni kuzanga mapwo jenu. Kanda nupwa akalu* ni ayo. 20 Ana, ononokenu kuli yisemi jenu mu yuma yeswe, mumu chino chakupemena kuli Mwene. 21 Yisemi, kanda nusosomba* ana jenu hanga achine kuhonga.* 22 Ndungo, ononokenu kuli miata jenu a hano hashi* mu yuma yeswe, kanda nuchilinga wika muze ananumono* hanga nuvwise atu kuwaha, alioze chilingenu ni mbunge yimuwika ni woma wa Yehova.* 23 Yuma yeswayo munulinga, yilingenu ni alma* yeswe ngwe ya Yehova,* hi ya atu ko. 24 Mumu nunanyingika ngwenu, kuli Yehova* munukatambula chihinga chenu ngwe fweto. Kashika, kalakalenu ngwe ndungo a Mwene, Kristu. 25 Kwamba pundu, yoze wakulinga yuma yipi kumakatambula kulita ni yuma yipi yize alingile, mumu Zambi keshi katonde.