Novanm

En Kretyen pa devret zanmen zoure. Me i annan lezot fason ki nou kapab ensilte lezot, ki pa sitan evidan. Alor nou bezwen vey byen ki nou pa fer sa. Par egzanp, nou bezwen fer atansyon pour nou pa dir bann move keksoz konsernan en dimoun ki sorti dan lezot kiltir, tribi ouswa pei. An plis, nou pa anvi bles santiman lezot par dir bann keksoz lo zot ki abes zot. Koz dan en fason ki ankouraz lezot. Dan plas kritik lezot ouswa konplent, pa ezite pour felisit zot. Menm si bann Izraelit ti annan en kantite rezon pour zot rekonesan, zot ti konplent. Ler nou annan en labitid pour konplent, sa i kapab fer lezot osi konplent. Rapel sa ki ti arive ler dis espyon ti anmenn en move rapor. Sa ti fer ki “tou bann Izraelit ti . . . konplent kont Moiz.” (Nom. 13:31–14:4) De lot kote, ler nou felisit lezot, sa i kapab ed tou dimoun pour pli zwaye. Alor, rod loportinite pour felisit lezot. w22.04 8 ¶16-17

Depi dan letan Labib, Zeova in ed en kantite zenn pour vin son zanmi. I osi kapab ed ou zanfan pour vin son zanmi, si sanmenm ki zot anvi. (1 Kor. 3:​6, 7) Menm ler ou zanfan i kit Zeova, Zeova pou kontinyen obzerv li. (Ps. 11:4) Ler zot montre en pti siny ki zot anvi fer plezir Zeova, Zeova pou pare pour ed zot vin son zanmi. (Akt 13:48; 2 Kron. 16:9) I kapab ed ou pour dir ou zanfan sa bon keksoz dan sa moman ki ou zanfan i bezwen tande. (Prov. 15:23) Ouswa i kapab motiv en frer oubyen en ser dan kongregasyon pour demontre lentere dan ou zanfan. Menm apre ki ou zanfan in vin adilt, Zeova i kapab fer li mazin en keksoz ki ou’n ansenny li. (Zan 14:26) Ler ou kontinyen ansenny ou zanfan par sa ki ou dir e sa ki ou fer, Zeova pou beni ou. w22.04 21 ¶18

Vi ki Satan in ganny zete lo later e i nepli kapab al dan lesyel, i atak bann Kretyen swazir ki ankor lo later. Sa bann Kretyen swazir i bann reprezantan Rwayonm Bondye e zot pe “rann temwannyaz konsernan Zezi.” (2 Kor. 5:20; Efe. 6:​19, 20) An 1918, i ti annan bann fo lakizasyon ki ti ganny anmennen kont wit parmi sa bann frer ki ti pe dirize dan lorganizasyon Zeova. Sa bann frer ti ganny kondannen plizyer lannen prizon. I ti paret ki sa travay ki bann Kretyen swazir ti pe fer ti’n aret net. (Rev. 11:​3, 7-11) Me an Mars 1919, sa bann Kretyen swazir ti sorti prizon e pli tar bann sarz kont zot ti ganny retire. Deswit bann frer ti rekonmans sa travay predikasyon. Me sa pa ti anpes Satan kontinyen atak pep Bondye. Depi sa letan, Satan pe persekit pep Bondye e sa persekisyon i parey “en larivyer.” (Rev. 12:15) I pour sa rezon akoz nou tou nou “bezwen demontre landirans ek lafwa.”—Rev. 13:10. w22.05 5-6 ¶14-16

Dan en vizyon, zapot Zan i vwar de group dimoun ki siport drwa Zeova pour dirize e zot ganny donnen lavi eternel. Dan sa premye group i annan 144,000 dimoun. Zot ganny anmennen dan lesyel pour form parti en gouvernman oubyen Rwayonm. (Rev. 5:​9, 10; 14:​3, 4) Ansanm avek Zezi, zot diriz lo later antye. Dan sa vizyon, Zan i vwar zot dan lesyel e zot pe debout avek Zezi lo Montanny Siyon. (Rev. 14:1) Depi letan bann zapot ziska ozordi, plizyer milye dimoun in ganny swazir pour form parti sa 144,000. (Lik 12:32; Rom. 8:17) Me Zan i ganny dir ki pandan bann dernyen zour, i pou annan en pti gin parmi sa 144,000 ki pou ankor lo later. Pandan gran ladetres, sa bann ki ankor la lo later pou ganny anmennen dan lesyel pour zwenn avek lezot 144,000 ki’n fini mor e ki deza dan lesyel. Ansanm avek Zezi, zot pou dirize dan Rwayonm Bondye.—Mat. 24:31; Rev. 5:​9, 10. w22.05 16 ¶4-5

Zezi ti ansenny son bann disip pour annan en bon pwennvi lo zot lekor. I ti dir zot: “[Zeova] i menm konnen konbyen bren seve i annan lo zot latet.” (Mat. 10:30) Sa ki Zezi ti dir i montre ki nou Papa ki dan lesyel i enterese avek nou e i apresye nou. Sa i ankourazan, sirtou si nou annan en move pwennvi lo nou lekor. Par egzanp, si nou krwar ki nou pa merite ador Zeova e viv pour touzour, i ti pou konmsi nou pe dir ki Zeova pa kapab ziz byen. Apepre 15 an pase, en Latour Veyer ti dir ki nou devret annan en bon pwennvi lo nou lekor. Sa Latour Veyer ti dir: “Nou pa pou anvi mazin plis ki an fo lo nou menm ziska en pwen kot nou vin vantar; me nou pa anvi osi tonm dan lot ekstrenm e mazinen ki nou pa vo nanryen. O kontrer, nou devret devlop en pwennvi rezonnab lo nou menm par pran an konsiderasyon nou pwen for e osi nou limit.” w22.05 24-25 ¶14-16

Ki sakenn parmi nou i kapab fer pour fer ki kongregasyon i reste ini? Nou kapab vin en dimoun ki kontan fer lape. (Mat. 5:9; Rom. 12:18) Sak fwa nou pran linisyativ pour fer lape avek lezot dan kongregasyon, nou ede pour fer sa paradi spirityel vin pli zoli. Nou bezwen gard antet ki Zeova ki’n atir sak dimoun ki dan sa paradi spirityel ver ladorasyon pir. (Zan 6:44) Imazinen ki mannyer Zeova i kontan ler i vwar nou pe fer zefor pour gard lape ek linite parmi son bann serviter ki presye pour li. (Iza. 26:3; Aga. 2:7) Zeova i donn son bann serviter en kantite bon keksoz. Ki byenfe nou kapab gannyen avek sa bann keksoz? Nou kapab reflesir lo sa ki nou etidye dan Parol Bondye. Ler nou fer sa, sa pou ed nou pour devlop bann kalite ki pou motiv nou pour “kontan kanmarad parey bann frer ek ser” e pour demontre “tandres ek lafeksyon” pour kanmarad.—Rom. 12:10. w22.11 12-13 ¶16-18

Ler nou aksepte ki Zeova in pardonn nou, sa i en “soulazman” pour nou. Nou pou osi annan lape lespri ek en konsyans kler. Nou santi koumsa zis ler “Zeova li menm” i pardonn nou. (Akt 3:19) Ler Zeova i pardonn nou, Zeova i fer li posib pour nou revin son zanmi. I pou konmsi nou pa’n zanmen fer pese. Apre ki Zeova in pardonn nou, i pa pou zanmen akiz nou oubyen pini nou pour sa pese. (Iza. 43:25) Zis “parey kot soley i leve i lwen avek kot soley i kouse,” Zeova i met nou pese lwen avek nou. (Ps. 103:12) Ler nou medit lo lafason ki Zeova i pardonnen, sa pou fer nou rekonesan e annan respe pour li. (Ps. 130:4) Ler Zeova pe deside si i pou pardonn en dimoun, sa pa depan lo si pese sa dimoun i grav oubyen non. O kontrer, ler Zeova pe deside si i pou pardonnen, i servi sa ki i konnen konman nou Kreater, konman sa Enn ki’n donn nou lalwa e konman nou Ziz. w22.06 5 ¶12-14

Zeova in donn tou bann ki kontan li en zoli lespwar. Byento, i pou fer ki dimoun i nepli malad, sagren e mor. (Rev. 21:​3, 4) I pou ed “bann ki annan limilite” e ki annan lespwar dan li pour fer later vin en paradi. (Ps. 37:​9-11) I pou fer li posib pour sakenn parmi nou annan en pli bon lanmitye avek li, enn ki pli meyer ki sa ki nou annan la konmela. Pa sa i en zoli lespwar! Kwa ki fer nou asire ki bann promes Bondye pou vin vre? Zeova i toultan fer sa ki i dir i pou fer. Alor nou annan bon rezon pour “met [nou] lespwar dan Zeova.” (Ps. 27:14) Nou montre ki nou annan lespwar dan Zeova par esper Bondye avek pasyans e dan lazwa pour li akonpli son bann promes. (Iza. 55:​10, 11) Annou reste fidel avek Zeova e annan konfyans ki i pou rekonpans “bann ki pe vreman rod li.” w22.06 20 ¶1; 25 ¶18

Zeova i nou Sef fanmir alor nou kapab asire ki i pou swiv sa prensip ki li menm in fer met dan 1 Timote 5:8. Ler nou asire ki Zeova i kontan nou ek nou fanmir, nou pou asire ki nou pou ganny bann keksoz ki nou bezwen. (Mat. 6:​31-33) Zeova i kontan nou, i zenere e i anvi donn nou sa ki nou bezwen. Ler Zeova ti kree later, i pa ti zis donn nou bann keksoz de baz ki nou bezwen pour viv. I ti osi donn nou bann keksoz pour fer nou zwaye. (Zen. 2:9) Menm si parfwa nou annan zis sa ki nou bezwen e pa plis ki sa, i ti pou byen ki nou konsantre lo lefet ki nou annan sa ki nou bezwen. Zeova in toultan donn nou sa ki nou bezwen. (Mat. 6:11) Nou bezwen gard antet ki menm si nou fer bann sakrifis la konmela, sa ki Zeova in donn nou e sa ki i pou donn nou dan lavenir i bokou pli presye.—Iza. 65:​21, 22. w22.06 15 ¶7-8

Nou tou nou bezwen manze spirityel. Zapot Pol ti dir ki ler nou aplik sa ki nou aprann dan Labib sa pou ed nou konn “fer diferans ant sa ki byen ek sa ki mal.” I kapab difisil pour obei bann standar Zeova parski en kantite dimoun ozordi pe viv en lavi imoral. Me Zezi i fer sir ki nou ganny sa manze spirityel ki nou bezwen pour fer nou lafwa reste for. Sa manze spirityel i sorti dan Parol Bondye. Parey Zezi, nou’n donn non Bondye sa loner ki i merite. (Zan 17:​6, 26) Par egzanp, an 1931 nou ti adopte sa non Temwen Zeova ki sorti dan Labib. Sa ti montre ki kantite non Bondye ti enportan pour nou e nou ti anvi ganny rekonnet par non nou Papa ki dan lesyel. (Iza. 43:​10-12) An plis, New World Translation of the Holy Scriptures in remet non Bondye kot i sipoze ete dan son Parol. w22.07 11 ¶11-12

Sa laverite ki dan Labib i osi enkli sa bon nouvel konsernan Rwayonm Bondye. Zezi ti konpar sa laverite konsernan Rwayonm avek en trezor ki’n kasyet. Dan Matye 13:​44, Zezi ti dir: “Rwayonm lesyel i parey en trezor ki’n ganny kasyet dan en plantasyon. En zonm ti trouv sa trezor e i ti rekasyet li. Parski i ti dan lazwa, i ti al vann tou sa ki i ti annan e i ti aste sa plantasyon.” Remarke ki sa zonm pa ti pe rod sa trezor. Me ler i ti trouv sa trezor, i ti vann tou sa ki i ti annan pour li ganny sa trezor. Akoz i ti fer sa? I ti konnen ki sa trezor i annan en gran valer. Nou konnen ki napa nanryen dan sa lemonn ki annan plis valer ki sa lazwa ki nou gannyen ler nou pe servi Zeova la konmela e sa lespwar pour viv pour touzour dan lavenir anba Rwayonm Bondye. Nou annan sa privilez pour annan en lanmitye pros avek Zeova e i vo lapenn pour fer nenport sakrifis pour nou annan sa lanmitye. Sa ki fer nou vreman zwaye i pour ‘fer li plezir.’—Kol. 1:10. w22.08 15 ¶8-9; 17 ¶12

Ki mannyer Zozef ti konnen ki Bondye ti pou vwar adilter konman “en keksoz sitan mal”? Dan Lalwa Moiz ki ti ganny donnen apepre desan z-an pli tar, i ti annan sa lord ki dir: “Ou pa devret komet adilter.” (Egz. 20:14) Kantmenm sa, Zozef ti konn Zeova ase byen pour li konnen ki mannyer Zeova ti pou santi konsernan adilter. Par egzanp, Zozef ti konnen ki Zeova in etabli maryaz e ki maryaz i en laranzman ant en msye ek en madanm. Sirman Zozef ti’n osi tande ki de fwa Zeova ti’n protez son granmer Sara pour li kapab reste fidel avek son msye ler i ti pros pour ganny vyole. (Zen. 2:24; 12:​14-20; 20:​2-7) Ler Zozef ti reflesir lo bann sityasyon koumsa, i ti konpran kwa ki byen e kwa ki mal dan lizye Bondye. Vi ki Zozef ti kontan Bondye, i ti osi kontan bann standar Zeova ki drwat e i ti determinen pour swiv sa bann standar. w22.08 26 ¶1-2

Oparavan, nou ti krwar ki Danyel 12:2 pe refer avek rezireksyon bann Kretyen swazir pour al dan lesyel oubyen avek sa travay predikasyon ki ti repran lo en pli gran lanpler apre ki bann ki opoz sa travay ti’n pros pour fer li arete an 1918. Me aprezan nou konpran ki sa bann parol pe refer avek rezireksyon ki pou ganny fer dan nouvo lemonn. Akoz nou dir sa? Dan langaz orizinal ki Labib ti ganny ekrir, sa mo “lapousyer” i ganny servi dan Zob 17:16 e dan Danyel 12:2. I pour sa rezon ki nou kapab dir ki Danyel 12:2 pe refer avek rezireksyon ki pou arive apre bann dernyen zour e apre lager Armagedon. Ki Danyel 12:2 pe vedir ler i dir ki serten pou ganny resisite pour ganny “lavi eternel”? Sa i vedir ki bann ki ganny resisite e aprann konn Zeova ek Zezi oubyen ki kontinyen aprann konn e obei Zeova ek Zezi pandan sa 1,000 an, pou finalman ganny lavi eternel.—Zan 17:3. w22.09 21-22 ¶6-7

Sa pa vedir ki Zeova i ekspekte ki nou annan konfyans dan lezot zis koumsanmenm. O kontrer i ekspekte ki nou annan konfyans dan zot parski zot in montre ki zot diny konfyans. I pran letan pour devlop konfyans dan bann frer ek ser. Ki mannyer ou fer sa? Aprann konn zot byen. Koz avek zot ler ou vin renyon. Al predikasyon avek zot. Annan pasyans avek zot, donn zot sa loportinite pour zot montre ki ou kapab annan konfyans dan zot. Petet o konmansman, ou pa pou dir ou bann keksoz personnel avek en dimoun ki ou pe aprann konnen. Me anmezir ki ou konn sa dimoun pli byen, petet ou pou pli konfortab pour koz lo ou bann santiman avek li. (Lik 16:10) Me ki ou kapab fer si en frer oubyen en ser i fer en keksoz ki fer ou perdi konfyans dan li? Pa taye pour aret zot lanmitye. O kontrer, les en pe letan pase. Pa les sa ki serten i fer, fer ou aret annan konfyans dan lezot frer ek ser. w22.09 4 ¶7-8

En ansyen ki apel Miqueas ti santi ki serten frer ki annan responsabilite dan lorganizasyon Zeova pa ti’n tret li byen. Kantmenm sa, i ti kontinyen rezonn byen e i ti fer bokou zefor pour kontrol son bann santiman. I ti koz avek Zeova souvan dan lapriyer e demann li pour donn li son lespri sen ek lafors pour andire. I ti osi rod bann lenformasyon dan nou bann piblikasyon ki kapab ed li. Ki leson nou aprann? Si ou santi ki en frer oubyen en ser pa’n tret ou byen, reste kalm e esey kontrol ou bann santiman. Petet ou pa konnen kwa ki’n fer sa frer oubyen sa ser koz ouswa azir dan sa fason. Alor koz avek Zeova dan lapriyer e demann li pour ed ou vwar keksoz parey sa frer oubyen sa ser i vwar. Vwar ki sa frer oubyen ser pa’n fer par ekspre pour bles ou santiman e ou pou pardonn li. (Prov. 19:11) Rapel ki Zeova i vwar ou sityasyon e i pou donn ou sa lafors ki ou bezwen pour andire.— Ekle. 5:8. w22.11 21 ¶5

Swazir bann zanmi ki kontan Zeova. Bann zanmi ki ou swazir i kapab ed ou pour vin en Kretyen matir. (Prov. 13:20) En ansyen ki apel Julien i dir: “Ler mon ti pli zenn, mon ti fer zanmi avek bann ki mon ti travay avek dan predikasyon. Zot ti devoue dan predikasyon e zot ti ed mwan vwar ki predikasyon i gou. . . . Mon ti osi realize ki rezon ki mon ti napa en kantite bon zanmi, i akoz mon ti pe fer zanmi avek zis bann ki menm laz avek mwan.” Ki ou pou fer si ou realize ki en dimoun dan ou kongregasyon pa en bon frekantasyon pour ou? Zapot Pol ti konnen ki serten dimoun dan kongregasyon dan premye syek pa ti mazin oubyen azir parey en Kretyen. Alor i ti dir Timote pa frekant zot. (2 Tim. 2:​20-22) Nou lanmitye avek Zeova i presye. Nou’n fer en kantite zefor pour vin pros avek Zeova, alor nou pa devret annan bann zanmi ki pou gat nou lanmitye avek Zeova. w22.08 5-6 ¶13-15

Nou pa parey bann dimoun ki ay konsey Bondye. O kontrer nou aprann pour kontan fason panse Zeova enkli son bann standar konsernan sa ki byen ek sa ki mal. Ler nou konpar sa ki arive ler nou obei e sa ki arive ler nou pa obei, sa i kapab fer nou pli kontan bann standar Zeova. Remark bann problenm ki dimoun i gannyen parski zot in rezet bann konsey saz ki sorti kot Zeova. Apre remarke ki mannyer ou lavi i bokou pli meyer akoz ou obei Bondye. (Ps. 32:​8, 10) Zeova i donn son lasazes avek nou tou. I pa fors personn pour aksepte sa lasazes. Me i dir nou ki i arive avek bann ki pa ekout son konsey saz. (Prov. 1:​29-32) Zot pou “bezwen pey konsekans zot aksyon.” Avek letan, zot pou soufer akoz fason ki zot pe viv zot lavi e pli tar, Zeova pou detrir zot. De lot kote, bann ki ekout konsey saz ki Zeova i donnen e ki aplik sa bann konsey, Labib i dir sa konsernan zot: “Sa enn ki ekout mwan pou an sekirite e i pa pou per maler.”—Prov. 1:33. w22.10 21 ¶11-13

Ler nou annan en gran respe pour Zeova, nou evite fer okenn keksoz ki pa fer li plezir. (Prov. 16:6) Alor, nou kontinyen fer nou mye pour swiv bann standar Zeova konsernan sa ki byen e sa ki mal parey in ganny eksplike dan Labib. (2 Kor. 7:1) Nou pou ere si nou fer bann keksoz ki Zeova i kontan e nou rezet bann keksoz ki i pa kontan. (Ps. 37:27; 97:10; Rom. 12:9) I kapab ki en dimoun i konnen ki Zeova i annan drwa deside kwa ki byen e kwa ki mal. Me sa dimoun i bezwen aksepte e anvi swiv bann standar Zeova. (Rom. 12:2) Alor, par sa ki nou fer, nou montre ki nou vreman krwar ki swiv bann standar Zeova i sa pli bon fason pour viv nou lavi. (Prov. 12:28) David ti santi koumsa. I pour sa rezon ki i ti dir Zeova: “Ou fer mwan konn sa santye ki donn lavi. Devan ou, i annan bokou lazwa, dan ou kote drwat, i annan lazwa pour touzour.”—Ps. 16:11. w22.10 8 ¶9-10

Zezi ti toultan annan limilite e i ti annan en bon pwennvi lo son lekor. Avan i ti vin lo later, i ti fer en kantite keksoz merveye pour Zeova. Atraver Zezi, “tou lezot keksoz dan lesyel e lo later in ganny kree.” (Kol. 1:16) Ler Zezi ti batize, i ti rapel bann keksoz ki i ti’n fer ler i ti avek son Papa. (Mat. 3:16; Zan 17:5) Me sa pa ti fer Zezi vin orgeye. O kontrer, i pa ti zanmen azir dan en fason ki ti fer li paret pli enportan ki lezot. I ti dir son bann disip ki i ti’n vin lo later “pa pour ganny servi, me pour servi e donn son lavi konman en ranson pour liber bokou dimoun.” (Mat. 20:28) I ti osi dir ki i pa kapab fer nanryen ki i’n deside lo li menm. Zezi ti annan bokou limilite e i’n kit en bon legzanp pour nou swiv. w22.05 24 ¶13

Ler Zeova pe deside si i pou pardonn en dimoun, i pran kont si sa dimoun ki’n fer sa pese ti konnen ki sa ki i pe fer i mal. Zezi ti montre nou sa dan Lik 12:​47, 48. Ler en dimoun i plàn pour fer en keksoz ki i konnen i mal e ki i konnen Bondye pa kontan me kantmenm sa i fer li, sa dimoun i fer en pese grav. I kapab ki Zeova i deside pour pa pardonn li. (Mark 3:29; Zan 9:41) Me eski kantmenm sa Zeova i kapab deside pour pardonn nou? Wi! Parski Zeova i osi pran kont si sa dimoun in repantir senserman. Repantir i vedir “sanz nou fason panse, latitid oubyen nou bann dezir.” I enkli ki en dimoun i regrete e sagren pour bann move keksoz ki i’n fer oubyen i regrete e sagren pour bann bon keksoz ki i pa’n fer. Sa dimoun i osi sagren parski i pa’n reste pros avek Zeova e sa in fer li fer pese. w22.06 5-6 ¶15-17

Nou bann lennmi i dir bann mansonz oubyen zot dir bann keksoz ki fer nou annan dout lo bann frer ki pe dirize dan lorganizasyon Zeova. (Ps. 31:13) Serten frer in ganny arete e akize konmkwa zot bann kriminel. Bann Kretyen dan premye syek ti fer fas avek en sityasyon en pe parey ler zapot Pol ti ganny arete e akize dan en fason enzis. Serten ti aret siport zapot Pol ler i ti ganny mete dan prizon Ronm. (2 Tim. 1:​8, 15; 2:​8, 9) Mazin ki mannyer zot aksyon ti fer Pol santi. I ti’n fer fas avek en kantite difikilte e i ti’n menm riske son lavi pour zot. (Akt 20:​18-21; 2 Kor. 1:8) Annou pa zanmen vin parey bann dimoun ki pa ti ed Pol. Alor nou pa devret sirprann ki Satan i atak bann frer ki pe dirize dan kongregasyon. Satan i anvi ki sa bann frer i aret fidel avek Zeova e i osi anvi fer nou per. (1 Pyer 5:8) Kontinyen siport ou bann frer e reste fidel avek zot.​—2 Tim. 1:​16-18. w22.11 16-17 ¶8-11

I kapab ki sa kriminel ki ti’n repantir e ki ti o bor Zezi avan Zezi i mor, ti en Zwif. Bann Zwif ti ador en sel Bondye me bann dimoun lezot nasyon ti krwar ki i annan en kantite bondye. (Egz. 20:​2, 3; 1 Kor. 8:​5, 6) Si sa kriminel pa ti en Zwif, i tre probab ki sa kestyon ki sa kriminel ti’n demande ki dan nou teks pour ozordi ti pou: “Eski ou napa okenn respe pour bann bondye?” An plis, Zezi pa ti’n ganny anvoye kot bann dimoun lezot nasyon me i ti’n ganny anvoye kot “bann mouton perdi pep Izrael.” (Mat. 15:24) Osi, Bondye ti’n fer bann Izraelit konnen ki i ti pou resisit bann dimoun mor. I kapab ki sa kriminel ki ti’n repantir ti konn sa e sa ki i ti dir i montre ki i ti krwar ki Zeova ti pou resisit Zezi pour Zezi dirize dan Rwayonm Bondye. Sa zonm ti swete ki Bondye ti pou osi resisit li. Vi ki sa kriminel ki ti’n repantir ti en Zwif, sirman i ti konn konsernan Adan ek Ev ek sa Paradi ki Zeova ti’n kree pour zot. Alor i kapab ki sa kriminel ti krwar ki sa Paradi ki Zezi ti mansyonnen ti pou en zoli zarden lo later.—Zen. 2:15. w22.12 8-9 ¶2-3

Nou kapab fer sa travay predikasyon parski Satan pe lager avek nou, pour li fer nou aret fer sa travay predikasyon. (Rev. 12:17) En kantite dimoun i krwar ki Satan i telman for ki nou pa kapab ranport laviktwar lo li. Me atraver nou travay predikasyon, nou pe ranport laviktwar lo li. (Rev. 12:​9-11) Ki mannyer sa? Ler nou anons sa bon nouvel, nou montre ki nou pa per bann latak Satan. Sa i montre nou ki Zeova i donn nou lafors atraver son lespri sen e ki nou annan laprouvasyon Zeova. (Mat. 5:​10-12; 1 Pyer 4:14) Lespri sen Bondye i kapab donn nou sa lafors ki nou bezwen pour fer fas avek nenport problenm ki nou gannyen dan sa travay predikasyon. (2 Kor. 4:​7-9) Alor ki nou kapab fer pour fer sir ki nou kontinyen ganny lespri sen Bondye? Nou bezwen kontinyen demann Zeova son lespri sen e asire ki i pou reponn nou lapriyer. w22.11 5 ¶10-11

Nou demontre lanmour pour nou bann frer ek ser par fer bokou zefor pour gard lape avek zot. Nou esey swiv legzanp Zeova e pardonn lezot. Si Zeova ti pare pour donn son Garson pour mor pour nou pese, pa nou devret pare pour pardonn nou bann frer ek ser ler zot fer keksoz ki ofans nou? Nou pa pou anvi vin parey sa move lesklav ki Zezi ti koz lo la dan en legzanp. Menm apre ki son met ti’n kennsel sa gro det ki i ti annan, sa lesklav pa ti oule pardonn en lot lesklav ki ti dwa li mwens larzan. (Mat. 18:​23-35) Si i annan en problenm ant ou ek en dimoun dan kongregasyon, eski ou kapab pran linisyativ e apros sa dimoun pour fer lape avan ki ou asiste Memoryal? (Mat. 5:​23, 24) Si ou fer sa, ou pou pe montre ki ou kontan Zeova ek Zezi en kantite. w23.01 29 ¶8-9

En fason ki ou kapab konnen ki ou bann frer ek ser i bezwen, i par servi bon zizman ler ou pe demann zot kestyon. (Prov. 20:5) Eski zot annan ase manze, latizann oubyen lezot keksoz ki zot bezwen? Eski petet zot kapab perdi zot travay oubyen eski zot annan ase larzan pour kontinyen pey zot landrwa reste? Eski zot bezwen led pour rod lasistans finansyel avek gouvernman? Zeova i anvi ki nou tou, nou ankouraz e ed lezot. (Gal. 6:10) Menm si nou fer en pti keksoz pour ed en dimoun ki malad, sa i kapab ankouraz sa dimoun en kantite. Par egzanp, en zanfan i kapab anvoy en kart oubyen en desen pour ankouraz en frer. En zenn i kapab al laboutik oubyen al fer en lot konmisyon pour en ser. Lezot dan kongregasyon i kapab kwi en repa pour en dimoun ki malad. Serten frer ek ser in anvoy en kart remersiman pour bann ansyen ki souvan i annan bokou plis keksoz pour fer ler i annan en lepidemi. I gou ler nou tou nou fer nou par pour “kontinyen ankouraz kanmarad e batir kanmarad.”—1 Tesa. 5:11. w22.12 22 ¶2; 23 ¶5, 6

Bann Sadiseen ti konn byen sa senk premye liv dan Lekritir Ebre. Me zot pa ti aksepte bann laverite enportan ki i annan dan sa bann liv. Par egzanp, remark sa ki Zezi ti dir ler bann Sadiseen ti demann li konsernan rezireksyon. I ti demann zot: “Zot pa’n lir dan liv Moiz, dan sa resi lo sa brousay kot Bondye ti dir li: ‘Mwan mon Bondye Abraam, mon Bondye Izaak ek Bondye Zakob’?” (Mark 12:​18, 26) I tre probab ki bann Sadiseen ti’n lir sa resi plizyer fwa me sa kestyon ki Zezi ti demann zot ti montre ki zot pa ti’n aksepte en laverite enportan, setadir sa lansennyman konsernan rezireksyon. (Lik 20:38) Ki nou kapab aprann? Ler nou lir Labib, nou anvi port latansyon lo tou sa ki en verse oubyen en resi i kapab ansenny nou. Nou pa anvi vwar zis bann lansennyman ki fasil pour konpran me nou anvi osi vwar lezot laverite ek prensip. w23.02 11 ¶9-10

Tou bann Temwen ki teks pour ozordi pe refer avek, in pas dan bann gro problenm me kantmenm sa, zot in reste fidel avek Zeova tou dilon zot lavi. (Ebr. 11:​36-40) Eski i ti vo lapenn pour zot andire e travay dir? Menm si zot pa ti vwar tou bann promes Bondye vin vre, zot ti kontinyen annan lespwar dan Zeova. Zot ti asire ki zot ti annan laprouvasyon Zeova. Alor sa ti fer zot annan konfyans ki zot ti pou vwar bann promes Zeova vin vre. (Ebr. 11:​4, 5) Zot legzanp pou fer nou pli determinen pour kontinyen annan lespwar dan Zeova. Ozordi nou pe viv dan en lemonn ki pe vin deplizanpli pli move. (2 Tim. 3:13) Satan i ankor pe teste pep Bondye. Nenport problenm ki nou pou gannyen dan lavenir, annou determinen pour travay dir pour Zeova e annan konfyans ki “nou’n met nou lespwar dan en Bondye vivan.”—1 Tim. 4:10. w22.06 25 ¶17-18

En rezon akoz ki nou devret esey reste an bonn sante, i pour nou kapab donn Zeova nou meyer. (Mark 12:30) Alor nou evite fer bann keksoz ki nou konnen i kapab fer nou malad. (Rom. 12:1) I vre ki menm si nou pou fer en kantite keksoz pour nou reste an bonn sante, sa pa vedir ki nou pa pou malad. Me nou fer sa ki nou kapab parski nou anvi montre nou Papa ki dan lesyel ki nou apresye sa kado lavi. Si nou malad oubyen laz pe antre, petet nou pa pou kapab fer sa kantite ki nou ti abitye fer oparavan. Sa i kapab fer nou fristre e sagren. Me nou pa devret aret pran swen avek nou lekor. Akoz? Parski menm si nou aze oubyen nou malad, nou ankor kapab loue Zeova parey Lerwa David ti fer. I vreman rekonfortan pour konnen ki menm si nou malad oubyen nou aze, nou presye pour Zeova. (Mat. 10:​29-31) Menm si i arive ki nou mor, Zeova pou vreman anvi resisit nou. (Zob 14:​14, 15) Alor, tan ki nou ankor vivan, nou anvi fer tou sa ki nou kapab pour pran swen avek nou lasante e protez nou lavi. w23.02 20-21 ¶3-5

Eski non sa bann ki form parti gran lafoul pou ankor dan liv lavi apre ki zot in sirviv Armagedon? Wi! (Rev. 7:14) Zezi ti dir ki zot parey bann mouton e zot “pou ganny lavi eternel.” (Mat. 25:46) Menm si zot sirviv Armagedon, zot pa pou ganny lavi eternel deswit. Pandan sa Mil An ki Zezi pou dirize, Zezi pou “vey lo zot parey en berze [e] i pou gid zot ver bann sours delo lavi.” Bann ki swiv gidans Kris e ki ganny trouve fidel avek Zeova pandan zizman final, zot non pou ganny ekrir dan en fason permanan dan liv lavi. (Rev. 7:​16, 17) Me bann kabri pou ganny detri dan lager Armagedon. Zezi ti dir ki zot “pou ganny lanmor eternel.” (Mat. 25:46) Zeova ti enspir zapot Pol pour ekri ki “sa bann menm dimoun pou ganny pinisyon ek destriksyon eternel.”—2 Tesa. 1:9; 2 Pyer 2:9. w22.09 16 ¶7-8

Ler bann fanmir i apresye bann keksoz ki Zeova in fer, zot kapab rilaks e pas en bon letan ansanm. Sa pou ed zot pour kontan kanmarad plis. Zeova in kree bann zoli landrwa lo later kot nou kapab fer bann keksoz ki nou kontan. En kantite fanmir i kontan al marse dan montanny ouswa pas letan ansanm lo lans. Dan nouvo lemonn, bann paran ek zot zanfan pour apresye kreasyon dan en fason ki zot pa pe kapab apresye la konmela. Sa letan, nou pou napa rezon pour per bann zannimo e bann zannimo pa pou per nou. (Iza. 11:​6-9) Nou pou kapab apresye sa ki Zeova in kree pour touzour. (Ps. 22:26) Me paran, pa bezwen esper ziska ki nou dan nouvo lemonn pour ed ou zanfan konmans apresye kreasyon. Ler ou servi kreasyon pour ansenny ou zanfan konsernan Zeova, i tre probab ki zot pou dakor avek sa ki Lerwa David ti dir: “O Zeova, napa okenn travay ki parey sa ki pour ou.”—Ps. 86:8. w23.03 25 ¶16-17