Desanm

Eski sa zofisye Etyopyen ti’n pare pour batize? Reflesir lo sa: Sa zonm Etyopyen “ti’n al ador Bondye, Zerizalenm.” (Akt 8:27) Alor i tre probab ki i ti’n aksepte larelizyon Zwif. San dout, i ti’n aprann konsernan Zeova dan Lekritir Ebre. Me kantmenm sa, i ti anvi aprann plis. Anfet ler Filip ti zwenn sa zofisye lo semen, sa zofisye ti pe lir liv profet Izai. (Akt 8:28) Sa zofisye ti anvi kontinyen aprann. I ti vwayaze sorti Etyopi pour li kapab al ador Zeova kot tanp Zerizalenm. Sa Etyopyen ti aprann bann laverite enportan avek Filip. Enn parmi i ki Zezi ti sa Mesi. (Akt 8:​34, 35) Son lanmour pour Zeova ek Son Garson ti vin pli for e sa ti motiv li pour fer en desizyon enportan. I ti deside pour batize konman en disip Zezi Kri. Filip ti vwar ki sa zonm ti’n pare alor i ti batiz li. w23.03 8-9 ¶3-6

Nou pa kapab fer plezir Zeova si nou koz manti. (Prov. 6:​16, 17) Menm si en kantite dimoun ozordi i krwar ki i normal pour koz manti, nou nou evite koz manti parski Zeova i dir ki i mal pour fer sa. (Ps. 15:​1, 2) Byensir, nou evite koz manti me nou osi evite gard bann lenformasyon ki pou fer lezot tonm lo sa move konklizyon. Nou osi devret evite koz an mal lo lezot. (Prov. 25:23; 2 Tesa. 3:11) Si dan pe koz avek lezot, ou remarke ki zot pe konmans koz an mal lo lezot, sanz konversasyon e koz lo en keksoz ki ankourazan. Vi ki nou viv dan en lemonn kot en kantite dimoun i annan en move fason koze, nou devret fer sir ki sa ki nou dir i fer plezir Zeova. I pou beni nou ler nou servi nou abilite pour koze pour loue li dan predikasyon, dan renyon e dan nou bann konversasyon. Ler Zeova i detri sa move lemonn, i pou pli fasil pour loue Zeova par sa ki nou dir.—Zid 15. w22.04 9 ¶18-20

Ler nou reflesir lo ki kantite Zeova ek Zezi i kontan nou, sa i motiv nou pour kontan zot nou osi. (1 Zan 4:10) Ler nou realize ki Zezi in mor pour nou personnelman, sa i fer nou kontan zot plis ankor. Zapot Pol ti rekonnet sa e i ti eksprim son lapresyasyon ler i ti ekri bann Kretyen dan lavil Galat. I ti dir: “Garson Bondye [in] kontan mwan e donn son lavi pour mwan.” (Gal. 2:20) Gras a sa ranson, Zeova in atir ou ver li pour ki ou kapab vin son zanmi. (Zan 6:44) Pa ou vreman kontan ler ou konnen ki Zeova in vwar en keksoz bon dan ou e i’n pey en pri vreman ser pour ou kapab vin son zanmi? Eski pa sa i fer ou kontan Zeova ek Zezi plis ankor? Alor nou devret demann nou lekor: ‘Ki mon lanmour pour Zeova ek Zezi i motiv mwan pour fer?’ Sa lanmour ki nou annan pour Bondye ek pour Kris i motiv nou pour demontre lanmour pour lezot.—2 Kor. 5:​14, 15; 6:​1, 2. w23.01 28 ¶6-7

Labib i en zouti vreman enportan ki Zeova i servi pour ed son pep pour “ador li ansanm dan linite.” I’n fer ekri diferan bout dan Labib dan en fason ki zis bann dimoun ki annan limilite ki pou konpran. (Lik 10:21) Dimoun partou dan lemonn i lir Labib. Me zis bann dimoun ki annan limilite ki vreman konpran e aplik sa ki Labib i dir. (2 Kor. 3:​15, 16) Dan Labib, nou kapab aprann konsernan lasazes Zeova. Zeova i servi Labib pour ansenny son pep konman en group e osi pour ansenny e rekonfort sakenn parmi nou. Ler nou lir Parol Zeova, nou kapab vwar ki i enterese avek sakenn parmi nou. (Iza. 30:21) Eski ou’n deza fer resers dan Labib e ou’n lir en verse Labib ki paret konmsi in ganny ekrir zis pour ou? Me kantmenm sa, Labib in ganny ekrir pour ki plizyer milyon dimoun i kapab konpran li. Ki mannyer i posib ki dan Labib i annan bann lenformasyon ki azour e ki egzakteman sa ki ou bezwen? Sa i posib parski Loter Labib i sa personnaz pli saz dan liniver.—2 Tim. 3:​16, 17. w23.02 4-5 ¶8-10

Konman bann vre Kretyen, nou kontan Zeova en kantite. Nou anvi donn nou meyer dan nou servis pour Zeova. Me pour nou kapab fer tou sa ki nou kapab pour li, nou bezwen met bann lobzektif dan son servis. Par egzanp, nou bezwen devlop bann kalite ki fer plezir Zeova, devlop bann abilite ki itil dan Son servis e rod fason pour ed lezot. Akoz nou devret anvi met e atenn bann lobzektif dan servis Zeova? Sa rezon pli enportan i akoz nou anvi fer plezir nou Papa ki dan lesyel ki kontan nou. Zeova i kontan ler i vwar nou pe byen servi nou abilite dan son servis. En lot rezon akoz nou anvi fer plis dan servis Zeova i pour nou kapab ed nou bann frer ek ser plis. (1 Tesa. 4:​9, 10) Nenport ki kantite letan nou pe servi Zeova, nou tou nou kapab fer plis dan Son servis. w22.04 22 ¶1-2

Byento bann gouvernman pou atak Gran Babilonn, ki reprezant tou fo larelizyon. Sa pou konmans gran ladetres. Eski sa pou fer en kantite dimoun konmans servi Zeova? Non. O kontrer, Revelasyon sapit 6 i montre ki pandan sa letan difisil, bann ki pa pe servi Zeova pou rod proteksyon avek sistenm politik ek komers sa lemonn, ki ganny konpare avek bann montanny. Vi ki zot pa pou siport Rwayonm Bondye, Zeova pou vwar zot konman bann ki opoz li. (Lik 11:23; Rev. 6:​15-17) Pandan gran ladetres, lavi pou difisil. Me i pou kler ki bann serviter Zeova i diferan avek sa lemonn. Zot pou ankor sa sel group dimoun lo later ki pou pe servi Zeova e ki refize siport “sa bebet sovaz.”—Rev. 13:​14-17. w22.05 16-17 ¶8-9

Pep Bondye pa pe zis anons sa “bon nouvel Rwayonm,” zot osi bezwen travay ansanm avek bann lanz ki ganny mansyonnen dan Revelasyon sapit 8 ziska sapit 10. (Mat. 24:14) Sa bann lanz i anonse ki i pou annan diferan maler ki pou tonm lo bann ki rezet Rwayonm Bondye. Alor, Temwen Zeova pe anons en mesaz zizman ki parey “lagrel ek dife” e ki montre zizman Bondye lo diferan bout dan lemonn Satan. (Rev. 8:​7, 13) Bann dimoun i bezwen konnen ki lafen i pros pour zot kapab fer bann sanzman e sirviv zour lakoler Zeova. (Zef. 2:​2, 3) Me laplipar dimoun pa kontan sa mesaz. Alor, nou bezwen annan kouraz pour anons sa mesaz. Pandan gran ladetres, sa dernyen mesaz zizman pou fer dimoun pli ankoler ankor.—Rev. 16:21. w22.05 7 ¶18-19

Annou vwar legzanp en koup ki ti pe vin paran.I kapab ki pandan bann lannen, zot in tann plizyer diskour konsernan fason pour elve zanfan. Me aprezan bann prensip dan sa bann diskour i vin pli enportan pour zot parski zot pou annan en zanfan pour zot elve e sa i en gro responsabilite. Alor i kler ki ler en keksoz i sanze dan nou lavi, serten prensip i vin pli enportan pour nou. I pour sa rezon ki bann serviter Zeova i fer parey bann lerwa Izrael. Zot lir Labib e medit lo la ‘tou zot lavi.’ (Det. 17:19) Paran, ou annan enn parmi bann pli gran privilez ki en Kretyen i kapab annan. Sa i pour ansenny ou zanfan konsernan Zeova. Me ou pa zis bezwen ansenny zot konsernan nou Bondye, ou anvi ed ou zanfan pour kontan Zeova en kantite. w22.05 26 ¶2-3

Nou bezwen fer plis ki zis regrete pour sa ki nou’n fer mal. Nou bezwen pare pour pran aksyon. Ler Zeova pe deside si i pou pardonn en dimoun, i pran kont si sa dimoun in sanz son lavi. Ler en dimoun i sanz son lavi, i bezwen aret fer bann move keksoz e i viv dan en fason ki fer Zeova plezir. (Iza. 55:7) Sa dimoun i bezwen sanz son fason panse e les li ganny gide par fason panse Zeova. (Rom. 12:2; Efe. 4:23) I bezwen anvi aret mazin e fer bann move keksoz. (Kol. 3:​7-9) Byensir, i nou lafwa dan sakrifis Zezi Kri ki fer li posib pour Zeova pardonn nou e pirifye nou avek nou bann pese. Me Zeova pou pardonn nou si i vwar ki nou pe fer zefor pour sanz nou lavi.—1 Zan 1:7. w22.06 6 ¶16-17

Depi ki Adan ek Ev in rebel kont Zeova, bann imen in fer ditor kanmarad. (Ekle. 8:9) Par egzanp, serten dimoun i servi zot lotorite pour tret lezot dan en move fason. I annan lezot ki fer bann krim vyolan. Bann bouli kot lekol i ensilte e menas lezot manrmay e serten dimoun i menm tret zot fanmir dan en fason ki kriyel. Alor, nou pa sirprann ki dimoun i per kanmarad! Ki mannyer Satan i servi sa lafreyer? Satan i esey fer nou sitan per dimoun ki nou aret anons sa bon nouvel oubyen nou aret fer lezot keksoz ki Zeova i demann nou pour fer. Satan i fer bann gouvernman enterdi sa travay predikasyon e persekit nou. (Lik 21:12) En kantite dimoun dan sa lemonn i fann bann fo lenformasyon ek mansonz lo Temwen Zeova. Bann dimoun ki krwar sa bann mansonz i kapab sikann nou oubyen atak nou. (Mat. 10:36) Sa bann taktik Satan pa sirprann nou parski i ti servi sa bann menm taktik dan premye syek.—Akt 5:​27, 28, 40. w22.06 16 ¶10-11

Bann Kretyen swazir pou ed lekel pour fer sa ki drwat? Zot pou ed bann ki ganny resisite, bann ki sirviv Armagedon e osi okenn zanfan ki ne dan nouvo lemonn. A lafen sa 1,000 an, tou dimoun lo later pou’n vin parfe. Nou bezwen rapel ki en dimoun parfe pa otomatikman ganny lavi eternel. Mazin sa ki ti arive avek Adan ek Ev. Zot ti parfe me zot ti bezwen demontre zot lobeisans anver Zeova avan ki zot ganny lavi eternel. Malerezman, zot pa ti obei li. (Rom. 5:12) Vi ki a lafen sa 1,000 an tou imen pou parfe, eski tou dimoun pou aksepte ki Zeova i diriz zot pour touzour? Ouswa eski serten pou fer parey Adan ek Ev, ki pa ti reste fidel menm si zot ti parfe? Sa bann kestyon pou bezwen ganny reponn. w22.09 22-23 ¶12-14

Ler ou get tou sa problenm dan lemonn ozordi, eski ou vwar li difisil pour krwar ki keksoz pou amelyore? Bann manm fanmir nepli kontan kanmarad parey avan. Dimoun pe vin pli move e egois. En kantite dimoun i vwar li difisil pour met konfyans dan bann ki annan lotorite. Me sa bann problenm i kapab konvenk ou ki keksoz pou amelyore. Akoz? Parski dimoun pe azir egzakteman parey Labib ti predir dan sa profesi konsernan “bann dernyen zour.” (2 Tim. 3:​1-5) Napa en dimoun senser ki kapab dir ki sa profesi pa pe ganny akonplir. Lakonplisman sa profesi i montre ki Zezi Kri in vin Lerwa dan Rwayonm Bondye. Me sa i zis enn parmi plizyer profesi konsernan Rwayonm. Tou sa bann profesi i konekte ansanm parey bann bout en puzzle pou ed nou konnen dan ki letan dan plan Zeova ki nou ladan. w22.07 2 ¶1-2

Pandan sa pandemi COVID-19, nou’n ganny lenstriksyon kler lo ki mannyer pour fer bann renyon e pour partisip dan predikasyon. Pa bokou letan apre ki sa pandemi ti konmanse, nou ti konmans asiste renyon ek lasanble atraver Enternet. Nou ti osi konmans fer predikasyon atraver telefonn e par anvoy bann let. Zeova in beni nou bann zefor. Bann Biro Brans Temwen Zeova dan plizyer pei in remarke ki lakantite proklanmater dan zot teritwar in ogmante. Anfet, pandan sa letan pandemi en kantite proklanmater in annan bann leksperyans ki ankourazan. I kapab ki serten frer ek ser ti santi ki bann lenstriksyon ki lorganizasyon Zeova ti donnen ti tro strik. Me plizyer fwa nou’n vwar ki sa bann lenstriksyon ti vreman saz. Nou kapab vwar ki Zezi i kontan nou dan lafason ki i diriz lorganizasyon Zeova. Ler nou reflesir lo lafason ki Zezi pe diriz son pep, sa i fer nou asire ki nenport kwa ki kapab arive dan lavenir, Zeova ek son Garson pou avek nou.—Ebr. 13:​5, 6. w22.07 13 ¶15-16

Apard ki loue Zeova, nou devret osi remersye li pour bann bon keksoz ki i donn nou. Par egzanp nou kapab remersye li pour bann fler diferan kouler, pour sa gran varyete bon manze e pour bann bon zanmi ki nou annan. Nou Papa ki kontan nou i donn nou sa bann keksoz e plis ankor akoz i anvi fer nou zwaye. (Ps. 104:​12-15, 24) Me pli enportan, nou remersye Zeova pour sa kantite manz spirityel ki i donn nou e sa zoli lespwar pour lavenir. Parfwa i fasil pour nou oubliye remersye Zeova pour tou sa ki i’n fer pour nou. Kwa ki kapab ed ou pour rapel? Ou kapab fer en lalis bann diferan keksoz ki ou’n priy lo la e tanzantan ou kapab tyek sa lalis pour vwar ki mannyer Zeova in reponn ou lapriyer. Apre fer en lapriyer pour remersye li pour son led.—Kol. 3:15. w22.07 22 ¶8-9

I pa ase pour zis etidye laverite. Pour nou ganny bann byenfe, nou bezwen viv laverite, setadir aplik sa ki nou pe aprann dan nou lavi. Sa i sa sel fason ki nou pou kapab vreman ere. (Zak 1:25) Ki mannyer nou kapab fer sir ki nou pe viv laverite? En frer ti sizere ki nou egzamin byen nou fason viv pour vwar si nou pe aplik sa ki nou pe aprann e pour vwar kote ki nou bezwen amelyore. Zapot Pol ti dir: “Nenport ki progre ki nou’n fer, annou kontinyen al annavan dan sa menm direksyon e dan en fason annord.” (Fili. 3:16) Mazin bann byenfe ki nou gannyen ler nou fer nou mye pour “kontinyen viv an armoni avek laverite.” Nou pa zis viv en pli bon lavi la konmela me nou osi fer Zeova ek nou bann frer ek ser kontan. (Prov. 27:11; 3 Zan 4) Sa i bann pli bon rezon pour nou kontan laverite e pour viv laverite. w22.08 18-19 ¶16-18

Ki mannyer bann ansyen i kapab montre ki zot kontan Zeova ek Zezi? En fason ki zot kapab fer sa i par pran swen avek bann mouton Zezi. (1 Pyer 5:​1, 2) Zezi ti fer zapot Pyer konpran sa. Apre ki Pyer ti’n dir ki i pa konn Zezi trwa fwa, i tre probab ki Pyer ti vreman anvi montre ki i kontan Zezi. Apre ki Zezi ti’n resisite, i ti demann Pyer: “Simon garson Zan, eski ou kontan mwan?” Nou kapab asire ki Pyer ti pou fer tou sa ki i kapab pour montre ki i kontan son Met. Zezi ti dir Pyer: “Pran swen avek mon bann pti mouton.” (Zan 21:​15-17) Pour larestan son lavi, Pyer ti montre ki i kontan Zezi par pran byen swen avek bann mouton Zezi. Ansyen, ki mannyer ou kapab montre ki sa ki Zezi ti dir zapot Pyer i enportan pour ou? Ou kapab montre ki kantite ou kontan Zeova ek Zezi par fer letan pour ankouraz ou bann frer ek ser e par fer plis pour ed bann ki inaktif pour retourn kot Zeova.—Ezek. 34:​11, 12. w23.01 29 ¶10-11

I annan en danze ki ou bezwen evite. Ou bezwen evite mazinen ki personn pa konpran sa problenm ki ou pe fer fas avek. Ler ou mazinen ki personn pa konpran sa problenm ki ou pe fer fas avek, sa i kapab fer ou krwar ki ou pa kapab fer nanryen pour amelyor ou sityasyon e ki ou pa kapab reziste bann move dezir. Me i pa sa ki Labib i dir. Labib i dir: “Ler zot ganny tante, i pou osi donn zot semen sorti pour ki zot kapab andire.” Alor menm ler nou annan en move dezir ki for, nou kapab reziste sa move dezir e reste fidel avek Zeova. Avek led Zeova, nou kapab evite fer sa ki mal. Ou devret toultan gard antet ki konman en imen enparfe, ou pa kapab evite ganny bann move dezir. Ler ou ganny bann move dezir, ou kapab rezet zot deswit parey Zozef ti fer ler madanm Potifar ti anvi dormi avek li. (Zen. 39:12) Ler ou ganny bann move dezir, ou pa bezwen fer sa ki mal. w23.01 12-13 ¶16-17

Lazistis i en kalite ki Zeova i annan. (Det. 32:4) En dimoun ki zis pa fer lapreferans e Zeova pa fer lapreferans. (Akt 10:​34, 35) Nou kapab vwar ki Zeova pa fer lapreferans parski Labib ti ganny ekrir dan bann langaz ki bokou dimoun ti koze sa letan. Zeova ti promet ki dan letan lafen, “sa vre konnesans” ki ganny trouve dan Labib ti pou “vin annabondans.” En kantite dimoun ti pou ganny sa vre konnesans. (Dan. 12:4) En fason ki sa vre konnesans in vin annabondans i atraver Labib ek bann piblikasyon baze lo Labib ki’n ganny tradwir, pibliye e distribye avek en kantite dimoun. Ziska aprezan, pep Zeova in tradwir Labib an antye ouswa an parti dan plis ki 240 langaz e nenport dimoun i kapab ganny en kopi pour nanryen. Sa i fer ki dimoun partou lo later pe aprann konsernan sa “bon nouvel Rwayonm” avan lafen i arive. (Mat. 24:14) Nou Bondye ki annan lazistis i anvi donn otan dimoun posib sa loportinite pour aprann konn li par lir son Parol. Sa i akoz i kontan nou en kantite. w23.02 5 ¶11-12

Eski ou kontan ladrwatir? San dout, ou kontan sa kalite. Me nou tou nou enparfe e si nou pa fer atansyon nou kapab ganny enfliyanse avek lafason ki dimoun dan lemonn i konsider ladrwatir. (Iza. 5:20) En kantite dimoun i mazinen ki en dimoun ki drwat i arogan, i kritik lezot ouswa i krwar ki i pli siperyer ki lezot. Me Bondye pa kontan sa bann kalite. Ler Zezi ti lo later, i ti dir bann sef relizye dan son letan ki zot ti pe mal fer parski zot ti met zot prop standar konsernan kwa ki byen e kwa ki mal. (Ekle. 7:16; Lik 16:15) En dimoun ki fer sa ki Zeova i dir i byen, pa zanmen krwar ki i pli siperyer ki lezot dimoun. Ladrwatir i en zoli kalite. I vedir fer sa ki Zeova i dir i drwat. Dan Labib, sa bann mo ki ganny tradwir “ladrwatir” i donn sa nide ki en dimoun pe viv dapre sa pli o standar, setadir bann standar Zeova. w22.08 27 ¶3-5

Zezi ti annan konfyans dan son bann disip menm si zot ti fer fot. (Zan 15:16) Ler Zak ek Zan ti demann Zezi en pozisyon spesyal dan Rwayonm, Zezi pa ti krwar ki zot ti pe servi Zeova pour bann move rezon oubyen i pa ti tir zot konman bann zapot. (Mark 10:​35-40) Pli tar ler Zezi ti ganny arete, tou son bann disip ti abandonn li. (Mat. 26:56) Me Zezi pa ti perdi konfyans dan zot. I ti konnen ki zot enparfe me kantmenm sa, i ti “kontinyen kontan zot ziska lafen.” (Zan 13:1) Apre ki Zezi ti resisite, i ti donn son 11 zapot fidel sa responsabilite enportan pour diriz sa travay predikasyon e pour pran swen avek son bann mouton presye. (Mat. 28:​19, 20; Zan 21:​15-17) I ti annan bon rezon pour annan konfyans dan sa bann zonm enparfe. Zot tou zot ti desarz zot responsabilite fidelman ziska ler zot ti mor. Zezi ti demontre konfyans dan bann imen enparfe e sa i en bon legzanp pour nou. w22.09 6 ¶12

Ler nou asire ki Zeova i kontan nou e ki i dan nou kote, Satan pa pou fer nou per. Annou vwar en legzanp. Ekriven Psonm 118 ti fer fas avek bann problenm ki ti fatig li. I ti annan en kantite lennmi e serten ti bann dimoun enportan (verse 9, 10). Parfwa i ti anba en kantite presyon (verse 13). Zeova ti osi disiplin li severman (verse 18). Me kantmenm sa, sa psalmis ti sante e dir: “Mon pa pou per.” I ti konnen ki menm si Zeova ti’n disiplin li, son Papa ki dan lesyel ti kontan li. Sa psalmis ti asire ki nenport sityasyon ki i fer fas avek, son Bondye ki kontan li pou toultan pare pour ed li. (Ps. 118:29) Nou bezwen asire ki Zeova i kontan nou. Sa pou ed nou sirmont trwa lafreyer ki bokou dimoun i annan. Sa i, (1) sa lafreyer ki nou pa pou kapab pran swen avek nou fanmir, (2) lafreyer zonm e (3) ler nou per lanmor. w22.06 15 ¶3-4

Nou bezwen fer sir ki ou met ladorasyon Zeova premye dan nou lavi. Konman nou Kreater, Zeova i merite ki nou ador li. (Rev. 4:11; 14:​6, 7) Alor sa keksoz pli enportan dan nou lavi i ki nou devret ador Zeova lafason ki i anvi nou ador li, setadir “an armoni avek lespri sen ek laverite.” (Zan 4:​23, 24) Pour nou ador Zeova an armoni avek laverite ki dan son Parol, nou bezwen gidans lespri sen. Nou ladorasyon i devret premye dan nou lavi menm si nou reste dan en pei kot nou travay i anba restriksyon oubyen i ganny enterdi. Ozordi, i annan plis ki 100 nou bann frer ek ser ki dan prizon zis akoz zot Temwen Zeova. Kantmenm sa, zot fer tou sa ki zot kapab pour priye, etidye e koz avek lezot lo Bondye ek son Rwayonm. Ler dimoun i kritik ouswa persekit nou, nou kontan parski Zeova i ed nou pour andire e i pou rekonpans nou.—1 Pyer 4:14. w22.10 9 ¶13

Dan liv Proverb, Zeova in donn nou bann konsey ki pou amelyor nou lavi si nou aplik li. Annou vwar zis de sa bann konsey. Premyerman, kontant ou avek sa ki ou annan. Proverb 23:​4, 5 i dir: “Pa rente pour ganny larises. . . . akoz vreman i pou ganny lezel parey en leg e i pou anvole dan lesyel.” Me kantmenm sa, bann dimoun ris konman pov i konsantre lo zis fer larzan. Sa i fer ki zot in gat zot repitasyon, gat zot lanmitye avek lezot e menm afekte zot prop lasante. (Prov. 28:20; 1 Tim. 6:​9, 10) Dezyenmman, reflesir avan ou koze. Si nou pa fer atansyon, sa ki nou dir i kapab fer en kantite ditor. Proverb 12:18 i dir: “Bann parol san reflesir i parey bann kou lepe, me lalang en dimoun saz i en gerizon.” Nou ede gard lape ler nou evite koz lo defo lezot.—Prov. 20:19. w22.10 21 ¶14; 22 ¶16-17

Ezekyel ti bezwen konpran byen sa mesaz ki i ti pe al anonse. I ti bezwen krwar sa mesaz pour ki sa i motiv li pour anons sa mesaz. Apre, en keksoz ekstraordiner ti arive. Ezekyel ti realize ki sa roulo “ti dou parey dimyel.” (Ezek. 3:3) Akoz sa? Parski Ezekyel ti vwar sa loner pour reprezant Zeova konman en bon leksperyans. (Ps. 19:​8-11) I ti rekonesan ki Zeova ti’n swazir li pour servi konman son profet. Pli tar, Zeova ti dir Ezekyel: “Pran a ker e ekout tou sa ki mon dir ou.” (Ezek. 3:10) Ler Zeova ti donn Ezekyel sa bann lenstriksyon, i ti pe dir ki Ezekyel i bezwen gard sa ki’n ganny ekrir dan sa roulo dan son lespri e medit lo la. Ler Ezekyel ti fer sa, son lafwa ti vin pli for e i ti konn sa mesaz ki i ti bezwen anons avek sa pep. (Ezek. 3:11) Ler Ezekyel ti konpran byen sa mesaz e krwar dan sa mesaz, i ti pare pour konmans anons sa mesaz e kontinyen ziska ki i fini sa travay ki Bondye ti’n donn li. w22.11 6 ¶12-14

Ki ou kapab fer si ou vwar li difisil pour reste fidel avek Zeova ler i annan en sanzman dan son lorganizasyon? Siport sanzman ki lorganizasyon Zeova i fer. Pandan ki bann Izraelit ti dan dezer, bann Koatit ti al par devan tou dimoun pour anmenn lars lalyans. (Nom. 3:​29, 31; 10:33; Zoz. 3:​2-4) Sa ti en gran privilez! Me ler bann Izraelit ti etabli zot dan Later Promiz, keksoz ti sanze pour zot. Lars lalyans pa ti bezwen ganny deplase regilyerman. Alor bann Koatit ti travay dan bann stor. (1 Kron. 6:​31-33; 26:​1, 24) Labib pa dir ki bann Koatit ti konplent oubyen demande ki zot ganny bann responsabilite pli enportan vi ki zot ti annan en responsabilite spesyal avan. Ki leson nou aprann? Siport bann sanzman ki lorganizasyon Zeova i fer, enkli okenn sanzman ki annan en lefe lo ou servis. Trouv lazwa dan nenport responsabilite ki ou gannyen. Gard antet ki i pa ou responsabilite ki fer ou presye pour Zeova. Zeova i apresye ou parski ou obei li. w22.11 23 ¶10-11

Onezifor ti rod Zapot Pol e ler i ti trouv li, i ti esey ed li ganny sa ki i bezwen. Ler Onezifor ti fer sa, i ti pe met son prop lavi an danze. Ki leson nou aprann? Nou pa devret les lafreyer pour zonm anpes nou siport nou bann frer ki pe ganny persekite. O kontrer, annou fer tou sa ki nou kapab pour ed zot. (Prov. 17:17) Zot bezwen santi ki nou kontan zot e zot bezwen nou sipor. Annou vwar ki mannyer bann frer ek ser Larisi in ed zot bann frer ek ser ki’n ganny met dan prizon. Ler serten frer ek ser i ganny anmennen ankour, lezot frer ek ser i vin ankour pour siport zot. Ki leson nou aprann? Ler dimoun i koz mansonz lo bann frer ki pe dirize dan kongregasyon, ler sa bann frer i ganny arete oubyen persekite, pa bezwen per. Priy pour sa bann frer, pran swen avek zot fanmir e rod lezot fason pour montre ki ou pe siport zot.—Akt 12:5; 2 Kor. 1:​10, 11. w22.11 17 ¶11-12

Bann ansyen i annan sa responsabilite pour donn bann frer ek ser lankourazman sorti dan Labib e pour ed bann ki dezespere. (1 Pyer 5:2) Ler i annan en dezas, bann ansyen i devret premyerman fer sir ki tou bann frer ek ser i sen e sof, zot annan manze, lenz ek en landrwa reste. Pour plizyer mwan apre, i tre probab ki bann frer ek ser pou ankor bezwen led spirityel ek emosyonnel. (Zan 21:15) En frer ki apel Harold, ki servi lo en Komite Biro Brans Temwen Zeova e ki’n zwenn avek plizyer frer ek ser ki’n ganny afekte avek bann dezas, i dir: “I pran letan pour en dimoun refer. Menm si zot lavi i retourn normal, i kapab ki zot ankor mazin en dimoun ki zot kontan ki’n mor, en keksoz ki annan bokou valer pour zot oubyen zot ankor mazin sa sityasyon difisil ki zot ti ladan. Sa bann souvenir i kapab fer zot sagren. Sa pa vedir ki zot mank lafwa me i zis en reaksyon normal.” Bann ansyen i aplik sa konsey pour “plere avek bann ki plere.”—Rom. 12:15. w22.12 22 ¶1; 24-25 ¶10-11

Zeova i donn nou son lespri sen pour ed nou reisi fer sa ki drwat. Ler nou etidye Parol Bondye, nou pe les nou ganny gide par lespri sen. Nou osi ganny lespri sen ler nou asiste renyon. Dan sa bann renyon, nou kapab pas letan avek bann frer ek ser ki pe travay dir pour fer sa ki byen parey nou. Sa i vreman ankourazan. (Ebr. 10:​24, 25; 13:7) Ler nou koz avek Zeova dan lapriyer e nou sipliy li pour ed nou fer fas avek nou bann febles, i pou donn nou son lespri sen pour nou annan lafors pour kontinyen lalit. Menm si sa bann aktivite pa pou fer nou aret annan bann move dezir, zot pou ed nou reziste sa bann dezir. Enn fwa ki nou’n konmans fer bann keksoz ki pou ed nou annan en bon lanmitye avek Zeova, i enportan ki nou kontinyen fer sa bann keksoz e kontinyen fer sa ki byen. w23.01 11 ¶13-14

Menm si Labib pa en liv ki koz lo ki mannyer pour pran swen avek nou lasante e i pa dir nou ki nou devret manze, Labib i ed nou konn pwennvi Zeova konsernan sa bann keksoz. Par egzanp, Zeova i demann nou pour “rezet sa ki koz ditor” pour ki nou pa fer dimal nou prop lekor. (Ekle. 11:10) Labib i dir ki nou pa devret manz tro bokou oubyen bwar tro bokou lalkol. Sa bann keksoz i kapab afekte nou lasante e menm touy nou. (Prov. 23:20) Zeova i ekspekte ki nou annan kontrol lo nou lekor ler nou pe deside ki nou pou manze e bwar e ki kantite nou pou manze e bwar. (1 Kor.9:25) Ler nou servi nou abilite pour reflesir, nou kapab fer bann desizyon ki montre ki nou apresye ki Bondye in donn nou lavi. (Ps. 119:​99, 100; Prov. 2:11) Par egzanp, nou fer bann bon desizyon konsernan sa ki nou manze. Si en manze ki nou kontan i fer nou malad, nou pa pou manz sa manze. Nou osi montre ki nou saz ler nou fer sir ki nou annan ase letan pour dormi, ler nou fer legzersis regilyerman e ler nou gard nou lekor ek nou lakour prop. w23.02 21 ¶6-7

Ki mannyer ou kapab trouv bann trezor spirityel ler ou pe lir Labib? Annou vwar sa ki 2 Timote 3:​16, 17 i dir. Sa verse i dir: “Tou Lekritir i . . . itil” pour (1) ansennyen, (2) reprimande, (3) remet keksoz drwat e (4) pour disiplinen. Ou kapab ganny sa kat byenfe menm ler ou pe lir bann liv Labib ki ou pa lir souvan. Ler ou pe lir Labib, port latansyon pour ou vwar ki sa resi i kapab ansenny ou konsernan Zeova, konsernan son plan oubyen konsernan son bann prensip ki dan Labib. Vwar ki mannyer sa resi i itil pour reprimande. Pour fer sa, ou kapab vwar ki mannyer sa bann verse i ed ou idantifye e rezet bann move dezir ek latitid e osi pour reste fidel avek Zeova. Reflesir lo ki mannyer ou kapab servi sa resi pour remet keksoz drwat oubyen pour koriz en move pwennvi, petet pwennvi en dimoun dan teritwar. Rode ki mannyer sa verse i kapab disiplin ou setadir ed ou pour annan menm fason panse avek Zeova. Ler ou gard antet sa kat fason ki Labib i ed ou, sa pou ed ou trouv bann trezor spirityel ki pou ed ou ganny plis byenfe atraver ou lektir Labib. w23.02 11 ¶11

En profesi dan liv Danyel ti predir ki Zezi ti pou vin Lerwa dan sa Rwayonm a lafen en peryod letan ki Labib i apel set letan. Eski i posib pour konnen kan ki Zezi ti vin Lerwa? (Dan. 4:​10-17) Sa “set letan” i reprezant 2,520 lannen. Sa ti konmans an 607 avan Kris ler bann Babilonnyen ti tir dernyen lerwa lo tronn Zeova ki ti Zerizalenm. I ti fini an 1914 ler Zeova ti fer Zezi, “sa enn ki annan drwa legal” vin Lerwa dan Rwayonm Bondye. (Ezek. 21:​25-27) Ki byenfe nou gannyen? Ler nou konpran sa profesi konsernan sa “set letan,” sa i asir nou ki Zeova i akonpli son bann promes dan sa bon moman. Zis parey Zeova ti fer Zezi vin Lerwa dan sa moman ki i’n deside, Zeova pou osi fer sir ki bann lezot profesi i ganny akonplir dan sa moman ki i’n deside. Alor nou kapab asire ki zour Zeova “pa pou an retar!”—Aba. 2:3. w22.07 3 ¶3-5