Mateo
6 «Cʌntan laʼ bʌ chaʼan maʼañic mi laʼ mel chuqui toj tiʼ wut lac piʼʌlob chaʼan jach mi laʼ qʼuejlel. Mi cheʼ mi laʼ mel bajcheʼ jiñi maʼañic mi caj laʼ taj laʼ chobejtʌbal tiʼ tojlel laʼ Tat am bʌ ti panchan. 2 Cheʼ bʌ maʼ coltan juntiquil a piʼʌl* mach a wus majlel trompeta yaʼ ti sinagoga yicʼot ti calle tac chaʼan miʼ qʼueletob ti ñuc cheʼ bajcheʼ miʼ melob jiñi poj chʼujul bʌ miʼ melob i bʌ. Mic subeñetla chaʼan tsaʼix i tajayob pejtelel i chobejtʌbal. 3 Pero cheʼ bʌ jatet an majqui maʼ coltan, jiñi tsʼej bʌ a cʼʌb mach yomic miʼ ñaʼtan tsaʼ bʌ i mele jiñi a ñoj, 4 cheʼ bajcheʼ jiñi, jiñi coltaya tsaʼ bʌ a wʌcʼʌ mucul jach mi caj i cʌytʌl. I jiñi a Tat woli bʌ i mucul qʼuelet mi caj i tojbeñet».
5 «Cheʼ jaʼel, cheʼ bʌ mi laʼ chaʼlen oración, mach laʼ mel cheʼ bajcheʼ jiñi poj chʼujul bʌ miʼ melob i bʌ. Waʼalob miʼ mulañob i mel oración yaʼ ti sinagoga tac yicʼot tiʼ xujc tac colem bij chaʼan miʼ qʼuejlelob. Mic subeñetla chaʼan tsaʼix i tajayob pejtelel i chobejtʌbal. 6 Pero cheʼ bʌ jatet mi caj a mel oración, ochen ti a cuarto, i cheʼ bʌ tsaʼix a ñupʼu, pejcan jiñi a Tat mucul jach bʌ an. I jiñi a Tat woli bʌ i mucul qʼuelet mi caj i tojbeñet. 7 Cheʼ bʌ maʼ chaʼlen oración, mach jin jach bʌ tʼan yom maʼ chʌcʌ al cheʼ bajcheʼ miʼ melob jiñi chʼoyoloʼ bʌ ti yambʌ tejclum, muʼ bʌ i ñaʼtañob chaʼan mi caj i ñʌchʼtʌntelob cheʼ miʼ cʼʌñob cabʌl tʼan tac. 8 Mach yomic cheʼetla bajcheʼob. Jiñi laʼ Tat yujilix chuqui i cʼʌjñibal laʼ chaʼan anquese maxto laʼ cʼajtibe».
9 «Cheʼ yom mi laʼ chaʼlen oración bajcheʼ ili:
‹C Tat lojon añet bʌ ti panchan, laʼ sʌqʼuesʌntic* a cʼabaʼ. 10 Laʼ tilic a Yumʌntel. Laʼ mejlic chuqui a wom wʌʼ ti lum cheʼ bajcheʼ yaʼ ti panchan. 11 Aqʼueñon lojon i bʌl lon c ñʌcʼ* chaʼan ili qʼuin 12 yicʼot ñusʌbeñon lon c mul cheʼ bajcheʼ tsaʼ lon c ñusʌbe i mul lon c piʼʌlob. 13 I mach a wʌcʼon lon ti yajlel* cheʼ bʌ mij qʼuelbentel lon c pusicʼal, locʼsañon lojon* tiʼ cʼʌb jiñi Satanás›».*
14 «Mi mucʼʌch laʼ ñusʌben i mul yambʌlob, jiñi laʼ Tat am bʌ ti panchan mi caj i ñusʌbeñetla laʼ mul jaʼel. 15 Pero mi maʼañic mi laʼ ñusʌben i mul yambʌlob, jiñi laʼ Tat maʼañic mi caj i ñusʌbeñetla laʼ mul jaʼel».
16 «Cheʼ bʌ mi laʼ chaʼlen chʼajb, mach yomic chʼijyemtic mi laʼ pʌs laʼ wut, cheʼ bajcheʼ miʼ melob jiñi poj chʼujul bʌ miʼ melob i bʌ come miʼ yʌñob i ñiʼ i wut chaʼan miʼ qʼuejlelob chaʼan woliyob ti chʼajb. Mic subeñetla chaʼan tsaʼix i tajayob pejtelel i chobejtʌbal. 17 Pero cheʼ bʌ jatet maʼ chaʼlen chʼajb, aqʼuen a bʌ xojocña bʌ aceite ti a jol yicʼot poco a wut 18 chaʼan jiñi yambʌlob maʼañic miʼ qʼuelob chaʼan woliyet ti chʼajb, cojach jiñi a Tat mucul jach bʌ an. I jiñi a Tat woli bʌ i mucul qʼuelet mi caj i tojbeñet».
19 «Cʌyʌ laʼ tempan laʼ chubʌʼan wʌʼ ti pañimil, baqui miʼ jilel ti i jochʼil, miʼ taʼʌyel yicʼot miʼ yochel xujchʼob. 20 Tempan laʼ chubʌʼan yaʼ ti panchan, yaʼ baqui maʼañic miʼ jilel ti i jochʼil, maʼañic miʼ taʼʌyel yicʼot maʼañic miʼ yochel xujchʼob. 21 Come yaʼʌch mi caj i yajñel a pusicʼal yaʼ baqui an a chubʌʼan».
22 «Jiñi lac wut lajalʌch bajcheʼ i sʌclel lac bʌcʼtal. Mi junsujm jach baqui an jiñi a wut, laj sʌc jaman mi caj i yajñel a bʌcʼtal.* 23 Pero mi an jontolil ti a wut,* laj icʼyochʼan mi caj i yajñel jiñi a bʌcʼtal. Mi jiñi sʌclel am bʌ ti a tojlel jiñʌch icʼyochʼañiyel, ¡wen ñucʌch jiñi icʼyochʼañiyel ti a tojlel!».
24 «Maʼañic majch miʼ mejlel i melben i yeʼtel chaʼtiquil i yum come mi caj i tsʼaʼlen juntiquil i mi caj i cʼuxbin jiñi yambʌ, o xucʼul mi caj i yajñel ti juntiquil i mi caj i cʌy jiñi yambʌ. Maʼañic miʼ mejlel laʼ chʼujutesan Dios yicʼot laʼ sʌclan Chubʌʼañʌl tac».
25 «Jin chaʼan mic subeñetla: Cʌyʌ laʼ cʼojoʼtan* laʼ cuxtʌlel chaʼan chuqui mi caj laʼ jap yicʼot laʼ cʼux o chaʼan laʼ bʌcʼtal chaʼan chuqui mi caj laʼ lʌp. ¿Mach ba ñumen añic i cʼʌjñibal jiñi laʼ cuxtʌlel bajcheʼ jiñi bʌlñʌcʼʌl i jiñi laʼ bʌcʼtal bajcheʼ jiñi laʼ pislel? 26 Wen qʼuelela jiñi xmateʼmut am bʌ ti panchan. Maʼañic miʼ chaʼleñob pacʼ yicʼot maʼañic miʼ lotob i bucʼbal tiʼ yotlel, pero jiñi laʼ Tat am bʌ ti panchan miʼ bucʼsañob. ¿Mach ba ñumen añic laʼ cʼʌjñibal jatetla? 27 ¿Majqui miʼ mejlel i tsʼitaʼ tamʼesan* i cuxtʌlel tiʼ caj miʼ cʼojoʼtan i bʌ? 28 Cheʼ jaʼel, ¿chucoch mi laʼ cʼojoʼtan laʼ pislel? Cʌñʌla ti jiñi ñichteʼ tac muʼ bʌ i colel ti jamil. Maʼañic miʼ chaʼleñob tsʌts bʌ eʼtel yicʼot tsʼisoñel, 29 pero mic subeñetla chaʼan anquese Salomón wen an i ñuclel maʼañic tsiʼ lʌpʌ utsʼatax bʌ i pislel bajcheʼ jiñi. 30 Jin chaʼan, mi Dios miʼ chʼʌl jiñi ñichteʼ tac yicʼot jamil cuxul bʌ wʌle i tiʼ yijcʼʌlel miʼ chojquel ochel ti cʼajc, ¿mach ba añic mi caj i yʌqʼueñetla laʼ pislel jatetla mach bʌ añic mi laʼ wen ñop? 31 Jin chaʼan, maʼañic baʼ ora yom mi laʼ cʼojoʼtan laʼ bʌ yicʼot mach laʼ wʌl: ‹¿Chuqui mi caj laj cʼux?›, ‹¿Chuqui mi caj lac jap?›, o ‹¿Chuqui mi caj lac lʌp?›. 32 Jiñi mach bʌ i cʌñʌyobic Dios* jiñʌch muʼ bʌ i chaʼleñob wersa i sʌclañob pejtelel iliyi. Jiñi laʼ Tat am bʌ ti panchan yujil chaʼan i cʼʌjñibal tacʌch laʼ chaʼan iliyi».
33 «Jin chaʼan, chʌn sʌclanla ti ñaxan jiñi Yumʌntel yicʼot chuqui toj* tiʼ wut Dios, cheʼ jiñi mi caj laʼ wʌqʼuentel jaʼel pejtelel ili yan tac bʌ. 34 Mach laʼ cʼojoʼtan chuqui mi caj i yujtel ijcʼʌl come yambʌyix chuqui mi caj laʼ cʼojoʼtan. Jasʌl jach jiñi wocol tac am bʌ ti jujumpʼejl qʼuin».