Dɔwɔwɔwo
15 Azɔ ame aɖewo tso Yudea va eye wole nu fiam nɔviawo be: “Ne wometso aʋa na mi le Mose ƒe kɔa nu+ o la, miate ŋu akpɔ ɖeɖe o.” 2 Ke esi esia na nyaʋiʋli kple nyahehe ɖo wo kpakple Paulo kple Barnaba dome vevie ta la, wowɔ ɖoɖo be Paulo kple Barnaba kpakple ameawo dometɔ aɖewo nayi apostoloawo kple hamemetsitsiawo gbɔ le Yerusalem+ le nya* sia ta.
3 Esi hame la ɖo wo ɖa vie vɔ la, ŋutsu siawo yi mɔzɔzɔa dzi to Foinike kple Samaria, eye wogblɔ dukɔwo me tɔwo ƒe dzimetɔtrɔ ŋu nya na nɔviawo tsitotsito si na dzi dzɔ nɔviawo ŋutɔ. 4 Esi wova ɖo Yerusalem la, hame la kple apostoloawo kpakple hamemetsitsiawo xɔ wo nyuie, eye wogblɔ nu geɖe siwo Mawu wɔ to wo dzi la na wo. 5 Gake ame siwo nye Farisitɔwo ƒe kɔmama me tɔwo tsã, eye wova zu xɔsetɔwo la, dometɔ aɖewo tso le woƒe ziwo dzi gblɔ be: “Ehiã be woatso aʋa na wo, eye woade se na wo be woawɔ Mose ƒe Se la dzi.”+
6 Eya ta apostoloawo kple hamemetsitsiawo va kpe ta be yewoalé nya sia kpɔ. 7 Ke esi wodzro nya la me* ʋuu la, Petro tso hegblɔ na wo be: “Nɔvinyeŋutsuwo, mienyae nyuie be tso gɔmedzedzea me ke la, Mawu tiam le mia dome be dukɔwo me tɔwo nase nya nyui la tso nunye ne woaxɔe ase.+ 8 Eye Mawu, ame si nya dziwo me+ la, ɖi ɖase esi wòna gbɔgbɔ kɔkɔe wo,+ abe ale si wòna míawo hã ene. 9 Eye mede vovototo aɖeke mía kpli wo dome kura o,+ ke boŋ ekɔ woƒe dzi ŋu to xɔse me.+ 10 Ekema nu ka tae miele Mawu dom kpɔ fifia be miatsɔ kɔkuti+ si mía kple mía tɔgbuiwo siaa míete ŋu tsɔ o la aku kɔ na nusrɔ̃laawo?+ 11 Ke boŋ míexɔe se be míakpɔ ɖeɖe to mía Aƒetɔ Yesu ƒe amenuveve la dzi,+ eye nenema kee wòle le woawo hã gome.”+
12 Ale ameha blibo la zi ɖoɖoe, eye woɖo to se ale si Barnaba kple Paulo gblɔ dzesi kple nukunu geɖe siwo Mawu wɔ to wo dzi le dukɔwo dome la ŋuti nya. 13 Esi woƒo nu vɔ la, Yakobo gblɔ be: “Nɔvinyeŋutsuwo, miɖo tom. 14 Simeon+ gblɔe eme kɔ nyuie, ale si Mawu trɔ susu ɖe dukɔwo ŋu zi gbãtɔ, be yeaɖe amewo tso wo dome hena yeƒe ŋkɔ la.+ 15 Eye Nyagblɔɖilawo ƒe nyawo wɔ ɖeka kple esia, abe ale si tututu woŋlɔe ɖi ene be: 16 ‘Le nu siawo megbe la, matrɔ ava, eye mafɔ David ƒe agbadɔ* si mu la ɖe te; magbugbɔ aɖɔ eƒe gbagbãƒewo ɖo, eye magafɔe ɖe tsitrenu, 17 ale be ame siwo susɔ la kple dukɔwo me tɔwo katã, ame siwo ŋu woyɔ nye ŋkɔ ɖo la, nadi Yehowa* vevie, Yehowa,* ame si le nu siawo wɔm, lae gblɔe;+ 18 nu siawo le nyanya tso keke blema ke.’+ 19 Eya ta nu si mekpɔe nye be,* míagaɖe fu na dukɔwo me tɔ siwo le tɔtrɔm ɖe Mawu ŋu la o,+ 20 ke boŋ míaŋlɔ na wo be woatsri nu siwo trɔ̃wo ƒo ɖii,+ kple gbɔdɔdɔ manɔsenu,*+ kple lã tsiʋumewo* kpakple ʋu.+ 21 Elabena tso blema ke la, amewo ɖea gbeƒã Mose ƒe sewo le du sia du me, elabena woxlẽnɛ wosena le ƒuƒoƒewo le sabat sia sabat dzi.”+
22 Ale apostoloawo kple hamemetsitsiawo kpakple hame blibo la katã tso nya me be yewoatia ame aɖewo tso yewo dome akpe ɖe Paulo kple Barnaba ŋu aɖo ɖe Antiokia; ame siawoe nye Yuda si wogayɔna be Barsaba kple Sila,+ siwo nye ŋgɔxɔlawo le nɔviawo dome. 23 Eye woŋlɔ nya siawo de wo si be:
“Apostoloawo kple hamemetsitsiawo, siwo nye mia nɔviwo, le agbalẽ sia ŋlɔm na mi nɔvi siwo nye dukɔwo me tɔ siwo le Antiokia+ kple Siria kpakple Kilikia: Míedo gbe na mi! 24 Esi míese be ame aɖewo tso mía dome tsɔ nya aɖewo va tɔtɔ mi,+ eye wodi be yewoagblẽ mia dome,* evɔ míena mɔfiame aɖeke wo hafi o ta la, 25 mí katã míelɔ̃ ɖe edzi be míatia ŋutsu aɖewo akpe ɖe míaƒe lɔlɔ̃tɔ Barnaba kple Paulo ŋu aɖo ɖe mi, 26 ame siwo tsɔ woƒe agbe* na ɖe mía Aƒetɔ Yesu Kristo ƒe ŋkɔ la ta.+ 27 Azɔ hã míele Yuda kple Sila dɔm ɖe mia gbɔ, be woawo hã woagblɔ nya mawo ke na mi kple nu.+ 28 Elabena enyo gbɔgbɔ kɔkɔe la+ kple míawo ŋutɔwo hã ŋu be, míagatsɔ agba bubu aɖeke akpee na mi wu nu vevi siawo ko o: 29 be miatsri nu siwo wotsɔ sa vɔ na trɔ̃wo,+ kple ʋu+ kple lã tsiʋumewo*+ kpakple gbɔdɔdɔ manɔsenu.*+ Ne miete mia ɖokui ɖa kura tso nu siawo ŋu la, ekema eme anyo na mi. Minɔ anyi nyuie!”
30 Esi wodo mɔ ŋutsu siawo la, woyi Antiokia, eye woƒo ha la me tɔwo katã nu ƒu hetsɔ agbalẽ la na wo. 31 Esi woxlẽe la, wokpɔ dzidzɔ le dzideƒonamenya sia ta. 32 Eye esi Yuda kple Sila nye nyagblɔɖilawo ta la, woƒo nuƒo geɖe tsɔ de dzi ƒo na nɔviawo, eye wodo ŋusẽ wo.+ 33 Esi wonɔ afi ma vie la, nɔviawo do mɔ wo le ŋutifafa me be woatrɔ ayi ame siwo dɔ wo ɖa la gbɔ. 34 * —— 35 Ke Paulo kple Barnaba nɔ Antiokia vie le nu fiam, eye wo kple ame bubu geɖewo le Yehowa* ƒe nya la ŋuti nya nyui la gblɔm.
36 Le ŋkeke aɖewo megbe la, Paulo gblɔ na Barnaba be: “Azɔ na míatrɔ ayi* aɖakpɔ nɔviawo ɖa le du sia du si me míeɖe gbeƒã Yehowa* ƒe nya le la me, ne míakpɔ ale si wole ɖa.”+ 37 Barnaba ɖoe kplikpaa be yewoakplɔ Yohanes si wogayɔna be Marko hã ɖe asi.+ 38 Ke Paulo ya meda asi ɖe edzi be yewoakplɔe ɖe asi o, elabena etrɔ le wo yome le Pamfilia, eye meyi ɖawɔ dɔ kpli wo o.+ 39 Esia na wodo dɔmedzoe ɖe wo nɔewo ŋu vevie, ale be woma tso wo nɔewo gbɔ; ale Barnaba+ kplɔ Marko, eye woɖo tɔdziʋu yi Kipro. 40 Paulo ya tia Sila, eye esi nɔviawo bia Yehowa* ƒe amenuveve na wo vɔ la, wodze mɔ.+ 41 Ke eyi ɖato Siria kple Kilikia hele ŋusẽ dom hameawo.