Àte Ŋu Atia Wò Etsɔme

BLEMATOMENUKULA Joan Oates gblɔ be togbɔ be wobua afakaka be enye “nuwɔna deŋgɔ si ɖe ame ƒe nunya fia le blema xexea katã me” hã la, enye “aɖaŋu si Hebri-nyagblɔɖilawo do vloe.” Nukatae?

Togbɔ be dukɔ siwo ƒo xlã blema Israel-viwo xɔ dzɔgbese dzi se hã la, wogbe dzixɔse si nye be gbɔgbɔ manyatalenu aɖee kpɔa ŋusẽ ɖe yewoƒe agbenɔnɔ dzi. Mawu gblɔ le mɔfiame siwo wòna dukɔa me be: “Ame aɖeke meganɔ dowòme [anye] bokɔnɔ, goloɖola, zidoedola kple adzetɔ . . . kple nukala . . . o.”​—Mose V, 18:​10, 11.

Esi Israel-viwo mexɔ dzɔgbese dzi se alo yia afakalawo gbɔ o ta la, kakaɖedzi ate ŋu anɔ wo si ɖe etsɔme ŋu. Esi Franse Katolikotɔwo ƒe numekugbalẽ si woyɔna be Théo nɔ nusitae me ɖem la, egblɔ be dukɔa xɔe se be “amegbetɔwo kple xexeame menye nusi le gbɔgbɔ makpɔmakpɔ aɖe si me wòle zazãm alesi dze eŋu o. Tameɖoɖo le Mawu si na amegbetɔwo.” Nukae nye tameɖoɖo sia?

Dzɔgbese Kple Tiatiawɔblɔɖe

Mawu do ŋugbe na Israel-viwo be woakpɔ ŋutifafa eye nu adze edzi na wo ne wowɔ ɖe yeƒe sewo dzi. (Mose III, 26:​3-⁠6) Tsɔ kpe ɖe eŋu la, wonɔ mɔ kpɔm na Mesia aɖe si aɖo nɔnɔme dzɔdzɔewo anyi le anyigba dzi. ( Yesaya, ta 11) Gake nyateƒe si wònye be Mawu do nusiawo ƒe ŋugbe mefia be amewo anɔ anyi naneke mawɔmawɔe ko nusiawo nava eme na wo o. Ke boŋ wogblɔ na wo be: “Nusianu, si wò asi ate ŋu awɔ la, wɔe kple wò ŋusẽ.”​—Nyagblɔla 9:⁠10.

Nu vevi si dze le nya sia mee nye tiatiawɔblɔɖe. Ablɔɖe nɔ Israel-viwo si be woasubɔ Mawu eye woana woƒe etsɔme nanyo. Mawu do ŋugbe na wo be: “Ne mielé to ɖe se, siwo mede na mi egbe ŋu pɛpɛpɛ, eye mielɔ̃ Yehowa, mia Mawu la, eye miesubɔe tso dzi blibo kple luʋɔ blibo me la, ekema mana ada kple kele nadza ɖe miaƒe anyigba dzi le edzaɣi, eye àƒo bli, wein kple ami nu ƒu.” (Mose V, 11:​13, 14) Mawu yraa Israel-viwo ne woɖo toe.

Do ŋgɔ teti na Israel-viwo ƒe gege ɖe anyigba si ƒe ŋugbe Mawu do na wo dzi la, etsɔ nu eve ɖo wo ŋkume be woatsɔ ɖeka: “Kpɔ ɖa, metsɔ agbe kple dzɔgbenyuie, ku kple dzɔgbevɔ̃e ɖo ŋkuwò me egbe.” (Mose V, 30:​15) Amesiame ƒe etsɔme nɔ te ɖe eya ŋutɔ ƒe nuwɔnawo kple nyametsotsowo dzi. Ne woɖo to Mawu la, ekema agbe kple yayra ado tso eme na wo, gake tomaɖomaɖo ana woakpe fu. Ke egbea ya ɖe?

Nuwɔna Kple Emetsonu

Woɖo dzɔdzɔmese geɖe siwo kpɔa ŋusẽ ɖe mía dzi la ɖi ɖe míaƒe nyonyo ta. Wo dometɔ ɖekae nye nuwɔna kple emetsonu ƒe sea, alo abe alesi Biblia la gblɔe ene be, “Nusi ke ame ƒãna la, esia ke wòaŋe.” (Galatiatɔwo 6:⁠7) Ne míede dzesi gɔmeɖose sia la, anɔ bɔbɔe be míabu nanewo siwo ate ŋu adzɔ le etsɔme ŋu.

Ne míeku ʋu sesĩe nuŋumabumabutɔe la, anɔ bɔbɔe be míakpɔ afɔku tsɔ wu ne míekui le ŋuɖɔɖo me. Ne míeno atama la, anɔ bɔbɔe be míaxɔ kansa, tsɔ wu ne míenoe o. Enye nyateƒe be ƒã hafi nanewo abe ŋɔdzidonamelawo ƒe amedzidzedze siwo ŋu míeƒo nu tsoe le nyati siawo dometɔ gbãtɔ me ene nadzɔ ɖe mía dzi, eye viɖe aɖeke manɔ alesi wòate ŋu adzɔe ŋu bubu ŋu o. Gake maɖe vi aɖeke be míaku ɖe dzɔgbese dzixɔsea ŋu o. Meɖea nusiwo adzɔ fifia alo le etsɔme fiaa mí o. Aʋatso dzixɔxɔse mena kakaɖedzi ŋutɔŋutɔ aɖeke sua ame si ɖe etsɔme ŋu o. Eye nenema kee nye ebubu be Mawu gbɔe nudzɔdzɔ ɖesiaɖe tso hã.

Aleke Wò Etsɔme Anɔ?

Womeɖo míaƒe etsɔme ɖi o, ke boŋ alesi míenɔa agbee fifia dzie wònɔ te ɖo. Togbɔ be agbe nye nunana tso Mawu gbɔ hã la, Biblia ɖee fia eme kɔ nyuie be mía ŋutɔwo míewɔa akpa vevi aɖe le alesi míaƒe agbe anɔ fifia kple le etsɔme ŋu. Nyateƒe si wònye be míate ŋu atiae be míado dzidzɔ na Mawu alo míana wòaxa nu fia be Mawu na ŋusẽ mí ɖe míaƒe agbenɔnɔ dzi vaseɖe teƒe aɖe.​—Mose I, 6:⁠6; Psalmo 78:​40; Lododowo 27:⁠11.

Tsɔ kpe ɖe eŋu la, Ŋɔŋlɔ Kɔkɔeawo gblɔe te gbe ɖe edzi enuenu be míaƒe etsɔme nɔ te ɖe míaƒe dzidodo kple alesi míenɔa agbee dzi, si anye nusi ŋu gɔmesese aɖeke manɔ o ne ɖe woɖo nuwo ɖi xoxo. (Mateo 24:​13; Luka 10:​25-28) Ke ne míetiae be míaɖo to Mawu ahawɔ nuteƒe nɛ la, etsɔme kae míate ŋu akpɔ mɔ na?

Biblia ɖee fia be etsɔme nyui aɖe le ameƒomea si. Woatrɔ anyigba wòazu paradiso afisi ŋutifafa kple dedienɔnɔ axɔ aƒe ɖo. (Psalmo 37:​9-11; 46:​9, 10) Kakaɖedzi le etsɔme sia ŋu elabena Wɔla ŋusẽkatãtɔ la awɔ ɖe eƒe ŋugbedodowo dzi. ( Yesaya 55:​11) Gake ne woayra mí kple agbe le Paradiso me alo womayra mí o, menɔ te ɖe dzɔgbese dzi o: asu mía si to Mawu ƒe lɔlɔ̃nu wɔwɔ fifia dzi. (Tesalonikatɔwo II, 1:​6-⁠8; Nyaɖeɖefia 7:​14, 15) Mawu na tiatiawɔblɔɖe mí hede dzi ƒo na mí be: “Mitia agbe, be . . . mianɔ agbe.” (Mose V, 30:​19) Tiatia kae nàwɔ? Wò etsɔme le wò ŋutɔ asiwò me, menye le dzɔgbese si me o.

[Nɔnɔmetata si le axa 10]

Mawu wɔ ɖoɖo ɖe etsɔme wɔnuku aɖe ŋu na ameƒomea me tɔ toɖolawo