Milé Ðekawɔwɔ Me Ðe Asi Le Ŋkeke Mamlɛ Siawo Me
“Mizɔ, abe alesi wòdze ... nyanyui la ene ... bena mianɔ tsitre le gbɔgbɔ ɖeka me, eye miatsɔ luʋɔ ɖeka aʋli nyanyui ƒe xɔse la ta hekpe ɖe mia nɔewo ŋuti.”—FILIPITƆWO 1:27.
1. Vovototo kae le Yehowa Ðasefowo kple xexeame dome?
‘ŊKEKE mamlɛawoe’ nye siawo. Ðikeke mele eme o be ‘ɣeyiɣiawo sesẽ.’ (Timoteo II 3:1-5) Le “nuwuɣi” si me ameƒomea tɔtɔ le la, Yehowa Ðasefowo to vovo kura le woƒe ŋutifafa kple ɖekawɔwɔ ta. (Daniel 12:4) Gake wobia tso Yehowa subɔlawo ƒe xexeame katã ƒe ƒomea me tɔ ɖesiaɖe si be wòadze agbagba vevie alé ɖekawɔwɔ sia me ɖe asi.
2. Nya kae Paulo gblɔ le ɖekawɔwɔ me lelé ɖe asi ŋu, eye biabia ka mee míadzro?
2 Apostolo Paulo xlɔ̃ nu hati Kristotɔwo be woalé ɖekawɔwɔ me ɖe asi. Eŋlɔe be: “Mizɔ, abe alesi wòdze na Kristo ƒe nyanyuie la ene, bena ne mava, eye makpɔ mi ɖa, alo ne nyemele mia gbɔ o, eye mase mia ŋkɔ la, bena mianɔ tsitre le gbɔgbɔ ɖeka me, eye miatsɔ luʋɔ ɖeka aʋli nyanyuie ƒe xɔse la ta hekpe ɖe mia nɔewo ŋuti; eye megaɖi vo le naneke me le miaƒe aɖikãtɔwo ŋuti o, esi nye gbegblẽ ƒe dzesi na wo, ke miawo la agbexɔxɔ ƒe dzesi wònye na mi, eye esia tso Mawu gbɔ.” (Filipitɔwo 1:27, 28) Paulo ƒe nyawo ɖee fia eme kɔ be ele be míawɔ dɔ ɖekae abe Kristotɔwo ene. Ekema nukae akpe ɖe mía ŋu míalé míaƒe Kristotɔwo ƒe ɖekawɔwɔ me ɖe asi le ɣeyiɣi sesẽ siawo me?
Wɔ Mawu ƒe Lɔlɔ̃nu
3. Ɣekaɣie Trɔ̃subɔla aʋamatsomatsotɔ gbãtɔwo zu Kristo yomedzelawo, eye alekee?
3 Mɔ siwo nu míalé ɖekawɔwɔ me ɖe asi le ƒe ɖekae nye be míawɔ Mawu ƒe lɔlɔ̃nu ɣesiaɣi. Ðewohĩ esia abia be míawɔ tɔtrɔ le míaƒe tamesusu me. Bu Yesu Kristo ƒe nusrɔ̃la Yudatɔ gbãtɔwo ŋu kpɔ. Esi apostolo Petro ɖe gbeƒã na Trɔ̃subɔla aʋamatsomatsotɔwo zi gbãtɔ le ƒe 36 M.Ŋ. me la, Mawu kɔ gbɔgbɔ kɔkɔe ɖe dukɔwo me tɔ siawo dzi eye wona nyɔnyrɔ wo. (Dɔwɔwɔwo, ta 10) Vaseɖe ɣemaɣi la, Yudatɔwo, amesiwo trɔ dzime zu Yudatɔwo, kple Samariatɔwo ɖeɖekoe nye Yesu Kristo yomedzelawo.—Dɔwɔwɔwo 8:4-8, 26-38.
4. Esi Petro ɖe nusi dzɔ ɖe Kornelio dzi me vɔ la, nya kae wògblɔ, eye dodokpɔ kae esia nye na Yesu ƒe nusrɔ̃la Yudatɔwo?
4 Esi apostoloawo kple nɔvi bubu siwo nɔ Yerusalem se be Kornelio kple Trɔ̃subɔla bubuwo trɔ dzime la, wodi vevie be yewoase nya le Petro nu. Esi apostoloa gblɔ nusi dzɔ ɖe Kornelio kple Trɔ̃subɔla xɔsetɔ bubuwo dzi vɔ la, etsɔ nya siawo ƒo etae be: “Azɔ ne Mawu tsɔ nenem nunana [si nye gbɔgbɔ kɔkɔe] ma ke na wo [Trɔ̃subɔla-zu-xɔsetɔ mawo], abe alesi wòna mí [Yudatɔwo], amesiwo xɔ Aƒetɔ Yesu Kristo dzi se la ene la, nye la ameka menye be, mate ŋu axe mɔ na Mawua?” (Dɔwɔwɔwo 11:1-17) Esia nye dodokpɔ na Yesu Kristo yomedzela Yudatɔwo. Ðe woawɔ Mawu ƒe lɔlɔ̃nu ahaxɔ Trɔ̃subɔla xɔsetɔawo abe wo nɔvi tadeagulawo enea? Alo ɖe Yehowa subɔla siwo le anyigba dzi ƒe ɖekawɔwɔ aɖo afɔku mea?
5. Aleke apostoloawo kple nɔvi bubuawo wɔ nu ɖe nyateƒe si wònye be Mawu na dzimetɔtrɔ Trɔ̃subɔlawo la ŋui, eye nukae míate ŋu asrɔ̃ tso nuwɔna sia me?
5 Nuŋlɔɖia gblɔ be: “Esi [apostoloawo kple nɔvi bubuwo se] nya siawo la, wozi ɖoɖoe, eye wokafu Mawu gblɔ bena: Ekema Mawu na dzimetɔtrɔ trɔ̃subɔlawo hã hena agbe.” (Dɔwɔwɔwo 11:18) Nuwɔna ma kpɔ Yesu yomedzelawo ƒe ɖekawɔwɔ ta hedoe ɖe ŋgɔ. Le ɣeyiɣi kpui aɖe ko me la, gbeƒãɖeɖedɔa kaka ɖe Trɔ̃subɔlawo, alo dukɔwo me tɔwo dome eye Yehowa ƒe yayra nɔ dɔ mawo dzi. Ne wobia be míawɔ dɔ ɖekae le hame yeye aɖe ɖoɖo me alo ne wowɔ teokrasi ƒe tɔtrɔ aɖe le Mawu ƒe gbɔgbɔ kɔkɔe ƒe mɔfiafia te la, ele be míalɔ̃ ɖe edzi. Míaƒe dɔwɔwɔ ɖekae tso dzi blibo me adze Yehowa ŋu eye akpe ɖe mía ŋu míalé ɖekawɔwɔ me ɖe asi le ŋkeke mamlɛ siawo me.
Lé Ðe Nyateƒea Ŋu
6. Ŋusẽ kae nyateƒea kpɔna ɖe Yehowa subɔlawo ƒe ɖekawɔwɔ dzi?
6 Esi míele Yehowa subɔlawo ƒe ƒomea me ta la, míewɔa ɖeka elabena ‘Yehowa fia nu’ mí katã eye míelé ɖe eƒe nyateƒe si wòɖe fia la ŋu sesĩe.’ (Yohanes 6:45; Psalmo 43:3) Esi wònye Biblia dzie míetu míaƒe nufiafiawo ɖo ta la, mí katã míegblɔa nya ɖeka. Míexɔa gbɔgbɔmenuɖuɖu si Yehowa nana to “dɔla nuteƒewɔla kple aɖaŋudzela” dzi la dzidzɔtɔe. (Mateo 24:45-47) Nufiafia ɖeka sia kpena ɖe mía ŋu míeléa míaƒe xexeame katã ƒe ɖekawɔwɔ me ɖe asi.
7. Ne nufiafia aɖe gɔmesese le sesẽm na mí ame ɖekaɖekawo la, nukae wòle be míawɔ, eye nukae mele be míawɔ o?
7 Ke ne nufiafia aɖe gɔmesese alo exɔxɔ le sesẽm na mí ame ɖekaɖekawo ya ɖe? Ele be míado gbe ɖa abia nunya eye míawɔ numekuku le Ŋɔŋlɔawo kple Kristotɔwo ƒe agbalẽwo me. (Lododowo 2:4, 5; Yakobo 1:5-8) Numedzodzro kple hamemegã aɖe ate ŋu akpe ɖe ŋuwò. Ne kokoko mète ŋu se egɔme o la, anyo wu ne àɖe asi le nya la ŋu. Ðewohĩ woava ta numeɖeɖe geɖe wu le nyatia ŋu, ekema míaƒe gɔmesese ade to ɖe edzi. Gake masɔ be míadze agbagba atrɔ ame bubuwo ƒe susu le hamea me ne woaxɔ mía ŋutɔ ƒe nukpɔsusu si to vovo la o. Esia anye mamã dede amewo me, ke manye ɖekawɔwɔ me léle ɖe asi o. Aleke wòhenyo wu enye si be ‘míayi edzi azɔ le nyateƒea me’ eye míade dzi ƒo na ame bubuwo be woawo hã nawɔ nenema!—Yohanes III, 4.
8. Nɔnɔme kae sɔ be míaɖe fia ɖe nyateƒea ŋu?
8 Paulo gblɔ le ƒe alafa gbãtɔ me be: “Azɔ la míekpɔa nu le ahũhɔ̃e me le abebubu me, ke emegbe la ŋku me kple ŋku me; azɔ la medze si nu afã kple afã, ke emegbe la madze si nu keŋ, abe alesi wodze sim keŋ la ene.” (Korintotɔwo I, 13:12) Togbɔ be Kristotɔ gbãtɔwo mese nuwo gɔme keŋ o hã la, woyi edzi wɔ ɖeka. Fifia míese Yehowa ƒe tameɖoɖo kple eƒe Nyateƒenya la gɔme nyuie wu. Eyata mina míakpɔ ŋudzedze ɖe nyateƒe si míexɔ to “dɔla nuteƒewɔla” dzi la ŋu. Eye mina míada akpe be Yehowa le míakplɔm to eƒe habɔbɔa dzi. Togbɔ be sidzedze agbɔsɔsɔme ma ke mesu mía si ɣesiaɣi o hã la, dɔ alo tsikɔ mewua mí le gbɔgbɔ me o. Ke boŋ mía Kplɔla, Yehowa, wɔ mí ɖekae heléa be na mí nyuie.—Psalm 23:1-3.
Zã Aɖe la Pɛpɛpɛ!
9. Aleke míate ŋu azã aɖe la atsɔ ado ɖekawɔwɔ ɖe ŋgɔe?
9 Aɖea zazã atsɔ de dzi ƒo na ame bubuwo nye mɔ vevi aɖe si dzi míato ado ɖekawɔwɔ havilɔlɔ̃ ƒe gbɔgbɔ ɖe ŋgɔ. Lɛta si ƒe alafa gbãtɔ me dziɖuha la ɖo ɖa tsɔ kpɔ aʋatsotsonya gbɔe la nye dzideƒotsoƒe. Esi nusrɔ̃la Trɔ̃subɔla siwo nɔ Antioxia xlẽe la, “wodzɔ dzi le akɔfafa la ŋuti.” Yuda kple Sila si wotsɔ lɛta la de asi na hedɔ wo ɖa tso Yerusalem la “xlɔ̃ nu nɔviawo kple nya geɖewo; eye wodo ŋusẽ wo.” Ðikeke mele eme o be Paulo kple Barnaba hã ƒe wo gbɔ nɔnɔ do ŋusẽ haxɔsetɔ siwo nɔ Antioxia. (Dɔwɔwɔwo 15:1-3, 23-32) Míate ŋu awɔ nu ma ke ne míeƒo ƒu le Kristotɔwo ƒe kpekpewo me, eye míatsɔ míaƒe afima nɔnɔ kple nyaŋuɖoɖo tuameɖowo ‘ade dzi ƒo na mía nɔewo.’—Hebritɔwo 10:24, 25.
10. Be míalé ɖekawɔwɔ me ɖe asi la, nukae wòle be míawɔ ne busubɔbɔ do mo ɖa?
10 Gake aɖea zazã ɖe mɔ gbegblẽ nu ate ade míaƒe ɖekawɔwɔ afɔku me. Nusrɔ̃la Yakobo ŋlɔe be: “Aɖe hã nye ŋutinu sue aɖe ko, eye wòkana ɖe nu gãwo ŋu. Kpɔ alesi dzo vi aɖe tɔa dzo ave gã la ɖa!” (Yakobo 3:5) Yehowa lé fu amesiwo dea dzre amewo dome. (Lododowo 6:16-19) Nya mawo ate ŋu ahe mamã vɛ. Eyata ne busubɔbɔ, si fia ame aɖe ŋu gbegblẽ alo edzudzu, li ya ɖe? Hamemegãwo adze agbagba akpe ɖe nugbegblẽwɔla la ŋu. Gake ele be woaɖe busubɔla matrɔdzime la le hamea me bene woalé hamea ƒe ŋutifafa, ɖoɖo, kple ɖekawɔwɔ ɖe te. Paulo ŋlɔ tso eŋu be: “Miagade ha kple ame aɖe, si ne woyɔnɛ be nɔvi, wònye ... busubɔla ... la o; migaɖu nu kple nenem me sia hã o.”—Korintotɔwo I, 5:11.
11. Nukatae ɖokuibɔbɔ hiã ne míegblɔ nya aɖe si de dzre mía kple haxɔsetɔ aɖe dome?
11 Aɖe la dzi kpɔkpɔ na míeléa ɖekawɔwɔ me ɖe asi. (Yakobo 3:10-18) Gake tsɔe be míegblɔ nya aɖe si de dzre mía kple nɔvi Kristotɔ aɖe dome. Ðe masɔ be míatso gbã awɔ ŋutifafa kple mía nɔvia, aɖe kuku nɛ ne ehiã oa? (Mateo 5:23, 24) Nyateƒe, esia bia ɖokuibɔbɔ alo ɖokuibɔbɔɖeanyi, gake Petro ŋlɔ be: “Mitsɔ ɖokuibɔbɔɖeanyi hetsyɔ; elabena Mawu tsia tre ɖe dadalawo ŋuti, ke evea ɖokuibɔbɔlawo nu.” (1 Petro 5:5) Ðokuibɔbɔ aʋã mí be ‘míawɔ ŋutifafa’ kple mía nɔviwo, míalɔ̃ ɖe míaƒe vodadawo dzi ahaɖe kuku si sɔ. Esia léa Yehowa ƒe ƒomea ƒe ɖekawɔwɔ ɖe te.—Petro I, 3:10,
12. Aleke míate ŋu azã aɖe la atsɔ ado Yehowa ƒe amewo ƒe ɖekawɔwɔ ɖe ŋgɔ ahalé eme ɖe asi?
12 Míate ŋu ado ƒome ƒe gbɔgbɔ ɖe ŋgɔ le Yehowa ƒe habɔbɔa me tɔwo dome ne míezã míaƒe aɖe nyuie. Esi wònye nu mae Paulo wɔ ta la, eɖo ŋku edzi na Tesalonikatɔwo be: “Mienyae hã bena, abe alesi fofo wɔna na viawo ene la, nenema ke míewɔ na mia dome amesiame: Míexlɔ̃ nu mi, eye míefa akɔ na mi, eye míeɖi ɖase na mi be, miazɔ bena mianye ame dzedzewo na Mawu.” (Tesalonikatɔwo I, 2:11, 12) Esi Paulo ɖo kpɔɖeŋu nyui le go sia me ta la, ete ŋu xlɔ̃ nu Kristotɔwo be “mifa akɔ na dzikatsoƒoetɔwo.” (Tesalonikatɔwo I, 5:14) Kpɔ nu nyui si gbegbe míawɔ ne míezã aɖe la tsɔ fa akɔ na ame bubuwo, míetsɔe de dzi ƒo na wo, hetu wo ɖoe ɖa. Ẽ, “aleke nya, si wogblɔ ɖe egblɔɣi la, mehevivinae oa?” (Lododowo 15:23) Hekpe ɖe eŋu la, nya mawo gbɔgblɔ doa Yehowa ƒe amewo ƒe ɖekawɔwɔ ɖe ŋgɔ helénɛ ɖe te.
Tsɔe ke!
13. Nukata wòle be míatsɔe ake?
13 Be míalé Kristotɔwo ƒe ɖekawɔwɔ me ɖe asi le, ele vevie be míatsɔe ake agɔdzela si ɖe kuku. Eye zi nenie míatsɔe ake? Yesu gblɔ na Petro be: “Nyemegblɔ na wò bena, vaseɖe zi adre o, ke boŋ zi [blaadre vɔ adre NW].” (Mateo 18:22) Ne míetsɔnɛ kena o la, maɖe vi na mía ŋutɔwo hã o. Nukata? Fuléle kple dzikuléleɖi mana míaɖe dzi ɖi o. Ne wova nya mí be míaƒe tame sẽ eye míetsɔnɛ kena o la, amewo ate ŋu agbe mí. (Lododowo 11:17) Dzikuléleɖi medzea Mawu ŋu o eye ate ŋu akplɔ mí ade nuvɔ̃ gã aɖe me. (Mose III, 19:18) Ðo ŋku edzi be tame vɔ̃ si Herodia vɔ̃ɖi la, amesi ‘lé’ Yohanes Amenyrɔɖetsimela ‘ɖe dɔme’ ɖo lae na wotso ta le enu.—Marko 6:19-28.
14. (a) Nukae Mateo 6:14, 15 fia mí le tsɔtsɔke ŋu? (b) Ðe wòle be míalala ɣesiaɣi be woaɖe kuku na mí hafi míatsɔe akea?
14 Nya siawo le Yesu ƒe kpɔɖeŋugbedodoɖa me be: “Tsɔ míaƒe nuvɔ̃wo ke mí; elabena mía ŋutɔwo hã míetsɔ kea amesiame, si nyia fe le mía si!” (Luka 11:4) Ne míetsɔnɛ kena o la, ate ŋu adzɔ be gbeɖeka la, Yehowa Mawu magatsɔ míaƒe nuvɔ̃wo ake mí o, elabena Yesu gblɔ be: “Ne mietsɔ amewo ƒe vodadawo ke wo la, ekema mia Fofo, si le dziƒo la, atsɔe ake miawo hã. Ke ne mietsɔ ke amewo o la, mia Fofo hã matsɔ miaƒe vodadawo ake mi o.” (Mateo 6:14, 15) Eyata ne míedi vavã be míawɔ míaƒe akpa dzi alé ɖekawɔwɔ me ɖe asi le Yehowa subɔlawo ƒe ƒomea me la, ke míatsɔe ake, anye be ɖeko míaŋlɔ vodada si ɖewohĩ enye nuŋumabumabu nyuie eye vɔ̃ aɖeke kura mele eme o la be. Paulo gblɔ be: “Mihe adodo kple mia nɔewo, eye mitsɔ ke mia nɔewo, ne nya aɖe le ame aɖe si ɖe ame aɖe ŋuti la, alesi [Yehowa, NW] hã tsɔ ke mii la, miawo hã miwɔ nenema ke!” (Kolosetɔwo 3:13) Ne míetsɔ kena la, míewɔa míaƒe akpa dzi tsɔ léa Yehowa ƒe habɔbɔa ƒe ɖekawɔwɔ xɔasi la ɖe te.
Ðekawɔwɔ Kple Ðokuisinyametsotsowo Wɔwɔ
15. Nukae kpena ɖe Yehowa ƒe amewo ŋu woléa ɖekawɔwɔ me ɖe asi ne wole ɖokuisinyametsotsowo wɔm?
15 Mawu wɔ mi hena tiatiawɔblɔɖe kple mɔnukpɔkpɔ kpakple agbanɔmedzi mí be míatso nya me le mía ɖokui si. (Mose V, 30:19, 20; Galatiatɔwo 6:5) Gake míeléa míaƒe ɖekawɔwɔ me ɖe asi elabena míewɔa Biblia ƒe sewo kple gɔmeɖosewo dzi. Míebua wo ŋu ne míele ɖokuisinyametsotsowo wɔm. (Dɔwɔwɔwo 5:29; Yohanes I, 5:3) Tsɔe be nya aɖe fɔ ɖe te le akpaɖekedzimademade ŋu. Míate ŋu atso nya me le mía ɖokui si ne míeɖo ŋku edzi be ‘míenye xexeame ƒe akpa aɖe o’ eye be ‘míetsɔ míaƒe yiwo tu kodziwoe.’ (Yohanes 17:16; Yesaya 2:2-4) Nenema ke ne míawɔ ɖokuisinyametsotsowo le míaƒe ƒomedodo kple Dziɖuɖua ŋu la, míabu nya si Biblia gblɔ be míatsɔ “nusi nye Mawu tɔ la, na Mawu,” evɔ míabɔbɔ mía ɖokui na dziɖuɖu, siwo ŋusẽ li na” le xexemenyawo me ŋuti. (Luka 20:25; Romatɔwo 13:1-7; Tito 3:1, 2) Ẽ, Biblia ƒe sewo kple gɔmeɖosewo ŋu bubu ne míele mía ŋutɔwo ƒe nyametsotsowo wɔm la na míeléa míaƒe Kristotɔwo ƒe ɖekawɔwɔ ɖe te.
16. Aleke míate ŋu ana míalé ɖekawɔwɔ ɖe te ne míele nyametsotso siwo meku ɖe Ŋɔŋlɔawo me se aɖeke ŋu o wɔm? Gblɔ eƒe kpɔɖeŋu.
16 Míate ŋu akpe asi ɖe Kristotɔwo ƒe ɖekawɔwɔ me léle ɖe asi ŋu ne míele nyametsotso si nye ame ŋutɔ ƒe nya si meku ɖe Ŋɔŋlɔawo me se aɖeke ŋu o gɔ̃ hã wɔm. Le mɔ ka nu? To ɖetsɔleme ɖeɖefia ame bubu siwo ŋu ɖewohĩ mía ŋutɔwo ƒe nyametsotso agblẽ nu le me. Le kpɔɖeŋu me: Le blema Korinto-hamea me la, nya aɖe fɔ ɖe te le lã siwo wotsɔ sã vɔ na trɔ̃woe ŋu. Nyateƒee, Kristotɔ makpɔ gome le trɔ̃nuwɔwɔ me o. Gake menye nuvɔ̃ ɣemaɣi be woaɖu lã sia tɔgbe si wotso ʋui nyuie si kpɔtɔ wodzrana le asime la o. (Dɔwɔwɔwo 15:28, 29; Korintotɔwo I,10:25) Ke hã la, lã sia ɖuɖu ɖe fu na Kristotɔ aɖewo ƒe dzitsinya. Eyata Paulo ƒoe ɖe Kristotɔ bubuwo nu be woagazu nukikli na wo o. Le nyateƒe me la, eŋlɔe be: “Ne nuɖuɖu ɖia nɔvinye nu la, ekema nyemele lã ɖu ge gbeɖegbeɖe akpɔ o, bene nyemagaɖia nɔvinye nu o.” (Korintotɔwo I, 8:13) Eyata ne meku ɖe Biblia me se alo gɔmeɖose aɖeke ŋu o hã la, aleke gbegbe wòanye lɔlɔ̃ enye si be míabu ame bubuwo ŋu ne míele ɖokuisinyametsotso siwo ate ŋu akpɔ ŋusẽ ɖe Mawu ƒe ƒomea ƒe ɖekawɔwɔ dzi la wɔm!
17. Nu ka me nunya le be míawɔ ne ele be míawɔ ɖokuisinyametsotsowo?
17 Ne míenya afɔ si míaɖe o la, nunya anɔ eme be míawɔ nyametsotso si awɔe ne dzitsinya nyui nanɔ mía si, eye ele be ame bubuwo nade bubu míaƒe nyametsotsoa ŋu. (Romatɔwo 14:10-12) Le nyateƒe me la, ne míawɔ ɖokuisinyametsotso aɖe la, ele be míadi Yehowa ƒe mɔfiafia le gbedodoɖa me. Míate ŋu ado gbe ɖa kakaɖedzitɔe abe hakpala la ene be: “Ƒu to anyi ɖe ŋunye, ... Elabena wòe nye nye agakpe kple nye mɔ̃ sesẽ, eye àlé nye alɔnu akplɔm le wò ŋkɔ la ta.”—Psalmo 31:2, 3.
Lé Kristotɔwo Ƒe Ðekawɔwɔ Me Ðe Asi Ɣesiaɣi
18. Aleke Paulo wɔ Kristo-hamea ƒe ɖekawɔwɔ ƒe kpɔɖeŋui?
18 Le Korintotɔwo I, ta 12 la, Paulo zã amegbetɔwo ƒe ŋutinuwo tsɔ wɔ Kristo-hamea ƒe ɖekawɔwɔ ƒe kpɔɖeŋui. Ete gbe ɖe alesi ŋutinuawo ɖea vi na wo nɔewo kple ɖesiaɖe ƒe vevienyenye dzi. Paulo bia be: “Ne wo katã nye ŋutinu ɖeka la, afika ŋutilã la anɔ? Ke azɔ la ŋutinu geɖewo li, gake ŋutilã ɖeka hɔ̃ koe. Ŋku mate ŋu agblɔ na asi be: ‘Mehiã nam o’; alo ta hã mate ŋu agblɔ na afɔwo be: ‘Mehiã nam o.’” (Korintotɔwo I, 12:19-21, NW) Nenema ke menye mí Yehowa subɔlawo ƒe ƒomea me tɔwo katãe wɔa dɔ ɖeka o. Gake ɖekawɔwɔ le mía dome, eye míehiã na mía nɔewo.
19. Aleke Mawu ƒe gbɔgbɔ me mɔnuɖoɖowo ate ŋu aɖe vi na míi, eye nya kae nɔviŋutsu tsitsi aɖe gblɔ le esia ŋu?
19 Abe alesi ametia hiã nuɖuɖu, beléle, kple mɔfiafia ene la, míehiã gbɔgbɔ me mɔnuɖoɖo siwo Mawu nana mí to eƒe Nya, gbɔgbɔ, kple habɔbɔa dzi. Be mɔnuɖoɖo siawo naɖe vi na mí la, ele be míanɔ Yehowa ƒe anyigba dzi ƒomea me. Esi nɔviŋutsu aɖe subɔ Mawu ƒe geɖe megbe la, egblɔ be: “Medaa akpe ŋutɔ be menɔ agbe ɖe Yehowa ƒe tameɖoɖowo ŋuti sidzedze si su asinye tso ɣemaɣi ke do ŋgɔ na ƒe 1914 teti la nu, esime nuwo me mekɔ tututu o ... vaseɖe egbea esime nyateƒea le keklẽm nyuie abe ɣe ene. Ne nane le vevie nam wu la, ke Yehowa ƒe habɔbɔ si wokpɔna ŋu nɔnɔ kplikplikplie. Nusiwo teƒe mekpɔ le ɖevime fia alesi nunya mele eme kura be woaɖo ŋu ɖe amegbetɔ ƒe susu ŋu o lam. Esi mese nya sia gɔme ko la, meɖoe kplikpaa be manɔ habɔbɔ wɔnuteƒe la ŋu kplikplikpli. Mu bubu kae ame agawɔ hafi Yehowa nakpɔ ŋudzedze ɖe eŋu ahayrae?”
20. Nukae wòle be míaɖoe kplikpaa awɔ le mí Yehowa ƒe amewo ƒe ɖekawɔwɔ ŋu?
20 Yehowa yɔ eƒe amewo tso xexeame viviti kple ɖekamawɔmawɔ me. (Petro I, 2:9) Ekplɔ mí va yayra ƒe ɖekawɔwɔ me kple eya ŋutɔ kpakple míaƒe haxɔsetɔwo. Ðekawɔwɔ sia anɔ nuɖoanyi yeye si ɖo vɔ fifia la me. Eyata le ŋkeke mamlɛ sesẽ siawo me la, mina míayi edzi ‘ado lɔlɔ̃’ eye míawɔ nusianu si míate ŋui ado míaƒe ɖekawɔwɔ xɔasi la ɖe ŋgɔ ahalé eme ɖe asi.—Kolosetɔwo 3:14
Aleke Nàɖo Wo Ŋui
◻ Nukata Mawu ƒe lɔlɔ̃nu wɔwɔ kple kuku ɖe nyateƒea ŋu akpe ɖe mía ŋu míalé ɖekawɔwɔ me ɖe asi?
◻ Aleke ɖekawɔwɔ do ƒome kple aɖe la zazã nyuie?
◻ Nukae tsɔtsɔke bia?
◻ Aleke míate ŋu alé ɖekawɔwɔ me ɖe asi ne míele ɖokuisinyametsotsowo wɔm?
◻ Nukata wòle be míalé Kristotɔwo ƒe ɖekawɔwɔ me ɖe asi?
[Nɔnɔmetata si le axa 16]
Abe alesi alẽkplɔla sia ƒo eƒe alẽha nu ƒu ɖekae ene la, nenema ke Yehowa na eƒe amewo wɔ ɖekae
[Nɔnɔmetata siwo le axa 18]
Ne míeɖea kuku ɖokuibɔbɔtɔe ne míedze agɔ la, ena míedoa ɖekawɔwɔ ɖe ŋgɔ