Ezekiel
3 Kɛkɛ ni ekɛɛ mi akɛ: “Gbɔmɔ bi,* ye nɔ ni yɔɔ ohiɛ lɛ.* Ye wolokpo nɛɛ, ni oya, ni okɛ Israel shĩa lɛ ayawie.”+
2 No hewɔ lɛ, migbɛ midaaŋ, ni ehã miye wolokpo lɛ. 3 Etee nɔ ekɛɛ mi akɛ: “Gbɔmɔ bi,* ye wolokpo nɛɛ ni mikɛhãa bo lɛ, ni okɛwo omusuŋ obɔ.” No hewɔ lɛ miye, ni eŋɔɔ tamɔ wo yɛ midaaŋ.+
4 Ekɛɛ mi akɛ: “Gbɔmɔ bi,* yaa Israel shĩa lɛ mli, ni oyawie miwiemɔi lɛ otsɔɔ amɛ. 5 Ejaakɛ jeee maŋ ni onuuu amɛwiemɔ loo oleee amɛwiemɔ ŋɔɔ atsuɔ bo lɛ, shi Israel shĩa lɛ ŋɔɔ atsuɔ bo lɛ. 6 Jeee majimaji babaoo ni onuuu amɛwiemɔ loo oleee amɛwiemɔ, mɛi ni onyɛŋ onu amɛwiemɔ lɛ shishi lɛ aŋɔɔ atsuɔ bo lɛ. Kɛ́ amɛŋɔɔ mitsuɔ bo kulɛ, amɛbaabo bo toi.+ 7 Shi Israel shĩa lɛ boŋ bo toi, ejaakɛ amɛsumɔɔɔ ni amɛboɔ mi toi.+ Mɛi fɛɛ ni yɔɔ Israel shĩa lɛ akuɛŋ ti ni amɛtsuiŋ wa hu.+ 8 Naa! Mihã ohiɛ ewa tamɔ bɔ ni amɛhiɛ wa lɛ nɔŋŋ, ni mihã ohiɛnaa hu ewa tamɔ bɔ ni amɛhiɛnaa wa lɛ nɔŋŋ.+ 9 Mihã ohiɛnaa efee tamɔ daimɔnd, ewa fe tɛ.+ Kaashe amɛ gbeyei ni kaahã amɛkɛ amɛhiɛ wo ohe gbeyei,+ ejaakɛ amɛji atuatselɔi ashĩa.”
10 Etee nɔ ekɛɛ mi akɛ: “Gbɔmɔ bi,* okɛ wiemɔi ni mikɛ bo wieɔ lɛ fɛɛ ato otsui mli ni obo toi. 11 Yaa omaŋbii* ni aŋɔ amɛ nom lɛ ateŋ+ ni okɛ amɛ ayawie. Kɛ́ amɛbo toi jio, amɛbooo toi jio,+ kɛɛmɔ amɛ akɛ, ‘Nɔ ni Nuŋtsɔ Ofe Yehowa kɛɛ nɛ.’”
12 Kɛkɛ ni mumɔ ko wó mi+ ni minu gbee ko ni naa wa ni jijeɔ yɛ misɛɛ akɛ: “Ajie Yehowa anunyam lɛ yi kɛjɛ eshihilɛhe lɛ.” 13 Ni minu bɔɔ nii ni hiɛ kamɔ lɛ afiji lɛ agbɛɛmɔ lɛ he be ni amɛhe shɔɔ amɛhe lɛ,+ kɛ dade taii* ni yɔɔ amɛmasɛi lɛ agbɛɛmɔ,+ kɛ gbee ni naa wa ni jijeɔ. 14 Ni mumɔ lɛ wó mi ni ekɛ mi tee, ni mitee yɛ awerɛho kɛ mimumɔ lɛ mlifu mli, ni Yehowa nine lɛ miitsu nii waa yɛ minɔ. 15 No hewɔ lɛ, mitee mɛi ni aŋɔ amɛ nom lɛ aŋɔɔ yɛ Tel-abib, mɛi ni yɔɔ Kebar faa lɛ naa lɛ,+ ni mihi he ni amɛyɔɔ lɛ; ni mihi amɛteŋ gbii kpawo ni mifee basaa.+
16 Gbii kpawo lɛ sɛɛ lɛ, Yehowa kɛɛ mi akɛ:
17 “Gbɔmɔ bi,* miwó bo bulɔ mihã Israel shĩa lɛ;+ ni kɛ́ onu wiemɔ ko yɛ minaa lɛ, bɔɔ amɛ kɔkɔ ohã mi.+ 18 Kɛ́ mikɛɛ efɔŋfeelɔ ko akɛ, ‘Bɔ fɛɛ bɔ ni fee lɛ obaagbo,’ ni obɔɔɔ lɛ kɔkɔ, ni owieee otsɔɔɔ efɔŋfeelɔ lɛ kɛbɔɔɔ lɛ kɔkɔ koni eje egbɛ fɔŋ lɛ nɔ ni ehi wala mli lɛ,+ ebaagbo yɛ etɔmɔ lɛ hewɔ ejaakɛ mɔ fɔŋ ji lɛ,+ shi mabi elá shi yɛ odɛŋ.*+ 19 Shi kɛ́ obɔ efɔŋfeelɔ ko kɔkɔ ni ekpaaa efɔŋ ni efeɔ lɛ ni ejeee egbɛ fɔŋ lɛ nɔ lɛ, ebaagbo yɛ etɔmɔ lɛ hewɔ, shi bo lɛ, bɔ fɛɛ bɔ ni fee lɛ, obaahere bo diɛŋtsɛ oyiwala.*+ 20 Shi kɛ́ jalɔ kpa ejalɛ nifeemɔi lɛ ni efee efɔŋ lɛ,* mikɛ tɛmɔtɛ baafɔ̃ ehiɛ ni ebaagbo.+ Kɛ́ obɔɔɔ lɛ kɔkɔ lɛ, ebaagbo yɛ ehe esha lɛ hewɔ, ni akaiŋ ejalɛ nifeemɔi lɛ, shi mabi elá shi yɛ odɛŋ.*+ 21 Shi kɛ́ obɔ jalɔ lɛ kɔkɔ koni ekafee esha, ni efeee esha lɛ, bɔ fɛɛ bɔ ni fee lɛ ebaaya nɔ ehi wala mli ejaakɛ abɔ lɛ kɔkɔ,+ ni obaahere bo diɛŋtsɛ oyiwala.”*
22 Yehowa nine ba minɔ yɛ jɛmɛ, ni ekɛɛ mi akɛ: “Tee shi ni oya jɔɔ lɛ mli, ni mikɛ bo baawie yɛ jɛmɛ.” 23 No hewɔ lɛ, mite shi ni mitee jɔɔ lɛ mli, ni naa! Yehowa anunyam lɛ yɛ jɛmɛ,+ tamɔ anunyam lɛ ni mina yɛ Kebar faa lɛ naa lɛ,+ ni mikɛ mihiɛ bu shi. 24 Kɛkɛ ni mumɔ ba mimli ni ehã midamɔ minaji anɔ,+ ni ekɛ mi wie ni ekɛɛ akɛ:
“Yaa ni oyaŋmɛ oshinaa lɛ mli owo oyi yɛ oshĩa lɛ. 25 Shi bo, gbɔmɔ bi,* amɛkɛ kpãi baashwie onɔ ni amɛkɛbaafimɔ bo koni okanyɛ oje kpo kɛba amɛteŋ. 26 Ni mahã olilɛi akpɛtɛ odaaŋ, ni obaatɔ mu bɔ ni onyɛŋ ojaje amɛ, ejaakɛ amɛji atuatselɔi ashĩa. 27 Shi kɛ́ mikɛ bo wie lɛ magbele onaa, ni obaakɛɛ amɛ akɛ,+ ‘Nɔ ni Nuŋtsɔ Ofe Yehowa kɛɛ nɛ.’ Mɔ ni miibo toi lɛ, ebo toi,+ ni mɔ ni booo toi lɛ, ekabo toi, ejaakɛ amɛji atuatselɔi ashĩa.+