Daniel

8 Maŋtsɛ Belshazar+ nɔyeli afi ni ji etɛ lɛ mli lɛ, mi, Daniel, mina ninaa ko yɛ nɔ ni mina klɛŋklɛŋ lɛ sɛɛ.+ 2 Mina ninaa lɛ, ni be ni miyakwɛ lɛ, miyɛ Shushan*+ mɔɔ* lɛ, ni yɔɔ Elam+ kpokpaa lɛ nɔ lɛ mli; mina ninaa lɛ, ni no mli lɛ miyɛ Ulai nu lɛ masɛi. 3 Be ni mihole mihiŋmɛii anɔ lɛ, naa! gwantɛŋnuu+ ko damɔ nu lɛ naa, ni eyɛ akolontoi enyɔ.+ Akolontoi enyɔ lɛ kwɔlɔ, shi ekome kwɔ fe ekome, ni nɔ ni kwɔ lɛ ba sɛɛ mli.+ 4 Mina ni gwantɛŋnuu lɛ miiya anaigbɛ kɛ kooyigbɛ kɛ wuoyigbɛ ni eeshilɛ kooloi, ni ŋa mli kooloo ko kwraa nyɛɛɛ adamɔ ehiɛ, ni mɔ ko mɔ ko nyɛɛɛ ajie mɔ ko kɛje edɛŋ.*+ Efee nɔ ni esumɔɔ ni ewó ehe nɔ.

5 Be ni mihiɛ kwɛmɔ aahu lɛ, naa! abotianuu+ ko fã kpo kɛjɛ anaigbɛ* kɛmiiba ni eeho kɛmiitsɔ shikpɔŋ muu lɛ fɛɛ hiɛ, ni ehe esaaa shikpɔŋ. Ni abotia lɛ yɛ akolonto wulu ko yɛ ehiŋmɛii ateŋ.+ 6 Eeba gwantɛŋnuu lɛ ni yɔɔ akolontoi enyɔ lɛ ni mina damɔ nu lɛ he lɛ nɔ; eeba enɔ kɛ foi yɛ mlifu ni naa wa mli.

7 Mina ni eebɛŋkɛ gwantɛŋnuu lɛ, ni eeba enɔ kɛ mlifu ni naa wa. Eshi gwantɛŋnuu lɛ ni ekumɔ ekolontoi enyɔ lɛ, ni gwantɛŋnuu lɛ nyɛɛɛ adamɔ ehiɛ. Etsi gwantɛŋnuu lɛ egbee shikpɔŋ, ni enaanaa enɔ, ni mɔ ko mɔ ko nyɛɛɛ ajie lɛ kɛje edɛŋ.*

8 Kɛkɛ ni abotianuu lɛ wó ehe nɔ waa diɛŋtsɛ, shi be ni ená hewalɛ waa nɔŋŋ lɛ, aku ekolonto wulu lɛ; kɛkɛ ni akolontoi wuji ejwɛ ni hiɛ miikwɛ ŋwɛi kɔɔyɔi ejwɛ lɛ baye ekome lɛ najiaŋ.+

9 Akolonto kroko fã kpo yɛ amɛteŋ ekome he kɛba, eyɛ bibioo, ni ebada agbo kɛtee wuoyigbɛ kɛ bokãgbɛ* kɛ Fɛfɛo Nɔ*+ lɛ he. 10 Ebada agbo aahu akɛ eyashɛ ŋwɛii asraafoi lɛ ahe tɔ̃ɔ, ni ehã asraafoi lɛ ekomɛi kɛ ŋulamii lɛ ekomɛi gbeegbee shikpɔŋ lɛ nɔ, ni enaanaa amɛnɔ. 11 Ewó ehe nɔ eshi asraafoi a-Lumɔ lɛ po, ni awó daa nifeemɔ* lɛ yɛ Lumɔ lɛ hiɛ, ni atsi ejamɔhe ni ato shishi lɛ atswa shi.+ 12 Ni akɛ asraafoi kɛ daa nifeemɔ* lɛ fɛɛ hã lɛ yɛ nɔtɔmɔ hewɔ; ni etee nɔ etsi anɔkwale etswa shi, ni efee nɔ ni esumɔɔ, ni eye omanye.

13 Ni minu ni mɔ krɔŋkrɔŋ ko miiwie, ni mɔ krɔŋkrɔŋ kroko kɛɛ mɔ ni wieɔ lɛ akɛ: “Mɛɛ be ninaa ni kɔɔ daa nifeemɔ* lɛ kɛ nɔtɔmɔ ni kɛ amaŋfɔfeemɔ baa lɛ, kɛ he krɔŋkrɔŋ lɛ kɛ asraafoi lɛ anɔ ni abaanaanaa lɛ he lɛ baaya nɔ kɛyashi?”+ 14 No hewɔ lɛ, ekɛɛ mi akɛ: “Kɛyashi jenamɔi kɛ jetsɛremɔi 2,300 baashɛ; ni bɔ fɛɛ bɔ ni fee lɛ, abaahã he krɔŋkrɔŋ lɛ afee tamɔ bɔ ni eji tsutsu lɛ ekoŋŋ.”

15 Be ni mi, Daniel, mikwɛɔ ninaa lɛ ni mitaoɔ akɛ manu shishi lɛ, trukaa be ni miyakwɛ lɛ, naa mɔ ko ni tamɔ gbɔmɔ damɔ mihiɛ. 16 Kɛkɛ ni minu nuu ko gbee yɛ Ulai+ lɛ mli, ni ebo ekɛɛ: “Gabriel,+ hã mɔ nɛɛ anu nɔ ni ena lɛ shishi.”+ 17 No hewɔ lɛ, etsi kɛba he ni midamɔ lɛ, shi be ni eba lɛ, mishe gbeyei waa aahu akɛ mikɛ mihiɛ bu shi. Ekɛɛ mi akɛ: “Bo gbɔmɔ bi,* ná ole akɛ ninaa lɛ yɛ kɛhã naagbee be lɛ.”+ 18 Shi be ni ekɛ mi wieɔ lɛ, mikɛ mihiɛ bu shi ni miwɔ vii. No hewɔ lɛ, eta mihe ni ehã mite shi midamɔ shi yɛ he ni midamɔ momo lɛ.+ 19 Kɛkɛ ni ekɛɛ mi akɛ: “Naa, mibahã ole nɔ ni baaba yɛ mlifu lɛ naagbee be lɛ mli, ejaakɛ eyɛ kɛhã be ni ato kɛhã naagbee lɛ.+

20 “Gwantɛŋnuu ni hiɛ akolontoi enyɔ ni ona lɛ damɔ shi kɛhã Media kɛ Persia maŋtsɛmɛi lɛ.+ 21 Abotianuu tsɔiatsɛ lɛ damɔ shi kɛhã Grees maŋtsɛ lɛ;+ ni akolonto wulu ni yɔɔ ehiŋmɛii ateŋ lɛ damɔ shi kɛhã klɛŋklɛŋ maŋtsɛ lɛ.+ 22 Bɔ ni aku akolonto lɛ ni ejwɛ te shi yɛ enajiaŋ lɛ,+ nakai maŋtsɛyelii ejwɛ baajɛ ejeŋmaŋ lɛ mli ate shi adamɔ shi, shi amɛnáŋ hewalɛ tamɔ lɛ.

23 “Ni yɛ amɛmaŋtsɛyeli lɛ naagbee be lɛ mli, be ni nɔtɔlɔi lɛ gbeɔ amɛnɔtɔmɔ lɛ naa lɛ,* maŋtsɛ ko ni he yɔɔ gbeyei ni nuɔ wiemɔi ni shishinumɔ bɛ faŋŋ ashishi* lɛ baate shi adamɔ shi. 24 Ehewalɛ lɛ baada, shi jeee yɛ lɛ diɛŋtsɛ ehewalɛ naa. Ebaakpãtã nii ahiɛ waa diɛŋtsɛ,* ni ebaaye omanye ni ebaafee enii jogbaŋŋ. Ebaakpãtã hewalɔi kɛ mɛi krɔŋkrɔŋi lɛ amaŋ lɛ hiɛ.+ 25 Ni eŋaalee lɛ sɔŋŋ hewɔ lɛ, ebaatsɔ lakamɔ nɔ eye omanye; ni ebaawó ehe nɔ yɛ etsui mli; ni ebaakpãtã mɛi babaoo ahiɛ yɛ toiŋjɔlɛ beiaŋ.* Ebaate shi ewo lumɛi a-Lumɔ lɛ po, shi abaakumɔ lɛ, shi jeee kɛ gbɔmɔ nine.

26 “Nɔ ni awie yɛ ninaa lɛ mli yɛ jenamɔi kɛ jetsɛremɔi lɛ ahe lɛ ji anɔkwale, shi bo lɛ, okɛ ninaa lɛ ato ejaakɛ ekɔɔ be ni baaba yɛ gbii babaoo sɛɛ kɛjɛ bianɛ lɛ he.”*+

27 Mi, Daniel lɛ, minu he akɛ etɔ mi waa, ni hela mɔ mi gbii komɛi.+ Kɛkɛ ni mite shi ni mitsu maŋtsɛ lɛ nitsumɔ lɛ;+ shi minaa kpɛ mihe yɛ nɔ ni mina lɛ hewɔ, ni mɔ ko mɔ ko nyɛɛɛ anu shishi.+