Akɛmaje Hebribii Lɛ
3 No hewɔ lɛ, nyɛmimɛi krɔŋkrɔŋi, mɛi ni ená ŋwɛi tsɛmɔ* lɛ mli gbɛfaŋnɔ,+ nyɛsusua Yesu, mɔ ni wɔkpɛlɛɔ nɔ* akɛ eji bɔfo kɛ osɔfonukpa lɛ he.+ 2 Eye mɔ ni kɛ lɛ to nakai gbɛhe lɛ anɔkwa,+ tamɔ bɔ ni Mose hu ye anɔkwa yɛ nakai mɔ lɛ shĩa lɛ fɛɛ mli lɛ.+ 3 Ejaakɛ abuɔ lɛ* akɛ esa anunyam+ fe Mose, akɛni akɛ woo babaoo hãa mɔ ni ma shĩa lɛ fe shĩa lɛ diɛŋtsɛ lɛ hewɔ. 4 Yɛ anɔkwale mli lɛ, shĩa fɛɛ shĩa lɛ mɔ ko kɛ̃ ma, shi mɔ ni fee nibii fɛɛ ji Nyɔŋmɔ. 5 Agbɛnɛ, Mose ye anɔkwa akɛ sɔɔlɔ yɛ nakai mɔ lɛ shĩa lɛ fɛɛ mli, ni no ye nibii ni abaawie yɛ sɛɛ mli lɛ ahe odase, 6 shi Kristo, ni ji bi lɛ,+ ye anɔkwa yɛ Nyɔŋmɔ shĩa lɛ ni ekwɛɔ nɔ lɛ mli. Anɔkwa, kɛ́ wɔhiɛ wiemɔ ni wɔwieɔ kɛ nɔmimaa, kɛ hiɛnɔkamɔ ni wɔkɛshiɔ wɔtsitsi lɛ mli kpɛŋŋ kɛyashi naagbee lɛ, no lɛ Nyɔŋmɔ shĩa ji wɔ.+
7 No hewɔ lɛ, tamɔ bɔ ni mumɔ krɔŋkrɔŋ lɛ kɛɔ lɛ,+ “Ŋmɛnɛ lɛ, kɛ́ nyɛbo egbee toi lɛ, 8 nyɛkakpiliŋa nyɛtsuii tamɔ eba lɛ yɛ mlilawoo be lɛ mli lɛ, tamɔ eba lɛ yɛ kaa gbi lɛ nɔ yɛ ŋa lɛ nɔ lɛ,+ 9 he ni nyɛtsɛmɛi lɛ ka mi ni amɛje mi ŋwane yɛ lɛ, eyɛ mli moŋ akɛ amɛna minitsumɔi lɛ afii 40 sɔŋŋ.+ 10 Enɛ hewɔ ni mimli wo yinɔ nɛɛ la ni mikɛɛ akɛ: ‘Amɛgbaa afã yɛ amɛtsuii amli be fɛɛ be, ni amɛleko migbɛi lɛ.’ 11 No hewɔ lɛ, mikã kitã yɛ mimlifu lɛ mli akɛ: ‘Amɛboteŋ mihejɔɔmɔ lɛ mli.’”+
12 Nyɛmimɛi, nyɛkwɛa jogbaŋŋ koni nyɛteŋ mɔ ko akaná tsui fɔŋ ni bɛ hemɔkɛyeli akɛni etsi ehe kɛje Nyɔŋmɔ hiɛkãalɔ lɛ he lɛ hewɔ;+ 13 shi moŋ nyɛyaa nɔ nyɛwowoa nyɛhe hewalɛ gbi fɛɛ gbi ni atsɛɔ lɛ “Ŋmɛnɛ” lɛ,+ koni esha lakamɔ lɛ akahã nyɛteŋ mɔ ko kpiliŋ etsui. 14 Ejaakɛ ja wɔhiɛ nɔmimaa ni wɔná kɛjɛ shishijee lɛ mli kpɛŋŋ kɛyashi naagbee dani wɔbaaná Kristo lɛ mli gbɛfaŋnɔ* lɛɛlɛŋ.+ 15 Tamɔ bɔ ni akɛɛ lɛ, “Ŋmɛnɛ lɛ, kɛ́ nyɛbo egbee toi lɛ, nyɛkakpiliŋa nyɛtsuii tamɔ eba lɛ yɛ mlilawoo be lɛ mli lɛ.”+
16 Ni namɛi nu ni kɛ̃lɛ amɛwo emli la lɛ? Anɔkwa, ani jeee mɛi ni je Ejipt yɛ Mose shishi lɛ fɛɛ ni?+ 17 Agbɛnɛ hu, namɛi Nyɔŋmɔ mli wo amɛ la afii 40 lɛ?+ Ani jeee mɛi ni fee esha ni amɛgboi yɛ ŋa lɛ nɔ lɛ ni?+ 18 Ni namɛi ekã amɛ kitã akɛ amɛboteŋ ehejɔɔmɔ lɛ mli lɛ? Ani jeee mɛi ni gbo toi lɛ ni? 19 No hewɔ lɛ, wɔnaa akɛ hemɔkɛyeli ni amɛbɛ lɛ hewɔ amɛnyɛɛɛ mli amɛbote lɛ.+