Nɔ Ni Yohane Ŋma
4 Be ni Nuŋtsɔ lɛ ná ele akɛ Farisifoi lɛ enu akɛ Yesu miifee kaselɔi babaoo ni eebaptisi+ mɛi babaoo hu fe Yohane lɛ— 2 eyɛ mli akɛ, Yesu diɛŋtsɛ ebaptisiii shi moŋ ekaselɔi lɛ ni baptisiɔ lɛ— 3 eshi Yudea ni eyi mli akɛ eeya Galilea ekoŋŋ. 4 Shi ehe bahia ni eyatsɔ Samaria kɛya. 5 No hewɔ lɛ, ebashɛ Samaria maŋ ko ni atsɛɔ lɛ Sikar ni bɛŋkɛ shikpɔŋ ni Yakob kɛhã ebi Yosef lɛ mli.+ 6 Yakob nubu lɛ hu yɛ jɛmɛ.+ Agbɛnɛ, akɛni gbɛnyiɛmɔ lɛ ehã etɔ Yesu hewɔ lɛ, eho eta shi yɛ nubu* lɛ he. No mli lɛ, eshɛ aaafee ŋmɛlɛtswaa ni ji ekpaa* lɛ nɔ.
7 Samaria yoo ko ba ni ebayɛ nu. Yesu kɛɛ lɛ akɛ: “Hã mi nu lɛ eko manu.” 8 (Ejaakɛ ekaselɔi lɛ etee maŋ lɛ mli amɛyaahé niyenii.) 9 No hewɔ lɛ, Samaria yoo lɛ kɛɛ lɛ akɛ: “Te tɛŋŋ ni bo Yudanyo lɛ, obiɔ mi, Samaria yoo lɛ koni mihã bo nu ni onu lɛ?” (Ejaakɛ Yudafoi kɛ Samariabii bɛ nɔ ko feemɔ.)+ 10 Yesu hã lɛ hetoo akɛ: “Eji ole Nyɔŋmɔ dromɔ keenɔ+ lɛ kɛ mɔ ni biɔ bo akɛ, ‘Hã mi nu lɛ eko manu’ lɛ kulɛ, bo moŋ obaabi lɛ, ni ebaahã bo wala nu.”+ 11 Ekɛɛ lɛ akɛ: “Onukpa, obɛ nɔ ko po ni akɛyɛɔ nu, ni nubu lɛ mli kwɔ. No hewɔ lɛ, nɛgbɛ oná wala nu nɛɛ yɛ mɔ? 12 Ani ofe wɔtsɛ Yakob, mɔ ni hã wɔ nubu nɛɛ, ni lɛ kɛ ebii kɛ ekooloi hu nu mli nu lɛ?” 13 Yesu hã lɛ hetoo akɛ: “Mɔ fɛɛ mɔ ni nuɔ nu nɛɛ eko lɛ, kumai baaye lɛ ekoŋŋ. 14 Mɔ fɛɛ mɔ ni nuɔ nu ni mahã lɛ lɛ eko lɛ, kumai yeŋ lɛ dɔŋŋ kɛaatee naanɔ,+ shi nu ni mahã lɛ lɛ baatsɔ nuhiŋmɛi yɛ emli, ni nu baajɛ mli kɛba koni ehã naanɔ wala.”+ 15 Yoo lɛ kɛɛ lɛ akɛ: “Onukpa, hã mi nu nɛɛ eko, koni kumai akaye mi dɔŋŋ, ni mikaya nɔ miba biɛ mibayɛ nu.”
16 Yesu kɛɛ lɛ akɛ: “Yaa ni oyatsɛ owu ni okɛ lɛ aba biɛ.” 17 Yoo lɛ here nɔ akɛ: “Mibɛ wu.” Yesu kɛɛ lɛ akɛ: “Owie anɔkwale akɛ, ‘Mibɛ wu.’ 18 Ejaakɛ ogbã wumɛi enumɔ, ni nuu ni okɛyɔɔ amrɔ nɛɛ, jeee owu ji lɛ. No hewɔ lɛ, owie anɔkwale.” 19 Yoo lɛ kɛɛ lɛ akɛ: “Onukpa, miina akɛ gbalɔ ji bo.+ 20 Gɔŋ nɛɛ nɔ wɔtsɛmɛi lɛ já yɛ, shi nyɛ lɛ nyɛkɛɔ akɛ he ni esa akɛ ajá yɛ lɛ yɛ Yerusalem.”+ 21 Yesu kɛɛ lɛ akɛ: “Yoo, hemɔ mi oye, ŋmɛlɛtswaa lɛ miiba ni jeee gɔŋ nɛɛ nɔ, ni jeee Yerusalem hu nyɛbaajá Tsɛ lɛ yɛ. 22 Nyɛjáa nɔ ni nyɛleee;+ shi wɔ lɛ, wɔjáa nɔ ni wɔle, ejaakɛ yiwalaheremɔ lɛ, ejeɔ shishi kɛjɛɔ Yudafoi lɛ anɔ.+ 23 Shi ŋmɛlɛtswaa lɛ miiba, ni eshɛ agbɛnɛ, be mli ni anɔkwa jálɔi lɛ baajá Tsɛ lɛ kɛ mumɔ kɛ anɔkwale, ejaakɛ, anɔkwa, Tsɛ lɛ miitao mɛi ni tamɔ nɛkɛ ni amɛjá lɛ.+ 24 Nyɔŋmɔ lɛ Mumɔ ni,+ ni mɛi ni jáa lɛ lɛ, esa akɛ amɛkɛ mumɔ kɛ anɔkwale ajá lɛ.”+ 25 Yoo lɛ kɛɛ lɛ akɛ: “Mile akɛ Mesia ni atsɛɔ lɛ Kristo lɛ miiba. Kɛ́ nakai mɔ lɛ ba lɛ, ebaajaje nibii fɛɛ etsɔɔ wɔ faŋŋ.” 26 Yesu kɛɛ lɛ akɛ: “Mi mɔ ni mikɛ bo wieɔ lɛ, mi ni.”+
27 Kɛkɛ ni ekaselɔi lɛ ba, ni efee amɛ naakpɛɛ akɛ ekɛ yoo miiwie. Shi kɛ̃lɛ, mɔ ko biii akɛ: “Mɛni otaoɔ?” aloo “Mɛni hewɔ okɛ yoo lɛ wieɔ?” 28 No hewɔ lɛ, yoo lɛ shi enugbɛ́ lɛ ni eyiŋ etee maŋ lɛ mli ni eyakɛɛ maŋbii lɛ akɛ: 29 “Nyɛbaa nyɛbakwɛa nuu ko ni gba mi nibii fɛɛ ni mifee lɛ. Ani enyɛŋ efee akɛ lɛ ji Kristo lɛ?” 30 Amɛje kpo kɛjɛ maŋ lɛ mli ni amɛbɔi eŋɔɔbaa.
31 No mli lɛ, kaselɔi lɛ miikpa lɛ fai akɛ: “Rabi,+ ye nɔ ko.” 32 Shi ekɛɛ amɛ akɛ: “Miyɛ niyenii ni miyeɔ ni nyɛleee.” 33 No hewɔ lɛ, kaselɔi lɛ kɛɛkɛɛ amɛhe akɛ: “Ani aleenɔ, mɔ ko ebahã lɛ nɔ ko eye?” 34 Yesu kɛɛ amɛ akɛ: “Miniyenii ji akɛ mafee mɔ ni tsu mi lɛ suɔmɔnaa nii+ ni magbe enitsumɔ lɛ naa.+ 35 Ani nyɛkɛɛɛ akɛ eshwɛ nyɔji ejwɛ dani nikpamɔ be lɛ baashɛ? Naa! Miikɛɛ nyɛ akɛ: Nyɛholea nyɛhiŋmɛii anɔ ni nyɛkwɛa ŋmɔji lɛ, akɛ amɛgbá futaa ni sa kpamɔ.+ Amrɔ nɛɛ 36 nikpalɔ lɛ miiná nyɔmɔwoo, ni eebua yibii anaa kɛhã naanɔ wala, bɔ ni afee ni nidulɔ lɛ kɛ nikpalɔ lɛ fɛɛ anya.+ 37 Ejaakɛ enɛ gbɛfaŋ lɛ, wiemɔ ni awie lɛ ji anɔkwale akɛ: Mɔ kome ji nidulɔ lɛ, ni mɔ kroko ji nikpalɔ lɛ. 38 Mitsu nyɛ koni nyɛyakpa nɔ ni jeee nyɛ nyɛtsu he nɔ ko. Mɛi krokomɛi etsu nii lɛ, ni nyɛ lɛ, nyɛba nyɛmiiná amɛnitsumɔ lɛ he sɛɛ.”
39 Ni Samariabii ni jɛ nakai maŋ lɛ mli lɛ ateŋ mɛi babaoo ná hemɔkɛyeli yɛ emli yɛ yoo lɛ wiemɔ ni ekɛye amɛ odase akɛ: “Egba mi nibii fɛɛ ni mifee lɛ” hewɔ.+ 40 No hewɔ lɛ, be ni Samariabii lɛ ba eŋɔɔ lɛ, amɛkpa lɛ fai akɛ ekɛ amɛ ahi shi, ni ehi jɛmɛ gbii enyɔ. 41 Ni mɛi babaoo hu he amɛye yɛ nɔ ni Yesu wie lɛ hewɔ, 42 ni amɛkɛɛ yoo lɛ akɛ: “Jeee nɔ ni owie lɛ kɛkɛ hewɔ wɔheɔ wɔyeɔ dɔŋŋ; ejaakɛ wɔ diɛŋtsɛ wɔnu ni wɔná wɔle akɛ nuu nɛɛ ji je lɛ yiwalaherelɔ lɛ lɛɛlɛŋ.”+
43 Gbii enyɔ lɛ sɛɛ lɛ, eshi jɛmɛ ni etee Galilea. 44 Shi Yesu diɛŋtsɛ ye odase akɛ gbalɔ ko hiɛ bɛ nyam yɛ lɛ diɛŋtsɛ emaŋ.+ 45 No hewɔ lɛ, be ni eshɛ Galilea lɛ, Galileabii lɛ here lɛ, ejaakɛ amɛna nibii fɛɛ ni efee yɛ Yerusalem yɛ gbijurɔyeli lɛ mli lɛ,+ ejaakɛ amɛ hu amɛtee gbijurɔyeli lɛ eko.+
46 Kɛkɛ ni esaa eba Kana ni yɔɔ Galilea lɛ, he ni ehã nu tsɔ wain yɛ lɛ.+ Ni nuu ko yɛ Kapernaum ni sɔmɔɔ maŋtsɛ ko, ni nuu nɛɛ binuu bɛ hewalɛ. 47 Be ni nuu nɛɛ nu akɛ Yesu ejɛ Yudea eba Galilea lɛ, etee eŋɔɔ ni eyakpa lɛ fai akɛ ekpeleke shi kɛba ni ebatsa ebinuu lɛ, ejaakɛ eehe egbo. 48 Shi Yesu kɛɛ lɛ akɛ: “Kɛ́ nyɛnaaa okadii kɛ naakpɛɛ nii lɛ, nyɛheee nyɛyeee kɔkɔɔkɔ.”+ 49 Maŋtsɛ sɔɔlɔ lɛ kɛɛ lɛ akɛ: “Nuŋtsɔ, kpelekemɔ shi oba dani mibi lɛ agbo.” 50 Yesu kɛɛ lɛ akɛ: “Yaa; obinuu lɛ ená hewalɛ.”+ Nuu lɛ he wiemɔ ni Yesu kɛ lɛ wie lɛ eye ni etee. 51 Shi be ni ekpelekeɔ shi kɛyaa lɛ, enyɔji lɛ kɛ lɛ bakpe ni amɛkɛɛ lɛ akɛ ebinuu lɛ ená hewalɛ. 52 No hewɔ lɛ, ebi amɛ nɔ ŋmɛlɛtswaa nɔ ni ená hewalɛ lɛ. Ni amɛkɛɛ lɛ akɛ: “Nyɛ ni atridii lɛ tee, yɛ ŋmɛlɛtswaa ni ji kpawo* lɛ nɔ.” 53 Ni tsɛ lɛ na akɛ nakai ŋmɛlɛtswaa lɛ nɔŋŋ nɔ ni Yesu kɛɛ lɛ akɛ: “Obinuu lɛ ená hewalɛ” lɛ.+ No hewɔ lɛ, lɛ kɛ eshĩabii lɛ fɛɛ he amɛye. 54 Enɛ ji okadi ni ji enyɔ+ ni Yesu fee be ni ejɛ Yudea eba Galilea lɛ.