Ezekiel
47 Kɛkɛ ni ekɛ mi ku sɛɛ kɛba he ni atsɔɔ kɛboteɔ sɔlemɔ shĩa lɛ mli lɛ,+ ni mina ni nu ko miiho kɛmiijɛ sɔlemɔ shĩa lɛ shinaa lɛ shishi kɛmiiya bokãgbɛ,+ ejaakɛ sɔlemɔ shĩa lɛ hiɛ kwɛɔ bokãgbɛ. Nu lɛ miikpeleke shi kɛmiijɛ sɔlemɔ shĩa lɛ ninejurɔgbɛ lɛ shishi, yɛ afɔleshaa latɛ lɛ wuoyigbɛ.
2 Kɛkɛ ni ekɛ mi tsɔ gbɛ ni yaa kooyigbɛ agbó lɛ mli+ lɛ nɔ kɛje kpo, ni ekɛ mi tee agbó lɛ naa, ni ekɛ mi lɔgɔ kɛba kponɔgbɛ agbó lɛ ni hiɛ kwɛɔ bokãgbɛ lɛ naa,+ ni mina ni nu miitsere kɛmiijɛ ninejurɔgbɛ.
3 Be ni nuu lɛ je kpo kɛtee bokãgbɛ kɛ susumɔ kpãa ni ehiɛ lɛ,+ esusu ninetalɔi* 1,000, ni ehã mitsɔ nu lɛ mli; nu lɛ ta minanetokota he.
4 Kɛkɛ ni esusu 1,000 ekoŋŋ ni ehã mitsɔ nu lɛ mli, ni eta minakutsei anaa.
Esusu 1,000 ekoŋŋ ni ehã mitsɔ mli, ni nu lɛ ta mihɛ.
5 Be ni esusu 1,000 ekoŋŋ lɛ, etsɔ faa ni minyɛɛɛ matsɔ mli, ejaakɛ nu lɛ mli kwɔ aahu akɛ ja asere, ejeee faa ni abaanyɛ anyiɛ kɛtsɔ mli kɛfo.
6 Ebi mi akɛ: “Gbɔmɔ bi,* ona enɛ?”
Kɛkɛ ni ehã minyiɛ kɛku misɛɛ kɛba faa lɛ naa. 7 Be ni miku misɛɛ miba lɛ, mina akɛ tsei babaoo diɛŋtsɛ mamɔ faa lɛ toi biɛ kɛ biɛ.+ 8 Kɛkɛ ni ekɛɛ mi akɛ: “Nu nɛɛ hoɔ kɛyaa bokãgbɛ kpokpaa lɛ nɔ, ni ekpelekeɔ shi kɛtsɔɔ Araba*+ lɛ nɔ ni eyaboteɔ ŋshɔ lɛ mli. Kɛ́ ebote ŋshɔ lɛ mli lɛ,+ ebaahã emli nu lɛ aná hewalɛ.* 9 He fɛɛ he ni nui* lɛ baaho kɛya lɛ, bɔɔ nii* ni hiɛ kamɔ baanyɛ ahi jɛmɛ. Akɛni nu nɛɛ baaho kɛya jɛmɛ hewɔ lɛ, loi babaoo diɛŋtsɛ baahi jɛmɛ. Ŋshɔ nu lɛ baaná hewalɛ, ni he fɛɛ he ni faa lɛ baaya lɛ, nɔ fɛɛ nɔ ni yɔɔ jɛmɛ lɛ baahi wala mli.
10 “Wolɛi baabadamɔ he kɛjɛ En-gedi+ aahu kɛyashi En-eglaim tɔ̃ɔ, he ni abaaná he ko ni akaa yaa* yɛ lɛ. Loi srɔtoi babaoo diɛŋtsɛ baaba mli, tamɔ Ŋshɔ Wulu*+ lɛ mli loi lɛ.
11 “Ebaaná hei ni nui taraa kɛ hei ni ŋmɔtɔ yɔɔ, ni ahãŋ enɛɛmɛi aná hewalɛ. Abaashi ni amɛtsɔmɔ ŋoo sɔŋŋ.+
12 “Tsei srɔtoi fɛɛ ni ayeɔ amɛnɔ yibii lɛ baakwɛ̃ yɛ faa lɛ toi biɛ kɛ biɛ. Amɛnɔ bai gbiŋ; ni amɛkpaŋ yibiiwoo. Daa nyɔɔŋ lɛ, amɛbaawo yibii hee, ejaakɛ nu ni amɛnáa lɛ jɛɔ jamɔhe lɛ.+ Amɛyibii lɛ baatsɔmɔ niyenii, ni akɛ amɛnɔ bai lɛ baatsa hela.”+
13 Nɔ ni Nuŋtsɔ Ofe Yehowa kɛɛ nɛ: “Shikpɔŋ nɛɛ ji shikpɔŋ ni okɛbaahã Israel wekui 12 lɛ akɛ amɛgboshinii lɛ, ni Yosef baaná gbɛfaŋnɔ enyɔ yɛ mli.+ 14 Ebaatsɔ nyɛnɔ, ni nyɛbaaja lɛ pɛpɛɛpɛ.* Mikã nyɛtsɛmɛi lɛ kitã akɛ mikɛ shikpɔŋ nɛɛ baahã amɛ,+ ni amrɔ nɛɛ mikɛhã nyɛ* akɛ nyɛgboshinii.
15 “Shikpɔŋ lɛ husu yɛ kooyigbɛ nɛ: Ejeɔ shishi kɛjɛɔ Ŋshɔ Wulu lɛ he kɛtsɔɔ Hetlon,+ kɛyaa Zedad,+ 16 kɛ Hamat,+ kɛ Berota,+ kɛ Sibraim, ni kã Damasko kpokpaa lɛ kɛ Hamat kpokpaa lɛ teŋ lɛ, kɛyashi Hazer-hatikon, ni yɔɔ Hauran+ husu lɛ naa lɛ. 17 No hewɔ lɛ, husu lɛ baajɛ ŋshɔ lɛ naa kɛya Hazar-enon,+ kɛtsɔ Damasko husu lɛ naa kɛya kooyigbɛ, kɛyamɔ Hamat+ husu lɛ. Enɛ ji kooyigbɛ husu lɛ.
18 “Bokãgbɛ husu lɛ baajɛ Hauran kɛ Damasko teŋ kɛ agbɛnɛ hu, yɛ Yordan lɛ he yɛ Gilead+ kɛ Israel shikpɔŋ lɛ teŋ. Nyɛsusua kɛjɛa husu lɛ naa kɛyaa bokãgbɛ ŋshɔ* lɛ he.
19 “Wuoyigbɛ husu* lɛ baajɛ Tamar kɛtsɔ Meribat-kadesh+ nui lɛ ahe, kɛyamɔ Nujɔɔ* lɛ, kɛya Ŋshɔ Wulu lɛ he.+ Enɛ ji wuoyigbɛ husu* lɛ.
20 “Anaigbɛ husu lɛ ji Ŋshɔ Wulu lɛ, kɛjɛ nakai husu lɛ naa aahu kɛyashi he ko ni hiɛ kwɛɔ Lebo-hamat.*+ Enɛ ji anaigbɛ husu lɛ.”
21 “Nyɛjaa shikpɔŋ nɛɛ nyɛhãa nyɛhe yɛ Israel wekui 12 lɛ anaa. 22 Nyɛjaa nyɛhãa nyɛhe kɛ gbɔi ni yɔɔ nyɛteŋ ni efɔ bii yɛ nyɛteŋ lɛ akɛ gboshinii; ni gbɔi nɛɛ baatsɔmɔ tamɔ Israel fɔmɔbii nɔŋŋ yɛ nyɛteŋ. Amɛ kɛ nyɛ fɛɛ baaná gboshinii yɛ Israel wekui lɛ amli. 23 Israel weku ni gbɔ lɛ bahi mli lɛ, nakai weku lɛ shikpɔŋ lɛ mli nɔŋŋ nyɛjɛa nyɛhãa gbɔ lɛ gboshinii,” Nuŋtsɔ Ofe Yehowa kɛɛ.