Jalɔi Ashitee Baaba
“Ni miyɛ Nyɔŋmɔ nɔ hiɛnɔkamɔ, akɛ gbohiiashitee baaba, ni jalɔi kɛ mɛi ni ejaaa fɛɛ baate shi.”—BƆFOI LƐ ASAJI 24:15.
1. Mɛɛ shihilɛ ebaka adesai fɛɛ nɔ, kɛjɛ be mli ni Adam kɛ Hawa fee esha nɛɛ?
“NƆ FƐƐ nɔ tsumɔ ni onine aaashɛ nɔ lɛ, okɛ ohewalɛ atsu; ejaakɛ nitsumɔ loo yiŋshwiemɔ loo nilee loo ŋaa ko bɛ gbohiiaje he ni oyaa lɛ.” (Jajelɔ 9:10) Maŋtsɛ Salomo nilelɔ lɛ kɛ nɛkɛ wiemɔi fioo ni ehala jogbaŋŋ nɛɛ tsɔɔ shihilɛ ni adesai ayinɔ fɛɛ yinɔ kɛkpe aahu kɛjɛ be mli ni wɔ klɛŋklɛŋ fɔlɔi, Adam kɛ Hawa gbee esha mli lɛ mli kɛbaa nɛɛ mli. Yɛ naagbee lɛ, gbele miɔ mɔ fɛɛ mɔ ni mɔ ko kwraa ejieee ehe yɛ mli—niiatsɛ kɛ ohiafo, maŋtsɛ kɛ maŋnyo folo, mɔ ni heɔ yeɔ kɛ mɔ ni heee yeee fɛɛ. Eji anɔkwale akɛ gbele ‘eye maŋtsɛ.’—Romabii 5:17.
2. Mɛni hewɔ anɔkwafoi komɛi ahiɛnɔkamɔ baanyɛ afee efolo yɛ naagbee be nɛɛ mli lɛ?
2 Yɛ hiɛyaa ni eba yɛ tsofafeemɔ mli nilee gbɛfaŋ nyɛsɛɛ nɛɛ lɛ fɛɛ sɛɛ lɛ, gbele kã he eeye maŋtsɛ lolo ŋmɛnɛ po. Eyɛ mli akɛ enɛ bɛ naakpɛɛ moŋ, shi ekolɛ mɛi komɛi anijiaŋ jeɔ wui kɛ amɛkɛ henyɛlɔ ni ehi shi kɛjɛ jeeŋmɔ beebe nɛɛ kpe. Mɛni hewɔ? Ojogbaŋŋ, mra mli yɛ 1920 afii lɛ amli lɛ, Buu Mɔɔ Asafo lɛ jaje shɛɛ sane nɛɛ etsɔɔ, akɛ, “Akpekpei Abɔ ni Yɔɔ Wala Mli Bianɛ lɛ Gboiŋ Kɔkɔɔkɔ.” Namɛi nɛkɛ akpekpei abɔ nɛɛ baaji? “Gwantɛŋi” ni awie amɛhe yɛ Yesu abɛbua ni kɔɔ gwantɛŋi kɛ abotiai ahe lɛ mli lɛ ni. (Mateo 25:31-46) Agba akɛ mɛi ni tamɔ gwantɛŋi nɛɛ baapue yɛ naagbee be lɛ mli, ni amɛ hiɛnɔkamɔ baafee naanɔ wala yɛ paradeiso shikpɔŋ nɔ. Beni be shwieɔ mli lɛ, Nyɔŋmɔ webii bana shishinumɔ ni mli ka shi jogbaŋŋ yɛ “gwantɛŋi” nɛɛ agbɛhe yɛ Yehowa yiŋtoi amli lɛ he. Ayoo akɛ, abaajie nɛkɛ toibolɔi nɛɛ kɛjɛ “abotiai” ni tsuii wa waa lɛ ahe, ni yɛ be mli ni akpata sɛɛkpee bii nɛɛ ahiɛ sɛɛ lɛ, gwantɛŋi lɛ anine baashɛ Maŋtsɛyeli lɛ nɔyeli he ni yɔɔ shikpɔŋ nɛɛ nɔ, ni asaa ato amɛ lɛ nɔ.
Mɛi ni Tamɔ Gwantɛŋi lɛ Anaabuamɔ
3. Kɛjɛ 1935 kɛbaa nɛɛ, mɛni Nyɔŋmɔ webii kɛ amɛjwɛŋmɔ ema nɔ?
3 Kɛjɛ 1935 shishijee mli kɛbaa nɛɛ, ‘tsulɔ anɔkwafo’ lɛ egbala ejwɛŋmɔ fɛɛ ema “gwantɛŋi” lɛ ataomɔ nɔ, ni ekɛ amɛ miiba Yehowa gbɛjianɔtoo lɛ mli. (Mateo 24:45; Yohane 10:16) Nɛkɛ Kristofoi ni anyɛɔ atsɔɔ amɛ nii nɛɛ ebayoo akɛ Yesu miiye maŋtsɛ yɛ Yehowa ŋwɛi Maŋtsɛyeli lɛ mli amrɔ nɛɛ, ni nibii agbɛjianɔtoo nɛɛ naagbee be lɛ kɛ be ni akɛ jeŋ hee ni jalɛ hiɔ mli lɛ baaba lɛ miibɛŋkɛ kɛ foi. (2 Petro 3:13; Kpojiemɔ 12:10) Yesaia wiemɔi ni haa mɔ tsui nyaa nɛɛ baaba mli yɛ nakai jeŋ hee lɛ mli: “Eeemi gbele kɛaatee naanɔ.”—Yesaia 25:8.
4. Eyɛ mli akɛ amɛhiɛnɔkamɔ yɛ anɔkwayeli mli ji ni amɛna akɛ abu maŋtsɛ ni Yehowa ji lɛ bem yɛ Harmagedon moŋ, shi mɛni eba tooi krokomɛi lɛ ateŋ mɛi pii anɔ?
4 Akɛni Satan je lɛ naagbee lɛ ebɛŋkɛ kpaakpa kwraa hewɔ lɛ, Kristofoi ni tamɔ gwantɛŋi lɛ baasumɔ waa ni amɛna shihilɛ mli ŋɔɔmɔ, kɛyashi be mli ni aaabu maŋtsɛ ni Yehowa ji lɛ bem yɛ naagbee amanehulu ni akɛbaaba Babilon Kpeteŋkpele lɛ kɛ Satan je lɛ ni eshwɛ lɛ anɔ lɛ mli. (Kpojiemɔ 19:1-3, 19-21) Mɛi babaoo diɛŋtsɛ ji mɛi ni ebako lɛ nakai yɛ amɛ gbɛfaŋ. Mɛi ni hiɛ ka nɔ akɛ amɛbaafata mɛi “akpekpei” abɔ ni gboiŋ kɔkɔɔkɔ lɛ ahe lɛ ateŋ mɛi babaoo egboi. Mɛi komɛi lɛ, agbe amɛ akɛ lá odasefoi yɛ anɔkwale lɛ hewɔ yɛ tsuŋwoo mli loo gbokɛlɛfoi aŋsarai amli, aloo yɛ mɛi ni eye jamɔ he sɛkɛ lɛ adɛŋ. Mɛi krokomɛi hu egboi yɛ osharai amli aloo kɛtsɔ nɔ ni atsɛɔ amɛ adebɔɔ mli nibii lɛ anɔ—hela kɛ gbɔlɛ hewɔ. (Lala 90:9, 10; Jajelɔ 9:11) Eyɛ faŋŋ akɛ, mɛi babaoo baagboi dani naagbee lɛ baashɛ. Te nɛkɛ gbɔmɛi nɛɛ aaafee tɛŋŋ ana jeŋ hee ni jalɛ baahi mli lɛ he shiwoo lɛ mlibaa hu?
Gbohiiashitee He Hiɛnɔkamɔ Lɛ
5, 6. Mɛɛ wɔsɛɛ be yɔɔ kɛha mɛi ni yɔɔ shikpɔŋ nɔ hiɛnɔkamɔ ni gboiɔ dani Harmagedon baa lɛ?
5 Bɔfo Paulo ha hetoo beni ewieɔ yɛ Roma amralo Felike hiɛ lɛ. Taakɛ aŋma yɛ Bɔfoi lɛ Asaji 24:15 lɛ, Paulo kɛ ekãa jaje akɛ: “Miyɛ Nyɔŋmɔ nɔ hiɛnɔkamɔ, akɛ gbohiiashitee baaba, ni jalɔi kɛ mɛi ni ejaaa fɛɛ baate shi.” Gbohiiashitee hiɛnɔkamɔ lɛ woɔ wɔ ekãa waa yɛ be mli ni wɔkɛ jaramɔ shihilɛi ni ehiii kwraa kpeɔ lɛ. Yɛ nakai hiɛnɔkamɔ lɛ hewɔ lɛ, wɔnanemɛi ni wɔsumɔɔ waa, ni helai mɔmɔɔ amɛ, ni amɛnuɔ he akɛ amɛbaagboi lɛ anijiaŋ ejeee wui yɛ enɛ he fe nine. Bɔ fɛɛ bɔ ni nibii aaaba lɛ aha lɛ, amɛle akɛ amɛnine baashɛ anɔkwayeli he nyɔmɔwoo lɛ nɔ. Gbohiiashitee hiɛnɔkamɔ lɛ hewɔ lɛ, wɔnyɛmimɛi hii kɛ yei ekãalɔi ni kɛ gbele kpeɔ yɛ yiwalɔi adɛŋ lɛ le akɛ, gbɛ ko kwraa bɛ ni mɛi ni waa amɛyi lɛ baatsɔ nɔ aye amɛnɔ kunim. (Mateo 10:28) Kɛji mɔ ko ni yɔɔ asafo lɛ mli gbo lɛ, wɔyeɔ awerɛho waa akɛ wɔlaaje nakai mɔ lɛ. Shi yɛ nakai beaŋ nɔŋŋ hu lɛ, kɛji nakai mɔ lɛ ji tooi krokomɛi lɛ ateŋ mɔ ko lɛ, wɔnaa miishɛɛ waa akɛ wɔnaanyo heyelilɔ lɛ eye anɔkwa aahu kɛyashi naagbee tɔ̃ɔ, ni amrɔ nɛɛ eejɔɔ ehe, kɛ nɔmimaa akɛ eyɛ wɔsɛɛ be ko yɛ Nyɔŋmɔ jeŋ hee lɛ mli.—1 Tesalonikabii 4:13.
6 Hɛɛ, gbohiiashitee hiɛnɔkamɔ lɛ ji wɔhemɔkɛyeli lɛ fã ko ni he hiaa waa. Shi, mɛni hewɔ gbohiiashitee lɛ mli hemɔkɛyeli ni wɔyɔɔ lɛ mli wa waa nakai lɛ, ni namɛi hu yɔɔ nakai hiɛnɔkamɔ lɛ?
7. Mɛni ji gbohiiashitee lɛ, ni mɛɛ ŋmalɛi komɛi maa bɔ ni ebaaba mli anɔkwale eha lɛ nɔ mi?
7 Hela wiemɔ kɛha “gbohiiashitee” ji a·naʹsta·sis, ni eshishinumɔ diɛŋtsɛ ji “ni aaate shi adamɔ shi.” Klɛŋklɛŋ lɛ ekɔɔ shitee kɛmiijɛ gbohii ateŋ lɛ he. Nɔ ni yɔɔ miishɛɛ ji akɛ, wiemɔ, “gbohiiashitee” lɛ diɛŋtsɛ ejeee kpo kwraa yɛ Hebri Ŋmalɛi lɛ amli, shi kɛlɛ, awie gbohiiashitee hiɛnɔkamɔ lɛ he faŋŋ yɛ mli. Akɛ nɔkwɛmɔ nɔ lɛ, wɔnaa enɛ yɛ wiemɔi ni Hiob wie beni enaa amanehulu lɛ mli, akɛ: “Mina ni kulɛ oŋɔ mi otee yɛ gbohiiaje . . . ni oto be oha mi ni okai mi!” (Hiob 14:13) Nakai nɔŋŋ hu, wɔkaneɔ yɛ Hoshea 13:14 akɛ: “Makpɔ̃ amɛ kɛaajɛ gbohiiaje dɛŋ, majie amɛ kɛaajɛ gbele mli! Gbele, nɛgbɛ otsɛŋemɔ hela lɛ yɔɔ? Gbohiiaje, nɛgbɛ ogbele hela lɛ yɔɔ?” Yɛ 1 Korintobii 15:55 lɛ, bɔfo Paulo kɛ nɛkɛ wiemɔi nɛɛ to gbele nɔ kunim ni abaaye, ni abaatsu he nii kɛtsɔ gbohiiashitee nɔ lɛ he. (No mli lɛ Paulo miiwie ŋwɛi shitee lɛ he yɛ nakai ŋmalɛ lɛ mli.)
“Abuɔ” Heyelilɔi lɛ “Jalɔi”
8, 9. (a) Te aaafee tɛŋŋ ni adesai ni yeee emuu aaana jalɔi ashitee lɛ mli gbɛfaŋnɔ? (b) Wɔ hiɛnɔkamɔ yɛ wala ni gbele efoŋ sɛɛ lɛ mli lɛ damɔ mɛni nɔ?
8 Beni ewieɔ yɛ Felike hiɛ, taakɛ áwie he yɛ kuku 5 lɛ, Paulo wie akɛ jalɔi kɛ mɛi ni ejaaa fɛɛ baana gbohiiashitee. Namɛi ji jalɔi ni abaatee amɛ shi lɛ? Ojogbaŋŋ, adesa ko kwraa bɛ ni ji jalɔ yɛ adebɔɔ su naa. Eshafeelɔi ji wɔ fɛɛ kɛjɛ fɔmɔ mli, ni wɔfeɔ eshai aahu wɔwala bei abɔ fɛɛ—ni enɛ haa wɔfeɔ mɛi ni sa gbele yɛ fɔbuu sɔrɔtoi enyɔ hewɔ. (Romabii 5:12; 6:23) Shi kɛlɛ, wɔnaa wiemɔ “abu amɛ jalɔi” yɛ Biblia lɛ mli. (Romabii 3:28) Enɛ kɔɔ adesai ni, eyɛ mli akɛ amɛyeee emuu moŋ, shi Yehowa kɛ amɛhe eshai eke amɛ lɛ ahe.
9 Akɛ wiemɔ nɛɛ tsuɔ nii waa yɛ Kristofoi ni afɔ amɛ mu, ni yɔɔ ŋwɛi hiɛnɔkamɔ lɛ ahe. Paulo kɛɔ, yɛ Romabii 5:1 lɛ akɛ: “Agbɛnɛ, akɛ nɔ ni atsɔ hemɔkɛyeli nɔ abu wɔ bem hewɔ lɛ, wɔkɛ Nyɔŋmɔ teŋ yɛ hejɔlɛ yɛ wɔ-Nuntsɔ Yesu Kristo hewɔ.” Abuɔ Kristofoi ni afɔ amɛ mu lɛ fɛɛ jalɔi yɛ hemɔkɛyeli hewɔ. Hemɔkɛyeli yɛ mɛni mli? Taakɛ Paulo tsɔɔ mli kɛtee hiɛ saŋŋ yɛ Romabii awolo lɛ mli lɛ, no ji Yesu Kristo mli hemɔkɛyeli. (Romabii 10:4, 9, 10) Yesu gbo akɛ gbɔmɔ ni eye emuu, ni no sɛɛ lɛ atee lɛ shi kɛjɛ gbohii ateŋ, ni ekwɔ kɛtee ŋwɛi koni ekɛ ewala akɛ adesa lɛ jarawalɛ lɛ ayaha yɛ jɛmɛ yɛ wɔ hewɔ. (Hebribii 7:26, 27; 9:11, 12) Beni Yehowa kpɛlɛ nakai afɔleshaa lɛ nɔ lɛ, no batsɔɔ akɛ Yesu ehe adesai aweku lɛ kɛjɛ esha kɛ gbele nyɔŋyeli mli. Mɛi ni tsɔɔ gbɛjianɔtoo nɛɛ mli hemɔkɛyeli lɛ naa he sɛɛ babaoo. (1 Korintobii 15:45) Yɛ nɔdaamɔ nɔ nɛɛ naa lɛ, hii kɛ yei anɔkwafoi yɛ hiɛnɔkamɔ akɛ amɛnine baashɛ wala ní amɛhenyɛlɔ ni ehiii fe fɛɛ, gbele nyɛŋ afo sɛɛ lɛ nɔ.—Yohane 3:16.
10, 11. (a) Mɛɛ shitee mɛɔ Kristofoi anɔkwafoi ni afɔ amɛ mu lɛ? (b) Mɛɛ shitee nɛkɛ jálɔi ni tsɔ Kristofoi abe lɛ hiɛ lɛ kpa gbɛ?
10 Kɛtsɔ Yesu kpɔmɔ afɔleshaa lɛ nɔ lɛ, anɔkwafoi ni afɔ amɛ mu, ni abu amɛ jalɔi lɛ, yɛ hiɛnɔkamɔ ni ma shi shiŋŋ akɛ abaatee amɛ shi akɛ mumɔŋ bɔɔ nii ni gbooo dɔŋŋ, tamɔ Yesu. (Kpojiemɔ 2:10) Atsĩɔ amɛ shitee lɛ ta yɛ Kpojiemɔ 20:6, ni kɛɔ akɛ: “Mɔ ni ajɔɔ kɛ mɔ krɔŋkrɔŋ ji mɔ ni aaana gbɛnaa yɛ klɛŋklɛŋ shitee lɛ mli lɛ; gbele ni ji enyɔ lɛ bɛ hewalɛ ko yɛ nakai mɛi lɛ anɔ; shi moŋ amɛaatsɔ Nyɔŋmɔ kɛ Kristo osɔfoi, ni amɛkɛ lɛ aaaye maŋtsɛ afii akpe.” Enɛ ji ŋwɛi gbohiiashitee lɛ. Shi, kadimɔ akɛ, Biblia lɛ tsɛɔ lɛ akɛ “klɛŋklɛŋ shitee lɛ,” ni tsɔɔ akɛ babaoo yɛ lolo ni baaba.
11 Paulo wie Nyɔŋmɔ tsuji anɔkwafoi babaoo, ni hi shi dani Kristofoi abe lɛ shɛ, ni jie hemɔkɛyeli ni mli wa kpo yɛ Yehowa Nyɔŋmɔ mli lɛ ahe yɛ Hebribii yitso 11. Mɛnɛɛmɛi hu ná hemɔkɛyeli yɛ gbohiiashitee ko mli. Yɛ nakai yitso lɛ kuku 35 lɛ, Paulo wie naakpɛɛ gbohiiashitee ko ni ba yɛ Israel yinɔsane be mli lɛ he, ni ekɛɛ: “Yei anine shɛ amɛmɛi ni egboi lɛ anɔ ekoŋŋ kɛtsɔ shitee nɔ. Shi mɛi krokomɛi hu, akɛ piŋmɔ gbe amɛ, ni amɛkpɛlɛɛɛ kpɔmɔ, koni amɛnine ashɛ shitee ni hi fe no lɛ nɔ.” Nakai blema odasefoi anɔkwafoi lɛ baanyɛ akpa gbohiiashitee ni hi kwraa fe nɔ ni, ákɛ nɔkwɛmɔ nɔ lɛ, ekɔɔ Elia kɛ Elisha he lɛ gbɛ. (1 Maŋtsɛmɛi 17:17-22; 2 Maŋtsɛmɛi 4: 32-37; 13:20, 21) Amɛ hiɛnɔkamɔ yɛ gbohiiashitee kɛmiiba jeŋ ko ni awaŋ Nyɔŋmɔ tsuji ayi yɛ amɛ hemɔkɛyeli hewɔ, jeŋ ni yei elaajeee amɛmɛi ni amɛsumɔɔ amɛ lɛ yɛ gbele mli dɔŋŋ lɛ mli. Hɛɛ, amɛkpa gbɛ akɛ amɛbaate shi kɛjɛ gbohii ateŋ kɛba jeŋ koome ni wɔ hu wɔkpaa gbɛ lɛ nɔŋŋ mli. (Yesaia 65:17-25) Yehowa ejieko jeŋ hee nɛɛ he saji babaoo etsɔko amɛ tamɔ bɔ ni efee kɛha wɔ lɛ. Shi kɛlɛ, amɛle akɛ eeba, ni amɛmiitao ni amɛhi mli.
Shikpɔŋ nɔ Shitee Lɛ
12. Ani abu anɔkwafoi ni hi shi dani Kristofoi abe lɛ shɛ lɛ jalɔi? Tsɔɔmɔ mli.
12 Ani esa akɛ wɔsusu hii kɛ yei anɔkwafoi ni hi shi dani Kristofoi abe lɛ shɛ lɛ ashitee yɛ nakai jeŋ hee lɛ mli lɛ he akɛ eji jalɔi lɛ agbohiiashitee lɛ fã? Eka shi faŋŋ akɛ, hɛɛ, ejaakɛ Biblia lɛ wieɔ amɛhe akɛ jalɔi. Akɛ nɔkwɛmɔ nɔ lɛ, kaselɔ Yakobo tsi nuu kɛ yoo ko ni hi shi yɛ blema beaŋ ni abu amɛ jalɔi lɛ ata. Nuu lɛ ji Abraham, mɔ ni eshwiei ji Hebribii aweku muu lɛ fɛɛ lɛ. Wɔkaneɔ yɛ ehe akɛ: “ ‘Abraham he Nyɔŋmɔ eye, ni abu enɛ jalɛ aha lɛ,’ . . . ni atsɛ lɛ akɛ ‘[Yehowa] Nyɔŋmɔ shieŋtsɛ.’ ” Yoo lɛ ji Rahab, mɔ ni jeee Israelnyo, shi ená hemɔkɛyeli yɛ Yehowa mli, ni “abu lɛ jalɔ” ni ebatsɔ Hebri maŋ lɛ fã lɛ. (Yakobo 2:23-25) No hewɔ lɛ, Yehowa bu hii kɛ yei ni hi shi yɛ blema beaŋ, ni na hemɔkɛyeli ni mli wa yɛ Yehowa kɛ eshiwoi amli, ni amɛye anɔkwa aahu kɛyashi gbele mli tɔ̃ɔ lɛ jalɔi, yɛ amɛ hemɔkɛyeli lɛ hewɔ, ni ŋwanejee ko kwraa bɛ he akɛ amɛbaaná ‘jalɔi lɛ agbohiiashitee’ lɛ mli gbɛfaŋnɔ.
13, 14. (a) Te wɔfeɔ tɛŋŋ wɔleɔ akɛ abaanyɛ abu Kristofoi ni yɔɔ shikpɔŋ nɔ hiɛnɔkamɔ lɛ jalɔi? (b) Mɛni enɛ tsɔɔ kɛhaa amɛ?
13 Shi, aŋkroaŋkroi ni tamɔ gwantɛŋi ni yɔɔ ŋmɛnɛ, mɛi ni yɔɔ shikpɔŋ nɔ hiɛnɔkamɔ, ni amɛjɔɔ amɛhe nɔ amɛha Yehowa, ni gboiɔ yɛ anɔkwayeli mli yɛ naagbee be nɛɛ mli lɛ hu? Ani amɛbaana jalɔi agbohiiashitee lɛ mli gbɛfaŋnɔ? Eka shi faŋŋ akɛ hɛɛ. Bɔfo Yohane na anɔkwafoi nɛɛ asafo babaoo ko yɛ ninaa mli. Kadimɔ bɔ ni etsɔɔ bɔ ni amɛji lɛ mli eha nɛɛ: “Nii nɛɛ asɛɛ lɛ mikwɛ, ni naa, asafo babaoo ni mɔ ko mɔ ko nyɛŋ akane, ni jɛ jeŋmaŋ fɛɛ jeŋmaŋ kɛ akutsei kɛ maji kɛ maji anɔ wiemɔi amli damɔ maŋtsɛsɛi lɛ hiɛ kɛ Toobi lɛ hiɛ, ni amɛwo atadei yɛji, ni amɛhiɛ blɛoi yɛ amɛdɛŋ. Ni amɛbolɔ kɛ gbee waa amɛkɛɛ: ‘Yiwalaheremɔ lɛ ji wɔ-Nyɔŋmɔ ni ta maŋtsɛsɛi lɛ nɔ lɛ, kɛ Toobi lɛ nɔ!’”—Kpojiemɔ 7:9, 10.
14 Kadimɔ akɛ nɛkɛ heshibalɔi nɛɛ yɛ nɔmimaa yɛ amɛ yiwalaheremɔ he, ni amɛkɛɔ akɛ enɛ jɛ Yehowa kɛ Yesu ni ji “Toobi lɛ.” Agbɛnɛ hu, amɛdamɔ Yehowa kɛ Toobi lɛ hiɛ, ni amɛ fɛɛ amɛwo atadei yɛji. Mɛni hewɔ amɛwo atadei yɛji lɛ? Ŋwɛi bɔɔ nɔ ko kɛɛ Yohane akɛ: “Amɛfɔ amɛtadei lɛ ahe, ni amɛha eyɛ futaa yɛ Toobi lɛ la lɛ mli.” (Kpojiemɔ 7:14) Yɛ Biblia lɛ mli lɛ, futaa feɔ krɔŋŋfeemɔ, kɛ jalɛ he okadi. (Lala 51:9; Daniel 12:10; Kpojiemɔ 19:8) Anɔkwale ni eji akɛ ana asafo babaoo lɛ yɛ ninaa mli ni amɛwo atadei yɛji lɛ tsɔɔ akɛ, Yehowa buɔ amɛ jalɔi. Enɛ baa lɛ nakai yɛ mɛɛ gbɛ nɔ? Ejaakɛ, amɛfɔ amɛtadei lɛ ahe yɛ Toobi lɛ la lɛ mli, yɛ mfoniri-feemɔŋ shishinumɔ naa. Amɛtsɔɔ Yesu Kristo la ni efɔse eshwie shi lɛ mli hemɔkɛyeli, ni abuɔ amɛ jalɔi akɛ Nyɔŋmɔ shieŋtsɛmɛi, kɛ shishinumɔ akɛ amɛbaaná yibaamɔ kɛfo amanehulu kpeteŋkpele lɛ. No hewɔ lɛ, Kristofoi anɔkwafoi “asafo babaoo” lɛ ateŋ mɔ fɛɛ mɔ ni kɛ gbele kpeɔ dani amanehulu kpeteŋkpele lɛ baa lɛ baanyɛ ana nɔmimaa akɛ ebaana jalɔi agbohiiashitee kɛmiiba shikpɔŋ nɔ lɛ mli gbɛfaŋnɔ.
15. Akɛni abaatee jalɔi kɛ mɛi ni ejaaa fɛɛ shi hewɔ lɛ, mɛɛ sɛɛnamɔ yɔɔ jalɔi ashitee lɛ mli?
15 Atsɔɔ nakai gbohiiashitee lɛ mli yɛ Kpojiemɔ yitso 20, kuku 13, yɛ nɛkɛ wiemɔi nɛɛ amli: “Ni ŋshɔ jie gbohii ni yɔɔ emli lɛ eha, ni gbele kɛ gbohiiaje jie gbohii ni yɔɔ amɛmli lɛ amɛha, ni akojo amɛ, mɔ fɛɛ mɔ bɔ ni sa enitsumɔi lɛ.” Enɛ hewɔ lɛ, yɛ Yehowa afii akpe Kojomɔ Gbi kpeteŋkpele lɛ mli lɛ, abaatee mɛi fɛɛ ni yɔɔ Nyɔŋmɔ kaimɔ mli lɛ ashi—jalɔi kɛ mɛi ni ejaaa fɛɛ. (Bɔfoi lɛ Asaji 17:31) Shi, kwɛ bɔ ni ebaahi jogbaŋŋ kɛha jalɔi lɛ! Amɛhi shi momo akɛ mɛi ni yɔɔ hemɔkɛyeli. Amɛkɛ Yehowa yɛ wekukpaa ni bɛŋkɛ kpaakpa momo, ni amɛyɛ hekɛnɔfɔɔ akɛ ebaatsu eyiŋtoi ahe nii. Odasefoi ni ji jalɔi, ni hi shi dani Kristofoi a-Be lɛ ba lɛ baate shi kɛjɛ gbele mli, kɛ gbɛkpamɔ ni mli wa akɛ amɛaale bɔ ni aha Yehowa shiwoi ni kɔɔ Seshi lɛ he lɛ ba mli ha. (1 Petro 1:10-12) Mɛi ni fata tooi krokomɛi lɛ ahe, ni Yehowa buɔ amɛ jalɔi yɛ wɔgbii nɛɛ amli lɛ baaje kpo kɛjɛ gbonyo bu mli, kɛ gbɛkpamɔ akɛ, amɛaana Paradeiso shikpɔŋ ni amɛwie he beni amɛjajeɔ sanekpakpa lɛ amɛtsɔɔ yɛ nibii agbɛjianɔtoo nɛɛ mli lɛ. Mɛɛ miishɛɛ be eeeji nɛkɛ!
16. Mɛni wɔbaanyɛ wɔwie yɛ mɛi ni gboiɔ yɛ wɔbe nɛɛ mli lɛ ashitee yɛ Kojomɔ Gbi lɛ nɔ lɛ he?
16 Mɛɛ be pɔtɛɛ abaatee mɛi ni gboi akɛ anɔkwafoi, yɛ Satan nibii agbɛjianɔtoo nɛɛ naagbee gbii nɛɛ amli lɛ ashi, yɛ nakai afii akpe Kojomɔ Gbi lɛ nɔ? Biblia lɛ etsɔɔɔ. Shi kɛlɛ, ani shishinumɔ bɛ mli akɛ aaasusu akɛ abaatee mɛi ni abu amɛ jalɔi ni gboiɔ yɛ wɔgbii nɛɛ amli lɛ ashi mra, bɔni afee ni amɛkɛ asafo babaoo ni ji mɛi ni baafo Harmagedon lɛ abana yinɔi ni tsɔ hiɛ lɛ ni ateeɔ amɛ shi kɛjɛɔ gbohii ateŋ ni ahereɔ amɛ atuu lɛ mli gbɛfaŋnɔ? Hɛɛ, shishinumɔ yɛ mli diɛŋtsɛ!
Hiɛnɔkamɔ ni Shɛjeɔ Mɔ Mii
17, 18. (a) Mɛɛ miishɛjemɔ gbohiiashitee hiɛnɔkamɔ lɛ kɛhaa? (b) Enɛ tsirɛɔ wɔ ni wɔjaje mɛni yɛ Yehowa he?
17 Gbohiiashitee hiɛnɔkamɔ lɛ kɛ hewalɛwoo kɛ miishɛjemɔ haa Kristofoi fɛɛ ŋmɛnɛ. Kɛ wɔtee nɔ wɔye anɔkwa lɛ, no lɛ be kɛ nibii ni baa trukaa ni wɔleee, loo henyɛlɔ ko kwraa hu bɛ ni baanyɛ ashɔ wɔ nyɔmɔwoo lɛ kɛjɛ wɔdɛŋ! Akɛ nɔkwɛmɔ nɔ lɛ, wɔnaa mfonirii komɛi ni kɔɔ Kristofoi ni yɔɔ ekãa, ni jɛ Etiopia, ni gboi moŋ fe ni amɛaaŋmɛɛ amɛhemɔkɛyeli he ni amɛkɛsaa lɛ ahe, yɛ 1992 Yearbook of Jehovah’s Witnesses lɛ baafa 177. Mfoniri lɛ he sane lɛ kaneɔ akɛ: “Hiɛi ni wɔkpaa gbɛ akɛ wɔɔna amɛ yɛ gbohiiashitee lɛ mli.” Mɛɛ hegbɛ enɛ ji nɛkɛ, akɛ wɔɔle mɛnɛɛmɛi, kɛ mɛi krokomɛi babaoo ni anyɛŋ akane amɛ, ni jie anɔkwayeli ni tamɔ nɛkɛ kpo yɛ gbele mli lɛ!
18 Shi wɔ diɛŋtsɛ wɔsuɔlɔi kɛ wɔnanemɛi ni yɛ dalɛ aloo gbɔjɔmɔi komɛi ahewɔ lɛ, amɛhiii shi kɛfooo amanehulu kpeteŋkpele lɛ hu? Yɛ gbohiiashitee hiɛnɔkamɔ lɛ hewɔ lɛ, amɛyɛ wɔsɛɛ be ko ni yɔɔ nyam kɛ amɛhi shi akɛ anɔkwafoi. Ni kɛ wɔ hu wɔkɛ ekaa jie hemɔkɛyeli kpo yɛ Yesu kpɔmɔ afɔleshaa lɛ mli lɛ, wɔbaana wɔsɛɛ be ni yɔɔ nyam. Mɛni hewɔ? Ejaakɛ, taakɛ Paulo ji lɛ, wɔyɛ hiɛnɔkamɔ yɛ ‘jalɔi kɛ mɛi ni ejaaa fɛɛ agbohiiashitee’ lɛ mli. Wɔkɛ wɔtsuii fɛɛ daa Yehowa shi, yɛ nɛkɛ hiɛnɔkamɔ nɛɛ hewɔ. Eka shi faŋŋ akɛ, etsirɛɔ wɔ ni wɔjaje lalatsɛ lɛ wiemɔi nɛɛ: “Nyɛjajea [Nyɔŋmɔ] anunyam lɛ nyɛtsɔɔa yɛ jeŋmaji lɛ ateŋ, kɛ enaakpɛɛ nii lɛ yɛ maji fɛɛ ateŋ! Ejaakɛ Yehowa da ni esa yijiemɔ babaoo.”—Lala 96:3, 4.
Ani Obaanyɛ Otsɔɔ Mli?
◻ Mɛɛ ŋmalɛi yeɔ buaa ni emaa wɔ hiɛnɔkamɔ ni yɔɔ shikpɔŋ nɔ shitee lɛ mli lɛ nɔ mi?
◻ Mɛni nɔ adamɔɔ abuɔ Kristofoi jalɔi bianɛ?
◻ Gbohiiashitee hiɛnɔkamɔ lɛ kɛ ekãawoo kɛ faishitswaa haa wɔ yɛ mɛɛ gbɛ nɔ?
[Mfoniri ni yɔɔ baafa 9]
Taakɛ Paulo ji lɛ, Kristofoi ni afɔ amɛ mu lɛ ahiɛnɔkamɔ yɛ ŋwɛi shitee lɛ mli