Miishɛɛ ni Aaana yɛ Yehowa Gbeyeishemɔ Kasemɔ Mli
“Mibii, nyɛbaa, nyɛboa mi toi; mibatsɔɔ nyɛ Yehowa gbeyeishemɔ.” —LALA 34:12.
1. Mɛɛ gbɛ nɔ Nyɔŋmɔ Maŋtsɛyeli baatsɔ ajie gbeyeishemɔ kɛya kwraa, shi ani enɛ tsɔɔ gbeyeishemɔi sɔrɔtoi fɛɛ?
GBƆMƐI ni yɔɔ he fɛɛ he shweɔ ni amɛye amɛhe kɛjɛ gbeyeishemɔ he—awuiyeli kɛ efɔŋ feemɔ he gbeyeishemɔ, nitsumɔ ni anaaa he gbeyeishemɔ, kɛ hela ni mli wa he gbeyeishemɔ. Mɛɛ miishɛɛ gbi eeeji nɛkɛ, beni heyelii nɛɛ baa mli diɛŋtsɛ yɛ Nyɔŋmɔ Maŋtsɛyeli lɛ shishi lɛ! (Yesaia 33:24; 65:21-23; Mika 4:4) Ni kɛlɛ, jeee gbeyeishemɔi lɛ fɛɛ abaajie kɛya, ni asaŋ esaaa akɛ wɔbɔɔ mɔdɛŋ akɛ wɔɔjie gbeyeishemɔi fɛɛ kɛjɛ wɔshihilɛ mli bianɛ. Gbeyeishemɔ ni ehiii kɛ gbeyeishemɔ ni hi fɛɛ yɛ.
2. (a) Mɛɛ gbeyeishemɔ nɛkɛ ehiii lɛ, ni te nɔ ni asumɔɔ lɛ? (b) Mɛni ji Nyɔŋmɔ gbeyeishemɔ, ni ŋmalɛi ni atsɛ lɛ tsɔɔ enɛ yɛ mɛɛ gbɛ nɔ?
2 Gbeyeishemɔ baanyɛ afee jwɛŋmɔŋ ebɔɔ, ni gbeɔ mɔ nyɛmɔ ni ekɛsusuɔ sane he. Ebaanyɛ efite ekãa ni ekpata hiɛnɔkamɔ hiɛ. Mɔ ko ni ehenyɛlɔ miiwo eshihilɛ diɛŋtsɛ he gbeyei lɛ baanyɛ ana gbeyeishemɔ ni tamɔ nɛkɛ. (Yeremia 51:30) Mɔ ni susuɔ bɔ ni ehe hiaa ni gbɔmɛi komɛi ni asusuɔ akɛ amɛhe gbɛi waa lɛ akpɛlɛ enɔ lɛ he babaoo fe nine lɛ baanyɛ ana gbeyeishemɔ ni tamɔ nɛkɛ. (Abɛi 29:25) Shi gbeyeishemɔ ko hu yɛ ni ji ekpakpa, nɔ ni tsiɔ wɔnaa koni wɔkafee nɔ ko kɛkɛ ni esaaa, ni wɔkaye wɔhe awui hu. Nibii pii fata Nyɔŋmɔ gbeyeishemɔ he fe enɛ kɛkɛ. Eji Yehowa gbeyeishemɔ kɛ woo, bulɛ ni mli kwɔ ni ayɔɔ kɛha lɛ, kɛ gbeyeishemɔ kpakpa akɛ afeŋ nɔ ko ni esaŋ ehiɛ. (Lala 89:8) Nɛkɛ gbeyei ni asheɔ akɛ afeŋ nɔ ni esaŋ Nyɔŋmɔ hiɛ nɛɛ jɛ hiɛsɔɔ ni ayɔɔ kɛha eduromɔ kɛ ejurɔfeemɔ. (Lala 5:7; Hoshea 3:5) Nɔ ni fata he hu ji le ni aaale akɛ Yehowa ji Kojolɔ Wulu Fe Fɛɛ kɛ Ofe, mɔ ni yɔɔ hewalɛ ni ekɛ toigbalamɔ, kɛ gbele po baa mɛi ni booo lɛ toi lɛ anɔ.—Romabii 14:10-12.
3. Esoro Yehowa gbeyeishemɔ yɛ bɔ ni asheɔ wɔŋjalɔi anyɔŋmɔi lɛ agbeyei lɛ he yɛ mɛɛ gbɛ nɔ?
3 Nyɔŋmɔ gbeyeishemɔ lɛ ekpakpa ni, jeee efɔŋ ni. Ekanyaa mɔ koni efee shiŋŋ kɛha nɔ ni ja, ni ekaŋmɛɛ sane he ekɛsaa kɛtsɔ efɔŋ ni eeefee nɔ. Etamɔɔɔ gbeyeishemɔ ni ayɔɔ kɛha blema Hela nyɔŋmɔ Phobos, ni awieɔ ehe akɛ eji nyɔŋmɔ ni feɔ efɔŋ waa, ni no hewɔ lɛ mɛi sheɔ lɛ gbeyei lɛ. Ni etamɔɔɔ gbeyeishemɔ ni ayɔɔ kɛha Hindu nyɔŋmɔ yoo Kali, ni bei komɛi lɛ afeɔ ehe mfoniri akɛ lá he kumai miiye lɛ, ni ekɛ gbohii, kɛ onufui kɛ yitsoŋoŋoi feɔ ehewulamɔ nii lɛ. Nyɔŋmɔ gbeyeishemɔ gbalaa mɔ; eshwieee mɔ. Ekɛ suɔmɔ fataa hiɛsɔɔ he ni efeɔ lɛ ekome. No hewɔ lɛ, Nyɔŋmɔ gbeyeishemɔ gbalaa wɔ kɛbɛŋkɛɔ Yehowa he.—5 Mose 10:12, 13; Lala 2:11.
Nɔ Hewɔ ni Mɛi Komɛi Yɔɔ Eko ni Mɛi Krokomɛi Bɛ Eko
4. Taakɛ bɔfo Paulo tsɔɔ mli lɛ, adesai eba mɛɛ shihilɛ mli, ni mɛni kɛ enɛ ba?
4 Kɛ aaawie adesai fɛɛ he lɛ, jeee Nyɔŋmɔ gbeyeishemɔ su kanyaa amɛ. Bɔfo Paulo tsɔɔ he ni gbɔmɛi egbee shi kɛjɛ shishijee emuuyeli mli lɛ he kɛyashɛ yɛ Romabii 3:9-18. Beni ewie akɛ mɛi fɛɛ yɛ esha shishi lɛ sɛɛ lɛ, Paulo tsɛ wiemɔi asɛɛ kɛjɛ Lalai lɛ amli, ni ekɛɛ: “Jalɔ ko bɛ, mɔ kome folo bɛ.” (Kwɛmɔ Lala 14:1) No sɛɛ lɛ, etsĩ nibii komɛi atã ni ekɛtsɔɔ nibii amli, tamɔ adesai ahiɛ ni amɛku amɛfɔ Nyɔŋmɔ sɛɛgbɛtaomɔ nɔ, ekpakpa feemɔ loo mlihilɛ ni amɛbɛ, amɛ shishiumɔ wiemɔi, loomɔ, kɛ lashishwiemɔ. Kwɛ bɔ ni enɛ tsɔɔ bɔ ni je lɛ ji ŋmɛnɛ lɛ mli pɛpɛɛpɛ ehaa! Gbɔmɛi ni fa bɛ Nyɔŋmɔ kɛ eyiŋtoi ahe miishɛɛ ko kwraa. Kɛ amɛná su ni tamɔ mlihilɛ kpojiemɔ lɛ, bei pii lɛ, amɛkɛtoɔ ni amɛjieɔ lɛ kpo yɛ be mli ni amɛbaana nɔ ko kɛjɛ mli pɛ. Malemɔ kɛ yakayaka wiemɔ egbɛ eshwa he fɛɛ he. Awieɔ lashishwiemɔ he, ni jeee yɛ adafitswaa saji pɛ mli, shi moŋ yɛ hiɛtserɛjiemɔ mli hu. Mɛni kɛ shihilɛ ni tamɔ nɛkɛ ba? Eji anɔkwale akɛ eshafeelɔ Adam shwiei ji wɔ fɛɛ, shi kɛ gbɔmɛi kɔ nibii ni bɔfo Paulo tsɔɔ mli yɛ biɛ lɛ akɛ amɛshihilɛ gbɛ lɛ, belɛ etsɔɔ akɛ nɔ kroko hu fata he. Kuku 18 tsɔɔ nɔ ni eji lɛ mli, akɛ: “Nyɔŋmɔ gbeyeishemɔ ko bɛ amɛhiɛ.”—Kwɛmɔ Lala 36:1, NW.
5. Mɛni hewɔ mɛi komɛi sheɔ Nyɔŋmɔ gbeyei, ni mɛi komɛi bɛ nakai lɛ?
5 Shi, mɛni hewɔ mɛi komɛi yɔɔ Nyɔŋmɔ gbeyeishemɔ ni mɛi komɛi bɛ eko lɛ? Kɛ wɔɔwie he kuku lɛ, nɔ hewɔ ji akɛ, mɛi komɛi bɔɔ mɔdɛŋ ni amɛná, shi mɛi krokomɛi efeee nakai. Akɛfɔɔɔ wɔteŋ mɔ ko mɔ ko, shi wɔteŋ mɔ fɛɛ mɔ yɛ nyɛmɔ ni wɔkɛaana. Nyɔŋmɔ gbeyeishemɔ ji nɔ ko ni esa akɛ wɔkase. No sɛɛ lɛ, kɛ eeefee hewalɛ ni kanyaa wɔ waa yɛ wɔshihilɛ mli lɛ, no lɛ esa akɛ wɔbɔ mɔdɛŋ ni wɔna eko.
Ninefɔɔ ni Akɛmiikpa Fai
6. Namɔ kɛ ninefɔɔ ni aŋma afɔ shi yɛ Lala 34:12 tsɛɔ wɔ lɛ, ni yɛ mɛɛ gbɛ nɔ ŋmalɛ nɛɛ tsɔɔ akɛ esa akɛ akase Nyɔŋmɔ gbeyeishemɔ?
6 Akpãa ninefɔɔ ni akɛtsɛɔ wɔ koni wɔbakase Yehowa gbeyeishemɔ lɛ mli ahaa wɔ yɛ Lala 34. David lala nɛ. Ni David fee namɔ he mfoniri? Jeee mɔ ko mɔ ko fe Nuntsɔ Yesu Kristo. Aŋma gbalɛ ko ni bɔfo Yohane kɛto Yesu he pɔtɛɛ lɛ afɔ shi yɛ lala nɛɛ kuku 21. (Yohane 19:36) Yesu ji mɔ ni kpaa ninefɔɔ ni tamɔ nɛkɛ mli ehaa wɔ, yɛ wɔgbii nɛɛ amli, yɛ kuku 12, akɛ: “Mibii, nyɛbaa, nyɛboa mi toi; mibatsɔɔ nyɛ Yehowa gbeyeishemɔ.” Enɛ tsɔɔ yɛ faŋŋ mli akɛ Nyɔŋmɔ gbeyeishemɔ ji nɔ ko ni abaanyɛ akase, ni Yesu Kristo ji mɔ ni he esa fe fɛɛ ni baatsɔɔ wɔ enɛ he nii. Mɛni hewɔ eyɔɔ nakai?
7. Mɛni hewɔ Yesu ji mɔ titri ni esa akɛ wɔkase Nyɔŋmɔ gbeyeishemɔ kɛjɛ eŋɔɔ lɛ?
7 Yesu Kristo le bɔ ni Nyɔŋmɔ gbeyeishemɔ he hiaa ha. Hebribii 5:7, (NW) wieɔ yɛ ehe akɛ: “Eheloo gbii lɛ amli lɛ Kristo ŋɔ sɔlemɔi kɛ faikpamɔi ni bolɔmɔ ni naa wa kɛ yaafonui fata he esha afɔle eha Mɔ ni yɔɔ hewalɛ ni ekɛaahere lɛ kɛaajɛ gbele mli lɛ, ni abo lɛ toi yɛ e-Nyɔŋmɔ gbeyeishemɔ lɛ hewɔ.” Nyɔŋmɔ gbeyeishemɔ ni tamɔ nɛkɛ lɛ ji su ko ni Yesu Kristo jie lɛ kpo po dani ekɛ sɛŋmɔtso nɔ gbele kpe. Kaimɔ akɛ, atsɔɔ bɔ ni Nyɔŋmɔ Bi lɛ ji lɛ mli akɛ nilee ni ejie ehe kpo yɛ gbɔmɔtsoŋ, yɛ Abɛi yitso 8. Ni akɛɔ wɔ yɛ Abɛi 9:10 akɛ: “Yehowa gbeyeishemɔ ji nilee shishijee.” No hewɔ lɛ, nɛkɛ Nyɔŋmɔ gbeyeishemɔ nɛɛ ji Nyɔŋmɔ Bi lɛ shishijee subaŋ, jeeŋmɔ kwraa dani eba shikpɔŋ lɛ nɔ.
8. Mɛni wɔkaseɔ yɛ Yehowa gbeyeishemɔ he yɛ Yesaia 11:2, 3?
8 Kɛfata he lɛ, Yesaia 11:2, 3 jajeɔ yɛ Yesu ni ji Mesia Maŋtsɛ lɛ he akɛ: “Ni Yehowa mumɔ lɛ aaahi enɔ, ŋaalee kɛ sanesɛɛkɔmɔ mumɔ lɛ, ŋaawoo kɛ hewalɛ mumɔ lɛ, nilee kɛ Yehowa gbeyeishemɔ mumɔ lɛ. Ni eeena Yehowa gbeyeishemɔ lɛ he miishɛɛ.” Kwɛ bɔ ni awie he fɛfɛo aha! Yehowa gbeyeishemɔ jeee nɔ ko ni eŋɔɔɔ. Ehi ni etswaa mɔ emaa shi. Eji su ko ni baakpele he fɛɛ he ni Kristo yeɔ nɔ akɛ Maŋtsɛ yɛ lɛ. Eeye maŋtsɛ bianɛ, ni ekɛ Yehowa gbeyeishemɔ he gbɛtsɔɔmɔ miiha mɛi fɛɛ ni abuaa amɛnaa akɛ eshishibii lɛ. Yɛ mɛɛ gbɛ nɔ?
9. Yesu Kristo miitsɔɔ wɔ Yehowa gbeyeishemɔ yɛ mɛɛ gbɛ nɔ, ni mɛni esumɔɔ ni wɔkase yɛ he?
9 Yesu ni ahala lɛ akɛ asafo lɛ Yitso kɛ agbɛnɛ akɛ Mesia Maŋtsɛ lɛ, tsɔɔ asafoŋ kpeei, kpeei bibii kɛ kpeei wuji anɔ eyeɔ ebuaa wɔ koni wɔnu nɔ ni Nyɔŋmɔ gbeyeishemɔ ji kɛ nɔ hewɔ ni ehe yɔɔ sɛɛnamɔ babaoo lɛ shishi yɛ faŋŋ mli. No hewɔ lɛ, ebɔɔ mɔdɛŋ ni eha hiɛsɔɔ ni wɔyɔɔ kɛha enɛ lɛ mli akwɔ, koni wɔkase bɔ ni wɔɔfee wɔna miishɛɛ yɛ Yehowa gbeyeishemɔ mli, tamɔ bɔ pɛ ni efeɔ lɛ.
Ani Obaabɔ Efeemɔ he Mɔdɛŋ?
10. Mɛni esa akɛ wɔfee kɛ wɔɔnu Yehowa gbeyeishemɔ shishi, yɛ be mli ni wɔtee Kristofoi akpeei lɛ?
10 Shi, Biblia lɛ kɛkɛ kanemɔ loo kpeei ni wɔɔya yɛ Maŋtsɛyeli Asa lɛ nɔ lɛ emaŋ nɔ mi akɛ wɔbaana Nyɔŋmɔ gbeyeishemɔ. Kadimɔ nɔ ni ehe hiaa ni wɔfee kɛ wɔɔnu Yehowa gbeyeishemɔ diɛŋtsɛ shishi. Abɛi 2:1-5 kɛɔ akɛ: “Mibi, kɛ omɔ miwiemɔi lɛ amli, ni okɛ mikitai lɛ to omasɛi, koni oba otoi shi oha nilee, ni okɛ otsui ha sanesɛɛkɔmɔ; hɛɛ, kɛ obolɔ otsɛ sɛɛyoomɔ, owo ogbee nɔ oha saneshishinumɔ, kɛji otao esɛɛgbɛ tamɔ jwiɛtɛi, ni otao tamɔ jwetri ni aŋɔtee lɛ, no dani ooonu Yehowa gbeyeishemɔ shishi, ni ooona Nyɔŋmɔ he nilee.” No hewɔ lɛ, kɛ wɔtee kpeei lɛ, ehe hiaa ni wɔbo nɔ ni akɛɔ lɛ toi jogbaŋŋ, ni wɔbɔ mɔdɛŋ waa ni wɔjwɛŋ nɔ ni awieɔ lɛ he, ni wɔkai emli saji otii lɛ, ni wɔjwɛŋ bɔ ni esa akɛ bɔ ni wɔnuɔ Yehowa he wɔhaa lɛ ana hewalɛ waa yɛ subaŋ ni wɔjieɔ lɛ kpo yɛ ŋaawoo ni akɛhaa lɛ he lɛ nɔ—hɛɛ, ni wɔgbele wɔtsuii amli. Ni no dani wɔbaanu Yehowa gbeyeishemɔ shishi.
11. Bɔni afee ni wɔna Nyɔŋmɔ gbeyeishemɔ lɛ, mɛni esa akɛ wɔkɛ hiɛdɔɔ afee ni wɔfɔ feemɔ hu?
11 Lala 86:11 gbalaa jwɛŋmɔ kɛyaa oti kroko hu ni he hiaa, ni ji sɔlemɔ nɔ. Lalatsɛ lɛ sɔle akɛ: “Yehowa, tsɔɔmɔ mi ogbɛ lɛ, manyiɛ onɔkwale lɛ mli. Feemɔ mitsui ekome, ni mashe ogbɛi lɛ gbeyei.” Yehowa kpɛlɛ nakai sɔlemɔ lɛ nɔ, ejaakɛ eha aŋma afɔ shi yɛ Biblia lɛ mli. Kɛji wɔɔna Nyɔŋmɔ gbeyeishemɔ lɛ, no lɛ ehe miihia ni wɔ hu wɔsɔle wɔbi Yehowa yelikɛbuamɔ, ni wɔbaana he sɛɛ kɛtsɔ mɔdɛŋbɔɔ yɛ sɔlemɔ kɛ enɛ ni wɔɔfee daa nɔ.—Luka 18:1-8.
Ekɔɔ Otsui He
12. Mɛni hewɔ esa akɛ agbala jwɛŋmɔ kɛya tsui lɛ nɔ titri lɛ, ni mɛni fata enɛ he?
12 Nɔ kroko hu yɛ ni sa akɛ wɔkadi yɛ Lala 86:11. Lalatsɛ lɛ biii ni aha ena Nyɔŋmɔ gbeyeishemɔ lɛ he shishinumɔ yɛ ejwɛŋmɔŋ kɛkɛ. Etsĩ etsui tã. Nyɔŋmɔ gbeyeishemɔ ni wɔɔna lɛ kɔɔ okadi tsui lɛ, ni ebiɔ ni aje gbɛ agbala jwɛŋmɔ kɛya nɔ yɛ gbɛ krɛdɛɛ nɔ, akɛni eji mligbɛ gbɔmɔ lɛ, ni jeɔ kpo yɛ wɔshihilɛ mli nitsumɔi fɛɛ mli, ni wɔ susumɔi, subaŋi, nibii ni wɔshweɔ, wɔ kanyamɔi, kɛ otii ni mamɔ wɔhiɛ fata he lɛ he.
13. (a) Mɛni baanyɛ atsɔɔ akɛ mɔ ko tsui mli eja enyɔ? (b) Yɛ be mli ni wɔtaoɔ Nyɔŋmɔ gbeyeishemɔ lɛ, mɛɛ oti ni ma wɔhiɛ esa akɛ wɔtsu he nii?
13 Biblia lɛ bɔɔ wɔ kɔkɔ akɛ mɔ ko tsui mli baanyɛ aja enyɔ. Ebaanyɛ efee kutumpɔfo. (Lala 12:3; Yeremia 17:9) Ebaanyɛ ekanya wɔ ni wɔkɛ wɔhe awo nitsumɔi kpakpai amli—wɔya asafoŋ kpeei kɛ shiɛmɔ ni wɔkɛ wɔhe baawo mli—shi ebaanyɛ esumɔ je lɛ shihilɛ gbɛ lɛ mli nibii komɛi hu. Enɛ baanyɛ atsĩ wɔ gbɛ ni wɔkɛ wɔsusuma fɛɛ akatsu nii kɛmiimɔ shi yɛ Maŋtsɛyeli lɛ he nibii ni wɔɔha eya hiɛ lɛ mli. Kɛkɛ lɛ, nakai kutumpɔo tsui lɛ baabɔ mɔdɛŋ ni etsɔ wɔyiŋ akɛ, fɛɛ sɛɛ lɛ, wɔ hu wɔmiifee babaoo tamɔ bɔ ni mɛi krokomɛi pii lɛ hu feɔ lɛ nɔŋŋ. Aloo, ekolɛ yɛ skul loo wɔ nitsumɔ he nɛkɛ lɛ, gbɔmɛi ahe gbeyeishemɔ baanyɛ ana tsui lɛ nɔ hewalɛ. Ni nɔ ni baajɛ mli aba ji, wɔbaashashao shi akɛ wɔɔjie wɔhe kpo akɛ Yehowa Odasefoi, yɛ hei ni tamɔ nɛkɛ, ni ekolɛ wɔɔfee nibii ni esaaa akɛ Kristofoi feɔ po. Shi, yɛ sɛɛ mli lɛ, wɔ henilee haoɔ wɔ. Jeee gbɔmɔ ni tamɔ nɛkɛ wɔtaoɔ wɔtamɔ. No hewɔ lɛ, wɔkɛ lalatsɛ lɛ sɔleɔ kɛhaa Yehowa akɛ: “Feemɔ mitsui ekome ni mashe ogbɛi lɛ gbeyei.” Wɔmiisumɔ ni wɔmligbɛ gbɔmɔ muu lɛ fɛɛ, taakɛ ejeɔ kpo yɛ wɔshihilɛ mli nifeemɔi fɛɛ mli lɛ, aye odase akɛ “[wɔ]sheɔ anɔkwa Nyɔŋmɔ lɛ gbeyei ni wɔyeɔ ekitai lɛ anɔ.”—Jajelɔ 12:13, NW.
14, 15. (a) Yɛ be mli ni egbaa Israel sɛɛkuu kɛmiijɛ Babilon nom mli lɛ he sane lɛ, mɛni Yehowa wo shi akɛ ekɛbaaha ewebii lɛ? (b) Mɛni Yehowa fee kɛ yiŋtoo akɛ eetɛo Nyɔŋmɔ gbeyeishemɔ yɛ ewebii lɛ atsuii amli? (d) Mɛni hewɔ Israel tsi ehe kɛjɛ Yehowa gbɛ̀i ahe lɛ?
14 Yehowa wo shi akɛ ekɛ tsui ni sheɔ Nyɔŋmɔ gbeyei ni tamɔ nɛkɛ baaha ewebii lɛ. Egba Israel sɛɛkuu kɛ amɛ shikpɔŋ lɛ nɔ baa ekoŋŋ lɛ efɔ shi ni ekɛɛ, taakɛ wɔkaneɔ yɛ Yeremia 32:37-39 lɛ: “Mikɛ amɛ aaaku sɛɛ aba biɛ nɛɛ ekoŋŋ, ni maha amɛhi shi shweshweeshwe. Ni amɛaatsɔ mimaŋ, ni mi hu matsɔ amɛ-Nyɔŋmɔ; ni maŋɔ tsui kome kɛ gbɛ kome maha amɛ, ni amɛshe mi gbeyei daa, koni ahi aha amɛ kɛ amɛbii ni baa yɛ amɛsɛɛ lɛ.” Awo Nyɔŋmɔ shiwoo lɛ mli hewalɛ ekoŋŋ yɛ kuku 40: “Ni migbeyeishemɔ lɛ hu, maŋɔwo amɛtsuii amli, koni amɛkaje mihe dɔŋŋ.” Yɛ afi 537 D.Ŋ.B. lɛ, Yehowa saa ekɛ amɛ ku sɛɛ kɛba Yerusalem ekoŋŋ, taakɛ ewo shi lɛ. Shi nakai shiwoo lɛ fã ni eshwɛ lɛ hu—akɛ ebaaha amɛ ‘tsui kome koni amɛshe lɛ gbeyei daa’ lɛ hu? Mɛni hewɔ blema Israel maŋ lɛ tsi ehe kɛjɛ Yehowa he, yɛ be mli ni ekɛ amɛ eku sɛɛ kɛjɛ Babilon kɛba lɛ, ni no ha akpata amɛ sɔlemɔtsu lɛ hiɛ yɛ afi 70 Ŋ.B., ni akuŋ sɛɛ atswaŋ amaŋ shi dɔŋŋ kɔkɔɔkɔ lɛ?
15 Enɛ jeee nɔ ko ni jɛ nii ni Yehowa nyɛɛɛ afee hewɔ. Yɛ anɔkwale mli lɛ, Yehowa to gbɛjianɔ koni ekɛ Nyɔŋmɔ gbeyeishemɔ awo ewebii lɛ atsuii amli. Eha amɛ yiŋtoo ni fa babaoo ni amɛaadamɔ nɔ amɛna bulɛ kɛ woo amɛha lɛ yɛ amɛtsuii amli, kɛtsɔ mɔbɔnalɛ kɛ mlihilɛ ni ejie kpo etsɔɔ amɛ, ni ekpɔ̃ amɛ kɛjɛ Babilon ni esaa ekɛ amɛ ba amɛshikpɔŋ nɔ ekoŋŋ lɛ nɔ. Nyɔŋmɔ saa ewo enɛ mli hewalɛ kɛ kaimɔi, ŋaawoo, kɛ kamɔi kɛtsɔ egbalɔi Hagai, Zakaria, kɛ Maleaki nɔ; kɛ agbɛnɛ kɛtsɔ Ezra ni etsu kɛba amɛŋɔɔ akɛ tsɔɔlɔ lɛ nɔ; kɛtsɔ Amralo Nehemia nɔ; kɛ Nyɔŋmɔ diɛŋtsɛ Bi lɛ hu nɔ. Yɛ bei komɛi amli lɛ gbɔmɛi lɛ boɔ toi. Amɛfee nakai beni amɛsaa amɛma Yehowa sɔlemɔwe lɛ ekoŋŋ kɛtsɔ Hagai kɛ Zakaria hewalɛwoo nɔ lɛ, kɛ beni amɛshwie maŋsɛɛ ŋamɛi lɛ yɛ Ezra gbii lɛ amli lɛ. (Ezra 5:1, 2; 10:1-4) Shi bei pii lɛ amɛbooo lɛ toi. Amɛfeee amɛhe mɛi ni boɔ lɛ toi be fɛɛ be; amɛyaaa nɔ amɛhiii shi akɛ mɛi ni boɔ ŋaawoo toi daa; amɛhaaa amɛtsuii amli agbele daa. Israelbii taooo Nyɔŋmɔ gbeyeishemɔ su, ni nɔ ni jɛ mli ba ji akɛ, ejeee kanyamɔ hewalɛ ni mli wa waa yɛ amɛshihilɛi amli.—Maleaki 1:6; Mateo 15:7, 8.
16. Yehowa etɛo Nyɔŋmɔ gbeyeishemɔ yɛ namɛi atsuii amli?
16 Ni kɛlɛ, Yehowa shiwoo akɛ ekɛ Nyɔŋmɔ gbeyeishemɔ baawo ewebii lɛ atsuii amli lɛ efeee efolo. Ekɛ mumɔŋ Israel, ni ji nakai Kristofoi ni ekɛ ŋwɛi hiɛnɔkamɔ ma amɛhiɛ lɛ fee kpaŋmɔ hee. (Yeremia 31:33; Galatabii 6:16) Yɛ 1919 mli lɛ, Nyɔŋmɔ kɛ amɛ ku sɛɛ kɛjɛ Babilon Kpeteŋkpele lɛ, jeŋ apasa jamɔ maŋtsɛyeli lɛ nomŋɔɔ mli kɛba ekoŋŋ. Edũ ehe gbeyeishemɔ ewo amɛtsuii amli ni emɔ shi shiŋŋ. Enɛ kɛ sɛɛnamɔi babaoo ebaha amɛ, kɛ “asafo babaoo” lɛ ni yɔɔ shihilɛ he hiɛnɔkamɔ akɛ Maŋtsɛyeli lɛ shishibii yɛ shikpɔŋ nɔ lɛ. (Yeremia 32:39; Kpojiemɔ 7:9) Yehowa gbeyeishemɔ ebote amɛ hu amɛtsuii amli.
Bɔ ni Afeɔ Atɛoɔ Nyɔŋmɔ Gbeyeishemɔ Awoɔ Wɔ Tsuii Amli
17. Yehowa kɛ Nyɔŋmɔ gbeyeishemɔ ewo wɔtsuii amli yɛ mɛɛ gbɛ nɔ?
17 Mɛɛ gbɛ nɔ Yehowa tsɔ etɛo nɛkɛ Nyɔŋmɔ gbeyeishemɔ nɛɛ ewo wɔtsuii amli? Kɛtsɔ emumɔ lɛ nitsumɔ nɔ. Ni mɛni wɔyɔɔ ni jɛ mumɔ krɔŋkrɔŋ lɛ hewalɛ kɛ nitsumɔ mli? Biblia lɛ, Nyɔŋmɔ Wiemɔ ni jɛ mumɔŋ lɛ. (2 Timoteo 3:16, 17) Kɛtsɔ nɔ ni efee yɛ blema, kɛ bɔ ni ekɛ etsuji yeɔ haa bianɛ ni haa egbalɛ Wiemɔ lɛ baa mli, kɛ agbɛnɛ kɛtsɔ gbalɛi ni kɔɔ nibii ni baaba lɛ ahe lɛ anɔ lɛ, Yehowa kɛ nɔdaamɔ nɔ kpakpa haa wɔ fɛɛ koni wɔkɛna Nyɔŋmɔ gbeyeishemɔ.—Yoshua 24:2-15; Hebribii 10:30, 31.
18, 19. Yɛ mɛɛ gbɛ nɔ kpeei wuji, kpeei bibii, kɛ asafoŋ kpeei yeɔ ebuaa wɔ ni wɔnaa Nyɔŋmɔ gbeyeishemɔ?
18 Esa kadimɔ jogbaŋŋ akɛ, taakɛ abɔ amaniɛ yɛ 5 Mose 4:10 lɛ, Yehowa kɛɛ Mose akɛ: “Buamɔ maŋ lɛ naa oha mi, ni maha amɛnu miwiemɔi lɛ, ni amɛkɛkase mi gbeyeishemɔ gbii abɔ fɛɛ ni amɛyɔɔ jeŋ lɛ, ni amɛŋɔtsɔɔ amɛbii lɛ hu.” Nakai nɔŋŋ hu ŋmɛnɛ, Yehowa eto nibii babaoo he gbɛjianɔ koni ekɛye ebua ewebii lɛ koni amɛkase bɔ ni amɛaafee ni amɛshe lɛ gbeyei. Wɔkaiɔ nibii ni yeɔ Yehowa suɔmɔ kɛ ejurɔfeemɔ, kɛ emlihilɛ lɛ he odase lɛ yɛ kpeei wuji, kpeei bibii, kɛ asafoŋ kpeei ashishi. No ji nɔ ni wɔfeɔ beni wɔkaseɔ Gbɔmɔ ni Fe Mɔ Fɛɛ Mɔ ni Ehi Shi Pɛŋ wolo lɛ. Te nakai nikasemɔ lɛ sa ohe, kɛ su ni ojieɔ lɛ kpo yɛ Yehowa he lɛ he eha tɛŋŋ? Beni onaa wɔ ŋwɛi Tsɛ lɛ sui ni yɔɔ nyam lɛ fãi sɔrɔtoi ni jeɔ kpo yɛ e-Bi lɛ mli lɛ, ani enɛ wooo bɔ ni oshweɔ waa ni okafee nɔ ko ni esaŋ Nyɔŋmɔ hiɛ lɛ mli hewalɛ?—Kolosebii 1:15.
19 Wɔkaseɔ saji ni tsɔɔ bɔ ni Yehowa jie ewebii yɛ blema bei ni eho lɛ amli lɛ hu he nii yɛ wɔkpeei ashishi. (2 Samuel 7:23) Yɛ be mli ni wɔkaseɔ Biblia mli wolo ni ji Kpojiemɔ lɛ kɛ wolo ni yeɔ ebuaa ni ji Kpojiemɔ—Enaagbee Kwraa lɛ Ebɛŋkɛ! lɛ, wɔkaseɔ gbalɛ ninaai ni eba mli momo yɛ afii ohai 20 nɛɛ mli, kɛ nibii ni yɔɔ gbeyei ni baaba kpaako lɛ ahe nii. Lala 66:5 wieɔ nɛkɛ Nyɔŋmɔ nitsumɔi nɛɛ fɛɛ he akɛ: “Nyɛbaa nyɛbakwɛa Nyɔŋmɔ nitsumɔi lɛ; ehe yɛ gbeyei yɛ nii ni etsuɔ ehaa gbɔmɛi abii lɛ mli.” Hɛɛ, kɛ wɔkwɛ lɛ yɛ gbɛ kpakpa nɔ lɛ, nɛkɛ Nyɔŋmɔ nitsumɔi nɛɛ dũɔ Yehowa gbeyeishemɔ, woo loo bulɛ ni mli kwɔ yɛ wɔtsuii amli. Enɛ baaha wɔna bɔ ni Yehowa Nyɔŋmɔ haa eshiwoo nɛɛ baa mli: “Ni migbeyeishemɔ lɛ hu, maŋɔwo amɛtsuii amli, koni amɛkaje mihe dɔŋŋ.”—Yeremia 32:40.
20. Bɔni afee ni Nyɔŋmɔ gbeyeishemɔ afee nɔ ni atɛo awo wɔtsuii amli vii lɛ, mɛni ataoɔ yɛ wɔdɛŋ?
20 Shi, eka shi faŋŋ akɛ, Nyɔŋmɔ gbeyeishemɔ baaa wɔtsuii amli, kɛ wɔ diɛŋtsɛ wɔbɔɔɔ he mɔdɛŋ. Nɔ ni jɛɔ mli baa lɛ baaa trukaa kɛkɛ. Yehowa tsuɔ egbɛfaŋnɔ. Ni esa akɛ wɔ hu wɔtsu wɔgbɛfaŋnɔ kɛtsɔ Nyɔŋmɔ gbeyeishemɔ ni wɔɔna nɔ. (5 Mose 5:29) Heloonaa Israel efeee enɛ. Shi akɛni mumɔŋ Israel kɛ amɛhefatalɔi lɛ kɛ amɛhiɛ fɔɔ Yehowa nɔ hewɔ lɛ, amɛje shishi amɛmiina sɛɛnamɔi babaoo ni baa mɛi ni sheɔ Nyɔŋmɔ gbeyei lɛ anɔ lɛ mli ŋɔɔmɔ momo. Wɔbaasusu sɛɛnamɔi nɛɛ ekomɛi ahe yɛ nikasemɔ ni nyiɛ enɛ sɛɛ lɛ mli.
Te Obaaha Hetoo Oha Tɛŋŋ?
◻ Mɛni ji Nyɔŋmɔ gbeyeishemɔ?
◻ Mɛɛ gbɛ nɔ atsɔɔ atsɔɔ wɔ nii koni wɔna miishɛɛ yɛ Yehowa gbeyeishemɔ mli?
◻ Mɛɛ mɔdɛŋbɔɔ he hiaa yɛ wɔgbɛfaŋ koni wɔna Nyɔŋmɔ gbeyeishemɔ?
◻ Mɛni hewɔ Nyɔŋmɔ gbeyeishemɔ ni wɔɔna lɛ kɔɔ wɔ okadi tsui lɛ he nɔ fɛɛ nɔ he?
[Mfonirii ni yɔɔ baafa 12, 13]
Ebiɔ nikasemɔ kɛ hiɛdɔɔ koni anu Yehowa gbeyeishemɔ shishi