Onukpai, Nyɛkojoa Yɛ Jalɛ Naa

“Nyɛboa nyɛnyɛmimɛi lɛ ateaŋ saji atoi, ni nyɛkojoa mɔ kɛ enyɛmi. . . teŋ yɛ jalɛ naa.”​—5 MOSE 1:⁠16.

 1. Mɛɛ hegbɛ ni akɛhaa mɔ kroko eba mli, yɛ kojomɔ he sane lɛ mli, ni mɛni enɛ tsɔɔ kɛhaa adesai ni ji kojolɔi?

AKƐ Kojolɔ ni Nɔ Kwɔ Fe Fɛɛ lɛ, Yehowa kɛ kojomɔ hegbɛ eha e-Bi lɛ. (Yohane 5:27) Ni lɛ hu, akɛ Kristofoi asafo lɛ Yitso lɛ, Kristo kɛ tsulɔ anɔkwafo kɛ nilelɔ kuu lɛ kɛ e-Nɔyeli Kuu lɛ tsuɔ nii ni ekɛhalaa onukpai, ni bei komɛi lɛ, ehe bahiaa ni amɛtsu nii akɛ kojolɔi. (Mateo 24:​45-47; 1 Korintobii 6:​12, 13; Tito 1:​5, 9) Akɛ kojolɔi ni damɔ mɛi komɛi anajiaŋ lɛ, sɔ̃ ka mɛnɛɛmɛi anɔ akɛ amɛnyiɛ ŋwɛi Kojolɔi, ni ji Yehowa kɛ Kristo Yesu nɔkwɛmɔ nɔ lɛ sɛɛ kpaakpa.

Kristo​—Kojolɔ ni Feɔ Nɔkwɛmɔ nɔ Kpakpa Lɛ

 2, 3. (a) Mɛɛ Mesia lɛ he gbalɛ ko tsɔɔ sui ni Kristo yɔɔ akɛ Kojolɔ? (b) Mɛɛ otii komɛi sa kadimɔ waa titri?

² Aŋma yɛ gbalɛ wiemɔ mli, yɛ Kristo nitsumɔ akɛ Kojolɔ lɛ he akɛ: “Yehowa mumɔ lɛ aaahi enɔ, ŋaalee kɛ sanesɛɛkɔmɔ mumɔ lɛ, ŋaawoo kɛ hewalɛ mumɔ lɛ, nilee kɛ Yehowa gbeyeishemɔ mumɔ lɛ. Ni eeena Yehowa gbeyeishemɔ lɛ he miishɛɛ; bɔ ni ehiŋmɛii naa lɛ, jeee nakai ebaakojo, ni bɔ ni etoii nuɔ lɛ, jeee nakai ebaabu atɛŋ; shi eeekojo ohiafoi yɛ jalɛ naa, ni jajemɔ hu ekɛaakã mɛi lɛ, ni eeebu mɛi ni nii yɔɔ mɔbɔ yɛ shikpɔŋ nɔ lɛ atɛŋ bɔ ni ja.”​—Yesaia 11:​2-4.

³ Kadimɔ sui ni haa Kristo nyɛɔ “ekojo[ɔ] jeŋ muu lɛ fɛɛ yɛ jalɛ naa” lɛ yɛ nakai gbalɛ lɛ mli. (Bɔfoi lɛ Asaji 17:31) Ekojoɔ yɛ Yehowa mumɔ lɛ, kɛ ŋwɛi ŋaalee, sanesɛɛkɔmɔ, ŋaawoo, kɛ nilee kɛ gbeekpamɔ naa. Agbɛnɛ hu, kadimɔ akɛ, ekojoɔ yɛ Yehowa gbeyeishemɔ naa. Enɛ hewɔ lɛ, “Kristo kojomɔ sɛi lɛ” feɔ “Nyɔŋmɔ kojomɔ sɛi lɛ” he mfoniri yɛ gbɛ ni ja nɔ. (2 Korintobii 5:​10; Romabii 14:​10, New World Translation) No hewɔ lɛ ekwɛɔ jogbaŋŋ koni ekojo saji bɔ ni Nyɔŋmɔ baakojo lɛ aha. (Yohane 8:16) Edamɔɔɔ bɔ ni mɔ lɛ pueɔ ehaa loo ehe saji ni enu lɛ kɛkɛ nɔ ekojooo. Shi moŋ ekojoɔ yɛ jalɛ naa ehaa heshibalɔi kɛ mɛi ni baa shi lɛ. Mɛɛ naakpɛɛ Kojolɔ eji nɛkɛ! Ni mɛɛ nɔkwɛmɔ nɔ ni yɔɔ naakpɛɛ nɛ kɛha adesai ni yeee emuu ni ŋmɛnɛ akɛ nitsumɔ woɔ amɛdɛŋ ni amɛhi kojomɔ gbɛhei amli lɛ!

Shikpɔŋ nɔ Kojolɔi

 4. (a) Mɛni baafee mɛi 144,000 lɛ anitsumɔi lɛ ateŋ ekome yɛ Kristo Afii Akpe Nɔyeli be lɛ mli? (b) Mɛɛ gbalɛ tsɔɔ akɛ abaahala Kristofoi ni afɔ amɛ mu lɛ ateŋ mɛi komɛi akɛ kojolɔi beni amɛyɔɔ shikpɔŋ nɔ lolo lɛ?

⁴ Ŋmalɛi lɛ tsɔɔ akɛ Kristofoi ni afɔ amɛ mu, ni ji kuu bibioo ko ni je shishi kɛjɛ bɔfoi 12 lɛ anɔ lɛ baafee hefatalɔi kojolɔi kɛ Kristo Yesu yɛ Afii Akpe Maŋtsɛyeli lɛ mli. (Luka 22:​28-30; 1 Korintobii 6:2; Kpojiemɔ 20:⁠4) Ni akojo mumɔŋ Israel mlibii ni afɔ amɛ mu lɛ ateŋ shwɛɛnii ni yɔɔ shikpɔŋ nɔ lɛ diɛŋtsɛ hu ni asaa akɛ amɛ ba amɛgbɛhe mli ekoŋŋ yɛ 1918-19. (Maleaki 3:​2-4) Agba afɔ shi yɛ nɛkɛ mumɔŋ Israel ni abaaku sɛɛ akɛ amɛ aba amɛgbɛhe mli ekoŋŋ nɛɛ he akɛ: “Ni maŋɔ okojolɔi lɛ mahao ekoŋŋ tamɔ tsutsu lɛ, kɛ ojinafoi lɛ hu tamɔ blema lɛ.” (Yesaia 1:26) Enɛ hewɔ lɛ, bɔ ni Yehowa fee yɛ “blema” yɛ heloonaa Israel gbɛfaŋ lɛ, nakai nɔŋŋ eha shwɛɛnii ni eku sɛɛ ekɛ amɛ eba amɛgbɛhe mli ekoŋŋ lɛ jalɛ kojolɔi kɛ ŋaawolɔi.

 5. (a) Namɛi ahala amɛ akɛ mɛi ni “kojoɔ” beni asaa akɛ mumɔŋ Israel ba amɛgbɛhe mli ekoŋŋ lɛ, ni afee amɛhe mfoniri yɛ Kpojiemɔ wolo lɛ mli yɛ mɛɛ gbɛ nɔ? (b) Namɛi yeɔ amɛbuaa nɔkwɛlɔi ni afɔ amɛ mu lɛ yɛ amɛkojomɔ nitsumɔ lɛ mli, ni aatsɔse mɛnɛɛmɛi koni amɛtsɔmɔ kojolɔi kpakpai yɛ mɛɛ gbɛ nɔ?

⁵ Kɛjɛ shishijee lɛ, hii ni afɔ amɛ mu ni amɛdara, loo onukpai ji ‘nilelɔi’ ni ahala amɛ akɛ mɛi ni “kojoɔ” lɛ. (1 Korintobii 6:​4, 5) Afeɔ nɔkwɛlɔi anɔkwafoi ni afɔ amɛ mu ni abuɔ amɛ lɛ ahe mfoniri yɛ Kpojiemɔ wolo lɛ mli akɛ Yesu hiɛ amɛ yɛ eninejurɔ dɛŋ, ni tsɔɔ akɛ, amɛyɛ ekudɔmɔ kɛ egbɛtsɔɔmɔ shishi. (Kpojiemɔ 1:​16, 20; 2:⁠1) Kɛjɛ 1935 kɛbaa nɛɛ, mɛi ni afɔ amɛ mu lɛ ena “asafo babaoo” ko, ni yaa nɔ amɛyi faa be fɛɛ be, ni amɛhiɛnɔkamɔ ji akɛ amɛbaafo “amanehulu kpeteŋkpele lɛ” ni amɛhi paradeiso shikpɔŋ nɔ kɛya naanɔ lɛ asɛɛfimɔ yɛ anɔkwayeli mli. (Kpojiemɔ 7:​9, 10, 14-17) Ni beni “Toobi lɛ yookpeemɔ lɛ” bɛŋkɛɔ nɛɛ, belɛ Nɔyeli Kuu ni afɔ amɛ mu lɛ miihala mɛnɛɛmɛi ateŋ mɛi babaoo be fɛɛ be koni amɛsɔmɔ akɛ onukpai kɛ kojolɔi yɛ Yehowa Odasefoi asafoi ni fa fe 66,000 ni yɔɔ shikpɔŋ lɛ nɔ fɛɛ lɛ amli.a (Kpojiemɔ 19:​7-9) Aatsɔ skul krɛdɛɛi ni afeɔ lɛ anɔ aatsɔse amɛ bɔni afee ni amɛnyɛ amɛtsu gbɛnaa nii ahe nii yɛ “shikpɔŋ hee” gbɛjianɔtoo lɛ mli. (2 Petro 3:13) Maŋtsɛyeli Sɔɔmɔ Skul, ni afee yɛ afi 1991 naagbee gbɛ yɛ maji pii amli lɛ ma bɔ ni ehe hiaa ni atsu kojomɔ saji ahe nii jogbaŋŋ lɛ nɔ mi waa. Sɔ̃ ka onukpai ni sɔmɔɔ akɛ kojolɔi lɛ anɔ akɛ amɛkase Yehowa kɛ Kristo Yesu, mɛi ni amɛkojomɔi lɛ, anɔkwa kɛ jalɛ kojomɔi ni lɛ.​—Yohane 5:​30; 8:​16; Kpojiemɔ 19:​1, 2.

Kojolɔi ni kɛ ‘Gbeyeishemɔ Baa Amɛjeŋ’

 6. Mɛni hewɔ esa akɛ onukpai ni sɔmɔɔ yɛ saneyeli ajinafoi akuu mli lɛ ‘kɛ gbeyeishemɔ aba amɛjeŋ’?

⁶ Kɛji Kristo diɛŋtsɛ kojoɔ yɛ Yehowa gbeyeishemɔ mli, kɛ agbɛnɛ kɛtsɔ E-mumɔ lɛ yelikɛbuamɔ nɔ lɛ, no lɛ kwɛ bɔ ni esa jogbaŋŋ akɛ onukpai ni yeee emuu lɛ hu aaafee nakai! Kɛji ahala amɛ ni amɛsɔmɔ yɛ saneyeli ajinafoi akuu mli lɛ, ehe hiaa ni ‘amɛkɛ gbeyeishemɔ aba amɛjeŋ,’ koni amɛtsɛ “Tsɛ lɛ ni kojoɔ ni ekwɛɛɛ mɛi ahiɛaŋ lɛ” ni eye ebua amɛ ni amɛkojo yɛ jalɛ naa. (1 Petro 1:17) Esa akɛ amɛkai akɛ gbɔmɛi awala, ni ji ‘amɛsusumai’ ahe nii amɛtsuɔ lɛ, akɛ mɛi ni “baabu he akɔntaa.” (Hebribii 13:17) Yɛ enɛ hewɔ lɛ, eka shi faŋŋ akɛ amɛ hu amɛbaabu amɛhe akɔntaa yɛ Yehowa hiɛ yɛ saneyeli mli tɔmɔi ni amɛaatɔ, yɛ beni kulɛ amɛbaanyɛ amɛkwa nakai tɔmɔi lɛ ahewɔ. Mlitsɔɔmɔ ni J. H. A. Ebrard ŋma yɛ Hebribii 13:17 lɛ he ji akɛ: “Nitsumɔ ni ka tookwɛlɔ lɛ nɔ ji ni ebu susumai ni atuu awo edɛŋ ni ekwɛ amɛnɔ lɛ ahe, ni. . . esa akɛ ebu amɛ fɛɛ amɛhe akɔntaa, kɛ mɛi fɛɛ ni etsɔ lɛ etɔmɔ nɔ amɛlaaje lɛ hu. Hiɛdɔɔ wiemɔ ni he jaraa waa nɛ. Ha wiemɔ lɛ he sɔɔlɔ fɛɛ sɔɔlɔ asusu he akɛ, lɛ diɛŋtsɛ ejɛ esuɔmɔ mli ekpɛlɛ nɛkɛ nitsumɔ gbɛhe ni yɔɔ tsuifaa [gbeyei] waa nɛɛ nɔ.”​—Okɛto Yohane 17:​12; Yakobo 3:1 he.

 7. (a) Mɛni esa akɛ ŋmɛnɛŋmɛnɛŋ beaŋ kojolɔi akai, ni mɛni esa akɛ efee oti ni ma amɛhiɛ?

⁷ Esa akɛ onukpai ni sɔmɔɔ yɛ saneyeli gbɛhei amli lɛ akai akɛ Kojolɔi diɛŋtsɛ ni tsuɔ sane fɛɛ sane he nii ji Yehowa kɛ Kristo Yesu. Kaimɔ nɔ ni akɛɛ kojolɔi ni hi Israel lɛ: “Ejaakɛ jeee gbɔmɛi nyɛkojoɔ nyɛhaa, shi moŋ Yehowa ni, ni efata nyɛhe yɛ atɛŋbuu lɛ mli. No hewɔ lɛ, agbɛnɛ nyɛhaa Yehowa gbeyeishemɔ ahia nyɛmli. . . . Kɛ nyɛfee nakai lɛ, nyɛyeŋ sɔ.” (2 Kronika 19:​6-10) Esa akɛ onukpai ni kojoɔ sane ko lɛ kɛ gbeyeishemɔ ni bulɛ yɔɔ mli abɔ mɔdɛŋ fɛɛ ni amɛaanyɛ ni amɛkɛna nɔmimaa akɛ Yehowa ‘fata amɛhe diɛŋtsɛ yɛ atɛŋbuu lɛ mli’ lɛlɛŋ. Esa akɛ amɛyiŋkpɛɛ lɛ ajie bɔ ni Yehowa kɛ Kristo susuɔ yɛ sane lɛ he lɛ kpo faŋŋ etsɔɔ. Esa akɛ nɔ ni ‘amɛfiɔ’ yɛ mfoniri-feemɔ mli (ni amɛbuɔ lɛ fɔ) aloo ‘amɛfɛneɔ’ (ni amɛbuɔ lɛ bem) yɛ shikpɔŋ nɔ lɛ afee nɔ ni afi loo afɛne momo yɛ ŋwɛi​—taakɛ nɔ ni aŋma yɛ Nyɔŋmɔ Wiemɔ ni jɛ mumɔŋ lɛ mli lɛ jieɔ lɛ kpo lɛ. Kɛji amɛsɔle amɛha Yahowa yɛ Yesu gbɛi amli lɛ, Yesu baahi “amɛteŋ” koni eye ebua amɛ. (Mateo 18:​18-20, NW shishigbɛ niŋmaa; The Watchtower, February 16, 1988, baafa 9) Esa akɛ shihilɛ mli ni atsuɔ kojomɔ sane ko he nii yɛ lɛ atsɔɔ akɛ Kristo yɛ amɛteŋ lɛlɛŋ.

Be-Fɛɛ Tookwɛlɔi

 8. Mɛni ji onukpai lɛ agbɛnaa nii titri yɛ tookuu lɛ he, taakɛ Yehowa kɛ Yesu Kristo fee he nɔkwɛmɔ nɔ lɛ? (Yesaia 40:​10, 11; Yohane 10:​11, 27-29)

⁸ Onukpai lɛ ekojooo kɛ amɛbe fɛɛ. Be-fɛɛ tookwɛlɔi ji amɛ. Mɛi atsalɔi ji amɛ, jeee mɛi atoigbalalɔi. (Yakobo 5:​13-16) Klɛŋklɛŋ jwɛŋmɔ ni yɔɔ Hela wiemɔ ni akɛtsu nii aha nɔkwɛlɔ (e·piʹsko·pos) lɛ sɛɛ lɛ tsɔɔ nii anɔkwɛmɔ kɛha ehebuu. Theological Dictionary of the New Testament lɛ wieɔ akɛ: “Kɛji akɛ wiemɔ tookwɛlɔ tsu nii [yɛ 1 Petro 2:25] lɛ, ehaa wiemɔ [e·piʹsko·pos] lɛ tsɔɔ tookwɛmɔ nitsumɔ ni ji nii anɔkwɛmɔ loo ehebuu.” Hɛɛ, klɛŋklɛŋ gbɛnaa nii ni ka amɛnɔ ji tooi lɛ anɔkwɛmɔ kɛ amɛhebuu, koni amɛhi tookuu lɛ mli.

 9, 10. (a) Paulo ma onukpai anitsumɔ lɛ mli klɛŋklɛŋ nɔ lɛ nɔ mi yɛ mɛɛ gbɛ nɔ, no hewɔ lɛ mɛɛ sane eja akɛ aaabi? (b) Mɛni Paulo wiemɔi ni yɔɔ Bɔfoi Asaji 20:29 lɛ tsɔɔ, no hewɔ lɛ mɛɛ gbɛ nɔ onukpai lɛ aaatsɔ amɛha kojomɔ saneyelii anɔ agbɔ?

⁹ Beni bɔfo Paulo kɛ Efeso asafo lɛ mli onukpai lɛ wieɔ lɛ, ema nɔ ni he hiaa lɛ nɔ mi jogbaŋŋ eha amɛ akɛ: “No hewɔ lɛ nyɛlea nyɛhe nɔkwɛmɔ kɛ tookuu lɛ fɛɛ ni mumɔ krɔŋkrɔŋ lɛ ewo nyɛ amɛ nɔkwɛlɔi lɛ, koni nyɛle Nyɔŋmɔ asafo lɛ ni ekɛ lɛ diɛŋtsɛ e-Bi lɛ la he lɛ.” (Bɔfoi lɛ Asaji 20:​28, NW) Paulo miima tookwɛmɔ nitsumɔ nɔ mi, shi jeee toigbalamɔ. No hewɔ lɛ, ebaahi jogbaŋŋ kɛha onukpai komɛi akɛ amɛaasusu sanebimɔ ni baa nɛɛ he: ‘Ani kulɛ wɔbaanyɛ wɔbaa be babaoo ni he hiaa ni wɔkɛtao kojomɔ saji amli, ni wɔkɛtsu he nii hu lɛ yi, kɛji wɔkɛ be kɛ mɔdɛŋbɔɔ babaoo wo nɔkwɛmɔ nitsumɔ lɛ moŋ mli?’

¹⁰ Eji anɔkwale, Paulo bɔ kɔkɔ yɛ “klaji fulɔi” ahe. Shi ani ekãaa mɛnɛɛmɛi ahiɛ waa akɛni ‘amɛhiɛɛɛ tooku lɛ kɛ mlitsɔlɛ’ lɛ hewɔ? (Bɔfoi lɛ Asaji 20:29) Ni eyɛ mli akɛ ewiemɔ nɛɛ tsɔɔ akɛ esa akɛ nɔkwɛlɔi anɔkwafoi lɛ ashwie nɛkɛ “klaji” nɛɛ moŋ, shi ani ewiemɔi lɛ etsɔɔɔ akɛ esa akɛ onukpai lɛ ahiɛ tooku lɛ mli bii ni eshwɛ lɛ “kɛ mlitsɔlɛ”? Kɛji tooi lɛ eko gbɔjɔ yɛ mumɔŋ ni ekpa Nyɔŋmɔ sɔɔmɔ lɛ, mɛni he hiaa nakai mɔ lɛ​—yii loo tsamɔ, toigbalamɔ loo kpalamɔ? (Yakobo 5:​14, 15) No hewɔ lɛ, esa akɛ onukpai lɛ ato be he gbɛjianɔ be fɛɛ be kɛha nɔkwɛmɔ nitsumɔ lɛ. Ni ekolɛ nɔ ni baajɛ mli aba lɛ baafee miishɛɛ, ni ji be fioo pɛ ni akɛaatsu kojomɔ saji ni heɔ be babaoo lɛ ahe nii, yɛ Kristofoi ni kɛ amɛhe ayawo eshafeemɔ mli lɛ agbɛfaŋ. Eka shi faŋŋ akɛ, nɔ ni esa akɛ onukpai lɛ asusu he klɛŋklɛŋ kwraa ji heyeli kɛ hejɔɔmɔ jɛɛhe ni amɛaaha mɛi ana, koni amɛtsɔ no nɔ amɛha toiŋjɔlɛ, kɛ kpoofeemɔ, kɛ shweshweeshwe shihilɛ aya hiɛ yɛ Yehowa webii ateŋ.​—Yesaia 32:​1, 2.

Ni Aaasɔmɔ Akɛ Tookwɛlɔi kɛ Kojolɔi Ejurɔfeelɔi

11. Mɛni hewɔ ehe hiaa ni onukpai ni sɔmɔɔ yɛ saneyeli ajinafoi akui amli lɛ afee mɛi ni kwɛɛɛ mɛi ahiɛaŋ ni agbɛnɛ hu amɛna “nilee ni jɛ ŋwɛi” lɛ?

¹¹ Kɛji atsuɔ nɔkwɛmɔ nitsumɔ lɛ jogbaŋŋ dani ebaa lɛ akɛ Kristofonyo ko kɔɔ gbɛ fɔŋ lɛ, no lɛ ekolɛ eeeha kojomɔ saji ni baa yɛ Yehowa webii ateŋ lɛ nɔ agbɔ kwraa. (Okɛto Galatabii 6:1 he.) Shi yɛ fɛɛ sɛɛ lɛ, yɛ adesai ahe eshai kɛ emuu ni amɛyeee hewɔ lɛ, ekolɛ ehe baahia yɛ be kɛ bei amli ni nɔkwɛlɔi Kristofoi atsu efɔŋfeemɔ saji ahe nii. Mɛɛ shishitoo mlai esa akɛ ekudɔ amɛ? Enɛɛmɛi tsakeko, kɛjɛ Mose loo mra be mli Kristofoi lɛ abeaŋ tɔŋŋ po kɛbaa. Wiemɔi ni Mose kɛ kojolɔi ni ahala yɛ Israel lɛ wie lɛ ka he eetsu nii lolo: “Nyɛboa nyɛnyɛmimɛi lɛ ateŋ saji atoi, ni nyɛkojoa mɔ kɛ enyɛmi. . . teŋ yɛ jalɛ naa. Ni nyɛkakwɛa hiɛaŋ yɛ kojomɔ mli.” (5 Mose 1:​16, 17) Mɛi ahiɛaŋ ni akwɛɛɛ lɛ ji “nilee ni jɛ ŋwɛi lɛ” sui lɛ eko, ni nakai nilee lɛ he miihia waa kɛha onukpai ni sɔmɔɔ yɛ saneyeli ajinafoi akui amli lɛ. (Yakobo 3:​17; Abɛi 24:23) Nilee ni tamɔ nɛkɛ baaye ebua amɛ ni amɛnyɛ amɛyoo sɔrɔtofeemɔ ni yɔɔ gbɔjɔmɔ kɛ efɔŋfeemɔ teŋ.

12. Ehe hiaa ni kojolɔi akafee jalɔi kɛkɛ, shi moŋ gbɔmɛi kpakpai hu yɛ mɛɛ shishinumɔ naa?

¹² Esa akɛ onukpai lɛ akojo “yɛ jalɛ naa,” yɛ tɛi ni Yehowa efolɔ eshwie shi yɛ jalɛ kɛ nɔ ni ejaaa he lɛ anaa. (Lala 19:10) Ni kɛlɛ, beni amɛbɔɔ mɔdɛŋ akɛ amɛaahi shi akɛ jalɔi lɛ, esa akɛ amɛbɔ mɔdɛŋ hu ni amɛfee gbɔmɛi kpakpai, yɛ shishinumɔ ni yɔɔ sɔrɔtofeemɔ ni Paulo ha eje kpo yɛ Romabii 5:​7, 8 lɛ sɛɛ lɛ naa. Beni ewieɔ nakai kukuji lɛ ahe yɛ emli saneyitso ni ji “Righteousness,” (‘Jalɛ’) shishi lɛ, Insight on the Scriptures wolo lɛ wie akɛ: “Nakai Hela wiemɔ ni akɛtsu nii lɛ tsɔɔ akɛ gbɔmɔ ni ale lɛ jogbaŋŋ kɛha, aloo esoro lɛ kwraa, yɛ ekpakpafeemɔ hewɔ Iɛ, ji mɔ ko ni mli hi (ni sumɔɔ nibii kpakpai loo nibii ni mɛi krokomɛi baana he sɛɛ feemɔ) kɛ ejurɔfeelɔ (mɔ ni jieɔ nakai ekpakpafeemɔ lɛ kpo be fɛɛ be). Jeee nɔ ni jalɛsaneyeli biɔ ni efee lɛ pɛ he esusuɔ, shi moŋ eyaa shɔŋŋ fe nakai, ni ehaa mɔ hesusumɔ kpakpa ni eyɔɔ kɛha mɛi krokomɛi kɛ suɔmɔ ni eyɔɔ akɛ ehe aba sɛɛnamɔ aha amɛ ni eye ebua amɛ lɛ kanyaa lɛ.” (Volume 2, baafa 809) Onukpai ni jeee ja kɛkɛ amɛja, shi moŋ amɛmli hi hu lɛ kɛ efɔŋfeelɔi baaye kɛ hedɔɔ kɛ mɔ hesusumɔ yɛ mlihilɛ mli. (Romabii 2:⁠4) Esa akɛ amɛsumɔ akɛ amɛaajie mɔbɔnalɛ kɛ musuŋtsɔlɛ kpo. Esa akɛ amɛfee nɔ ni amɛaanyɛ ni amɛkɛye amɛbua efɔŋfeelɔ lɛ koni ena akɛ ehe miihia ni etsake etsui, eyɛ mli akɛ ekolɛ, kɛjɛ shishijee mli lɛ etsuŋ amɛmɔdɛŋbɔɔ nɛɛ he nii.

Su Kpakpa yɛ Saneyeli Mli

13. (a) Kɛji onukpa ko miitsu nii akɛ kojolɔ lɛ, mɛni no etsɔɔɔ akɛ ejeee dɔŋŋ? (b) Mɛɛ ŋaawoo ko ni Paulo kɛha he hiaa yɛ kojomɔ saneyelii amli hu?

¹³ Kɛji shihilɛ ko biɔ ni atsu kojomɔ saneyeli he nii lɛ, esaaa ni nɔkwɛlɔi lɛ ahiɛ kpaa nɔ akɛ amɛ kã he amɛji tookwɛlɔi lolo, ni amɛkɛ Yehowa tooi lɛ miiye, yɛ “tookwɛlɔ kpakpa” lɛ shishi. (Yohane 10:11) Ŋaawoo ni Paulo kɛha akɛ aye abua tooi ni eyaje jaramɔ shihilɛ mli lɛ be fɛɛ be lɛ kɔɔ kojomɔ saneyeli hu he waa nakai nɔŋŋ. Eŋma akɛ: “Anyɛmimɛi, kɛji nɔtɔmɔ ko banina mɔ ko trukaa lɛ, nyɛ mɛi ni nyɛji mumɔŋ gbɔmɛi lɛ, nyɛsaa nakai mɔ lɛ ekoŋŋ yɛ mlijɔlɛ mumɔ mli, ni ole ohe nɔkwɛmɔ, koni bo hu akakao. Nyɛjatsui lɛ, nyɛkpeekpeea nyɛhe nyɛterea, ni nakai nyɛaaye Kristo mla lɛ nɔ.”​—Galatabii 6:​1, 2.b

14. Te esa akɛ nɔkwɛlɔi abu kojomɔ saneyeli amɛha tɛŋŋ, ni mɛɛ su esa akɛ amɛna yɛ mɔ ni etɔ̃ lɛ he.

¹⁴ Yɛ nɔ najiaŋ ni amɛaabu amɛhe akɛ kojolɔi ni nɔ kwɔlɔ ni ekpe koni amɛtsu toigbalamɔ he nii lɛ, esa akɛ onukpai ni sɔmɔɔ yɛ saneyeli ajinafoi akuu mli lɛ abu saneyeli lɛ akɛ amɛ tookwɛmɔ nitsumɔ lɛ fa kroko. Yehowa tooi lɛ ekome ebote sane mli. Mɛni amɛbaanyɛ amɛfee ni amɛkɛhere eyiwala? Ani ekpe sɛɛ tsɔ akɛ aaaye abua nɛkɛ too ni ekpalaŋŋ kɛjɛ tooku lɛ he nɛɛ? Wɔhiɛ ka nɔ akɛ ebaŋ lɛ nakai. Esa akɛ onukpai lɛ ana jwɛŋmɔ kpakpa yɛ mɔbɔnalɛ ni amɛaajie kpo amɛtsɔɔ lɛ he, kɛji nakai feemɔ baafee nɔ ni sa. Enɛ etsɔɔɔ akɛ esa akɛ amɛgbɔjɔ tɛi ni Yehowa efolɔ eshwie shi lɛ amli, kɛji afee esha ko ni hiɛdɔɔ yɔɔ he. Shi kɛji amɛhiɛ hi shihilɛi komɛi ni baaha amɛkafee keketee tsɔ lɛ anɔ lɛ, ebaanyɛ eye ebua amɛ ni amɛjie mɔbɔnalɛ kpo kɛ ehe miihia. (Lala 103:​8-10; 130:⁠3) Shi dɔlɛ sane ji akɛ, efɔŋfeelɔi lɛ ekomɛi jieɔ tsuiwalɛ su kpo aahu akɛ enyɛɔ onukpai lɛ anɔ ni amɛfee shiŋŋ, eyɛ mli akɛ jeee kɛ keketee-feemɔ moŋ.​—1 Korintobii 5:⁠13.

Yiŋtoo ni Yɔɔ Kojomɔ Saneyeli Sɛɛ

15. Kɛji naagba ko ni hiɛdɔɔ yɔɔ mli ba aŋkroaŋkroi ateŋ lɛ, mɛni esa akɛ atao mli ni ale klɛŋklɛŋ?

¹⁵ Kɛji naagba ko ni hiɛdɔɔ yɔɔ he te shi yɛ aŋkroaŋkroi ateŋ lɛ, onukpai ni yɔɔ nilee lɛ baakwɛ akɛ klɛŋklɛŋ lɛ, ani mɛi ni sane lɛ yɔɔ amɛteŋ lɛ eka akɛ amɛ pɛ amɛbaasa sane lɛ lo, yɛ mumɔ ni yɔɔ Mateo 5:​23, 24 loo Mateo 18:15 lɛ naa. Kɛji enɛ yeee omanye lɛ, ekolɛ ŋaa ni onukpa kome loo mɛi enyɔ baawo amɛ lɛ kɛkɛ fa. He ni kojomɔ saneyeli he hiaa yɛ pɛ ji kɛji afee esha ni hiɛdɔɔ yɔɔ he, ni baanyɛ ekɛ nakai mɔ lɛ shwiemɔ aba. (Mateo 18:​17; 1 Korintobii 5:11) Esa akɛ ana Ŋmalɛ naa nɔdaamɔ nɔ ni mli wa waa dani ato saneyeli ajinafoi akuu. (Kwɛmɔ Buu-Mɔɔ, September 15, 1989, baafa 9) Kɛ aato eko nakai lɛ, esa akɛ ahala onukpai ni he esa fe fɛɛ kɛha nakai sane pɔtɛɛ lɛ.

16. Mɛni onukpai lɛ bɔɔ mɔdɛŋ akɛ amɛaatsɔ kojomɔ saneyeli lɛ nɔ amɛfee?

¹⁶ Mɛni onukpai lɛ bɔɔ mɔdɛŋ akɛ amɛaatsɔ kojomɔ saneyeli lɛ nɔ amɛtsu? Klɛŋklɛŋ lɛ, anyɛŋ akojo yɛ jalɛ naa kɔkɔɔkɔ, ja ana ale anɔkwale lɛ da. Taakɛ afee yɛ Israel lɛ, esa akɛ ‘atao hiɛdɔɔ saji fɛɛ amli fitsofitso.’ (5 Mose 13:​14; 17:⁠4) No hewɔ lɛ yiŋtoi ahewɔ ni ayeɔ sane ko lɛ ekome ji ni akɛtao anɔkwale ni yɔɔ sane lɛ mli. Shi abaanyɛ, ni esa hu akɛ afee yɛ suɔmɔ mli. (1 Korintobii 13:​4, 6, 7) Kɛji ana ale anɔkwale lɛ, onukpai lɛ baafee nɔ fɛɛ nɔ ni he hiaa bɔni afee ni amɛkɛbu asafo lɛ he, koni amɛha tɛi ni nɔ kwɔlɔ ni Yehowa efolɔ eshwie shi lɛ ahi mli, ni emumɔ lɛ ahi asafo lɛ mli daa. (1 Korintobii 5:​7, 8) Shi kɛlɛ, yiŋtoi ni yɔɔ saneyeli lɛ sɛɛ ekome hu ji ni, kɛji ebaahi feemɔ lɛ, ahere eshafeelɔ ni ebote oshara mli lɛ yiwala.​—Okɛto Luka 15:​8-10 he.

17. (a) Te esa akɛ akɛ mɔ ni afolɔ enaa lɛ aye yɛ saneyeli lɛ mli aha tɛŋŋ, ni yɛ mɛɛ yiŋtoo hewɔ? (b) Mɛni enɛ baabi yɛ saneyeli ajinafoi akuu lɛ mlibii lɛ agbɛfaŋ?

¹⁷ Esaaa akɛ akɛ mɔ ni afolɔ enaa lɛ yeɔ yɛ gbɛ kroko nɔ kɔkɔɔkɔ, fe akɛ eji Nyɔŋmɔ too. Esa akɛ akɛ mɔ lɛ aye yɛ musuŋtsɔlɛ mli. Kɛji afee esha ko (loo eshai komɛi) lɛ, kojolɔi jalɔi lɛ ayiŋtoo ji ni amɛye amɛbua eshafeelɔ lɛ ni amɛtsake lɛ ekoŋŋ, ni enu tɔmɔ ni yɔɔ gbɛ ni ekɔ lɛ he lɛ shishi, ni etsake etsui, koni atsɔ nakai feemɔ nɔ ajie lɛ kɛjɛ “Abonsam tsɔne lɛ mli.” Ehe baahia ni ana ‘nitsɔɔmɔ he ŋaa,’ ni ‘akɛ mlijɔlɛ awie atsɔɔ’ mɔ lɛ. (2 Timoteo 2:​24-26; 4:⁠2) Shi kɛji nakai feemɔ ha eshafeelɔ lɛ yoo akɛ efee esha, ni sane lɛ edɔlɛ waa kɛtee etsui mli lɛlɛŋ, ni ebi ni Yehowa kɛ esha lɛ ake lɛ hu? (Okɛto Bɔfoi lɛ Asaji 2:37 he.) Kɛji ajinafoi lɛ na nɔmimaa akɛ ekɛ anɔkwayeli miitao yelikɛbuamɔ lɛ, no lɛ, yɛ be babaoo mli lɛ ehe ehiaaa ni ashwie lɛ.​—Kwɛmɔ The Watchtower, January 1, 1983, baafa 31, kuku 1.

18. (a) Mɛɛ be mli esa akɛ saneyeli ajinafoi akuu ko afee shiŋŋ yɛ efɔŋfeelɔ ko shwiemɔ mli? (b) Mɛɛ shihilɛ ni ji tsuiŋdɔlɛ sane ko hewɔ ni esa akɛ onukpai lɛ amia amɛhiɛ waa yɛ tooi ni kpalaŋɔ kɛyaa lɛ ahewɔ lɛ?

¹⁸ Shi yɛ gbɛ kroko nɔ lɛ, kɛji saneyeli ajinafoi akuu lɛ mlibii lɛ kɛ shihilɛ ni mli ka shi faŋŋ ni tsɔɔ hemɔkɛyeli kwamɔ ni dɔlɛ loo he-shwamɔ ko bɛ mli, loo suɔmɔ mli ni ajɛ atse Yehowa mlai ahiɛ atua, loo efɔŋ ni aje gbɛ afee kpe lɛ, no lɛ nitsumɔ ni ka amɛnɔ ji ni amɛbu asafo lɛ mlibii krokomɛi ni eshwɛ lɛ ahe kɛtsɔ shwiemɔ ni amɛaashwie nɛkɛ nɔtɔlɔ ni tsakeee etsui nɛɛ nɔ. Sɔ̃ ko kaaa saneyeli ajinafoi akuu lɛ nɔ akɛ amɛkɛ efɔŋfeelɔ lɛ akpe kpitiokpitio, aloo amɛkɛ wiemɔi awo enaa, ni amɛkɛbɔ mɔdɛŋ ni amɛnyɛ enɔ ni etsake etsui, kɛji eyɛ faŋŋ akɛ ebɛ Nyɔŋmɔ gbeyeishemɔ ni baaha nɔ ni efee lɛ adɔ lɛ lɛ.c Yɛ nyɛsɛɛ afii nɛɛ amli lɛ, mɛi ni ashwieɔ kɛjɛɔ asafo lɛ mli yɛ je lɛŋ fɛɛ lɛ ayifalɛ miihe ashɛ shiɛlɔi fɛɛ amlijaa oha mli 1. No tsɔɔ akɛ, tooi oha fɛɛ oha ni hiɔ tooi akuu lɛ mli lɛ ateŋ too kome laajeɔ​—kɛ hooo lɛ, yɛ be kuku mli. Kɛji wɔsusu be kɛ mɔdɛŋbɔɔ ni he hiaa dani anyɛɔ akɛ mɔ kome bafataa tooi akuu lɛ he lɛ he lɛ, ani ejeee tsuiŋdɔlɛ sane akɛ aaale akɛ akɛ akpei nyɔŋmai abɔ ‘kuɔ sɛɛ haa Satan’ ekoŋŋ daa afi?​—1 Korintobii 5:⁠5.

19. Mɛni esaaa akɛ onukpai ni sɔmɔɔ yɛ saneyeli ajinafoi akuu mli lɛ ahiɛ kpaa nɔ kɔkɔɔkɔ, no hewɔ lɛ mɛni baafee oti ni ma amɛhiɛ?

¹⁹ Esa akɛ onukpa ni jeɔ kojomɔ saneyeli shishi lɛ akai akɛ eshafeemɔ saji ni baa yɛ asafo lɛ mli lɛ mli babaoo kɔɔ gbɔjɔmɔ he, shi jeee yiwalɛ. Esaaa ni amɛhiɛ kpaa Yesu abɛbua ni kɔɔ too kome ni laaje lɛ he lɛ nɔ kɔkɔɔkɔ, nɔ ni ekɛ nɛkɛ wiemɔi nɛɛ mu naa lɛ: “Miikɛɛ nyɛ akɛ, nakai nɔŋŋ miishɛɛ aaaba ŋwɛi, yɛ eshafeelɔ kome ni tsakeɔ etsui lɛ hewɔ, fe jalɔi nyɔŋmai nɛɛhu kɛ nɛɛhu ni tsuitsakemɔ ehiaaa amɛ lɛ.” (Luka 15:⁠7) Lɛlɛŋ, “Nuŋtsɔ [Yehowa]. . . sumɔɔɔ akɛ mɛikomɛi alaaje, shi moŋ akɛ mɛi fɛɛ atsake amɛtsui.” (2 Petro 3:⁠9) Eba akɛ saneyeli ajinafoi akui ni yɔɔ je lɛŋ fɛɛ lɛ baatsɔ Yehowa yelikɛbuamɔ nɔ amɛfee bɔ fɛɛ bɔ ni amɛaanyɛ, koni amɛha ana miishɛɛ yɛ ŋwɛi kɛtsɔ efɔŋfeelɔi ni amɛaaye amɛbua koni amɛna bɔ ni ehe hiaa ni amɛtsake amɛtsui, ni amɛku sɛɛ amɛkɛ amɛnaji amamɔ gbɛ fintɔŋŋ ni kɛ mɔ yaa naanɔ wala mli lɛ nɔ ekoŋŋ lɛ nɔ.​—Mateo 7:​13, 14.

[Shishigbɛ niŋmai]

Sanebimɔi ni Akɛtiɔ Mli

◻ Mɛni esa akɛ efee onukpai lɛ ayiŋtoo titri ni fe fɛɛ, yɛ Tookwɛlɔ kpeteŋkpele lɛ kɛ Tookwɛlɔ Kpakpa lɛ anɔkwɛmɔ nɔ lɛ sɛɛnyiɛmɔ mli?

◻ Onukpai Iɛ baanyɛ abɔ mɔdɛŋ ni amɛha kojomɔ saji ni ayeɔ lɛ anɔ agbɔ yɛ mɛɛ gbɛ nɔ?

◻ Ehe hiaa ni kojolɔi akafee jalɔi kɛkɛ, shi moŋ mɛi kpakpai hu yɛ mɛɛ shishinumɔ naa?

◻ Te esa akɛ akɛ nɔtɔlɔ lɛ aye aha tɛŋŋ beni ayeɔ sane lɛ, ni yɛ mɛɛ yiŋtoo hewɔ?

◻ Mɛni hewɔ shwiemɔ ji naagbee nifeemɔ kwraa kɛji nɔ ko kwraa bɛ ni abaanyɛ afee dɔŋŋ lɛ?

(b) Mɛni esa akɛ onukpai akase kɛjɛ Mateo 18:​18-20.

[Mfoniri ni yɔɔ baafa 16]

Kɛji atsu tookwɛmɔ nitsumɔ lɛ jogbaŋŋ kɛtsɔ hiɛ lɛ, enyɛɔ etsiɔ kojomɔ saji ni baanyɛ aba lɛ babaoo naa

[Mfoniri ni yɔɔ baafa 18]

Kɛji aaye kojomɔ sane ko po lɛ, esa akɛ onukpai lɛ abɔ mɔdɛŋ ni amɛjaje efɔŋfeelɔ lɛ ekoŋŋ yɛ mlijɔlɛ mli